Archive for year: 2023

2023 жылдың 5 сәуірінде Тұрар Рысқұлов ауданында Жамбыл облысы әкімдігінің «Бейбітшілік пен келісім» жобасын жүзеге асыру бойынша кең көлемді іс-шаралар ұйымдастырылды.

Жамбыл облысы әкімдігінің ішкі саясат басқармасының басшысы Ұлана Сламбекова, «Қоғамдық келісім» КММ басшысы Жинақбаева Мүбарак Қасымқызының қатысуымен аталмыш ауданда алғаш рет «Мәдениетті ана – Мәдениетті ұлт» республикалық жобасы аясында, тәжірибе алмасу мақсатында «Ел анасы» ауыл әйелдері Аналар кеңесінің отырысы өтті.

Кездесуде Аналар кеңесінің төрайымы Түзел Сейілбайқызы, білім саласының ардагері Есенкүл Мұхтарқызы, Құлан ауылдық Ш.Уәлиханов атындағы орта мектеп директоры Шолпан Дайрабаева, Т.Рысқұлов ауданы Ардагерлер кеңесінің төрағасы Бижанов Қожайхан Қазыбайұлы,Жарлысу ауылы,Қарақыстақ округы Аналар кеңесінің төрайымдары келелі мәселелерді көтеріп, өз ұсыныстарын ортаға салды.

Сонымен бірге, өңірлік ҚХА Аналар кеңесінің белсенді мүшесі Аракси Плетнева да облыстық Аналар кеңесінің атқарған ауқымды іс-қимылдары жөнінде сөз сөйледі.

Өз кезегінде Ш.Дайрабаева көпшілікті өзі басшылық етіп отырған мектеп оқушыларының ата-аналарымен қарым-қатынасы жұмыстарының бағытымен және әйелдер кеңесінің атқаратын міндеттерімен танысып-білісуге шақырды.

Қазіргі қоғам бала тәрбиесіне айрықша мән беруді талап етеді. Осы орайда жиынға қатысушылар жасөспірімдер арасында кездесетін түйткілді мәселелерге (ерте жүктілік,зиянды әдеттерге әуестік) кеңінен тоқталып, алдын-алу шаралары жайлы сөз қозғады.

Тәрбие көзінің бірі – мектеп болғандықтан ондағы психолог мамандардың жұмысының сапасын арттыру мәселесі де қарастырылды.

Отырыс барысында аудандағы Аналар кеңесінің жұмысының бағыты, бүгінгі күні өз күші, ынта-жігерімен жетістікке жеткен әйелдер қауымының игі істері аталып өтті.

Жас ұрпақты тәрбилеуде ұлттық мұралар мен құндылықтарды насихаттау да маңызды рөл атқарады. Атадан балаға мирас болып келе жатқан салт-дәстүрлер қай уақытта болса да өміршеңдігін жоғалтқан емес. Оны келешек ұрпақтың бойына дарыту – басты міндеттердің бірі. Осы мақсатты ұстанғандар қатарында Т.Рысқұлов ауданындағы Қарақыстақ ауылында қайтарымсыз несие алу арқылы қазіргі трендте жүрген қазақы заманауи нақыштағы тақия, корсет, этножилет тігуді қолға алған екі нәзік жанды да бар.

Сондай-ақ, дәл осы ауылда жас келіндер арасында ұлттық дәстүрлерді дәріптеу мақсатында, жас қыздарға үлгі-өнеге ретінде нан жаюдан байқау өткізілді. Мұндай тәлім-тәрбиенің өзі өскелең ұрпаққа рухани азық болатынына сенім мол.

Ақпараттық жұмыс және қоғаммен байланыс бөлімі

Ағымдағы жылдың 3 сәуірінде Жамбыл облысы әкімдігінің ішкі саясат басқармасы мен Қордай ауданы әкімдігінің ұйымдастыруымен Қазақстан халқы Ассамблеясы жанындағы «Ассамблея жастары» республикалық қоғамдық бірлестігінің өкілдері Қордай ауданы жастарымен кездесіп, түрлі іс-шараларға белсене қатысты.

Ең алдымен, Қордай ауданы, Масаншы ауылында орналасқан  «Қазақ халқына мың алғыс» ескерткіші маңына «Ассамблея жастары» РҚБ ағаш отырғызды.Игі шараға аталмыш бірлестіктің төрағасы Тимур Джумурбаев бастаған жұмысшы топ та атсалысты. Мұндағы мақсат- ауыл жастарын қоршаған ортаға ұқыпты қарауға, туған жерді қастерлеуге, көшелерді көркейту – көгалдандыруға шақыру.

Сондай-ақ, облыс әкімінің орынбасары Еркін Үйсімбаев, Жамбыл облысы әкімдігі ішкі саясат басқармасының «Қоғамдық келісім» КММ басшысы Жинақбаева Мүбарак Қасымқызы және «Ассамблея жастары» РҚБ өкілдері Масаншы, Сортөбе және Бұлар батыр ауылдарының жастарымен кездесті.

«Ассамблея жастары» РҚБ төрағасы Т.Джумурбаев, «Қазақстан дүнгендерінің республикалық этномәдени орталығы» ҚБ төрағасы З.Махусеев, «Қазақстан ұйғыр жастары одағы» ҚБ төрағасы Р.Қайрыев, облыстық «Атамекен» ұлттық кәсіпкерлер палатасының өкілі, облыстық Қорғаныс істері жөніндегі департаментінің өкілдері келесі кезекте Масаншы ауылдық мәдениет үйінде Масаншы, Сортөбе, Бұлар батыр, Ауқатты және Қаракемер ауылдық округтерінің жастарымен кездесу өткізді.

Емен-жарқын жүздесу барысында сөз алған «Ассамблея жастары» РҚБ төрағасы Т.Джумурбаев мұндай жиындар әрдайым жаңа идеялардың жаршысы болатынын, сол арқылы жергілікті жастардың ойынан, ұсыныстарынан хабардар болып, бірге жұмыс істеуге мүмкіндік ашылатынын жеткізді.

Дәл осындай кездесу Масаншы ауылы №12 Жүсіпбек Аймауытов атындағы орта мектебінде өтті. Мұнда «Ассамблея жастары» республикалық қоғамдық бірлестігінің өкілдері ұйымның мектеп оқушыларына ұсынатын мүмкіндіктері, өз жобалары жайында, сондай-ақ, жастар саясатын қолдауға бағытталған мемлекеттік бағдарламалар төңірегінде сөз қозғалды. Еркін форматтағы пікір алмасу ретінде ұйымдастырылған кездесуде қатысушылар да қызықтырған сауалдарын жолдап, белсенділік танытты.

Осыдан кейін Масаншы ауылдық Әл-Фараби атындағы №50 орта мектебінің қазақ сыныптарының жұмысымен танысқан жұмысшы топтың өкілдері ұлт бірлігінің басты факторы мемлекеттік тіл екенін айтып, қазақ тілінің этносаралық қарым-қатынас тілі ретіндегі қызметін нығайтуға, өзге ұлт өкілдерін мемлекеттік тілді үйренуге ынталандыру жұмыстарын жүйелі жүргізуге баса мән беру қажеттігіне тоқталды.

Сонымен қатар, ауданымыздың  аймағына іс-сапармен келген меймандар Масаншы ауылындағы №13 Міржақып Дулатұлы атындағы орта мектебінде, Сортөбе ауылындағы №18 Әлия Молдағұлова атындағы орта мектебінде мектеп оқушыларымен кездесу өткізді.

Келесі кезекте Сортөбе ауылындағы №16 М.Лермонтов атындағы орта мектебінің музейі мен И.Буларов атындағы тарих кабинетінің жұмысымен танысты.

Қазақстан халқы Ассамблеясы жанындағы «Ассамблея жастары» республикалық қоғамдық бірлестігінің өкілдері бұл күні жастардың тың бастамаларын тыңдап, жастарды қолдауға бағытталған жобаларды талқылау мақсатында Бұлар батыр атындағы орта мектебінде де ауыл жастарымен кездесті. Басқосуда жастардың қоғамның қозғаушы күші екендігін тілге тиек еткен түрлі сала мамандары өскелең ұрпақты елдегі кез келген өзгерістерден тыс қалмай, белсенді болуға, халықтың ынтымақ-бірлігін нығайтуға қоғамның бір бөлшегі ретінде атсалысуға шақырды.

Қордай ауданының Масаншы, Сортөбе және Бұлар батыр ауылдық округтерінде ЭМБ өкілдерімен, ауылдық округ жастарымен фокус топтық зерттеулер жүргізілді.

Айта кету керек,этномәдени бірлестіктердің өкілдері «Ассамблея жастары» РҚБ төрағасы Тимур Джумурбаевтың қолынан ҚХА төрағасының орынбасары Марат Әзілхановтың Алғыс хаттарын алды.

Марапатталғандар қатарында — Қордай ауданы этномәдени бірлестіктер қауымдастығының заңды тұлғалар бірлестігінің өкілі Нұрали Ивлеев, Қордай ауданы «Вайнах»  шешен-ингуш этномәдени бірлестігінің басшысы Эльсихан Хазбулатов, осы ауданның «Ахыска» түрік этномәдени бірлестігінің мүшелері Рамиз Әбілқасымов, «Ийнпан» Масаншы ауылдық округінің Дүнген этномәдени бірлестігінің мүшесі Лочь Зенебе, Сортөбе ауылдық округінің дүнген этномәдени бірлестігі Исмаил Хуров, Әзірбайжан «Әзери» этномәдени бірлестігінің Худаверді Нұриев, Жамбыл облысының «Вынхуа» дүнген этномәдени орталықтарының қоғамдық бірлестігі Абу-Ханифе Люшер.

«Ақпараттық жұмыс және қоғаммен байланыс» бөлімі

Ағымдағы жылдың наурыз айында Winrock International ұйымы АҚШ-тың USAID халықаралық даму агенттігінің және тәжік ұлты мигранттарының өкілдері үшін ҚР еңбек заңнамасының жобасы шеңберінде іске асыратын «Орталық Азиядағы қауіпсіз көші-қон» тренингі өтті. Іс-шара олардың өмірлік дағдыларын дамытуға қолдау көрсету мақсатында өткізілді.

Аталған тренингтің спикерлері Тараз – АИТВ-ға қарсы қоғамдық бірлестігінің төрағасы Рамиль Перзадаев, «Мирэкл» ҚБ қызметкері Гүлсара Тухтамышева және ҚХА медиаторы, азаматтық құқықтарды қорғау жетекшісі Ирина Федорова және ҚХА кәсіби медиаторы болды.

Өз сөзінде Рамиль Перзадаев тыңдаушыларды еңбек мигранттарын консультациялық қолдау бойынша өткен жылғы жұмыс тәжірибесімен таныстырды және «Адам саудасының құрбаны болмау жолы» кейсін ұсынды. Ол жыл сайын жұмыссыздық пен жұмыс күшінің құнсыздануына байланысты Орталық Азия елдерінің миллиондаған тұрғындары жұмыс іздеп үйлерін тастап, олардың көпшілігі еңбек және жыныстық қанау тәуекелдеріне ұшырайтынын атап өтті және өздерін осы тәуекелдерден қалай тануға және қорғауға болатыны туралы теориялық және практикалық білімдермен таныстырды.

«Бүгінде әлемде адам саудасы және мәжбүрлі еңбек сияқты қылмыстар адамзатқа үлкен қауіп төндіретіні ешкімге құпия емес. Ол үшін «Орталық Азиядағы қауіпсіз көші-қон» жобасы әзірленді, оның мақсаты адам саудасына қарсы іс-қимыл жасау, жәбірленушілерді қорғау және үкіметтердің, азаматтық және жеке секторлардың әлеуеті мен өзара жауапкершілігін күшейту арқылы қауіпсіз көші-қонға жәрдемдесу. Жоба мигранттарды қолдау, олардың еңбек қанауына осалдығын азайту және адам саудасынан зардап шеккен адамдарды қорғау бойынша жұмысты жақсартуға ықпал етеді. Сіздердің әрқайсыларыңыз адам саудасы және мәжбүрлі еңбек жағдайлары туралы тікелей құқық қорғау органдарына хабарлай аласыз!»,- деді Рамиль Оспанұлы.

Гүлсара Туктамышева балалармен және олардың ата-аналарымен түсіндіру жұмыстарын жүргізді.

«Қазақстанға жыл сайын негізінен жұмыс мақсатында 2 миллионнан астам адам келеді. Көбінесе ересектер балалармен бірге келіп, оларды қауіпті көші-қон процесіне тартады. Мұндай балалар кейде мектепте қорлаудың, атап айтқанда мазақ ету мен қорлаудың қайнар көзіне айналады», – деп атап өтті Ол.

Ирина Федорова шетелден келген азаматтардың құқықтары мен міндеттері, атап айтқанда заңсыз жұмысқа орналасуға және жалақыны төлемеуге байланысты құқықтардың бұзылуы туралы айтып берді. Оның сөзі халықтың мигранттардың құқықтары, қауіпсіз көші-қон тәсілдері және мигранттардың қабылдаушы қоғамдастыққа қосқан үлесі туралы хабардарлығын арттыруға бағытталған.

Сабақтарда алынған теориялық, практикалық білім мен ұсынымдар мигранттың еңбек құқықтарын сақтау мәселелерін шешуге көмектеседі және олардың адамдарды қанау мен сауданың барлық түрлеріне осалдығын төмендетеді деп үміттенеміз.

Өңірлігіміздің ерекшеліктерін ескере отырып, этносаралық ахуал бақылауымызда үнемі сақталып отырады және кейбір кезде көші-қон ондағы қақтығыс факторы болуы мүмкін. ҚХА медиациясының міндеттерінің бірі жанжалдардың уақтылы алдын алу және оларды сәтті шешу болып табылады! Достық байланыстар орнату және бейімделуге, жұмыс іздеу және жұмыспен қамту жағдайларына көмектесу үшін көп жұмыс атқарылуда! Бұл жергілікті және аймаққа келген мигранттар үшін әртүрлі қақтығыстардың пайда болу қаупін болдырмайды.

Ақпараттық жұмыс және қоғаммен байланыс бөлімі

2023 жылдың 30 наурызында Тараз қаласында «Қоғамдық келісім» КММ-де Жамбыл облысы әкімінің орынбасары Еркін Үйсімбаевтың қатысуымен Жамбыл облысы ҚХА Кеңесі мен Ақсақалдар кеңесінің отырысы өтті. Оған жоғарыда аталған Кеңестердің, Жамбыл облыстық «Ассамблея жастары» қоғамдық бірлестігінің өкілдері қатысты.

Іс-шара модераторы Еркін Үйсімбаев отырыстың күн тәртібіндегі бірқатар мәселелерге тоқталды. Нақтырақ айтқанда:

1.Өңірлік ҚХА Ақсақалдар кеңесінің төрағасы мен құрамын бекіту және жұмыс жоспарларымен танысу;

2. Облыстық ҚХА кеңесінің құрамына өзгерістер енгізу;

3.Өңірлік ҚХА-ның 2023 жылға арналған жоспары;

4.2023 жылы 26-27 сәуірде өтетін ҚХА-ның XXIII сессиясына дайындық барысы туралы .

Сұрақтарға көшпес бұрын модератор Ақсақалдар кеңесінің құрылу алғышарттары мен тарихына тоқталып, 2022 жылғы 25 қарашада өткен ҚХА Кеңесінің отырысында нақты шешім қабылданғанын, консультативтік-кеңесші орган ретінде ҚХА Ақсақалдар кеңесі құрылғаны жайлы сөз қозғады.

Жиын барысында Жамбыл облысы әкімдігі ішкі саясат басқармасының «Қоғамдық келісім» КММ басшысы Жинақбаева Мүбарак Қасымқызы сөз сөйлеп, Жамбыл облыстық ҚХА Ақсақалдар кеңесінің төрағасы мен өкілдерін сайлауға үміткерлер тізімін жариялады.

Бұдан соң, дауыс беру арқылы Ақсақалдар кеңесінің төрағасы сайланып, осы Кеңестің құрамы бекітіліп, жұмыс жоспарымен таныстырылып, алдағы жоспарлар белгіленді.

Келесі сөздің кезегі өңірлік ҚХА кеңесінің құрамы мен қызметіне қатысты мәселелер бойынша Жамбыл облысы әкімдігінің ішкі саясат басқармасы басшысының орынбасары, облыстық ҚХА хатшылығының меңгерушісі Сержан Қуанышовқа берілді.

Жиын соңында қатысушылар түрлі сауалдар қойып, тұшымды жауаптар алды. Сондай-ақ, пікірлер мен ұсыныстар да тыңдалды.

Ақпараттық жұмыс және қоғаммен байланыс бөлімі

Наурыз мерекесі – жалпы түркі халықтарының мерекесі, ұрпақтар жалғасы мен рухани қазына болып табылады. Бұл мереке ел бірлігіне, тыныштығына ықпал етеді. Күн мен түннің теңеліп, жан-дүниені тірілтіп, шаруаның бір малы екеу болып, арқа-басы кеңіп, аққа аузы тиген, қыстың ызғарынан құтылып, алдағы шуақты күндерден үміттендірген Наурыз мерекесі де келіп кетті.

Ағымдағы жылдың наурыз айында Жамбыл облысы әкімдігінің «Жұмыспен қамтуды үйлестіру және әлеуметтік бағдарламалар» басқармасының тапсырысы бойынша, бас бостандығынан айыру мекемелерінен босаған адамдарға арналып, Ұлыстың ұлы күні — Наурыз мерекесі атап өтілді. Мереке Жамбыл облысы бойынша қылмыстық-атқару жүйесі департаменті мен «Жаңа шабыт» республикалық қоғамдық бірлестігі арасындағы меморандум негізінде ұйымдастырылды.

Бас бостандығынан айыру мекемелерінен босаған адамдармен прокуратура және Тараз қалалық №1,2,3 пробация бөлімінің қызметкерлері Наурыз мерекесімен құттықтап, құқықтық түсіндірме жұмыстарын жүргізді. Кездесу барысында сотталғандарға жаза өтеу барысында пробация қызметімен белгіленген тәртіп бойынша сот жүктеген міндеттерді сақтап, заң талаптарын орындауға шақырды.

Сонымен қатар, «Жаңа шабыт» республикалық қоғамдық бірлестігінің мамандары пробация есебіндегі мұқтаж азаматтарға әлеуметтік-құқықтық, психологиялық  көмек, жұмыссыз адамдарды жұмысқа орналастыру бағытында тиісті көмектерді көрсететіндігін жеткізді.

Кездесу барысында, Наурыз мерекесі өтіп кетсе де, әлеуметтік-мәдени қызметтерді ұсыну мақсатында, концерттік бағдарлама ұйымдастырылып, жұртшылыққа қазақтың күйлері мен әуендері шырқалды. Осыған қоса, іс-шараға қатысушыларға тары, арпа, бидай, бұршақ, күріш сияқты жеті түрлі дән мен ақ қосылған Наурыз көже таратылды. Сол жерде қазанға пісірілген ыстық палау мен бауырсақтар, тәттілер үлестірілді, ыстық шай берілді.

Алдағы уақытта осы меморандум аясында пробация есебінде тұрған азаматтарды спорттық шараларға тартып, әр-түрлі көмек түрлері көрсетілетін болады.

Ұлыс оң болсын, ақ мол болсын, ағайын!

Талғат Ахымбетов,  

«Жаңа шабыт» республикалық

қоғамдық бірлестігінің төрағасы