Archive for month: September, 2021

Үстіміздегі жылдың  28 қыркүйегінде Ел Тәуелсіздігінің 30 жылдығы мерекесі қарсаңында Жамбыл облысы әкімдігінің ішкі саясат басқармасының «Қоғамдық келісім» коммуналдық  мемлекеттік мекемесінде, аталмыш мекеменің ұйымдастыруымен облыстық  ҚХА «Жаңғыру жолы» республикалық жастар  қозғалысының өңірлік штабы мен жастар басқармасы  және  жастары ұйымдарымен  бірлік пен келісімді дамыту мақсатында өзара ынтымақтастық туралы МЕМОРАНДУМҒА қол қойылды.

Іс-шараның мақсаты – қоғамдық келісім мен бірлікті нығайтуға бағытталған  жұмыстарды бірлесе іске асыру және жастардың ынтымақтастығын дамыту, нығайту.

Көптарапты меморандумға Жамбыл облысы әкімдігінің жастар саясаты мәселелері басқармасы, «Nur Otan» партиясы Жамбыл облыстық филиалы жанындағы  «Jas Otan»  ЖҚ, Жамбыл облысы «Жас ұлан» республикалық балалар-жасөспірімдер ұйымы қоғамдық бірлестігі басшылары, Жамбыл облыстық ҚХА «Жаңғыру Жолы»  жастар қозғалысы  өңірлік штабының және аймақтық ассмаблея жастары, еріктілері, колледж, орта оқу орындары білімгерлері, облыстық БАҚ өкілдері атсалысты. Сонымен бірге, аталмыш шараға тараптардан  – М.Х. Дулати атындағы  Тараз өңірлік университетінің проректоры, экономика      ғылымдарының  докторы –  Ержан Әмірбекұлы, Жамбыл облысы әкімдігінің жастар саясаты мәселелері басқармасының басшысы  – Берікқожа Серікбол Қайратұлы, Нұр Отан партиясы Жамбыл облыстық филиалы жанындағы Жас Отан ЖҚ-ның төрағасы – Уәли Болатбек Уәлиұлы,  Жамбыл облысы «Жас ұлан» республикалық балалар-жасөспірімдер  ұйымы қоғамдық бірлестігінің төрайымы – Алебаева Айжан Ортайқызы, сондай-ақ, облыс әкімдігінің ішкі саясат басқарамасының  «Қоғамдық келісім» КММ  басшысы – Мамедова Парида Иманжановна қатысты.

Парида Иманжанқызы өз кезегінде: – Жамбыл өңірі жастарының өзара ынтымақтастығының бірлескен тиімді жұмысын қамтамасыз ету және этносаралық қатынастар арасындағы байланысты орнату ниетіндегі    бірнеше тараптық ынтымақтастық меморандумы  сіздер мен біздер үшін  үлкен бастама. Өңіріміздегі бірлік пен татулықты, қоғамдық пен келісімді нығайтуға бағытталған түрлі іс-шараларды бірлесе атқарайық, – деп,  көпжақты байланысты нығайтып, идеяларды молайтып, бірлесе жұмыс жасауға дайын  екендігін назарға салса, ал, қол қоюшы тараптар да алдағы жоспарланған игілікті шаралар өз нәтижесін беретіндігіне: – Бұл ынтымақтастықтың аясында түрлі шараларды өткізіп, өзіміздің жинаған тәжірибелерімізді алмасып тұрамыз. Біз бірлескен зерттеу, талдау, ғылыми жұмыстарды жүргізе аламыз!- деп сенім білдірді.

Жамбыл облысы әкімдігінің ІСБ

«Қоғамдық келісім» КММ

Баспасөз қызметі орталығының

 баспасөз хатшысы Бибігүл Шахзада

Ұлтаралық татулық пен келісімді сақтау және нығайту бағыты мемлекеттік саясаттың негізгі басымдықтарының бірі болып қала береді. Тәуелсіздіктің алғашқы жылдарынан бастап қоғамда бейбітшілік пен келісімді сақтау мәселелеріне ерекше көңіл бөлінді. Біздің еліміз үшін әр түрлі тарихи оқиғаларға байланысты қалыптасқан халықтың бұл этникалық құрамын ескере отырып, бірнеше ондаған түрлі діндерді ұстанатын жас республиканың аумағында 140-тан астам ұлт өкілдерінің бейбітшілігі мен  тұрақтылығын сақтап отыру объективті қажеттілік болды. Осыған қатысты үстіміздегі жылдың 23 қыркүйегінде  Қазақстан Республикасы тәуелсіздігіне 30 жыл толуына орай, Тараз қаласындағы №30-мектеп-гимназиясының 4 «Е» сынып оқушылары «Бейбітшілік пен тұрақтылық – тәуелсіздігіміздің  негізі» тақырыбында Достық үйіне  танымдық саяхат жасады.

Экскурсияның мақсаты – болашақ жас ұрпақтың өз еліне деген мақтанышы арқылы қазақстандық патриотизмге, белсенді өмірлік ұстанымына тәрбиелеу, оқушылардың бірлік, ынтымақтастық туралы түсініктерін кеңейтіп, оларды  ортақ Отанымызда тұратын түрлі ұлттарға құрмет көрсетуге, қоғамда достық қарым-қатынас пен келісімді сақтауға баулу.

Осыған сәйкес алыстан мен мұндалап тұратын достық пен бірліктің символы – «Достық үйі» мен татулық пен тыныштықтың нышаны – бірегей «Ассамблея» тақырыбына терең қызығушылық танытқан №30-мектеп-гимназиясының жеткіншектері күмбезді ғимаратқа зор қуанышпен қадам жасады. Оларды Жамбыл облысы әкімдігінің ішкі саясат бөлімінің «Қоғамдық келісім» КММ, әрі Достық үйінің басшысы Парида Мамедованың өзі және көрме залының меңгерушісі Вера Майкович, сондай-ақ, Баспасөз қызметінің баспасөз хатшысы Бибігүл Шахзада қарсы алды. Кішкентай қонақтарды Достық үйінің үшінші қабатында орналасқан дөңгелек үстелге жайғастыру барысында Парида Иманжанқызы осы жердегі әрбір орындықтың өзіндік тарихы бар екенін атап өтті: -«Сендер отырған осы орындықтарда Елбасымыз — Нұрсұлтан Назарбаев, дипломат, елші — Мұрат Әуезов т.б. елімізге танымал көптеген ірі тұлғалар отырған. Сендердің де сол ағаларымыз секілді мықты қайраткерлер, өз елінің жанашыр азаматтары болуларыңа зор тілектеспін. Сендер соған сай сабақтарыңды жақсы оқып, еліміздің көркем мінезді дұрыс азаматтары боп өсіңдер!» –ыстық ықыласын білдіре келе, аталмыш мектеп-гимназиясына облыстық ассамблея жөніндегі жаңа шығарылым мен балаларға түрлі ұлттардың тілінде жазылған ертегілер жинағын сыйға тартты. Осыған қоса, Президентіміз Қасым-Жомарт Тоқаев пен Елбасымыздың әділетті саясаты мен жобалары арқылы Қазақстанның  ірі жетістіктерге жеткендігіне де біраз шолу жасалды.

Бұдан соң, Вера Андреевна жас жеткіншектерге қоғамдық келісім қызметінің қыр-сыры мен облысымызда тұратын түрлі этнос өкілдері туралы айтып берді, оқушыларды олардың салт-дәстүрлерімен, әдет-ғұрпымен таныстырды.   Сонымен қатар, оқушылар үшін  Қазақстан Республикасы рәміздері мен ел тәуелсіздігі жөнінде  танымдық сағат ұйымдастырылып, оқушылар ҚР тәуелсіздігінің 30-жылдығы мерекесі қарсаңында Қадыр Мырзалиев, Олжас Сүлейменов, Мұқағали Мақатаев сынды танымал ақын-жазушылардың өлеңдерін  патриоттық сезіммен мәнерлеп оқып шықты.

Сондай-ақ, В.Майкович оқушыларды көрме залымен, ондағы әр этностың ұлттық құндылықтарымен, этномәдени бірлестіктердің кеңселері, олардың қызметімен таныстырды. Осыған байланысты қонақтар Достық үйінде орналасқан Махмұд Қашқари атындағы облыстық Ұйғыр этномәдени орталығында болды. Оларға ұйғыр халқының ұлттық киімдері мен аспаптары, жетістіктері мен марапаттары таныстырылды. Сонымен қатар, «Жаңғыру жолы» жастар қозғалысының төрайымы – Хамида Тұрдыева облыстық ассамблеяның жастар қанатының іс-қимылдары жөнінен де шараға қатысушыларды хабардар етті. Бұған қоса, мектеп оқушыларына елімізге еңбек сіңірген этномәдени бірлестіктер өкілдерінің облыстық ассамблеяның арнайы Құрмет тақтасына орналастырылған фотосуреттері көрсетіліп, айналысатын жұмыстары туралы мағлұмат берілді.

Бұдан соң баспасөз хатшысы Б.Шахзаданың ұйымдастыруымен ассамблея дегеніміз не, оның атқаратын міндеті қандай, ассамблеяға кімдер мүше бола алады, этнос, депортация, этномәдени бірлестік дегеніміз не деген сауалдар төңірегінде оқушылар арасында өз деңгейлеріне қарай кішігірім викторина өткізілді. Онда әртүрлі этникалық топтардың  арасындағы татулық, достық қарым-қатынас мәселелері қозғалып, олардың басты идеясы – адамдарды терісінің түсі немесе көзінің қиығы бойынша нәсілге, ұлтқа  бөлудің дұрыс еместігі сөз болды. Тағдырдың жазуымен қазақ жеріне келген адамдар туралы әңгімелерге үлкен қызығушылық танытқан олар Қазақстан этностарының дәстүрлері мен мәдениеті туралы білімдерімен де бөлісті. Балалар ассамблея жөнінде осы күнгі алған мәліметтері негізінде пысықтау ретінде қойылған әрбір сұраққа зор ынтамен жауап беріп, пікір алмасты. Іс-шара барысында ең белсенді оқушыларға Достық үйінің атынан кішігірім сыйлықтар табыс етілді. Викторинаның барлық қатысушыларына естелікке ҚХА логотипі бар төс белгішелер таратылды.

– «Бүгінде Қазақстандағы 140 этностың өкілдері бейбітшілік пен келісімде өмір сүруде. Мұның бәрі тәуелсіз елдегі барлық ұлттардың мүдделерін қолдай отырып, бірегей бірлестік – Қазақстан халқы Ассамблеясын құрған ҚР Тұңғыш Президенті – Елбасы Н.Назарбаевтың арқасында деп санаймын. Достық үйінің қызметкерлері бізді өте жылы қарсы алды. Біздің оқушылар облыстық ассамблеяның қызметі мен құрылымы, өткізілетін мерекелері жөнінде көптеген қызықты және пайдалы ақпарат алды. Жылы қабылдағандарыңызға үлкен рахмет!» – деп Достық үйінің басшылығы мен мамандарына қонақжайлылығы мен қызықты бағдарламасы үшін алғыс білдірді бастауыш сынып мұғалімі Әлия Таңжарықызы.

Қызықтырған сұрақтарына  толыққанды жауап алып, өздеріне бір тың дүние ашып, «ассамблея», «достық үйі» ұғымдарынан хабардар боп шыққан балақайлар қуаныштан жүздері бал-бұл жанып, «Достық» ордасынан әсерлі көңіл-күймен шықты.

Танымдық экскурсияның соңы фотосесиямен аяқталды.

Жамбыл облысы әкімдігінің

ІСБ «Қоғамдық келісім» КММ

Баспасөз қызметі орталығы

Бүгін, үстіміздегі жылдың 22 қыркүйегінде облыстық Қазақстан халқы ассамблеясы төрағасының орынбасары Латиф Айдаровтың Жамбыл облысы әкімдігі ішкі саясат басқармасының “Қоғамдық келісім” КММ бөлім басшыларымен жұмыс кездесуі өтті.

Кездесу барысында Жамбыл облысы ҚХА жастарын кәсіпкерлік қызметке тарту мәселелері талқыланды және жуық арада осыған орай, жұмыс жоспары белгіленетіндігі сөз болды.

 Жамбыл облысы әкімдігінің

ІСБ «Қоғамдық келісім» КММ

Баспасөз қызметі орталығы

Үстіміздегі жылдың қыркүйек айында Ш.Уәлиханов атындағы Жамбыл облыстық әмбебап ғылыми кітапханасы өңірдегі интеркультурализм қағидаттарын ілгерілету, оның  ұстанымдарын насихаттау мақсатында және Қазақстан тәуелсіздігінің 30 жылдығына орай, түрлі этнос өкілдерінің жастары арасында ұлы ақын Абай Құнанбайұлының шығармашылығына арналған «Абай – дана, Абай – дара қазақта» Поэзия минуттарын өткізді.

Поэзия минуттарын өткізудегі мақсат – танымал ақындардың өмірінен мағлұмат беру, өлеңдерін мәнерлеп оқу, ақындар поэзиясының халыққа кең таралауына және оның шығармаларының сыры неде екенін таныту, ақындар өлеңдерін оқи отырып, адамгершілікке, шындықты айта білуге, адалдыққа, өлеңнен жақсы әсер ала білуге, ізденімпаздыққа тәрбиелеу,  оқырмандардың шығармашылық қабілеттерін дамыта түсу.

Ерекше форматта өткен поэзия кешіне орыс, өзбек, түрік, түрікмен, әзірбайжан, ұйғыр этномәдени бірлестік өкілдерінің жастары қатысып, ұлы ақынның шығармаларын өз ана тілдерінде жатқа оқыды.

Іс-шараға қатысушы облыстық «Jambyl tv» телеарнасының қызметкері,      Өскеменде өткен Абайдың 175  жылдық  мерейтойына орай ұйымдастырылған этнос жастары арасындағы «Абай оқулары» республикалық байқауының 1-орын иегері, облыстық Ұйғыр этномәдени бірлестігінің өкілі  Мухаббат Алеханова поэзия кешіне:  «Жастардың ұлттық поэзияны құрметтеуі, оның ішінде Абай шығармашылығына деген қызығушылықтары мен өлеңдерін өз ана тілдерінде мәнерлеп оқуы мені қатты таңырқатып отыр. Өзге тілдерде ақын шығармаларын тыңдау  сондайлық қызық болды. Мемлекеттік тілді тез меңгерген маған, өзімнен кіші жастардың қазақ тілін білуге деген құштарлығымен қоса, өз ана тілдеріне деген құрметі мені өздеріне тәнті етпей қоймады. Таразда осындай жастардың өсіп-өркендеп келе жатқанына іштей риза болып, кеудемді қуаныш кернеді»,- деп өзінің ыстық ықыласын білдірді.

Айта кету керек, поэзия минутына көптеген байқауда бақ сынап, мемлекеттік тілдің мәртебесін биіктетіп жүрген жастар қатысты.

Әсерлі поэзиялық кеш соңы фотосессиямен аяқталды.

Жамбыл облысы әкімдігінің

ІСБ «Қоғамдық келісім» КММ

Баспасөз қызметі орталығы

Елбасы Н.Ә.Назарбаевтың АҚШ-тың Вашингтон қаласында өткен Ядролық қауіпсіздік жөніндегі IV саммитте жариялаған «Әлем. XXI ғасыр» манифесін ілгерілетуді қамтамасыз ету негізінде ең алғаш Қазақстан халқы Ассамблеясы осы «Ақ oрамал» республикалық акциясын өткізуге бастама жасаған болатын. Осылайша, қазақ халқының ұлттық салт-дәстүрін жаңғырту  және бейбітшілікті қолдау мақсатында «Ақ орамал» акциясы пайда болды.

Мемлекет басшысы Қ.К.Тоқаевтың қоғамның барлық мүшесінің және әрбір азаматының бейбітшілік пен тұрақтылықтың сақталуына бірдей жауапкершілігін сезінуі,  жаппай қырып-жоятын ядролық және басқа да қару-жарақ түрлерінен бас тарту, баянды бейбітшілік әлемін қалыптастыру, өмірлік іс-әрекет  әдісі ретінде соғыс атаулыны түбірімен жою сияқты  ұсыныстарын іске асыруға  бағытталып, қайта жаңғырып жатқан бұл іс-шараға негізгі қатысушылар Ассамблея жанындағы Аналар кеңесінің мүшелері, этномәдени бірлестік өкілдері, жас аналар мен жас жұбайлардан тұрады. 

    Акция неге «ақ орамал» деп аталады? Себебі,  ақ орамалдың қазақ тарихында философиялық мағынасы тереңде жатыр. Мәселен, әйел ана басындағы орамалын шешіп, жауласушылардың ортасына тастау арқылы жанжалды тоқтата алған.  «Қазақфильм» студиясы түсірген «Қыз Жібек» фильмі естеріңізде ме?! Өзінің ғашығы Төлеген мен жоңғарға қарсы күресте батыр атанған Бекежанның арасындағы жанжалды тарқату үшін араша боп Жібек-қыз ақ орамалын найзаға байлап, екі батырды бір мәмлеге шақырған болатын.

    Акцияның нақты басты мақсаты – елдің барша азаматтарын «Ақ орамал» акциясына қатыстыру арқылы олардың этносына, әлеуметтік, діни және басқа да ерекшеліктеріне қарамай, бейбітшілік идеясы аясына шоғырландыру. Сондай-ақ, халқымыздың ежелгі дәстүрі – татуластыру салтын жаңғырту.

Осыған орай, ағымдағы жылдың тамыз айынан бастап, күні бүгінге дейін «Біз соғыссыз әлемді қолдаймыз!» деген тақырыппен облысымыздың Жамбыл, Қордай, Шу, Талас, Мойынқұм, Жуалы аудандарында және олардың ауылдық округтерінде аталмыш іс-шара ойдағыдай өткізілді. Жас жұбайларға, жастарға үлгілі тәлім-тәрбие беру мен келер ұрпаққа ұлттық салт-дәстүрді дәріптеу мақсатында жарияланған акция аудандарда жоғары дәрежеде өтті. Әр аудандағы, тіпті шалғай жатқан ауылдарындағы жас отбасылары мен батыр аналарға ақ ормалдар тарту етіліп, бейбітшілік пен тұрақтылық әспеттелді. Қай ауданды алып қарасақ та, бейбіт бастамаларды қолдап, әйелдер қауымы ақ ниеттің символы ретінде ақ орамалды ерекше қастерлеуді өсиет етіп, өскелең ұрпаққа әлем тыныштығы жайлы ойлары мен тәлім-тәрбиелерін ортаға салды.

Сонымен бірге, акция аясында отбасылы жұптар мен перзентханада жатқан аналарға ақ орамал тағылды. Акцияға қатысушы қала және аудан аналары «21 ғасыр  – бейбітшілік ғасыры. Өміріміз тек қана бейбітшілікпен үндесуі қажет, соғысқа, лаңкестікке қарсымыз, біз балаларымыздың болашағына жауаптымыз, сондықтан оларды соғыс туралы ештеңе білмейтіндей етіп, тәрбиелейміз!» деген ұранды ұстанды.

Мәселен, осы акцияға қатысты Қордай ауданында жалпыадамзаттық құндылықтарды, ортақ тарихи сананы нығайтуға және Қазақстандағы барлық этностардың тарихи-мәдени мұрасын сақтау мен дамытуға бағытталған іс-шара ұйымдастырылса, Жамбыл ауданында  «Ақ орамал» акциясына арқау болған «Жер – бейбітшілік планетасы», «ядролық, химиялық, биологиялық немесе кез-келген басқа да қарусыз әлем үшін», «біз лаңкестікке қарсымыз», «адамзаттың санасында соғыс жойылсын», «соғыстар мен қақтығыстар вирусы жойылсын!», «болашақ ұрпақтың жүрегінде тек ізгілік болсын!» тәрізді тақырыптардың рухани және терең философиялық мәні түсіндірілді. Сондай-ақ, Шу ауданында жалпықазақстандық бірегейлікті нығайтудың маңыздылығы әспеттелсе,  Талас ауданында соғыс батырларына, қуғын-сүргін және ашаршылықтан зардап шеккендерге, лаңкестік құрбандарына қойылған ескерткіштерге тағзым ету дәріптелді. Бұған қоса, Жуалы, Мойынқұм аудандарында  отбасылық мерекелер (некені тіркеу, отбасылық алтын және күміс тойлар, сәбиді перзентханадан шығару және т.б.) кезінде түсіндіру жұмыстары жүргізілді. Бұл тұрғыда елімізге танымал және облысымыздың беткеұстар аналары, Ұлы Отан соғысының батыры Бауыржан Момышұлының келіні – Зейнеп Ахметова, қазақ тілінің жанашыры Асылы Османқызы, облыс ақыны Үміт Битенова, сондай-ақ, Аналар кеңесінің белсенді мүшелерінің ізгі істері паш етіліп,  жалпыұлттық дүниетанымдық құндылықтар мен жалпықазақстандық бірегейлікті нығайтудың маңыздылығы да сөз болды.

Облыстық ҚХА Аналар кеңесінің төрайымы Мухаббат Миражапованың айтуынша, ақ түс – пәктіктің белгісі, адамның ойы мен жан-дүниесінің кіршіксіз тазалығын білдіреді. Абыройдың, ізгіліктің, аманатқа адалдықтың белгісі. – Біз балаларымыз бен немерелеріміздің болашағы туралы ойлауға тиіспіз. Өткен ғасырлардың қасіретті қателіктерін қайталауға жол бермей, әлемді соғыс қатерінен түпкілікті арылту үшін бүкіл әлем үкіметтерінің, саясаткерлерінің, ғалымдарының, бизнесмендерінің, өнер қайраткерлерінің және миллиондаған адамдарының күш-жігерін жұмылдыру қажет. Іс-әрекетсіз отыру немесе бітімгершілік қызметпен айналысқан кейіп көрсету әлемдік апатпен барабар. Адамзатты ажал сепкен соғыс қатерінен мүлде арылту үшін қолымыздан келгеннің бәрін жасауымыз керек. Біз үшін қазір және таяу болашақта бұдан көкейкесті міндет жоқ,– деп кеңес басшысы өз ойын білдірді.

Жамбыл облысы әкімдігінің

ІСБ «Қоғамдық келісім» КММ

Баспасөз қызметі орталығы