Archive for category: Жаңалықтар

2023 жылдың 9 мамырында Тараз қаласының Ж.Үшкемпіров атындағы «Тараз Арена» спорт сарайында басталған «Ордабасы» ұлттық командалық ойынының Ұлы Отан соғысының Жеңіс күніне арналған халықаралық турнирінің бірінші күні өтті.
Ұйымдастырушы – «Ордабасы» Қазақстан командалық ойын федерациясы « РҚБ.
Жекпе-жек сайыскерлерінің әдіс-тәсілдерін тамашалауға, арнайы kick-sparring-тен өнерлерін көруге, сондай-ақ, «Ордабасы» ұлттық командалық ойындары бойынша кәсіби шеберліктерін бөлісуге ойластырылған спорттық іс-шара 2 күнге созылмақ.
Файтерлерге арналған жарыстың бірінші күні олардың ережелер мен шарттарды дұрыс қолдануы, яғни, спорттық формаларды көрсетуінен басталды. Ерекше атап өткен жөн, сайыскерлердің дайындық деңгейі мен шеберлігі де осы формаларды көрсетуінен-ақ бірден байқалды.
Мәселен, жекпе-жек кезінде ырғақты ұстай білу, өзін-өзі баппен меңгерудегі ой жүйріктігі, дене қозғалыстарының табиғилығы, мұның бәрі жоғары деңгейде көрсетілді.
Бұдан соң «Ордабасы» ұлттық командалық ойыны басталды. Бұл күні сайысқа жасөспірімдер қатысты. Атаулы ойынның иесі, ойлап тапқан авторы ҚР Спортына еңбегі сіңген спорт қайраткері, ҚХА мүшесі, аталған федерация президенті Руслан Бакирович Исмазов екенін еске сала кетейік.
Бүгін, халықаралық шара болғандықтан ба, залдағы көрермендер мен жанкүйерлердің, бапкерлердің бұрын-соңды болмаған қызықты да көңілді , нағыз жанкүйерлік түрлі эмоцияларының куәсі болдық. Жекпе-жек тіпті қызған кезде ойыншылар сонда да ережелерді барынша бұзбауға тырысты. Олар өз ойын аумағын қатты қорғаштап, ептілікпен ұстап қана тұрмай бір жағы қарсыластың “туын” басып алуға талпынып, сөзсіз жеңіске жетуге тырысып-ақ бақты.
Ойынның бабына әбден жаттығып епті болып алған
қарсыластар бір-бірлерімен қызу жекпе-жек үстінде де ойын ережесінен асып кетпей, үлгілі тактика мен қарсыласқа деген құрметін сақтауға тырысады. Ойынның қызығы да осы тұста.
Турнирдің ашылу салтанатында облыс әкімінің орынбасары Еркін Құлымбайұлы Үйсімбаев жиынға шақырылған қариялар – соғыс ардагерлерін атаулы мейраммен құттықтап, оларға зор ілтипат, жылы лебізін білдірді. Сонымен бірге, “Қоғамдық келісім”КММ басшысы Жинақбаева Мүбәрак Қасымқызы да жиналған жұртшылық пен қарт жауынгерлерге сөз сөйлеп, ізгі тілегін жеткізді.
Ұлттық ойын турнирдің алғашқы күні бойынша өз мәресіне жеткен соң, ойынға белсенді қатысқан өскелең ұрпақ қатары бағалы сыйлықтармен марапатталды.
Ақпараттық жұмыс және қоғаммен байланыс бөлімі

«Біз – қайырымды жастармыз» деген қағиданы ұстанатын жамбылдық ассамблея мейірімді жастары қаламыздағы әлеуметтік маңызы бар жұмыстарды жыл сайын белсенді атқарып келеді.

Бұған дәлел, 2023 жылдың 5 мамырында Тараз қаласында Жамбыл облысының ҚХА “Ассамблея жастары” РҚБ мүшелері Жеңіс күні мейрамы қарсаңында “Отан үшін от кешкендер” қайырымдылық акциясын ұйымдастырып, ҰОС ардагерлеріне құрмет көрсетті.

Атап айтқанда үш ардагердің үйіне барып, оларға арнайы сыйлықтар табыстап, ізгі тілектерін айтып, қарияларға шаттық сыйлай білген елгезек жастарымыз әр ардагердің сұрапыл соғыстағы жорығы, бастан өткерген естеліктері туралы да азды-көпті хабардар боп қайтты.

ҚХА жастарынан шын жүректен құттықтаулар мен табыстаулар қабылдаған қарт ардагерлердің бірі 100 жастағы Шалданбай Шаңбаев атамыз еді. Бұл кісі 1942 жылдың тамызында майданға аттанып, ішкі істер күштерінің 227-ші полкінде тіркеліп соғысқа шыққан екен.

Ал, Долганов Виктор Васильевич болса, 1945 жылдың 1 қаңтарында майданға шақырылып, II дәрежелі Отан соғысы”, “Маршал Жуков”, “Германияны жеңгені үшін” ордендерімен марапатталған. Сонымен бірге, Ұлы Отан соғысы майданында радиодивизионның барлаушысы болған Иван Федорович Макеев те барлау жұмыстары кезіндегі өзінің, жауынгерлердің ерлігін баяндау арқылы жастардың өзіне деген ерекше назарын аудартты. Бұған қоса ол Харбин, Мукден, Чан-Чюнь қалаларын азат ету шайқастарына да қатысып, соңғы соғыс жортуылын сол Чан-Чюнь қаласында аяқтағандығын атап өтті.

“Қоғамдық келісім”КММ “Ақпараттық жұмыс және қоғамдық байланыс” бөлімі

Ағымдағы жылдың мамыр айында Жамбыл облысы ТЖД Өрт сөндіру және авариялық-құтқару жұмыстары қызметінің Тараз қаласының №1 мамандандырылған өрт сөндіру бөлімінің аумағында салтанатты іс-шара өтті.

Іс-шара басталмастан бұрын Өрт сөндіру қызметінің жеке құрамы қызметін атқару барысында қайтыс болған өрт сөндірушілер мен құтқарушыларды бір минут үнсіздікпен еске алып, батырлар ескерткішіне гүл шоқтарын қойды.

Бұдан соң өрт сөндіру қызметінің бастығы, азаматтық қорғау полковнигі Әлібек Әділбекұлы Әбсатов ұжымды 7 мамыр Отан қорғаушылар күні және 9 мамыр Ұлы Жеңіс күні мейрамдарымен құттықтап, отбастарына амандық, жұмыста табыс және зор денсаулық тіледі.

Сонымен бірге, №2 мамандандырылған өрт сөндіру бөліміне Халық қаһарманы-Мейіржан Аймановтың есімі берілгені туралы бұйрықтың шыққанын атап өтті.

Салтанатты шара барысында жұмысқа жаңадан жұмылдырылған жас мамандар Отан алдындағы анттарын қабылдап, бірқатар қызметкерлер арнайы ведомстволық наградалармен және Жамбыл облысы әкімдігінің алғыс хаттарымен марапатталды.

Іс-шараға қатысушылар қатарында Шешен этносының өкілі Дадаев Ахмад Хасанұлы мен Нығметов Жеңіс Әжғалиұлы бастаған азаматтық қорғау органдарының ардагерлері шақырылды.

Олар бірінші кезекте шараға арнайы шақырылғандары үшін ұйымдастырушыларға алғыстарын білдіріп, өрт сөндірушілердің жұмысы әлемдегі ең маңызды және қажетті екенін айрықша атап өтті. Сонымен қатар, әскерге алынған жас өрт сөндірушілерді құттықтап, қызметте барлығына сәттілік тіледі.

Мерекелік жиын соңында өрт сөндіру қызметі бастығының орынбасары, азаматтық қорғау полковнигі, облыстық Өзбек этномәдени бірлестігінің өкілі – Шайкрамов Мансур Закирович барлық өрт сөндірушілер мен құтқарушыларды атаулы мерекелерімен құттықтап, қызметтік міндеттерін атқару кезінде қаза тапқан өрт сөндірушілерді еске алудың маңыздылығын атап өтті.

Іс-шара естелік фотосессиямен аяқталды.

”Ақпараттық жұмыс және қоғаммен байланыс” бөлімі

Әсем қаламыздың “Жеңіс” саябағына жылда 9-мамырда өңір тұрғындары таңертеңнен келіп, бір-бірін қасиетті Жеңіс күні мерекесімен құттықтауға, сонымен бірге, арамызда аман-есен бірге жүрген Ардагер Аталар мен Әжелерге ізет, құрмет көрсетуге және соғыстан үйлеріне оралмаған майдангерлерді еске алуға жиналады.

Бүгін, Кеңес Одағының батыры, қолбасшы, Қазақ елінің мақтанышы, аты аңызға айналған Бауыржан Момышұлының мемориалына жылдағыдай гүл шоқтарын қою салтанатты рәсімі мен еске алу шарасы өткізілді.

Гүл қою рәсімі Жамбыл облысының әкімі, өңірлік ҚХА төрағасы Нұржан Нұржігітовтың, және ҰОС ардагерлері, “Оңтүстік” өңірлік қолбасшылығының әскери қызметшілері, Ішкі саясат басқармасы және “Қоғамдық келісім” КММ басшылығы мен қызметкерлерінің қатысуымен өтті.

Ұлы Отан соғысының батырларын еске алуға келгендердің қатарында ҚХА мүшелері, біздің өңірдің этномәдени бірлестіктерінің басшылары мен өкілдері де болды. Осы тұста ерекше атап өтсек, облысымыздың ҚХА мүшелері мен этномәдени бірлестік өкілдері 7-9 мамыр —Отан қорғаушылар және Жеңіс күні әскери мейрамдарын мерекелеуге жылдағыдай бар ықыластарымен белсене қатысты.

Күні бүгінге дейін сызаты кетпеген сұм соғыс құрбандарын еске алуға “Жеңіс” саябағына жиналған жұртшылықтың молдығы сонша, бірнеше қатардан бағандар құрап, қаз-қатар тізіліп тұрды. Бейбіт өмірдің қадірін білер әр адам батыр атамыз бен жамбылдық жауынгерлерді еске алып, бір минуттық үнсіздікпен рухтарына тағзым етті.

Бұдан соң, әскери үрмелі аспаптар оркестрінің орындауындағы бірінен соң бірі бүкіл саябаққа қалықтаған ескі әскери әндер мен соғыс жылдарындағы музыкалық әуендер арада бір ғасырға жуық уақыт өтсе де, сол сұрапыл соғыс аяқталғаннан кейін бүкіл Кеңес елінің Жеңіс күнін қалай қуанып қарсы алып жатқанынан көрініс беріп тұрғандай болды.

Кемеңгер тұлға соғыста ғана ерлік көрсетіп қоймай, туған халқының ұлттық құндылықтары – салт-дәстүрі мен әдет-ғұрпын, тілін, дінін, ділін, тарихын “қиын-қыстау “ кезеңдерде жанұшыра, қызғыштай қорыған арыстарымыздың бірі еді.

Ерлігі мен елдігін болашақ ұрпағына аманат етіп кеткен Бауыржан атамыздың

“мәңгі от- алауы” орналасқан ескерткішіне Жамбыл жұртшылығының атынан құрметпен гүл шоқтары қойылды. Саябақ іші Жеңіс күні мерекесіне арналған берекелі іс-шаралармен жалғасып жатты. Ер есімі – мәңгі ел есінде қала бермек.

Ақпараттық жұмыс және қоғаммен байланыс бөлімі

2023 жылғы 5 мамырда «Мехри-Бану»  мейрамханасында Тараз қаласының Өзбек орталығының мүшесі Рахматхан Нәжімедденов өзінің 70 жылдық мерейтойына орай жұртшылыққа құдайтамақ – қайырымдылық түскі ас берді.

Айта кетейік, Р. Нәжімедденов 1953 жылы 5 мамырда дүниеге келген. Ол Жамбыл облысы мен Алматы қаласында Өзбек орталықтарын құрудың бастамашыларының бірі болды, облыс меценаты. Барлық мұқтаж жандарға, мүмкіндіктері шектеулі адамдарға, халықтың әлеуметтік маңызы бар топтары өкілдеріне үнемі көмек көрсетеді. Ардагерлер кеңесіне де көмегін аяған емес.

Осындай қайырлы іс-шараға Тараз қалалық Өзбек орталығының төрағасы Абдырахман Зайнутдинов, Жамбыл облысы әкімдігінің ІІБ «Қоғамдық келісім» КММ басшысы Мүбарак Жинақбаева, Тараз қаласы Ардагерлер кеңесінің төрағасы Күләш Әбдікешова және т. б. мерейлі жасқа жеткен өзбек қариясы Рахматхан аканы арнаулы сыйлықтарымен құттықтап барды.

«Қоғамдық келісім» мекемесінің атынан Мүбәрак Қасымқызы сыйлық ретінде қазақтың жоралғысымен үстіне шапан жауып, Алғыс хат табыс етсе, Тараз қаласының Өзбек орталығынан да Алғыс хат беріліп, портрет табысталды. Сонымен қатар, Тараз ардагерлер кеңесінің төрайымы Күләш Әбдікешова «Құрметті ардагер»  төсбелгісін кеудесіне тақты.

Барлығы да мерейтой иесіне зор денсаулық пен ұзақ ғұмыр тіледі.

«Қоғамдық келісім» КММ «Ақпараттық жұмыс және қоғаммен байланыс» бөлімі