Archive for category: Жаңалықтар

Қазақстанда 1 қазанда Халықаралық қарттар күні мерекесі қарсаңында 2023 жылдың 29 қыркүйегінде Тараз қаласының «Қоғамдық келісім» мекемесінде өңірлік ассамблея ардагерлеріне құрмет көрсетілді.

Мерекелік іс-шараға қатысушыларға “Қоғамдық келісім” мекемесі шығармашылық топтарының қатысуымен концерттік бағдарлама қойылып, көрермендер назарына вокалдық және түрлі хореографиялық нөмірлер ұсынылды.

Концерттік бағдарламаны іске асырушылардың қатарында КХА-ның ересек белсенділері- Жамбыл облыстық Қытай этномәдени бірлестігінінің төрайымы Галина Воробьева, КХА Ақсақалдар кеңесінің өкілі Ыдырыс Юнусов, Немістер қауымдастығының «Поющие сердца» вокалдық тобы бар.

Айта кетейік, Кенен Әзірбаев Жамбыл облыстық филармониясының әншілері Дулат Жасұзақов «Туған жерім-өз елім», «Анаға сәлем», Мейірім Ханзина «Қарлығаш», «Қазағым-ай» әндерін нақышына келтіріп шырқап, көрерменнің көзайымына айналды.

Іс-шараға қатысушыларға Достық үйінің «Белсенді ұзақ өмір сүру» орталығының қолөнершілері дайындаған киім туындылары көрсетіліп, көз жауын алар сән көрсетілімі де ерекше түрде өтті.

Мерекелік шараның соңында этномәдени бірлестіктері ардагерлері мен белсенді өкілдерінің бірқатары «Қоғамдық келісім» мекемесі басшылығы атынан сыйлықтар алып, Алғысхат, Дипломдармен марапатталды.

«Ақпараттық жұмыс және қоғаммен байланыс» бөлімі

ҚХА бойынша түрлі этнос өкілдерінен құралған жастар ұйымы «Ассамблея жастары» қоғамдық бірлестігі болып құрылғаннан бері республика, облыс бойынша болсын, қай жерде игі істер, сол жерде — біздің жастар!

Жастар бірлестігінің көздеген мақсаттары мен атқаратын міндеттері осыдан 3 жыл бұрын «Қоғамдық келісім» Республикалық мемлекеттік мекемесімен бекітілген болатын.

Олардың ішінде ең бастысы – жастар бастамаларын дамыту, жастар ортасында қоғамдық келісім мен бірлікті нығайту, қазақстандық жастардың әлеуметтік деңгейін арттыру және оларға үкімет, халық мүддесіне жақын жақсылықтардың жанынан табылу, жалпықазақстандық бірегейлікті қалыптастыру.

Осыған сәйкес, еліне жанашыр өңірлік ассамблея жастары — өз Отанының адал патриоттары, өз Мемлекетінің сенімді болашағы ретінде қаншама игі жұмыстарды игеріп, жақсылыққа жар елінің белсенді атсалысушылары боп қызмет етіп келеді.

Бүгін, күз айының 27 қыркүйегінде, Тараз шаһары, «Көне-Тараз»  тарихи-мәдени кешенінде орналасқан Достық үйінің алдында Тараз қаласы күні мен алда келе жатқан мемлекеттік ортақ мерекеміз — Республика күніне арнап, өңірлік Ассамблея жастары «Қазағым»  әнінің желісінде «Қазақстан — туған жерім, туған елім»  флешмобын қазақстандықтар мен жамбылдықтарға тарту ретінде дайындап, ҚР күніне қатысты қосымша шаралар жұмыстарын жүргізді.

Әр елдің келешегі жастарымен кемел. Іс-шараға жұмыла келген жастардың талпынысы мен шынайы ниеттерін көре келе болашаққа болжаммен емес, селкеусіз сеніммен қарайсыз! Өздерінен кейінгіге үлгі тұтар тәрбиелі жастардың іс-қимылдарынан түрлі этностан жиналса да, тілектерінің бір екенін айқын байқайсың!

Жалынды жастарымызбен, ашық аспанымызбен қадірлі, әрі көпэтносты Қазақ елінің бірлігі мен тірлігі жарасып, көсегесі көгеріп, туы көктен түспесін!

«Ақпараттық жұмыс және қоғаммен байланыс» бөлімі

Ағымдағы жылдың 27 қыркүйегінде Тараз қаласы Көне-Тараз тарихи-мәдени кешенінде орналасқан Достық үйінде облыс әкімі Е.Ш.Қарашөкеевтің өңірлік этномәдени бірлестік өкілдері және Ассамблея мүшелерімен маңызды кездесуі өтті.

Кездесуге облыс әкімдігі, облыстық ішкі саясат басқармасы, этномәдени бірлестік басшылары мен мүшелері, «Қоғамдық келісім» КММ, «Ассамблея жастары»  РҚБ республикалық, облыстық баспа БАҚ өкілдері мен жергілікті ТV телетілшілері қатысты.

Жиын барысында әкім Ербол Шырақпайұлы жиынға қатысушы этнос өкілдерімен танысып болған соң бірден өңірлік ҚХА тарапынан ендігі атқарылатын міндеттер мен маңызды жобалар жөнінде алғы сөзін бастап кетті.

Жалпықазақстандық бірегейлікті алға тарта отырып, өз нәсіліне, ұлтына қарамастан толыққанды қазақстандық статусын сақтай отыра, Қазақстан Республикасының Әскери Армиясы мен құқық қорғау органдарына және мемлекеттік қызметтерге толыққұқықты қазақстандық ретінде этнос өкілдерінің де еш қысылмастан біліктілігі мен білімділігінің арқасында маман ретінде қызу кірігіп, қызмет етуге талпынуды және балаларына қазақ армиясында әскерлік қызметін өтеуден алшақтамауға бейімдеуді , осыған орай, әскери қызметті әрбір қазақстандық орындау керектігін басым түрде үндеді.

Жалпы бүгінгі кездесудің басты мақсаты да этнос өкілдерімен жақынырақ танысу және облыс көлемінде этномәдени бірлестіктердің қоғамдық келісімге қосып отырған үлестерін, ұсыныс-пікірлерін тыңдау, ҚХА жұмыс істеу жүйесіне жаңаша өзгеріс енгізу және мемлекеттік маңызды мәселелерге аса зор ден кою болатын.

Облыс басшысы ел аумағындағы 140-тан астам этнос өкілдерінің 87-сі Жамбыл өңірінде шоғырланғандығына тоқталып, ассамблеяның алдағы атқарар жұмыстарына жаңашылдық, өзгешелік кіргізу турасында өзінің мақсат тұтқан тың ой-ұсыныстарымен бөлісті.

Сондай-ақ, облыста этнос өкілдерінің басын қосқан 75 этномәдени бірлестік барынан хабардар өңір басқарушысы Жамбыл жерін мекен еткен этнос өкілдері ортақ Отанымыздың тыныштығы мен тұрақтылығына атсалысып жатқанына зор алғысын білдіріп, ЭМБ өкілдерін тыңдауға сыңай білдірді.

Әкім сөзінен кейін өңірлік ҚХА төрағасының ІІ-қоғамдық орынбасары, Ақсақалдар кеңесінің төрағасы Асқарбек Ақылшаұлы және І-қоғамдық орынбасары, облыстық Қан орталығының басшысы Ғұлам Умаров жалғастырды.

Бұдан соң, М.Х.Дулати атындағы Тараз өңірлік Университетінің ректоры, «Әулие Ата» Қазақ мәдени орталығының төрағасы Мұхтар Байжұманов сөз алып, әріқарай облыстық «Днепро», «Вынхуа» этнобірлестік орталықтарының басшысы мен өкілдері —Федор Клименко, Руслан Исмазовтар және ҚХА Ғылыми-сараптамалық тобының облыс бойынша төрағасы Махметғали Сарыбеков сөз сөйлеп, құрылымдар тарапынан «Ассамблея жастары»  РҚБ жетекшісі Хамида Тұрдыеваның баяндамасымен аяқталды.

Шара соңына қарай облыс әкімі этнос өкілдеріне ынтымағы жарасқан елде ғана тұрақтылық сақталып, болашақтың дамуы баянды болатынын айшықты жеткізіп, этностар қозғаған келелі мәселелер мен айтылған ұсыныстарын назарына алғандығын білдіріп, оларды айқын жоспармен жемісті де, нәтижелі еңбек етуге шақырды.

Жиын соңы естелік фотосессиямен тәмамдалды.

«Ақпараттық жұмыс және қоғаммен байланыс» бөлімі

Мемлекет басшысы Қасым-Жомарт Тоқаевтың ұстанған сарабдал саясатының аясында елімізде де, өңірімізде де көптеген іргелі істер еңсерілуде. Ел басқарушысының Жолдаулары да және соның негізінде туған мемлекеттік жобалар да – мол еңбектің арқасы.

Өзіміздің республикалық ҚХА ілгерілетіп жатқан ұлттық құндылықтар мен идеологияны, дәстүрлерді, сындарлы саясатты насихаттайтын тың жоба боп кіріп, құлашын кең жайып кеткен ҚХА құрылымдарына қатысты «Мәдениетті Ана – мәдениетті Ұлт», «Бір Ел», «Достық керуені», «Әралуандылық – бірлікте», «Мектепке жол» және басқв да көптеген қайырымдылық акциялары, мемлекеттік тілдің меңгерілуін дамыту, сондайлық, жастар арасында жүргізіліп жатқан түрлі челлендж, акция, зияткерлік жобалар негізінде жастарымызбен де, Ақсақалдар, Аналарымызбен де, Ғылыми-сараптамалық кеңес және Медиациямен де, Журналистер клубымен де жарияланымдардан көріп оқып отырмыз, «Қоғамдық келісім» мекемесі ұйымдастыруымен біршама жұмыстар атқарылып жатқандығы баршаға белгілі.

Осы бір маңыздылығы жоғары аталмыш бастамалар мен жалғастырулар халық арасында қызу талқыланып, өңіріміздегі әрбір азаматтың қызығушылығын арттыруда. Қарапайым мысал, «Мәдениетті ана – мәдениетті ұлт» – бір ғана жобаның өзін алып қарайықшы, қыруар шара, шаруа өндірілген ғой. Аналар кеңесі командасымен түрлі бейнеролик, ақпарлардан көзіміз көріп отыр, әр этностық салт-дәстүрі жаңғырып, бұрындары біз білмеген ұлттық достық дастархандары дәріптеліп, жас жеткіншек қыздарымызға үлкен тәрбие, әр шарадан ұлдарымызға дұрыс бағыт, мықты ұлағат боп өнеге беріліп жатыр.

Мәселен, жуырда ғана облыс әкімдігінің ішкі саясат басқармасы мен “Қоғамдық келісім” мекемесінің бірігіп жүргізген этностар жиі шоғырланған аймақтардағы ақпараттық-түсіндіру жұмыстары, одан бері қыркүйек айының соңына тақау басталып, әлі жалғасын табатын республикалық “Достық керуені” жобасы этносаралас аудан тұрғындарына серпіліс әкелгені айтпаса да белгілі.

Әр түрлі игі тақырыптағы акциялар мен жобалар, менің әріптестерім мен қызметтестерімнің ерен еңбектері арқылы іске асуда.

Жалпы алғанда, өзім облыс, қала, аудан көлемінде ұйымдастырылып жүрген ҚХА-лық іс-шаралардан шама-шарқымша қалмауға тырысып, жиі қатысып тұрамын. Сондағы байқағаным, аталмыш шаралардың барлығы асқан жауапкершілік, ерекше еңбексүйгіштік, зор еңбекқорлықпен нәтижелі, жемісті боп орындалып шығып жатады.

Қызметтестерімнің бойынан адами қасиеттердің ішінен еліне деген адалдық пен еңбексүйгіштігін жоғары бағалаймын. Себебі, аздаған уақыт аралығында біріншіден, Президентіміздің қажырлығы, екіншіден, бірізді саясатымыздың, үшіншіден, жергілікті және басқа да өңірлердің қажырлы еңбегінің арқасында, сондай-ақ, әрине, мемлекетімізде жалпықазақстандық бірегейлік пен бірлік нық орын алғанынан еліміз әлемдік державалар санасатын дәрежеге жетті деп ойлаймын.

Сондықтан, Еңбек дегенде, ел дегенде ерінбей, ойлау қабілетіміз де ұшқыр, қажыр-қайратымыз да сембес, күш-қуатымыз да сарқылмас мықты болайық! Ел тірегі тек еңбекпен ғана тік тұратынын ұмытпайық!

Жалил Азимұлы Аббосов, ҚХА мүшесі, Байзақ аудандық «Ахыска» түріктер этномәдени бірлестігінің төрағасы, облыстық «Ахыска» Түріктер мәдени орталығы» ҚБ өкілі