Archive for month: December, 2021

Бүгін, ағымдағы жылдың 14 желтоқсанында Жамбыл облысының әкімі Бердібек Сапарбаевтың төрағалығымен Таразда Қазақстан Республикасы Тәуелсіздігінің 30 жылдығын мерекелеуге арналған ҚХА қоғамдық құрылымдары бірлескен отырысы өтті.

          Қатысушылар – этномәдени бірлестіктердің жетекшілері, Жамбыл облысы әкімдігінің ішкі саясат басқармасы мен «Қоғамдық келісім» КММ

басшылары мен қызметкерлері.

Мақсат –  қоғамдық келісім мен жалпыұлттық бірлікті нығайтуға бағытталған өңірдің оң нәтижелерімен бөлісу және алдағы уақытта этносаралық шиеленіс пен жанжалдардың алдын алатын кешенді жүйе қалыптастыру.

Алғы сөздің тізгіні облыс әкімінің орынбасары Дәулет Жамаубайұлы  Кәрібекте болды: Мемлекет дамуы мен өсіп-өркендеуінің  темірқазығына айналған – этносаралық татулық пен өзара келісімді нығайту және оны бағалай білу әрқашан да аса маңызды. Өйткені, мемлекет байлығына айналған ынтымақ пен бірлікті сақтау – үздіксіз іске асырылатын аса жауапты сала және барша көпұлтты халқымыздың ортақ парызы,-дей келе, өңірдегі этносаралық татулық пен өзара келісімді сақтауда өңірде атқарылған жұмыстарды қорытындылау екенін жиналған жұртқа жүйелей түсіндіре келе, атаулы мерекемен құттықтады.

Бұдан соң, Жамбыл облысы Қазақстан халқы ассамблеясының қоғамдық келісім кеңесінің төрағасы Бигелді Тәжібаев  «Бейбітшілік пен келісім»  жобасы аясында Бірлескен қоғамдық келісім кеңесінің мүшелерінің этностар тығыз орналасқан аудандарда белсенді жұмыс істегендігін атап өтті. Арықарай, сөз кезегі «Қоғамдық келісім» КММ Медиация кабинетінің меңгерушісі Досыбиева Валентинаға берілді. Валентина Николаевна облыстық ассамблеяның кәсіби және тәжірибелі медиаторлармен сындарлы өзара іс-қимыл орнату бойынша нәтижелі жұмыс жүргізіліп жатқандығынан жұртшылықты хабардар етті.

Қазақстан халқы Ассамблеясы Кеңесінің 2021 жылғы 21 қазанда өткен кеңейтілген отырысында Мемлекет басшысы Қ.Тоқаев берген тапсырмаларды іске асыру аясында, «Ассамблея жастары» республикалық қоғамдық бірлестігін құру мақсатында «Ассамблея жастары» жастар ұйымы қызметінің алты негізгі бағыты айқындалған болатын. Осы негізде облыстық ҚХА “Жаңғыру жолы” жастар қозғалысының мүшесі, дүнген этносының өкілі Амина Курбанова ассамблея жастарының  атқарып жүрген іс-қимылдары жөнінде баяндап шықты. Сонымен бірге, аймақтық ассамблея Журналистер клубының төрағасы және “Казахстанская правда” республикалық газетінің меншікті тілшісі Михаил Те Журналистер клубының жұмысы туралы айтып берді.

– Баспасөз қызметі орталығының қызметкерлері мен журналистер клубының өкілдері Жамбыл облысы Қазақстан халқы Ассамблеясының, өңірдің этномәдени бірлестіктерінің жұмысы баспа БАҚ, сайттар, әлеуметтік желілер, теледидар беттерінде кеңінен жария етілді . Жедел ақпараттың арқасында Жамбыл облысы ҚХА баспасөз орталығы барлық өңірлер арасында жетекші орынға ие, – деп атап өтті өз сөзінде Михаил Те.

Одан әрі марапаттау Жамбыл облысы әкімінің орынбасары Д.Кәрібектен бастап, облыс әкімдігінің ішкі саясат басқармасының басшысы Алмас Садубаев, Жамбыл облысы ҚХА хатшылығының меңгерушісі Сержан Қуанышов, Жамбыл облысы ІСБ “Қоғамдық келісім” КММ басшысы Парида Мамедовалардың жетекшілігімен іс-шараға қатысушыларды  марапаттау рәсімі өтті.

Облыстың қоғамдық, мәдени іс-шараларына үлес қосып, өңірлік ассамблея жолында аянбай еңбек еткен этномәдени бірлестіктердің өкілдері “Бірлік” және “Қазақстан Тәуелсіздігіне 30 жыл” медальдарымен, “Жомартжан” төсбелгісімен, сондай-ақ, алғыс хаттармен марапатталды.

Жамбыл облысы әкімдігінің ІСБ

«Қоғамдық келісім»  КММ

Баспасөз қызметі орталығы

2021 жылғы 10 желтоқсанда Жамбыл облысы әкімдігінің ІСБ “Қоғамдық келісім” КММ-де Жамбыл облысы Қазақстан халқы ассамблеясы Журналистер клубының кеңейтілген отырысы өтті.

Жиын барысында Республикалық Журналистер клубында назарға алынған және облыстық журналистер қоғамдастығының алдында тұрған өзекті мәселелер мен жаңа міндеттер талқыланды.

Іс-шараға “Қоғамдық келісім” КММ басшысы Парида Мамедова, Баспасөз қызметі қызметкерлері мен республикалық, облыстық және қалалық БАҚ тілшілері, клуб өкілдері қатысты.

Парида Мамедова өз кезегінде: – Бүгін біз барлығыңызды Журналистер клубының жұмыс жоспарларын,өзекті мәселелерін, ұсыныстарын бірге талқылау, сондай-ақ жақсы жаңалықтармен бөлісу үшін жинадық. Бірінші кезекте республикалық “Казахстанская правда” газетінің меншікті тілшісі Михаил Тены республикалық “Шаңырақ” байқауындағы жеңісімен құттықтауға рұқсат етіңіздер. Михаил Те 3- орынды иеленіп, жоғары дәрежелі  дипломмен марапатталды. Сондай-ақ, Жамбыл облысы әкімдігінің ІСБ “Қоғамдық келісім” КММ Баспасөз қызметінің жетекшісі Бибігүл Утепованы Республикалық Журналистер клубының отырысына белсенді қатысқаны және өңірлік ассамблеяның ақпаратын республикалық және облыстық БАҚ – та белсенді жариялағаны үшін ҚР Ақпарат және қоғамдық даму министрлігінің Алғыс хатымен құттықтаймын, – деп құттықтау сөзін айтып, алғысын білдірді.

Сондай-ақ, Парида Иманжанқызы 2019-2021 жылдар аралығында ҚХА Журналистер клубының жұмысын тыңғылықты, нәтижелі жүргізгені үшін республикалық “Айқын” газетінің меншікті тілшісі, облыстық “Арай” газеті мен қалалық “Жамбыл-Тараз” газетінің бас тілшісі – Саятхан Сатылғановты арнайы құттықтап, алғыс хат табыс етіп,  естелікке жақында жарыққа шыққан  ҚХА кітабын табыстады. Сонымен бірге,  өңірлік ассамблея ақпараттарын БАҚ беттерінде тиянақты жариялаған облыстық журналистер – республикалық “Егемен Қазақстан” газетінің тілшісі – Хамит Есаманды, облыстық “Арай” газетінің тілшілері – Қамар Қарасаева мен Айжан Өзбекованы, облыстық “Знамя труда” газетінің тілшілері – Индира Боташева мен Лариса Губашеваны, апталық облыстық “Магнолия» газетінің тілшісі – Михаил Бунинді,  облыстық «Знамя труда» газетінің фотографы – Юрий Кимді «Қоғамдық келісім» КММ алғыс хатымен марапаттады.

Айта кету керек, облыстық Журналистер клубының өкілдері Қазақстан халқы ассамблеясы мен этномәдени бірлестіктердің жұмыстарын БАҚ беттерінде, теледидарда үзбей жариялағандығы мен Қоғамдық келісім” КММ Баспасөз қызметі қызметкерлерінің жедел ақпарат беріп отыруының арқасында Жамбыл облысының ҚХА Баспасөз орталығы басқа өңірлер арасында жетекші орынға ие болғандығы – біріге жасалған игілікті істің нәтижесін көрсетеді.

Мәжіліс барысында күн тәртібіндегі келесі мәселе бойынша Жамбыл облысы ҚХА Журналистер клубының жаңа төрағасын сайлау өткізіліп,  төрағасы болып клуб мүшелерінің дауыс беруімен бірауыздан журналистер клубының республикалық “Казахстанская правда” газетінің меншікті тілшісі Михаил Те сайланды.

Отырыс соңында клуб өкілі, ардагер журналист Михаил Бунин Жамбыл облысы ҚХА Журналистер клубының жұмысы туралы өзінің арнайы әзірлеген жаңа Ережесімен таныстыра келе, БАҚ өкілдерінің кәсіби шеберлігін арттыру бойынша семинар-тренингтер, шеберлік кластар өткізу жөнінде басшылыққа ұсынысын жеткізді.

Жамбыл облысы әкімдігінің ІСБ

“Қоғамдық келісім” КММ

Баспасөз қызметі орталығы

2021 жылғы 11 желтоқсанда “Анаға тағзым” рухани-адамгершілік тәрбие орталығында Қазақстан Республикасы Тәуелсіздігінің 30 жылдығына арналған “Тәуелсіздікке тәубе” акциясы өтті. Аталмыш іс-шара Жамбыл облысына жұмыс сапарымен келген ҚР Мемлекеттік хатшысы Қырымбек Көшербаевтың қатысуымен өтті.

Сонымен бірге, іс-шараға Тараз қаласы және Жамбыл облысы этномәдени бірлестіктерінің өкілдері белсенді қатысты. Олар қазақ, өзбек, орыс, дүнген, тәжік, неміс, әзірбайжан, күрд және басқа да этностардың ұлттық тағамдарын ұсынды.

“Анаға тағзым” орталығының директоры Эльмира Мырза-Ғали қатысушыларды қоғамдағы әйелдердің мәртебесін арттыруға бағытталған Ұйымның қызметімен таныстырды.

ҚР Мемлекеттік хатшысы Қырымбек Көшербаев мемлекеттік әлеуметтік саясаттың басты бағыттарының бірі – ана мен баланы қолдау екенін атап өтті: – Ел болашағы бесіктен басталады. Ана мен бала денсаулығын қорғау – Қазақстан Республикасының стратегиялық дамуының негізгі басым бағыты. Көп балалы аналарды одан әрі жан-жақты қолдау қажет.

Жамбыл облысы әкімдігінің ІСБ

“Қоғамдық келісім” КММ

Баспасөз қызметі орталығы

Ағымдағы жылдың 4 желтоқсанында Жамбыл облысы Қазақстан халқы ассамблеясы Аналар кеңесінің мүшесі – Лобар Гаюпова «Анаға тағзым» рухани-адамгершілік тәрбие орталығында ұлттық тағамдарды дайындау бойынша шеберлік сабағын ұйымдастырды.

Іс-шараға ҚХА Аналар кеңесінің мүшелері және этномәдени бірлестіктерінің төрағалары мен мүшелері қатысты. Бұл жолы Лобар ханым өзбек халқының сүйікті сорпасы – Машхорданы дайындады.

«Бұл сорпа өте тойымды, әрі пайдалы дәрумендерге толы. Тағамның басты ингредиенті – «маш» асбұршағы. Оның құрамында көптеген дәрумендер, минералдар, токсиндерден тазартатын талшық, сонымен қатар пайдалы заттар мен антиоксиданттар бар. Өнім әсіресе артық салмақтан арылғысы келетіндер үшін өте пайдалы» – дейді Лобар Төлегенқызы.

Ары қарай аспаз өзбек халқының ұлттық тағамына қосылатын дәмдеуіштердің түрлерін егжей-тегжейлі айтып берді. Оның айтуынша аскөктің орнына кинза өсімдігін дәмдеуіш ретінде пайдалану тағамның көркі мен дәмін кіргізіп қана қоймай, шығыс асханасының мәдениетіне жетелейді.

Жиын соңында жиналғандар ерекше астың дәмін татып, жылы лебіздерін білдірді.

“Қоғамдық келісім” КММ Баспасөз қызметі орталығы

Үстіміздегі жылдың 30 қарашасы күні Жамбыл облысы ішкі саясат басқармасының «Қоғамдық келісім» коммуналдық мемлекеттік мекемесінде Махмұт Қашқари атындағы Ұйғыр этномәдени бірлестігі «Бейбітшілік пен тұрақтылыққа 30 жыл» атты Ашық есік күнін өткізді.

Іс-шара Қазақстан Тәуелсіздігінің 30 жылдығына және Тұңғыш Президент күніне арналып өткізілді.

Мақсаты – жастарды патриоттық сезімге тәрбиелеу, облыстық ҚХА Ұйғыр этномәдени бірлестігінің қызметімен таныстыру, жастар санасында этносаралық бірлікті, толеранттылық пен ұлттық бірегейлікті қалыптастыру.

Іс-шараға Жамбыл облысы Қазақстан халқы ассамблеясының “Жаңғыру жолы” өңірлік штабының белсенділері мен ұйғыр этномәдени бірлестігінің жастары, колледж студенттері мен қалалық №34-мектептің жоғарғы сынып оқушылары қатысты.

Іс-шара Достық үйіне экскурсия жасаулан басталды. Танысу барысында  қатысушылар “Қоғамдық келісім” КММ қызметі мен ассамблея құрылымдарының іс-қимылдарынан хабардар болды. Сондай-ақ, жиналғандар алдында Ұйғыр этномәдени бірлестігінің төрайымы, ҚХА Аналар кеңесінің мүшесі Мухабат Абрахманқызы  сөз сөйледі. Облыстық Махмута Қашқари атындағы бірлестіктің басшысы Мухабат Тұрдыева өз сөзінде ҚХА-ның ел өміріндегі маңызды рөлін атап өтіп, өзі басқарып отырған этномәдени бірлестіктің жұмысы туралы айтып өтіп, оның дәлелі ретінде жастарға бейнеролик көрсетті.

– 30 жыл ішінде Ұлт Көшбасшысы Нұрсұлтан Назарбаевтың арқасында Тәуелсіз Қазақстан үлкен жетістіктерге жетті, – дейді Мұхабат Тұрдыева. – КСРО ыдырағаннан кейін еліміздің жаңа өмірі басталды. Мемлекетіміздің Тұңғыш Президенті Нұрсұлтан Назарбаев 1995 жылғы 1 наурызда Қазақстан халықтары Ассамблеясын құрды, ал 2007 жылы Қазақстан халқы Ассамблеясы болып өзгертілді. Біз-Қазақстанның біртұтас халқымыз, біз-еліміздің тең құқылы азаматтарымыз. Біз бейбітшілік пен бірлікті сақтауымыз керек,- деп, жастарға үлгі-өнеге боларлық ұлағатты сөздер айтты. Сонымен бірге, шара барысында «ассамблея дәрістері» өткізіліп, жиналған жұртшылыққа Қазақстан тәуелсіздігінің 30 жылдығы  мен Тұңғыш Президент күніне орай,  «Бейбітшілік пен тұрақтылықтың 30 жылдығы» атты сабағы өткізілді. “Ассамблея жастары – Тәуелсіз Қазақстанның патриоттары” тақырыбында “Жаңғыру жолы” штабының мүшелері сөз сөйледі, “Мамандық таңдау” СГТК колледжінің студенттері өз пікірлерін білдірді. Қатысушылар арасында танымдық викториналық сұрақтар қойылып, жастар құлшына жауап берісіп, өзара қызықты пікірталас та ұйымдастырды.

    Ұйғыр этномәдени бірлестігінің жетістіктері туралы, оған қоса, осы аталмыш ұйымның кабинетіндегі марапаттары жөнінде де сөз болды.  Жастарға ондағы әдебиеттермен, экспонаттармен танысуға да мүмкіндік болды.

Шара соңында Махмұт Қашқари атындағы бірлестіктің жетекшісі Мухабат Турдыева колледж директорлары Фарида Накыш пен №34 мектеп директоры Динара Нұралиеваны аталған мерекелерімен құттықтап, жемісті бірлескен ынтымақтастық үшін алғысын білдірді.

Іс-шара қонақтар мен қатысушыларға арналған арнайы фуршет пен естелік-фотосессиямен аяқталды.

Жамбыл облысы әкімдігінің ІСБ

 “Қоғамдық келісім” КММ

Баспасөз қызметі орталығы