ДОСТЫҚ ҮЙІНДЕ «ЕЛТАНУ» (ҚАЗАҚТАНУ) ЖОБАСЫ АЯСЫНДА «АЛТЫН ШАҢЫРАҚ» АЛАҢШАСЫ АШЫЛДЫ

/in /by

Қазақ халқының  салт-дәстүрін,   ұлттық құндылықтарын  өзге этностарға дәріптеуге бағытталған  Қазақстан халқы Ассамблеясының «Елтану» (Қазақтану) мәдени-ағартушылық  жобасының ауқымы жыл артып кеңеюде.

2018 жылы ҚХА-ның XXVI сессиясында қабылданған жоба қазіргі таңда қоғамнан қызу қолдау тапты.

Баянды бастама аясында бүгін Жамбыл облысы әкімдігінің ақпарат және қоғамдық даму басқармасы «Қоғамдық келісім» мекемесінің Көрме залында мекеме басшысы Мубарак Қасымқызының ұйытқы болуымен құнды жәдігерлердің бірі алты қанатты киіз үй – «Алтын шаңырақ» алаңшасы ашылды.

Салтанатты шараға өңірлік ҚХА мүшелері, этномәдени бірлестік жетекшілері, Аналар, Ақсақалдар кеңесі,  қалалық білім бөліміне қарасты №17 бөбекжай-балабақшасының бүлдіршіндері мен  тәрбиешілері,  №18 Еркеназ бөбекжай-балабақшасының тәрбиешілері және мекеме ұжымы қатысты.

Тарихи құндылықтарды айшықтаған алаңшаның ашылу салтанатында «Қоғамдық келісім» мекемесі басшысының орынбасары Дәурен Тайлеев және өңірлік ҚХА Ақсақалдар кеңесінің мүшесі Исмайл Хаджимуратов  сөз алып, ұлттық болмысымызды танытатын мұндай бастаманың берері мол екендігін алға тартты.

– «Алтын шаңырақ» алаңшасының пайдалануға берілгені – жаһандану заманында рухты жаңғырту арқылы, заманауи үрдістерге жұтылып кетпей, ұлттық, рухани артықшылықтарымызды сақтап қалуға арналған әрекеттің  жарқын көрінісі.  Өткенімізге үңіліп, жоғымызды түгендеп, ұлттық рухты дүр сілкінтуге бағытталған бұл шаралардың қайсысы болмасын еліміз үшін қымбат, – дей келе  ақсақал Исмайл Хаджимуратұлы көпшілікке ақ батасын берді.

Сондай-ақ, шарада «Ассамблея бөбектері» жобасының белсенділері, қалалық  №17 бөбекжай-балабақшасының  тәрбиеленушілері Отан, Тіл тақырыптарында  тақпақтарын айтып, өнерлерін ортаға салды.

Бауырмалдық байланыстырған көптеген этностардың өзара араласып, қазақи құндылықтарды тануда алаңшаның атқаратын рөлі зор. Іс-шарада «Қазақстандық татар және башқұрттар конгресі» республикалық қоғамдық бірлестігінің Жамбыл облысы филиалы төрағасы  Фарида Нақыш   еңселі ел болуға ұмтылған мемлекетіміздің алтын шаңырағы биік болсын деген ақжарма тілегін жеткізіп, тәттіден шашуын шашты.

Иә, алаңша – қазақ руханиятынан хабар беретін «Елтану» (Қазақтану) жобасының жемісі. Алдағы уақытта Достық үйіне келетін қонақтар осынау алты қанатты киіз үйдің жарты моделі арқылы қазақ халқының болмысын танып, тұрмыс тіршілігін, салт-дәстүрлерін, әдеп-ғұрпын ұғынып,  ұлттық ойындары мен театрлық қойылымдарын көре алады.

–Елтану деген сөз – оның бірлігін, елдігін, мәдениетін, әдебиетін, тарихын, дәстүрін тану дегенді білдіреді. Ендеше, алдағы уақытта өңіріміздегі этнос өкілдерінің қазақтың қайнар көзін танып, руханиятымен сусындауына жұмыс жасау жоспарланып отыр. Бұл жоба арқылы ашылған алаңша да халқымызды біріктіріп, мемлекет  тұрақтылығын нығайта түсетініне сенім мол, – дейді «Алтын шаңырақ» алаңшасының  жетекшісі, Көрме залының меңгерушісі Жазира Шілдебаева.

Шара соңында өнер көрсеткен бүлдіршіндерге Қазақстан халқы  ертегілері топтамасы сыйға беріліп, «Қоғамдық келісім» мекемесінің қызметкері Қалижан Саркеев әуезді әнімен көпшіліктің құлақ құрышын қандырды.

БАЛАЛАРДЫ ҚУАНТУ — ҰЙҒЫР БІРЛЕСТІГІНІҢ БАСТЫ ҰСТАНЫМЫ

/in /by

#Мектепкежолакциясы

#МектепкежолЖамбыл

 

Жыл сайын дәстүрлі түрде ел көлемінде тамылжыған тамыздан бастап, қыркүйек айының соңына дейін «Мектепке жол» акциясы өтеді.

Науқанға облыстық ассамблеяның этномәдени бірлестіктері бір кісідей жұмыла кірісіп, елдік пен кеңдіктің үлгісін тең көрсетіп келеді.

Қайырымдылық жасаудан қапы қалмайтын этностардың бірегейі «Махмұт Қашқари» атындағы Ұйғыр этномәдени бірлестігі ҚР Конституциясы күні мен Білім күніне орай  Достық үйінде «Мектепке жол» акциясын өткізді.

Аталмыш бiрлестiктің төрағасы Мухабат Турдыева бастаған акцияның басты мақсаты  — аз қамтылған, көпбалалы отбасылардан шыққан оқушыларға және ата-анасының қамқорлығынсыз қалған балаларға оқу жылының басталуы алдында материалдық көмек көрсету, балалардың әлеуметтік себептер бойынша мектепке бармауының алдын алу болып табылады.

Дәстүрлі акцияда аталған бірлестік өкілдері 30 баланы мектепке қажетті оқу құралдарымен қатамасыз етті.  Қайырымдылық көмегі ұйғыр, өзбек, қазақ, дүнген тағы да өзге этнос өкілдерінің  балалары  мен  балалар үйінің тәрбиеленушілеріне үлестірілді.

Айтулы жиында  бірлестік жетекшісі Мухабат Абдрахманқызы және «Қоғамдық келісім» мекемесі басшысының орынбасары Дәурен Тайлеев балаларды жаңа оқу жылымен құттықтап, ақжолтай қуаныштар мен білімде сәттілік тіледі.

-Аталған акция  алғаш рет 2007 жылы дәл осы өңірлік Ұйғыр этномәдени бірлестігінде әлеуметтік көмек ретінде бастау алып, кейінірек  республикалық сипатқа ие болды. Міне, содан бері желісі бір үзілмей, қарқынды түрде жалғасып келеді. Атаулы акция болашақта да жалғасын тауып, ауқымы кеңейеді деген сенімдемін. Біздің бір баланы демеп, бір баланы мектепке дайындауымыз —болашақта еліне адал қызмет ететін ұрпаққа берген үлесіміз деп білемін. Сондықтан, барлық азаматтарды  мұндай қайырымдылық акциясынан алыс болмай, мүмкіндігінше атсалысуға шақырамын! Бүгінгі шараға үлес қосқан әрбір жанға алғысым шексіз, – деді Мухабат Турдыева.

Акция аясында балаларға базарлық таратылып қана қоймай, оларға сәні мен сәулеті келіскен Достық үйінің ішкі көрінісі көрсетіліп, түрлі аниматорлық ойын-сауықтар, сабын көпіршіктерінен шоу ұйымдастырылды.

Өз кезегінде акцияға қатысқан ата-аналар да бірлестік мүшелеріне ризашылығын білдіріп, зор алғыстарын жеткізді.

 

#Дорогавшколу

#дорогавшколуЖамбыл

ЖАСТАР – ЕЛ ДАМУЫНЫҢ БАСТЫ ДРАЙВЕРІ

/in /by

Қазақстандағы Халықаралық Жастар күні жарқын сипатқа ие болып, жалпы жастар саясатын дамыту тұжырымдамасы да әлдеқашан  өзгерген болатын.  Бұрын тұжырымдама «жастарға арналған саясат» болса, бүгінде –  «жастармен саясатқа» меңзейді.  Жастар бүгінде өздерінің одан әрі дамуын жүйелі қалыптастырып үйренген.  Мәселен,  олар келешекті қалай көреді,  бүгінгісін  қалай сезінеді және дамуға қандай қажеттілікттер мен бағыттар бар, қазір осының бәріне көреген.

ҚХА бойынша түрлі этнос өкілдерінен құралған жастар ұйымы «Ассамблея жастары» қоғамдық бірлестігі болып құрылғаннан бері республика, облыс бойынша болсын, қай жерде игі істер, сол жерде — біздің жастар!

Жастар бастамаларын дамыту, жастар ортасында қоғамдық келісім мен бірлікті нығайту, қазақстандық жастардың әлеуметтік деңгейін арттыру және оларға үкімет, халық мүддесіне жақын жақсылықтардың жанынан табылу,  жалпықазақстандық  бірегейлікті қалыптастыру мақсат-міндеттері осыдан 5 жыл бұрын республикалық «Қоғамдық келісім» мекемесінде бекітілген болатын.

Жастар күні қарсаңында күні кеше 11 тамызда Тараз қаласының  Қайрат Рысқұлбеков атындағы демалыс саябағында өңірлік  «Ассамблея жастары» РҚБ қатысуы және РҚБ төрағасының орынбасары  Хамида Тұрдыеваның басшылығымен  жарқын мерекелік жастар кеші өтті.

Жастар күнін мерекелеу аясында «Ассамблея жастары» бірлестігі белсенділерінің қатысуымен саябақта демалушыларға әр түрлі жанрдағы және этностық стильдегі композициялар қойылып,  түрлі этностардың (қазақ, өзбек, ұйғыр, түрік, күрді, грузин, қарашай, әзірбайжан, т.б.) ұлттық билері ұсынылды.  Барлық қатысушылар би алаңын ерекше жақсы көңіл-күй мен сергектікке  бөледі.  Көрермендер саны да өте көп болды.

Әр елдің келешегі жастарымен  кемел.  Қазақ елінің бірлігі мен тірлігі жарасып, жастары жасай берсін!

ҰЛЫ АҚЫН ЕСІМІ ҰЛЫҚТАЛҒАН КЕШ

/in /by

10 тамыз – қазақтың бас ақыны Абай Құнанбайұлының туған күні. Айтулы дата қарсаңында облыстық мәдениет және тілдерді дамыту басқармасы мен «Қоғамдық келісім» мекемесінің ұйытқы болуымен «Абай – дана, Абай – дара қазақта» атты танымдық кеш өтті. Қазақ тілінің көркемдік ерекшелігін, бай сөздік қорын Абай шығармашылығы арқылы насихаттап, қазақтың тілі мен әдебиетіне, мәдениетіне деген жастардың қызығушылығын арттыруды мақсат еткен шара «Мәміле» клубы отырысының аясында ұйымдастырылды.

Рухани кеш түндігі ақынның «Жарқ етпес қара көңілім неғылсада» әдеби музыкалық композициясымен түрілді.

Шараның алғы сөзін алған облыстық ақпарат және қоғамдық даму басқармасы «Қоғамдық келісім» мекемесінің басшысы Мубарак Жинақбаева ұлы ақынның өміршең шығармалары жайында жастарға кеңінен мәлімдеді.

Кеш барысында Хәкім Абайдың шығармаларынан үзік ойлар айтылып, сүбелі жырлары оқылды. Өңірлік ҚХА төрағасының қоғамдық орынбасары Асқарбек Ақылшаұлы, М.Х.Дулати атындағы Тараз өңірлік университетінің доценті, филология ғылымдарының кандидаты, абайтанушы Рахат Саламатова тағылымды шараға жиналған қауымға Абай шығармашылығы тек қазақ халқының ғана мұрасы емес, шетелдіктер қазақты Абай арқылы танып, ақынның жырлары арқылы бағалайтындығын айтты. Сондай-ақ, оның жалпыадамзаттық құндылықтарды насихаттауға толы шығармалары бүкіл халықаралық қауымдастыққа жатып, әлемдік мәдениеттің бөлігі болып табылатындығына тоқталды.

Сонымен қатар, қалалық №34 орта мектептің директоры Динара Нуралиева ақынның «Қалқам-ай, мен үндемей жүремін көп» өлеңін мәнерлеп оқыса, өңірлік «Ассамблея жастары» РҚБ белсендісі Аяна Ким «Қалың елім, қазағым, қайран жұртым» шығармасын көпшілікке ұсынды.

Абайдың қара сөздері – көркем әңгіме емес, ғақлиялық даналық сөздер. Танымдық кеште Жуалы аудандық «Мыңбұлақ» халық театрының режиссері Ербол Бекжанов, өңірлік «Ассамблея жастары» РҚБ мүшесі Эсмер Дурсунова ақынның қара сөздерінен үзінділер оқыды. Ал Ш.Мұртаза атындағы Халықаралық Тараз инновациялық институтының магистрі Бақтияр Бекназаров ұлы ақынға арнап, жыр жолдады.

Кеш соңында К.Әзірбаев атындағы облыстық филармонияның әншісі Ерлан Ибаділдаев Абайдың «Өлсем орным қара жер сыз болмай ма?» әнін тамылжыта орындады.

Шара соңында мекеме басшысы Мубарак Қасымқызы Абай жырларын оқып, насихаттап жүрген жастарға «Әлемді аялаған сөз» атты еліміздегі этнос өкілдерінің ақын жайлы жазбалары жинақталған кітап тарту етті.

 

«Ақпараттық жұмыс және қоғаммен байланыс» бөлімі

МЕДИАЦИЯ – ЫНТЫМАҚ ПЕН БІРЛІКТІҢ БАСТАУЫ

/in /by

Дана қазақ «Ынтымақ жүрген жерде ырыс бірге жүреді» деп тегін айтпаған. Бірлік барда берекелі тірлік көрініс табары анық.

Бүгінде қазақ жерін мекен еткен 140-тан астам этнос өкілдері осы бірліктің арқасында тату-тәтті ғұмыр кешуде. Біз қоғамдағы бірлік пен келісімді көздің қарашығындай сақтап, қашан да алауыздыққа қарсы тұра білуіміз керек. Бұл жөнінде Мемлекет басшысы, ҚХА төрағасы Қасым-Жомарт Тоқаев «Бірлік. Жасампаздық. Өрлеу» атты ҚХА-ның ХХХІІІ сессиясында да айтқан болатын. Күні кеше еліміздің бас қаласы Астанада өткен республикалық ҚХА медиация кеңесінің кеңейтілген отырысына қатысып қайттым.

Алқалы жиында ҚХА Төрағасының орынбасары, ҚР Президенті Әкімшілігі ҚХА Хатшылығының меңгерушісі Марат Әзілханов Мемлекет басшысының ҚХА-ның ХХХІІІ сессиясында берген тапсырмасына сәйкес Алматы, Түркістан және Жамбыл облыстарында этномедиация саласындағы мамандардың тәжірибесі барлық өңірлердегі Ассамблеяның бүкіл ұйымдастырушылық шеңбері бойынша кеңейгенін атап өтті. Сондай-ақ, қазіргі қоғамда медиаторлардың еңбегі мен жалпы медиацияның рөліне тоқталып, соңғы бірнеше жылда медиацияның көмегімен көптеген арыз-шағым мәселелері шешілгенін айтты. Сонымен қатар, Жамбыл облысы «Қоғамдық келісім» КММ этнос өкілдермен жұмыс істеу жүйесі жоғары бағаланды.

Басқосуда қатысушылар проблемалық мәселелерін ортаға салып, жалпы медиация институтын жетілдіру бойынша ұсыныстарын ұсынды. Медиация кеңесінің мүшелері айтылған ой-пікірлерді қолдады.

Мемлекет үшін халқы тату, жері тыныш, қоғамы тұрақтылықта өмір сүру – үлкен жетістік. Сан түрлі этностың басын біріктіріп, бір мақсатқа жұмылдыру – оңай шаруа емес. Киелі Әулиеата жерінде көптеген этнос өкілдері берекелі бірлікке негізделген игі бастамаларға атсалысып, қоғамдық келісімді сақтап, ұлт бірлігін дәріптеуге үлес қосып жүр.

 

Абдрахман ЗАЙНУТДИНОВ,

Тараз қалалық Өзбек орталығының төрағасы

АСТАНАДА ҚХА МЕДИАЦИЯ КЕҢЕСІНІҢ КЕҢЕЙТІЛГЕН ОТЫРЫСЫ ӨТТІ

/in /by

5 тамыз – елімізде медиация күні. Ағымдағы жылы «Медиация туралы» заңның қабылданғанына 13 жыл толып отыр. Осыған орай, күні кеше Астана қаласында өткен республикалық ҚХА медиация кеңесінің кеңейтілген отырысында бітімгерлік институтының атқаратын қызметі, қоғамдық келісімді сақтау және нығайту мәселелері төңірегінде тереңірек айтылды.

ҚР Мәдениет және ақпарат министрлігінің қолдауымен өткен шараға ҚХА Төрағасының орынбасары, ҚР Президенті Әкімшілігі ҚХА Хатшылығының меңгерушісі Марат Әзілханов ҚР Парламенті Сенатының депутаттары, ҚР Президенті Әкімшілігінің ҚХА Хатшылығының өкілдері, ҚР Мәдениет және ақпарат министрлігі Этносаралық қатынастарды дамыту комитетінің басшылығы, Білім және ғылым, Ішкі істер министрліктерінің, Бас прокуратура, ҚР Ұлттық қауіпсіздік комитетінің, ҚР Адам құқықтары жөніндегі өкілдері, сондай-ақ республикалық және өңірлік медиация кеңестерінің мүшелері мен БАҚ өкілдері қатысты.

ҚХА-ның «Елдесу және татуласу» жобасы шеңберінде ұйымдастырылған алқа отырысына облыстық ақпарат және қоғамдық даму басқармасы «Қоғамдық келісім» мекемесіінң басшысы Мубарак Жинақбаева, «Медиация» кабинетінің меңгерушісі Валентина Досыбиева да қатысып қайтты.

Алғы сөзінде Марат Әзілханов Мемлекет басшысының ҚХА-ның ХХХІІІ сессиясында берген тапсырмасына сәйкес Алматы, Түркістан және Жамбыл облыстарында этномедиация саласындағы мамандардың тәжірибесі барлық өңірлердегі Ассамблеяның бүкіл ұйымдастырушылық шеңбері бойынша кеңейгенін атап өтті.

Кеңес отырысы барысында ҚХА Республикалық медиация кеңесінің төрағасы, Ұлттық құрылтай мүшесі Шерзод Пулатов ҚХА Медиация кеңесі қызметінің перспективалары мен жаңа бағыттарымен таныстырса, ҚХА Төрағасының орынбасары Лугмар Буларов Қордай ауданындағы жанжалды шешудің тиімді шаралары туралы пікірімен бөлісті.

 

 

 

 

АЗАҚ ТІЛІН ОҚЫТУ БОЙЫНША КУРСТАР ӨТТІ

/in /by

ҚР Мәдениет және ақпарат министрлігінің қолдауымен Азаматтық бастамаларды қолдау орталығының жобасы аясында Жамбыл облыстық «Жаңа-Ру» жастар коалициясының қауымдастығы» заңды тұлғалар бірлестігі «Тілдік және этникалық белгілері бойынша ар-намыс пен қадір-қасиетті қорлаудың кез келген нысандарына жол бермеу» атты жобаны жүзеге асыруда.

Жобаның мақсаты түрлі этнос өкілдері тығыз шоғырланған қала, ауылдарда кемсітушіліктің кез-келген нысандарына жол бермеу, халықтың құқықтық сауаттылығын арттыруға бағытталған.

Аталған жоба аясында ағымдағы жылғы 30-31 шілде аралығында Zoom платформасында этнос өкілдеріне арналған 8 сағаттық қазақ тілін оқыту бойынша курстар өтті. Осыған орай біздің өңірден 20 этнос өкілі қатысты.

Сондай-ақ, қатысушыларға курсқа қатысқандығы туралы сертификаттар табысталды.

ZOOM ПЛАТФОРМАСЫНДА КЕЗДЕСУ ӨТТІ

/in /by

Мемлекет басшысы Қасым-Жомарт Тоқаев Қазақстан халқы Ассамблеясының «Бірлік. Жасампаздық. Өрлеу» атты ХХХІІІ сессиясында қоғам дамуына өзіндік үлесін қосып жүрген белсенді жастар қатарының артқандығын алға тартқан болатын.

Осы орайда, ҚР Мәдениет және ақпарат министрлігінің ұйықты болуымен «Zoom» платформасында «Ассамблея жастары» республикалық қоғамдық бірлестігі мен өңірлік «Қоғамдық келісім» мекемелерінің жұмысы турасында онлайн кездесу өткізілді.

Жиынды республикалық «Қоғамдық келісім» мемлекеттік мекемесінің директоры Элина Масагутова жүргізді. Аталған кездесуге облыстық ақпарат және қоғамдық даму басқармасы «Қоғамдық келісім» мекемесінің қызметкерлері және «Ассамблея жастары» РҚБ төраға орынбасары, бірлестіктің өңірдегі жетекшісі Хамида Турдыева да қатысты.

Онлайн режимде өткен басқосуда «Ассамблея жастары» республикалық қоғамдық бірлестігінің төрағасы Тимур Жұмырбаев жастарды қоғамдағы бірлік пен келісімді нығайту жөніндегі қызметке тарту жайы, ҚХА бастамалары мен жастар жобаларын қолдау тапсырмасын іске асыру мәселелері барысында ой қозғады.

АНАЛАР ДОЙБЫДАН ДОДАҒА ТҮСТІ

/in /by

Бұқаралық спортты дамыту әрі халықты салауатты өмір салтына бағыттау – еліміздегі күн тәртібіндегі маңызды мәселенің бірі.

Әсіресе, тұрмыс тіршілігінен қолы босамайтын аналардың спортпен шұғылдануы да айрықша маңызға ие. Осыған орай, ҚХА-ның “Салауатты сана” жобасын жүзеге асыру мақсатында Меркі аудандық Аналар кеңесінің өкілдері арасында дойбы сайысы ұйымдастырылды. «Аналар асыл жандар» атауымен өткен спорт жарысына ауданға қарасты 14 округтен 20 ойыншы қатысып, бақ сынады.

Айта кетейік, дойбы додасына Ә.Өмірзақова, Б.Молдраймова, Ә.Аманбаева, Р.Досумбекова, М.Увалиева, Р. Анафияева, Ы. Рай, О.Макашева, Р.Байбосынова секілді кеңес төрайымдары да белсене атсалысты.

Интеллектуалдық жарыс нәтижесіне сай А.Жазықбаева жеңіске жетсе, С.Отарбекова екінші орынға ие болды. Ал М.Тортаева үздік үштікті түйіндеді.

Сондай-ақ, «Көрермен көзайымы» аталымы бойынша Г.Беркімбаева және « Жеңіске деген құштарлығы үшін» Ә. Өмірбекова арнайы жүлдеге иелік етті.

Дзюдодан Қазақстан командасының белді мүшесі Елдос Сметов Париж Олимпиадасының чемпионы атанғанына баршамыз куәміз.

/in /by

Дзюдодан Қазақстан командасының белді мүшесі Елдос Сметов Париж Олимпиадасының чемпионы атанғанына баршамыз куәміз.

Отандасымыз осылайша ел қоржынына алғашқы алтын медальді сыйлады.

Жеңісті күндеріміз көп болсын! Жарайсың Елдос! Қазақ елінің даңқын шығарған жеңісті жолдарың тарихта алтын әріппен жазылып қалды.

Сенің талмас күш-жігерің мен асқан шеберлігіңді,адал азаматтық биігіңді,шынайы перзенттік сезіміңді, талантты өнеріңді жоғары бағалаймыз!

Өркендей бер,жүрегі ел деп соққан Елдос батыр!

Жаса, Қазақ елі!

 

Абзалбек Меңдібаев, Жамбыл облыстық «Манас Ата» Қырғыз этномәдени бірлестігінің төрағасы

Page 1 of 140
1 2 3 … 140