ӨНЕРІМ САҒАН ҚАЗАҚСТАН

/in /by

2023-ші жыл қортындыланды. Жамбыл облысы әкімдігі ІСБ «Қоғамдық келісім» КММ ұйымдастыруымен Достық үйінде «Өнерім саған Қазақстан» атты этномәдени берлестіктер фестивалі өтті.

Салтантты жиын «Қоғамдық келісім» КММ басшысы Мүбарак Қасымқызы Жинақбаеваның құттықтау сөзімен басталды. Өткен жылы атқарылған ауқымды істерді ауыз толтыра айтқан мекеме басшысы алдағы жылдың жоспарымен бөлісіп, ел игілігі мен бірлігінің мызғымас беріктігі жолында атқарған әр іске береке тілеп серіктестер мен этнос өкілдеріне ақжарма тілегін арнады.

Фестиваль барысында жыл бойы ҚХА шеңберіңінде жұмыла жұмыс істеп белсенділік танытқан серіктестер, облыстық ҚХА мүшелері мен құрылымдары, этномәдени бірлестік басшылары мен өкілдері, журналистер, медиаторлар, ЭМБ өкілдерінен құрылған ансамбльдер және өнерпаздар марапатталды.

Мерекелік жиында өңірдің белсенді өнерпаздары мен этнос өкілдері ән мен жырдан шашу шашты.

Марапат алып мадақталған қонақтар алғыс айтып, естелік суреттерге түсіп тарқасты.

«Ақпараттық жұмыс және қоғаммен байланыс» бөлімі

ТАРАЗДА ҚХА ЖУРНАЛИСТЕР КЛУБЫНЫҢ КЕҢЕЙТІЛГЕН ОТЫРЫСЫ ӨТТІ

/in /by

Биылғы жылдың 21 желтоқсанында «Қоғамдық келісім» мекемесінде Жамбыл облыстық ҚХА Журналистер клубының кеңейтілген отырысы өтті.

Іс-шараны «Қоғамдық келісім» КММ басшысының орынбасары Сәуле Құрманқұлова құттықтау сөзімен ашты. Ол қатысушыларды бірлескен жемісті жұмысы үшін алғыс айтып, келе жатқан Жаңа жыл мерекесімен құттықтап, алдағы күндеріне сәттілік тіледі.

Клуб отырысына республикалық, облыстық және қалалық БАҚ тілшілері, ҚХА Журналистер клубы өкілдері қатысты.

Мәжілісті модератор ретінде «Қоғамдық келісім» КММ «Ақпарат және қоғаммен байланыс» бөлімінің бас сарапшысы, бөлім басшысы Бибігүл Шахзада жүргізіп отырды.

Күн тәртібіндегі қаралған мәселелер қатарында Журналистер клубының іс-қимылдары бойынша атқарылған жұмыстар есебі, алдағы жылға жоспары, сондай-ақ, 2023 жылдың Жамбыл облысы ҚХА Журналистер клубы мүшелерінің БАҚ және әлеуметтік желілердегі материалдарының мониторинг қорытындысы, жуырда Алматы қаласында өткен Республикалық Журналистер клубы отырысы туралы айтылды.

Нақтырақ, «Ақпараттық жұмыс және қоғаммен байланыс» бөлімінің сарапшысы Ольга Макарова Журналистер клубының мүшелерін 2023 жылдың басынан бері БАҚ пен әлеуметтік желілердегі мониторинг нәтижелерімен таныстырды. Есепті кезеңде жыл бойына ҚХА ақпараттарын жариялауда 2884 материал, оның ішінде әлеуметтік желілерде, Tik Tok, Telegram және YouTube арналарында – 2053, республикалық және облыстық телеарналарында – 133, ҚХА-ның республикалық және облыстық сайттарында – 326, республикалық және облыстық баспа БАҚ – 372 басылым шыққаны жөнінде ақпарат берілді.

Негізінен, әлеуметтік желілер мен мультимедиялық порталда ақпараттық материалдар басым екені атап өтіліп, сұхбат, репортаж, аналитикалық, публицистикалық сапалы жарияланымдарды баспа БАҚ-та көбейту айрықша көзделді.

Іс-шарада журналистер клубының мүшелерімен қалалық «Жамбыл-Тараз» газетінің тілшісі Дионисий Пляшешник пен шара модераторы Бибігүл Шахзада өңірлік БАҚ өкілдерімен Республикалық Журналистер клубының кеңейтілген отырысында алған білімдері, пайдалы кеңестер, тың идеяларын ортаға салып, өз алған әсерлерімен бөлісті.

Сонымен қатар, облыстық «Ақ жол» газетінің тілшісі Марат Кулибаев пен «Евразия-1» республикалық телеарнасының меншікті тілшісі Ұлдана Жұбай да өз ой-пікір, ұсыныстарын сөз етті.

Ерекше атап өту керек, облыстық Журналистер клубының мүшелері өңірлік ассамблея этномәдени бірлестіктердің жұмыстары мен іс-шараларын БАҚ беттерінде, теледидарда үзбей жариялағандығы және «Ақпараттық жұмыс және қоғаммен байланыс» бөлімінің қызметкерлерінің жедел ақпарат беріп, тығыз ынтымақты байланыста болуы арқасында өзге өңірлер арасында жетекші орынға ие болғандығы – біріге жасалған игілікті істің нәтижесі екендігі де тілге тиек етілді.

Бұған қоса, ҚР Президент аппараты, ҚР Мәдениет және ақпарат министрлігі, «Қоғамдық келісім» РММ үйлестіруі, ұйымдастыруымен өткен Республикалық Журналистер клубында берілген біліктілік – этносаралық қақтығыстардың алдын алу, араздық тілі, жалған ақпараттарға жол бермеу, журналистік этиканы сақтау тәрізді ақпараттық түсіндіру жұмыстарын жүргізу бойынша да облыстық журналистермен түйіні шешілмей жүрген бірқатар мәселелер талқыланды.

Отырыс соңында «Қоғамдық келісім» келісім басшысының орынбасары С.Құрманқұлова мекеме атынан мәжіліске қатысқан БАҚ өкілдеріне шағын сыйлықтар – облыстық ҚХА туралы жинақ-кітап сыйлыққа табыс етті.

«Ақпараттық жұмыс және қоғаммен байланыс» бөлімі

ТАРАЗДА «МӘМІЛЕ» КЛУБЫНЫҢ ЖҰМЫСЫ ҚОРЫТЫНДЫЛАНДЫ

/in /by

«Қоғамдық келісім» мекемесінің ұйымдастыруымен Достық үйінде «Мәміле» қазақ тілі пікірталас клубы жобасының қорытынды отырысы өтті.

Қоғамдық келісім КММ басшысы Мүбарак Жинақбаеваның модераторлығымен өткен аталмыш жиынға клуб мүшелері, этномәдени бірлестік өкілдері, «Ассамблея жастары» РҚБ мүшелері, мемлекеттік тілді меңгерген этнос өкілдері, тіл үйренушілер, БАҚ өкілдері қатысты.

Мәміледе қазақ халқының тарихи және мәдени мұрасын, салт-дәстүрлерін, менталитетін және өмірлік құндылықтар жүйесін зерделеу арқылы мемлекеттік тілді үйрену көзделген.

Бүгін осы мәміле клубының 6 айлық жұмысы қорытындыланды.

Бұған дейін 7 отырысы өткен «Мәміле» пікірталас клубында отбасы, туыстық қатынастар, еліміздің әдебиеті мен тарихына, ұлттық- мемлекеттік мерекелеріміз бен атаулы күндерге, қоғамдағы жастардың мәселелері көтерілді. Әр отырысқа мәдениеттанушы, тарихшы, тілдің кәсіби оқытушылары, креативті, белсенді спикерлер тартылды.

Сондай ақ, бүгінгі «Мәміле» отырысының қонағы «Жамбыл облысы жастар ұйымдарының қауымдастығы» заңды тұлғалар бірлестігінің президенті, қоғам белсендісі Исламбек Дастан дені жастардан құралған пікірталас алаңы жұмысына пікір білдірді.

Қатысушы жастар пікірлері ұнаған тақырыптар қатарына ғалым С.Құлбарақтың ұлы Абайдың өмірі туралы айтқаны және спикерлер Р.Нұрақбаевтың отбасы құндылықтары жайлы сабақтарын ерекше атап өтті.

Ерекше атап өтетіні «Мәміле» клубының қатысушылары жас ерекшелігі және мамандықтары әр алуан бірі – дәрігер, бірі ағылшын мұғалімі, теміржолшы, сондай ақ банк, мәдениет қызметкерлері. Барлығының басын қосқан бір қасиет — мемлекеттік тілді еркін игеруге деген құлшыныс.

Тіл жанашырларына арналған басқосуда Махмұт Қашғари атындағы Ұйғыр этномәдени бірлестігінің төрайымы Мухаббат Турдыеваға арнайы сыйлық берілді.

Айта кетейік, мемлекеттік тілдің қолдану аясын кеңейтуге, мемлекеттік тілді ілгерілетуге байланысты шараларға жыл бойы атсалысып келе жатқан клуб мүшелеріне сертикаттар мен сыйлықтар табысталды.

Аталмыш клуб жұмысы алдағы жылы өз жұмысын қарқынды жалғастыратын болады және онда дәстүрлі жағдайларда қазақ тіліндегі диалогтарда ауызекі сөйлеу дағдылары меңгеріліп, риторика – шешендік өнер игерілмек.

«Ақпараттық жұмыс және қоғаммен байланыс» бөлімі

ӘУЛИЕАТА ӨҢІРІНДЕ «MIRAS» АЙМАҚТЫҚ КЕҢЕСІНІҢ ОТЫРЫСЫ ӨТТІ

/in /by

2023 жылдың 21 желтоқсанында Тараз қаласында азаматтық қоғам мен мәдениетті дамыту «Мiras» аймақтық кеңесі отырысы өтті.

Шарада «Аmanat» партиясы облыстық филиалының басшылығы, «Мiras» аймақтық кеңесінің мүшелері, облыс әкімдігінің басқарма басшылары, орынбасарлары және БАҚ өкілдері болды.

Атаулы жиынға аталған кеңес мүшелері – «Қоғамдық келісім» КММ басшысы Мүбәрак Жинақбаева және «Әулие Ата» Қазақ мәдениеті орталығының төраға орынбасары Айгүл Қабиева да қатысты.

Іс-шара «Ұлы дала» шығармашылық байқауының қатысушылары марапатталған соң, кеңес төрағасы Асқар Абдуалы кіріспе сөзімен жалғасты.

Бұдан соң партияның «Халықпен бірге!» сайлауалды бағдарламасын іске асыру жөніндегі Жол картасы аясында мәдени объектілердің қолжетімділігін қамтамасыз ету және мәдениет саласындағы кадр мәселесі бойынша облыстағы атқарылып жатқан жұмыстардың барысы туралы мәдениет, архивтер және құжаттама басқармасының басшысы Ерлан Жүнісбай сөз сөйледі.

Сонымен қатар, баяндамашылар қатарында партияның Жол картасы аясындағы «Туризмді дамыту» бағыты бойынша облыстағы атқарылып жатқан жұмыстар туралы туризм басқармасының басшысы Біржан Күзембеков және аудандық орталықтандырылған кітапханалар жүйесінің директоры, Жамбыл облыстық мәслихатының депутаты Айтбала Жолмаханова да аудандардағы кітапханалардың бүгінгі ахуалы жөнінде өз ойын ортаға салды.

Отырыс барысында жасалған баяндамаларға қатысты спикерлерге түрлі маңызды сұрақтар қойылып, азаматтық қоғам мен мәдениетті дамытуға орай көңілге қонымды жауаптар алынды.

Шара ел бірлігі мен тірлігінің астарласа дамуы негізінде халық игілігіне қызмет етуді жан-жақты жүйелеу шешімдерімен қорытындыланды.

«Ақпараттық жұмыс және қоғаммен байланыс» бөлімі

ПОВОЛЖЬЕЛІК НЕМІСТЕР ЭТНОСЫНА 100 жыл

/in /by

Тараз қаласы «Қоғамдық келісім» мекемесінде Жамбыл облысы немістер қоғамы «Ein Blick in die Geschichte» виртуалды мұражай клубының отырысы өтті.

«Поволжьелік» немістер республикасының құрылғанына 100 жыл толуына арналған отырысқа этномәдени бірлестік белсенділері қатысты. Аталған кездесуге Жамбыл облысы немістер қоғамының төрағасы Гибнер Александр модераторлық етті.

Жиын «Поволжьелік» немістері республикасының құрылғанына 100 жыл толуына арналған презентация тамашалаумен басталды. Қатысушыларға «Поволжьелік» немістердің тарихы, тағдыры, мемлекеттің дамуына қосқан үлесі туралы айтылды.

Отырыстың соңы еркін түрде өзара пікір алмасумен тәмамдалды.

«Ақпараттық жұмыс және қоғаммен байланыс» бөлімі

ҚАЗАҚСТАН РЕСПУБЛИКАСЫНЫҢ ТӘУЕЛСІЗДІГІ МӘҢГІ ЖАСАСЫН!

/in /by

ҚАЗАҚСТАН РЕСПУБЛИКАСЫНЫҢ ТӘУЕЛСІЗДІГІ МӘҢГІ ЖАСАСЫН!

 

Құрметті Отандастар, жерлестер!

Сіздерді, өңірлік ҚХА мүшелері, этномәдени бірлестіктер, облыстық ҚХА құрылымдары, облыс әкімдігінің ІСБ «Қоғамдық келісім» КММ атынан ел егемендігі заңды қабылданған айтулы датамен шын жүректен құттықтаймыз.

16 желтоқсан — ата-бабамыздың арманы орындалып, жасампаздығымызды жаңа белеске көтерген Тәуелсіздік күні. Тарихқа көз жіберетін болсақ, 1986 жылдың желтоқсаны алаңға шыққан жастардың ерік-жігерінің арқасында егемендік алған елдің бейбітшілігі салтанат құрған сәулелі уақыты.

Тәуелсіздікке деген ұмтылыс халықтың қолы жетпеген сайын асылға айналған, орындалмаған арманы еді. Біз, ХХ ғасырдың аяғында қайта жаңғырған, халқы қайғы-қасіретке қарамастан уақыт сынына қасқайып тұра білген қайратты мемлекетпіз.

Азап пен төзімнің өтеуі, халықты сан ғасырлар бойы зарықтырған заманның жауабы, қанына сіңген еркіндікті аңсаған ата-бабаның орындалған орны бөлек арманы. Бүгінде егеменді ел ретінде танылғанымызға отыз жылдан асып отыр.

Біз үшін қастерлі де қадірлі саналатын Тәуелсіздіктің тұрақты болуының бір көрінісі 140-тан астам ұлт пен ұлыстың бүгінгідей алмағайып уақытта тонның ішкі бауындай ымыралы өмір сүруінде. Себебі, бірліктің берекеге бастайтыны баршамызға мәлім.

Ендігісі Егемен еліміздің басына қонған бағы баянды болса екен деген ыстық тілек. Бұл жолда еліміздің әрбір азаматы мен азаматшаларына қазақтың бас ақыны Абай Құнанбаев айтқандай ыстық қайрат, нұрлы ақыл, жылы жүрек тілейміз.

Ел мерейі үстем боп, азаттықтың ақ туы көгімізде мәңгі желбіресін!

 

Жамбыл облысы әкімдігі ІСБ

«Қоғамдық келісім» КММ басшысы

Мүбәрак Қасымқызы Жинақбаева

бастаған ұжым

«Тәуелсіздік» монументіне гүл шоқтары қойылды

/in /by

Бүгін Ел Тәуелсіздігіне 32 жыл толды. Атаулы мерекеге орай Жамбыл облысы әкімдігінің ішкі саясат басқармасы Тараз қаласындағы «Тәуелсіздік» моніментіне гүл шоқтарын қою рәсімін ұйымдастырды. Салтанатты рәсімге облыстық этнос төрағалары мен өкілдері қатысып, гүл шоқтарын қойды.

 

«Ақпарат және қоғаммен байланыс» бөлімі ‎

Құрметті жерлестер, қазақстандықтар! Атаулы мерекеміз құтты болсын!

/in /by

Құрметті жерлестер, қазақстандықтар! Атаулы мерекеміз құтты болсын!

Тәуелсіздік күні – бұл жетістіктер мен сын-қатерлерге терең талдау жасау мүмкіндігі. Бұл жаңа дәстүр аясында, пафоссыз және формализмсіз жылдың саяси, экономикалық және әлеуметтік қорытындыларын шығаруға себеп болады.

Бұл әрбір азаматтың еліміздің дамуындағы жауапкершілігін, оның рухани құндылықтары мен материалдық әл-ауқатын нығайтудағы қызметін тағы да атап өту үшін маңызды сәт.

Ел бірлігі мен тірлігі бекем болсын!

 

Динара Хатамовна Нуралиева, Республикалық Дүнгендер қауымдастығының белсенді мүшесі, Тараз қалалық 34-мектептің директоры

Тәуелсіздік мерекесі құтты болсын, қымбатты жерлестер, қадірлі Отандастар!

/in /by

Тәуелсіздік мерекесі құтты болсын, қымбатты жерлестер, қадірлі Отандастар!

Тәуелсіз мемлекет – жауапты ұлт және халық үніне құлақ асатын мемлекеттік аппарат.

Сондықтан біздің саяси жүйемізде әлеуметтік сұраныстар мен қоғамдық пікір шешім қабылдау процесіне енгізілген.

Тәуелсіздік күні – бұл өз өмірін халқымыздың бостандығы мен егемендігі үшін күреске арнаған ұлттық тұлғаларды – батырлар, алашордашылар, Екінші дүниежүзілік соғыс ардагерлері, желтоқсаншыларды еске алатын күн. Олардың барлығы туған жерді сыртқы агрессиядан қорғады, мемлекеттілігімізді нығайтты, ұлттың басты арманы – егемен мемлекетті жүзеге асыруға жол ашты.

Ендеше, еліміз тұғырлы, егемендігіміз ғұмырлы болсын!

 

Танзиля Апаева, республикалық «Бірлік» Қарашай-балқар этномәдени бірлестігінің Жамбыл облысындағы «Архыз» филиалының беделді мүшесі, облысқа танымал жоғарғы санаттағы білікті дәрігер.

Егеменді еліміздің әбден бұғанасы қатып, түпқазығы бекіген Тәуелсіздік мерекесі баршамызға құтты болсын, Отандастар, жерлестер!

/in /by

Егеменді еліміздің әбден бұғанасы қатып, түпқазығы бекіген Тәуелсіздік мерекесі баршамызға құтты болсын, Отандастар, жерлестер!

Біздің қазіргі заманғы құндылықтарымыз отансүйгіштікке, еңбекқорлыққа, білім мен ғылымға деген құштарлыққа, жоғары моральдық қасиеттерге және Қазақстанның ұлттық тарихи тұлғалары – батырлардың, жауынгерлердің, ойшылдардың, мемлекет қайраткерлерінің жанқиярлығына негізделген.

Бұл жоғары басымдықтар тәуелсіздіктің жаңа буыны үшін мінез-құлық үлгісін қалыптастыратын «Адал азамат» президенттік тұжырымдамасының негізін қалады.

Бұл халық мүддесін жекеден жоғары қою қабілеті және нағыз құрметке лайық патриоттарды қалыптастырады.

Бірлігі бекем, тірлігі көркем еліміздің азаттығы мәңгілік болсын!

 

Айваз Магадиевич Османов, Меркі аудандық «Ахыска» этномәдени бірлестігінің төрағасы

Page 2 of 30
1 2 3 4 … 30