Қоғамдық келісім мекемесінде 1-наурыз Алғыс күніне орай ұйымдастырылған «Алғысым саған, туған ел» атты Достық үйіне саяхат экскурсия жалғасуда.
Бұл жолы Жамбыл жеріндегі этнос өкілдерінің қара шаңырағына айналған Достық үйіне келген жас қонақтар Жамбыл атындағы №5 мектеп гимназиясының оқушылары.
Қонақтарға мекеменің жұмысы, этностық бұйымдар және ғимарат сәулетімен Көрме залы меңгерушісі Жазира Шілдебаева таныстырды.
Ақпараттық жұмыс және қоғаммен байланыс бөлімі
Сіздерді 1 наурыз – Алғыс айту күнімен шын жүрекпен құттықтаймын!
Жыл құсындай болып жеткен көктемнің алғашқы мерекесі саналатын бұл күнді барша қазақстандықтар үлкен қуанышпен қарсы алады.
2016 жылдан бері тойланып келе жатқан Алғыс айту күні – барлық қазақстандықтарға арналған, қоғамдағы бейбітшілік пен келісімді, еліміздің бірлігі мен тыныштығын айшықтайтын жалпыұлттық мереке.
Бұл күн – тарихтың түрлі кезеңдерінде қазақ халқының бауырмалдығына бөленген түрлі этнос өкілдерінің қазақ жері мен қонақжай қазақ халқына деген терең тағзымының белгісі.
Сондай-ақ, 1 наурыз – ҚХА-ның келісім және этносаралық өзара ықпалдасу институтының құрылған күні болып табылады.
Тәуелсіздік жылдарында ынтымақтастық пен өзара қамқорлық сияқты берік құндылықтар біріктіруші күшке айналып, еліміздің болашағына деген нық сенімін қалыптастырды.
Баршамызды қайырымдылыққа, мейірімділікке, жақсылыққа үндейтін осынау мерекеде әр отбасыға бақ-береке, бейбіт өмір және табыс тілеймін!
Егемен еліміздің бірлігін нығайту мен берекесін еселеу жолындағы игілікті істеріңіз үшін баршаңызға алғыс айтамын!
Мухабат Турдыева, Жамбыл облыстық Махмұт Қашғари атындағы Ұйғыр этномәдени қоғамдық бірлестігінің төрағасы
Жамбыл ауданы, Гродеково орта мектебінде 1 наурыз – Алғыс айту күніне арналған «Достық пен бірлік ынтымақ негізі» атты тәрбиелік іс- шарасы өтті.
Балалардың сыйластық құндылығы туралы түсініктерін кеңейту, ризашылық пен алғыс туралы кеңес беру, үлкен-кішіге деген сүйіспеншілігін, сыпайылық қарым – қатынасын дамыту іс-шараның басты мақсаты.
Сондай ақ, жиын барысында қатысушылар Қазақстан халқы Ассамблеясының құрылған күні – 1 наурызды жыл сайын барлық этностардың атап өтетінін айтып, бір-біріне және қуғын-сүрінге ұшыраған халықты бауырындай қабылдаған қазақ халқына ризашылық білдірді.
«Ақпараттық жұмыс және қоғаммен байланыс» бөлімі
2024 жылғы 21 ақпанда ZOOM платформасында ҚР Мәдениет және ақпарат министрлігі этносаралық қатынастарды дамыту комитетінің төрағасы Ғалым Нұрмағамбетұлы Шойкиннің қатысуымен Республикалық әдістемелік кеңестің онлайн-отырысы өтті.
Іс-шараға «Қоғамдық келісім» КММ, өңірлік Достық үйлерінің қызметкерлері қатысты.
Отырыс барысында ҚХА құрылымдары мен этномәдени бірлестіктермен жұмыс істеу тәсілдерін жандандыру, ақпараттық жұмысты ұйымдастыру, «Қоғамдық келісім» КММ және Достық үйлерінің қызметін қайта форматтау мәселелері қызу талқыға түсті.
Іс-шараның ең маңызды сәті — ҚХА мақсаты мен міндеттерін іске асыру жөніндегі жұмыс жоспарының жобасын ұсыну болды. Бұл жоба этномәдени бірлестіктердің жұмысын жандандыруға, жүйелі жоспарлауға және неғұрлым тиімді өзара іс-қимылға бағытталды.
Сонымен қатар, аудитория үшін Қоғамдық келісім КММ қызметін бағалау тетігі, жаңа жүйедегі қоғамдық аккредиттеу ережелері, «Алғыс айту» күніне арналған «Арайлы Атамекенім» челленджін орайлы өткізу сөз болды.
Сондай-ақ, алдағы «Алғыс айту» мейрамы тек этнос өкілдеріне ғана емес, жалпы бүкіл қазақстандарғв қатысты екені де баса айтылды. Жалпы, Ғалым Нұрмағамбетұлы ҚХА Баспасөз қызметінің жұмыстарына да жаңашылдық ендіруді тілге тиек ете келе өңірлік КММ жұмыстарының жаңа жүйелерін таныстыру барысында түсінікті де, көңілге қонымды бағыт-бағдар берді.
Оңтайлы отырыс барысында мәдениетаралық өзара іс-қимылды, этносаралық коммуникацияларды кеңейту, этноәлеуметтік топтарды біртұтас азаматтық отбасына біріктіру, мемлекеттік тіл, іс-шараларды өткізу кезінде мемлекеттік рәміздерді пайдалану туралы да нақты тапсырмалар қатары талқыланды.
«Ақпараттық жұмыс және қоғаммен байланыс» бөлімі
Мемлекет басшысы Қ.Тоқаевтың этносаралық қатынастарды нығайту және ҚХА-ның жоғарғы, орта оқу орындарымен жұмысты күшейту жөніндегі тапсырмасын орындау мақсатында 2024 жылғы 16 ақпанда Достық үйінде «Ассамблея жастары» РҚБ, «Қоғамдық келісім» КММ және Ш.Мұртаза атындағы халықаралық Тараз инновациялық мемлекеттік университеті бірлесіп, Алғыс айту күніне арналған бірқатар іс-шараларды өткізді.
Алғашқы іс-шара Достық үйіне экскурсиядан басталды. Оны Көрме залының меңгерушісі Жазира Шелдебаева өткізді.
Қатысушылар мекеменің жұмысы туралы анығырақ біліп, этностардың көрме экспонаттарын тамашалады.
Екінші іс-шара «Бір халық, Бір ел, бір болашақ» деп аталды.
Бұл іс-шара екі алаңда өтті. Бірнші алаңның спикерлері өңірлік ҚХА төрағасының Қоғамдық орынбасары Асқарбек Сейлханов, ректордың кеңесшісі Асқар Абдуалы, ҚХА Ғылыми зерттеу тобының өкілі Парида Мамедова болды.
Екінші алаңның спикерлері — «Қоғамдық келісім» КММ басшысының орынбасары Сәуле Құрманқұлова, «Ассамблея жастары» РҚБ төрайымы Хамида Тұрдыева, «Қазақстандық Татар және башқұрт конгресі» РҚБ филиалының жетекшісі Фарида Нақыш.
Спикерлер тарапынан мемлекеттік саясаттың басымдықтары, жаңа, әділ Қазақстанның құрылысы, халық үніне құлақ асатын Мемлекет, этносаралық қатынастар, теңдік пен азаматтық құқықтар, бірлік пен келісімді нығайту, ассамблея тарихы мен жұмысы, медиа сауаттылық, этномедиация және т. б. ҚХА тақырыптары төңірегінде студенттер назарына маңызды ақпараттар берілді.
Ақпараттық жұмыс және қоғаммен байланыс бөлімі