Archive for category: Жаңалықтар

Бүгін қаламызда баршаңызға атаулы ұлттық мейрам – Республика күні мерекесі еліміздің тәуелсіздігі мен егемендігінің символына айналған көк байрақты көтеру рәсімінен басталды. Қазақстан халқының бірлігі мен қоғамдық келісімді нығайтудың негізі – Қазақстан халықтары арасындағы өзара сыйластық, татулық, бірлік болғандықтан, бұл күнді өңірлік ҚХА өкілдері мен «Қоғамдық келісім» мекемесінің қызметкерлері бірге атсалысып атап өту жылда ортақ парызымызға айналады.

2022 жылы Президент Қасым-Жомарт Тоқаев Республика күнін қайтаруды ұсынып, оған “ұлттық мереке” деген мәртебе беріп, Қазақстанның басты мейрамы ретінде атап өту туралы бастама көтерген болатын. Бұл бастама халықтың қолдауына ие болып, дәл сол жылы заңға тиісті өзгеріс енгізілді. Сонымен былтыр Қазақстан халқы ұзақ жылдар бойы атаусыз қалған Республика күнін алғаш рет атап өтті.

– «Қуатты аймақтар – қуатты мемлекет» дегеніміз – жалаң ұран емес. Бұл – Әділетті Қазақстанды құруға қажетті ең басты қағидат. Біз былтыр еліміздің әкімшілік-аумақтық құрылымына бірқатар өзгеріс енгіздік. Сол арқылы кейбір облыстың дамуына тың серпін бердік. Менің тапсырмаммен ауыл-аймақты дамыту тұжырымдамасы қабылданды. Бұл құжаттың мән-маңызы зор. Аймақтарда әлеуметтік, инженерлік және көлік инфрақұрылымын құру – басты міндет”,- деді Қасым-Жомарт Тоқаев Республика күні қарсаңында Астанада мемлекеттік наградалар мен сыйлықтар тапсыруға арналған салтанатты рәсімде.

Президенттің пікірінше, Республика күні халықтың болашаққа сенімін нығайтатын ерекше мейрам болуы керек деп патриоттық, іс-шараларды көптеп ұйымдастыруды ұсынды.

Қуатты мемлекет болу үшін ауыл-аймақты инфрақұрылымын дамытуға қоса саяси ахуалын да үнемі қадағалап отыру – сарапшылардың міндеті. Осыған қатысты мемлекет басшысы еліміздегі тұрақтылықты сақтауды айта келе, тыныштық болмаса басқаның бәрі бекер дейді.

Сондай-ақ, әлемде болып жатқан кейбір келеңсіз жағдайлар халыққа қандай ауыр күй кештіретінін де баса айтқан еді. Тұрақтылық пен тыныштықтың айқын бір көрінісі – алыс-жақын шетелдегі әртістердің Қазақстанмен шарт жасасып, біздің аймаққа батыл келетінідігін де тілге тиек етті.

Шынымен де, тұрақсыздық жайлап, берекесі кеткен елге ешкім келмесі анық.

Осыдан ой ала түйіндейтін болсақ, тыныштығымызға жетер байлық жоқ. Бір бүтін мемлекет тұрмақ бір кішкене ауылдың өзіне өз атқаратын міндетімізде қаншама сараптамалық жұмыстар керек?!

Сондықтан да, тұрақтылығымызды ең асыл қазынамыздай сақтағанымыз дұрыс. Және де балаларымызға Қазақстанымыздың ең асыл қасиеті — бейбітшілікті сақтап отырғандығын үнемі дәріптеп отырғанымыз абзал.

Қайта жаңғырған мейрамымызда жерлестер мен әріптестерге тілерім – зор денсаулық, ұзақ ғұмыр, отбасы-жанұяларыңызға амандық, шаңырақтарыңызға шаттық, еңбекте барлық бастамаларыңызға сәттілік, жаңа жетістіктер!

«Қоғамдық келісім» КММ Ғылыми-сараптамалық топты қолдау бөлімінің бас сарапшысы Ербол Қаншымбеков

Биылғы жылдың 22-қазанында Жамбыл облыстық Немістер қауымдастығы 25 қазан ұлттық мереке — Республика күніне және өздерінің салт-дәстүріне сәйкес егін жинау мерекесіне арнап «Еrntedankfest» атты мерекелік концерт өткізді.

Мерекелік шараға этномәдени бірлестік өкілдері, «Қоғамдық келісім» мекемесінің басшылығы, Немістер қауымдастығының мүшелері, шығармашылық топтары, жастар қанаты қатысты.

🔷Концерттік бағдарлама Қазақстанның бұл этнос үшін тыныштық пен бейбітшілікті сақтап, талай ұлттың басын бір шаңырақтың астында ұйытып ұстап отырған Достық патшалығы сияқты және туған Отаны саналатындығы, әсем табиғатымен көркем екендігін дәріптейтін  немістер бірлестігінің мүшесі,  «Зингэндэ Хэрцен» вокалдық тобының әншісі Татьяна Алехинаның Қазақстан туралы шығарған авторлық өлеңінен басталды.

Бұдан соң хореографиялық  «Эремурус» тобының орындауындағы «Қазақ биіне» ұласты. Әріқарай залды құйқылжыта алып кеткен әндер мен ырғала көрсетілген билер, ду шапалақ, тамашаланған театралды көріністер, ұлттық киімдерімен жүріп қырманды сомдай білген Немістер этномәдени бірлестігінің үлкенді-кішілі шығармашылық топтары жиналған қауымға шынымен де егін жинау алқабында жүргендей күй кештіріп, тамаша өткізілген концерттік бағдарламаларымен көрерменнің көңілінен лайықты орын ала білді.

Ерекше атап өтейік, мерекелік концерт сахнасында сондай-ақ, ең кішкентай қатысушылар —«Sternchen» и «Zwerge» құрама топтарының бишілерінің билері,   «Ювель» вокалдық-аспаптық тобының әні мен биі, сахнада «Репка на новый лад» ертегісін қойып берген «Talente» театралдық  студиясының көрсетілімі,  «Wir haben die Wahl» -«И лететь по белому свету», «Не жалей», «Хопсаполька»,  «Полька, полька,зажигаем!» т.б.әндері, Т.Алехинаның «Күз» өлеңі, «Лесорубы» «Полька», «Самовар»  атты билері тамашаланды.

Шара соңы «Немістер қауымдастығы» ҚБ басшысы Александр Гибнер мен “Қоғамдық келісім” КММ басшысының орынбасары Сәуле Құрманқұлованың Республика күнімен құттықтауы және

«Wir sind zusammen!» — «Мы вместе!” әнімен аяқталды.

«Ақпараттық жұмыс және қоғаммен байланыс» бөлімі

Республика күнін мерекелеу қарсаңында, бүгін – 21 қазан күні Достық үйінде «Қазақстан-біздің ортақ үйіміз» атты дөңгелек үстел өтті.

Ұйымдастырушылар-Жамбыл облыстық Тәжіктер этномәдени бірлестігі.

Мақсаты — этносаралық қатынастарды, қазақстандық бірегейлікті нығайту, бейбітшілік пен келісімді сақтау.

Іс-шараға тәжік орталығының мүшелері, әйелдер кеңесі, басқа да ЭМБ және БАҚ өкілдері қатысты.

«Біз Республикамыздың Тәуелсіздігі қалыптасқан кезден бастап осы тарихи ұлттық мерекені атап өтудеміз», — деп атап өтті

«Жамбыл облысы бойынша тәжіктердің тәжік этномәдени орталығы»  ҚБ республикалық филиалының төрағасы Махкам Орифов өз сөзінде.

Дөңгелек үстелдің барлық қатысушылары қазақ ата-бабаларының күш-жігерінің арқасында осы тәуелсіздікке қол жеткізілгенін және барлық этностар мен ұлыстардың Қазақстанда тығыз достықта, бейбітшілік пен келісімде өмір сүріп жатқанын айта келе, әділетті Қазақстанның құрылысына өңірде кім қандай үлес қосты, қосып жүр – осы жөнінде сөз қозғады.

Президент Қасым-Жомарт Тоқаевтың сарабдал саясатының арқасында біздің көпэтносты Республикамыз экономикада, саясатта, құрылыста және индустрияда күн сайын жаңа жетістіктерге қол жеткізуі де атап өтілді. Солардың бірі — барлық этностар мемлекеттік тілді үйрене бастағандығы, жастардың татулықта, бірлікте екендігі, т.б.

Сонымен қатар, қалалық Өзбек мәдени орталығының басшысы Әбдірахман Зайнутдинов та: «Қазақстан-біздің ортақ үйіміз! Біздің әрқайсымыз өз Отанымызға сүйіспеншілікпен қарап, бағалауымыз қажет. Біз балаларымызды Отанға деген патриотизм рухында тәрбиелеуіміз керек. Біздің күшіміз —бірлік пен өзара түсіністікте»,—деді өз сөзінде.

Шара соңында Тәжік этномәдени орталығының басшысы Махкам Жұманазарұлы барша қазақстандықтарға зор денсаулық, отбасылық бақыт, амандық, қуаныш, достық және бейбітшілік тілеп, келе жатқан ұлттық мереке – Республика күнімен құттықтады.

«Ақпараттық жұмыс және қоғаммен байланыс» бөлімі