Ауыртпалықты бірге көтерген абзал

/in /by

Небір қилы кезеңді, тар заман мен зар заманды бастан өткерген халықпыз. Бауырмалдығымыз бен қонақжайлығымыздың жөні бір бөлек. Жатты жатырқамайтынымыз, бауырмашылдығымыз сол, тағдыр тауқыметін тартып, қазақтың кең даласына күштеп жер аударылған талай халықты құшақ жая қарсы алдық. Паналаттық, үзім нанды бөліп жедік.

Енді міне, сол халықтармен бірге бір шаңырақ астында достық шыраймен, бауырлық пейілмен жарастықта тұрмыс кешіп жатырмыз. Бар қиындықтан бірлік пен ынтымақтың арқасында өтуге серттескенбіз. 16-желтоқсан – Тәуелсіздік мерекесі қарсаңында Қазақ елін және барша этнос өкілдерін ортақ мейрамымызбен құттықтай отырып, ауыртпалықты бірге көтеріп, бүгінде ұлттық тұтастығымызды қадірлеп, әлем алдында беделді мемлекет атағымызды қадірлейік демекпін. Алдағы жылдардан да үлкен үміт күтейік, отандастар!

Бірлік пен келісім құндылықтарын сақтап, этносаралық қақтығыстарға жол бермей, бейбіт өмірде елімізді өркендетуге күш салайық!

Алпысбай Жұмаханов,

Жамбыл ауданы Қоғамдық кеңесінің төрағасы

Тараз қаласында «Бірлігіміз жарасқан» атты этнофестивалі өтті

/in /by

Қазақстан Республикасының өркендеуі үшін қоғамдық келісім мен жалпыұлттық бірлікті нығайтуға елеулі үлес қосқан өңірлік ассамблея белсенділеріне құрмет көрсету, дәріптеу мақсатында үстіміздегі жылдың желтоқсанында Тараз қаласының Достық үйінде Тәуелсіздік күні мерекесі және Қазақстан халқы Ассамблеясының 25 жылдығына орай, Жамбыл облысы әкімдігінің ішкі саясат басқармасы «Қоғамдық келісім» коммуналдық мемлекеттік мекемесі және облыстық ассамблея ұйымдастыруымен ағымдағы жылдың желтоқсан айында «Бірлігіміз жарасқан» атты этнофестиваль өткізілді.

Іс-шара аясында Жамбыл облысы этномәдени бірлестіктерінің барлық өкілдері, Аналар, ақсақалдар, қоғамдық келісім, медиация кеңестері, «Жаңғыру жолы» жастар қозғалысының активтері және мәдениет саласының, қалалық, облыстық БАҚ өкілдері қатысты.

Этнофестивальдің негізгі міндеттері қоғамдық келісім мен этникаралық төзімділікті нығайту, Қазақстанда тұратын халықтардың салт-дәстүрлерін, ұрпақтар сабақтастығын сақтауға жәрдемдесу, сондай-ақ Жамбыл облысының этномәдени бірлестіктері арасындағы байланыстарды дамыту және ақпараттық-мәдени алмасуды жүзеге асыру болып табылады.

Фестиваль аясында ҚХА жұмыстарын жандандыруда бар үлесін қосқан еңбектері үшін «Ең белсенді этномәдени бірлестік», «Этномәдени бірлестіктің ең белсенді жетекшісі», «Жамбыл облысында Қазақстан халқы Ассамблеясының қызметін БАҚ-да кеңінен жариялағаны үшін», «ҚХА қызметіне белсенді қатысқаны үшін», «Халықтық өнер дәстүрлерін сақтауда белсенді еңбегі мен аймақ мәдениетін дамытуға қосқан үлесі үшін» номинациялары бойынша этномәдени бірлестіктердің жетекшілері мен облыстық ҚХА құрылымы, серіктестер, этномәдени бірлестіктердің шығармашылық ұжымдары, сондай-ақ Жамбыл облысының ҚХА белсенді облыстық жастары, сондай-ақ, БАҚ өкілдері – облыстық «Jambyl» телеарнасының, өңірлік «Аq jol» газетінің тілшілері марапатталды.

Сонымен бірге, «Бірлігіміз жарасқан» этнофестивалі «Үкілім-ай» би ансамблінің қазақ, тәжік, украин билерін, «Нұршашу» би ансамблі «Лезгин» биін орындауында, сондай-ақ, «Жамбыл облыстық Немістер қауымдастығы» қоғамдық бірлестігінің «Juwel» вокалдық тобының неміс халқының әні, Дидар Базарбайдың «Биле бірге» әні, Құрмаш Қуанышбаевтың «Туған жер» әндерінің шыркалуында облыстық этномәдени бірлестіктер шығармашылық топтарының қатысуымен мерекелік концерт өткізілді.

Жиын соңы фотосессиямен аяқталды.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз орталығы







Тараз қаласы Достық үйінде «Меценат-2020» қайырымдылық форумы өтті.

/in /by

Ағымдағы жылдың желтоқсан айында Тараз қаласының Достық үйінде Жамбыл облысы әкімдігі ішкі саясат басқармасы «Қоғамдық келісім»

КММ-нің ұйымдастыруымен «Меценат-2020» қайырымдылық форумы өтті.

Форумға 2020 жылда облыс бойынша әлеуметтік аз қамтылған отбасыларына және пандемия кезінде зардап шеккен жандарға қайырымдылық жасаған меценаттар, облыстық этномәдени бірлестіктер төрағалары, белсенділері, облыстық және қалалық БАҚ өкілдері қатысты.

Іс-шараның мақсаты – қайырымдылықты насихаттау, адамдардың әл-ауқатын және қоғамдық сананы дамыту мен жақсартуға көмектесу, жастардың патриоттық сезімін ояту. Сондай-ақ, қоғамдағы маңызды бастамаларды, қоғамдық келісім мен халықтың бірлігін нығайтуға қатысты жобалар мен ұсыныстарды қолдау және ынталандыру.

Жиынға арнайы келген қатысушылар мен қонақтарға Достық үйінің бірінші қабатында классикалық жанрда радио-концерт және LED экранда 2018-2019 жылдардағы меценаттар форумы туралы фотослайдтар көрсетілді.

Достық үйінің конференц-залында көрермендерге Дулати Жастары халық театры, облыстың этномәдени бірлестіктерінің шығармашылық ұжымдары мен К.Әзірбаев атындағы Жамбыл облыстық филармония әртістерінің қатысуымен «Поэзия» атты театрландырылған қойылым ұсынылды.

Марапаттау рәсімі үш номинация бойынша өтті: «Мақтаралға көмек», «Біз біргеміз!» және «Мың алғыс».

Марапатталғандардың қатарында облыстық «Вынхуа» дүнген этномәдени бірлестігінің мүшесі, жеке кәсіпкер Исмар Фунчи бар. Ол Масанчи ауылында өрт сөндіру машиналармен қамтамасыздандырып, аз қамтылған отбасы үшін үй салуға қаражат жинауды ұйымдастырып, пандемия кезінде ауылдық аурухананы сегіз миллион теңгенің желдеткішімен, ауыл тұрғындарын дәрі-дәрмектермен және маскалармен қамтамасыз еткені үшін марапатталды. Сондай-ақ, жомарт жан «Мектепке жол» акциясы аясында мұқтаж балаларға 700 мың теңгеге смартфондар сатып алып жәрдем көрсетті.

«Ахыска» түрік этномәдени орталығы» қоғамдық бірлестігі Жамбыл облыстық филиалының мүшесі Наби Ағалиев коронавирустық инфекцияның таралуы кезінде жерлестеріне қолдан келген көмегін берді.

«Жамбыл облыстық өзбек этномәдени бірлестігі» қоғамдық бірлестігінің төрағасы Бахром Муминов Мақтааралдың зардап шеккен тұрғындарына 410 мың теңге көлемінде қаржылай жәрдем беріп, пандемия кезінде аз қамтылған 12 отбасыға 500 мың теңгеге көмек көрсетті және «Мың алғыс» акциясы

аясында дәрігерлерге ыстық түскі ас беріп, науқастарға 400 мың теңге көлемінде көмек көрсетіп, 50 мұқтаж отбасыға азық-түлік пакеттері сыйға тартқаны үшін марапатталды.

«Жамбыл облыстық өзбек этномәдени бірлестігі» қоғамдық бірлестігінің мүшесі, Тараз қалалық өмірлік қиын жағдайға тап болған балаларды, арнайы әлеуметтік қызмет көрсету орталығының мемлекеттік қамқоршыларын қолдау бойынша жыл сайын Тараз орталығының тәрбиеленушілеріне қайырымдылық көмек көрсеткені үшін облыстық ҚХА аналар кеңесінің мүшесі Лобар Гаюпова марапатталды. Айта кетейік, «Біз біргеміз!» акциясы аясында Мақтаарал тұрғындарына екі миллион теңге , жалғызбасты аналарға миллион теңге көлемінде көмек көрсетті.

Республикалық «Хэсед Полина» қамқорлық орталығы» қайырымдылық қорымен бірлесе отырып Саяси қуғын-сүргін құрбандарының онына жүйелі түрде қаржылық көмек көрсеткені үшін Жамбыл облыстық «Шиват Цион» этномәдени бірлестігі» қоғамдық бірлестігінің төрайымы Людмила Корнилина марапатталды.

Барлығы 20 адам марапаттарға ие болды. Олардың қатарында жеке кәсіпкерлер Сәкен Атаев, Кәмшат Молдыбекова, Лесбек Мырзабеков, Жамбыл ауданы әкімдігінің ішкі саясат бөлімінің «Жастар ресурстық орталығы» КММ-нің директоры Маханбет Рахымжанов, «Вайнах» Жамбыл шешен-ингуш мәдени орталығының мүшесі Ваит Талгаев, «Меркен ірімшік фабрикасы» ЖШС басшысы Дастан Айтуленов, «Altais Group» ЖШС бас директоры Әлімбек Джұмабаев, «Жамбыл облыстық Махмуд Қашғари атындағы ұйғыр этномәдени бірлестігі» қоғамдық бірлестігінің төрайымы Мухабат Турдыева, Талас ауданы корей этномәдени орталығының, «Анжела-Анжелика» қоғамдық бірлестігінің жетекшісі Екатерина Цой, «Сұлтан би» шаруа қожалығының жетекшісі Қажымұрат Жаттаев, «Гамбург» ЖШС жетекшісі Георг Кох, Тараз қаласындағы №7 мектеп гимназиясының мұғалімі және ерікті Михаил Платов, «Жаңғыру жолы» жастар қозғалысының төрайымы Хамида Турдыева, Жамбыл облыстық «Вынхуа» дүнгендер этномәдени орталықтары» қоғамдық бірлестігінің мүшесі, жеке кәсіпкер Абдумалик Шарипов қатысты.

Жиын соңында меценаттарға естелік сыйлықтар мен алғыс хаттар табысталды.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз орталығы





Тілім менің- таусылмайтын байлығым!

/in /by

Тілім менің- таусылмайтын байлығым! М. Жұмабаев айтқандай: “Ұлтқа тілінен қымбат нәрсе болмақ емес, бір ұлттың тілінде сол ұлттың сыры, тарихы, тұрмыс тіршілігі, мінезі айқын көрініп тұрады”. Тіл байлығы – әрбір ұлттың мақтанышы. Әр азамат өзінің ана тілін, көзінің қарашығындай қарап, орынсыз шұбарлануына қарсы тұруы керек.Менің ойымша тіл туралы жазу, ол туралы айтудан қашпау да, жалықпау да керек. Себебі тіл бір халықтың жүрегі. Оның бойында ұлттық болмыс, ұлттық рух, дәстүр мен салт жатыр. Сондықтан әр халық өз тілінде мақтанып қана қоймай, оны дамытып, жұмыс жасауы қажет.

“Өзге тілдің бәрін біл, Өз тіліңді құрметте”.Менің ана тілім- дүнген тілі, ал екінші ана тілім ол – қазақ тілі. Себебі осы тілді мен сүйсіне меңгердім. Ата-анамның айтуынша қазақ тілін үйрену құлшынысы кішкентайымнан бастап пайда болған. Бұл құлшынысымды ата -анам қолдап, бірінші сыныптан қазақ тілін меңгере бастадым, қазіргі таңда қазақ тілінде еркін сөйлей аламын. Қазақ жерінде қазақ елінде туылып,қазақ тілін білу мен үшін үлкен мақтаныш және зор құрмет.Осыған байланысты қолдау көрсеткен отбасыма, мектеп мұғалімдеріне алғысым шексіз.

Қазақ тілі шексіз бай, шұрайлы,тегеуріні мықты тіл. Тіл арқылы ақындарымыз бен жазушыларымыздың. даналардың сөздерін, өлең – жырларын оқып білеміз, олардан ғибрат аламыз. “Өнер алды – қызыл тіл” деген осыдан шыққан болар.

Қазіргі таңда әлемде 2500-ден астам тіл бар. Олардың нақты санын дәл айту мүмкін емес. Жыл сайын, әр ай сайын, тіпті, күн сайын бір тіл жойылып отырады. Ғұлама ғалым А.Байтұрсынұлы: «Сөзі жоғалған жұрттың өзі де жоғалады»,– деп тілдің ұлт үшін қандай маңызды екенін бір-ақ ауыз сөзбен жеткізген. Әлемде жаулап алушы елдердің озбырлығынан, үстемдігінен қаншама тіл жоғалып кетсе, қаншама тіл жоғалудың аз-ақ алдында тұрғаны мәлім. Сондықтан қазіргі жаһандану дәуірінде аз ұлттар мен ұлыстар өз тілдерін қорғап қалуға барынша күш салуда. Қазақстан Республикасы қазақ тілінің ғана емес, Қазақ елінде тұратын барлық ұлттар мен ұлыстардың тілінің дамуына барынша жағдай жасап отыр. Елбасымыздың 22- қыркүйекті «Қазақстан халықтарының тілдері күні» деп жариялау да сол мақсаттан туған.

Курбанова Амина

Жамбыл облысы ҚХА «Жаңғыру жолы»

жастар қозғалысының мүшесі,

№34 орта мектептің 10 сынып оқушысы

Бейбіт күннің қадірін білейік

/in /by

Дәл қазір бізге не керек?! Алда 16-желтоқсан – Тәуелсіздік күні мейрамы келе жатыр. Бізге керегі – ұлтаралық келісім, ауызбіршілік, тұрақтылық пен түсіністік. Бірлігіміз бекем болса, бізді берекенің өзі іздеп келеді. Ұлы даланы мекендеген барлық халықтың мақсаты мен мүддесі бір болғандықтан, қоғамдағы келісім мен саяси тұрақтылықты сақтай отырып, ел тәуелсіздігінің тұғырын тайдырмас үшін Отанға адал қызмет ету – бәріміздің қасиетті борышымыз.

Бір қуанарлығы, 140 этнос өкілі тұратын егемен еліміздегі этносаралық және конфессияаралық татулық жалпақ жаһанның көптеген еліне үлгі болып отыр. Біздің ең басты құндылығымыз да сол – елдің бірлігі мен татулығы. Берекені көктен тілемей, бірлігі мол көптен тілеп отырғанымыз осындағы барлық ұлттың бір-біріне деген сенімін, құрметін көрсетсе керек.

Ендігі жерде сол ынтымағымыз ыдырамасын деп тілегеніміз дұрыс болар.

Бейбіт күннің қадірін білейік, отандастар!

Рахымбек Жапаров,

Жамбыл облысы

Жамбыл аудандық

Билер кеңесінің төрағасы

Өз басым Қазақстан Республикасын зайырлы мемлекет ретінде білемін

/in /by

Өз басым Қазақстан Республикасын зайырлы мемлекет ретінде білемін. Біздің елімізде 140-тан астам өзге ұлт өкілдері тұрады, өзге ұлт өкілінің бірі -өзім.

Еліміздегі саяси тұрақтылық мен үшін өте маңызды. Бейбіт заманда өмір сүріп жатқанымыз үшін Президентіміз Қасым-Жомарт Тоқаевқа алғысым шексіз және тұрып жатқан елімді, жерімді мақтан етемін.

Біз болашаққа сеніммен қараған тәуелсіз және заманауи мемлекетте тұрамыз. Елімізді көркейту жолында біраз іс тындырылды, бірақ біз одан да көп жұмыс істеуіміз қажет. Біздің мемлекеттілігіміз орнатылды, дегенмен тәуелсіздік, бірлік және даму сияқты негізгі құрылымдарын үнемі нығайтып отыруымыз керек! Бейбіт заманда өмір сүріп жатқанымыз үшін Біздің Президентімізге алғысым шексіз және тұрып жатқан елімді, жерімді мақтан етемін.

Жамбыл облысы Жамбыл аудандық Қызылқайнар ауылының тұрғыны, ұлтым күрді бола тұра, Қазақ елінің 16-желтоқсан – Тәуелсіздік күні мейрамын жылдар өте қазақ халқымен бірге мерекелеп келемін. Тәуелсіздік, тұрақтылық, бейбітшілік пен келісім сияқты құндылықтар аясында мемлекеттілікті, Қазақстан халқының бірлігін нығайту мен қоғамды біріктіру, Отанға, өткен тарихымызға деген құрмет пен қызығушылық, сүйіспеншілік сезімін тәрбиелеу, азаматтық жауапкершілік, мемлекет алдындағы азаматтық парыз, Отан үшін қызмет етуге дайын болу сынды сезімдерді қалыптастыру – біздің мақсатымыз.

Келе жатқан Тәуелсіздік мейрамдарыңызбен, ағайын! Еліміз тыныш, аспанымыз ашық болсын!

Жамбыл облысы Жамбыл аудандық

ҚХА Аналар кеңесінің мүшесі

Мұхтар-оглы Хадиша Дямаловна

Тараз қаласында корей халқының этнос күні өтті

/in /by

Ағымдағы жылдың желтоқсан айында өңіріміздегі Достық үйінде «Жамбыл облысы «Корё» корейлер қауымдастығы» қоғамдық бірлестігі этнос күнін атап өтті. Салтанатты кешке құрметті қонақтардан «Жамбыл облысы «Корё» корейлер қауымдастығы» ҚБ-нің төрағаасы Кан Анатолий Лаврентьевич, «Ноиндан» ақсақалдар кеңесінің төрағасы орынбасары Пак Анатолий Иванович және кәріс этносының өкілдері мен жастары қатысты.

Жамбыл облыстық «Ноиндан» ақсақалдар алқасының мүшесі Пак Анатолий Иванович: «918 жылы Корё мемлекетінің іргетасы қаланып, ол 936 жылы бүкіл корей елін біріктіреді. Қазіргі «Корея» атауы, осы «Корё» сөзінен пайда болды. Заңдар жинағы шығарылып, Буддизм белең алды. 1396 жылы корей алфавиті Хангыль қабылданды. 1945 жылға дейін корейлер жапон колониясы болды. Екінші дүниежүзілік соғыста Жапонияның жеңіліс табуы, жапон билігіне нүкте қойды. АҚШ пен КСРО елді бөліп билеу жайында келісімшарт жасалды. Осылайша, 1948 жылы солтүстікте КХДР, оңтүстікте Корея Республикасы құрылды. Ал 1928 жылдың аяғына қарай қазақ жерінде күріш өсіруді дамыту бойынша ауқымды жұмыстар басталды. Бұл үшін Қиыр Шығыс өлкесінің корейлерін тарту шешіледі. Қызылордаға Чосоннан 70 отбасы қоныс аударды. Бұл бастама өз жемісін беріп, 1931 жылға қарай Қазақстан КСРО-ның күрішті ең көп егетін өлкесіне айналды. Осылайша қазаққа бауырлас ел болып кеткен корейлер көптеген қиындықтарды бірге көріп, көтере білді»- деп, кеңес үкіметі кезіндегі этносаралық қатынастар туралы тарихи деректерді егжей-тегжейлі баяндап өтті.

Қазақ жеріне келген сәттен бастап кәрістер тарих шеңберіне кіргенін, өз мәдениеті мен дәстүрлерін сақтап, байытқанын атап өтті.

Іс-шара барысында қатысушылар және белсенді жастар облыстық ассамблея жұмыстарына белсене атсалысқандары үшін құрмет грамотасымен марапатталды.

Жамбыл облысының «Корё» корейлер қауымдастығының жетекшісі Кан Анатолий Лаврентьевич қонақтарға алғысын білдіріп, сондай-ақ, осы жылы бірлескен күш-жігерлерінің арқасында көптеген мақсаттарға қол жеткізгендігін ерекше атап өтті.

Кеш соңында аталмыш этнос өкілдері қонақтарға алғыс білдіріп, естелік суреттерге түсті.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз орталығы


Облыс әкімдігінде аймақ басшысы Бердібек Сапарбаевтың төрағалығымен Жамбыл облыстық Қазақстан халқы ассамблеясы Кеңесінің отырысы өтті

/in /by

Ағымдағы жылдың желтоқсан айында облыс әкімдігінде аймақ басшысы Бердібек Сапарбаевтың төрағалығымен Жамбыл облыстық Қазақстан халқы ассамблеясы Кеңесінің отырысы өтті. Жиынның күн тәртібіне сәйкес алдымен этносаралық саладағы ахуал және қоғамдық келісім мен жалпыұлттық бірлікті нығайту бойынша атқарылған жұмыстар туралы облыс әкімдігі ішкі саясат басқармасының басшысы Дауыл Бейсенқұлов есеп берді. Басқарма басшысы ҚР Президенті Қасым- Жомарт Тоқаевтың тапсырмасына сәйкес облыстық ҚХА хатшылығы және «Қоғамдық келісім» мекемесі облыс әкімдігі ішкі саясат басқармасының қарамағына берілгенін, осыған орай басқармадан 5 штаттық лауазымнан тұратын этносаралық қатынастар мәселелері бойынша арнайы бөлім ашылғанын атап өтті. Сонымен бірге, республикалық әдістемелік ұсыныстарды ескере отырып,этносаралық қатынастарды дамытудың алдағы жылға арналған ведомствоаралық жоспары жасалғанын тілге тиек етті.

– Тиімді және нәтижелі жұмыс істеу үшін қоғамдық құрылымдардың қызметі қайта қаралды. «Қоғамдық келісімге» қарасты кеңестер мен клубтар саны 11-ден 7-ге қысқартылды. Сонымен қатар республикалық деңгейде аналар және медиация кеңестерімен бірлескен іс- шаралардың мониторингі құрылды. «Халық үніне құлақ асатын мемлекет» жобасы аясында аз қамтылған және көпбалалы отбасылардың түйткілді мәселелерін шешу мақсатында өңірлік «Аналар» сайты ашылды. «Қоғамдық келісім» коммуналдық мемлекеттік мекемесінде сенім телефоны орнатылған медиация кабинеті мен қоғамдық қабылдау жұмыс істейді және тұрғындарға практикалық, медиациялық көмек көрсету үшін облыстағы 40 медиация учаскелерінде түсіндіру жұмыстары жүргізіліп келеді.

Облыстағы барлық этнос өкілдері арасындағы татулық пен бірлікке негізделген «Бейбітшілік пен келісім» пилоттық жобасы іске асырылды, – деді Дауыл Ынтықбайұлы.

Жиында Қазақстан Республикасының Парламенті Мәжілісі депутаттығына Қазақстан халқы ассамблеясы тарапынан кандидат ретінде Қордай ауданы Сортөбе ауылдық округінің әкімі Ілияс Буларов ұсынылды.

Жиынды қорытындылаған облыс басшысы Бердібек Сапарбаев мемлекет дамуы мен өсіп-өркендеуінің темірқазығына айналған этносаралық

татулықпен өзара келісімді сақтау және оны бағалай білу барша халқымыздың ортақ парызы екенін атап өтті.

Жамбыл облысы әкімдігі

Ішкі саясат басқармасының

«Қоғамдық келісім» КММ

Баспасөз орталығы


«Жыл волонтері» халықаралық сыйлығының 48 жеңімпазы анықталды

/in /by

Мемлекет басшысының тікелей қолдауымен басталған Еріктілер жылы да аяқталуға жақын. Бұл ауқымды жоба аясында елдегі еріктілік қозғалыстың қарқыны өсіп, волонтерлік акциялардың саны бірнеше есе артқанын көрдік. Мемлекет үздік волонтерлік жобаларды қолдап, түрлі идеялар мен тәжірибелердің үлкен базасын құрды.

Жыл шеңберінде жарияланған еріктілердің байқауына қатысу үшін еліміздің түкпір-түкпірі және шетелдерден 768 өтінім түсіпті. Екі іріктеу кезеңінен сүрінбей өткен қатысушылардың ішінен тәжірибелі қазылар алқасы «Жыл волонтері» халықаралық сыйлығының 48 жеңімпазын анықтаған. Олардың қатарында біздің жерлестеріміз де бар. Облыстық ҚХА «Жаңғыру жолы» қозғалысының төрайымы Хамида Турдыева «Корпоративті волонтерлік көшбасшылары» номинациясын еншілесе, жастар қозғалысының активі Станислав Насыров «Бейбітшілікті, достық пен келісімді нығайтуға қосқан үлесі үшін» номинациясын иеленді. Ресейлік және қырғызстандық волонтерлер да жеңімпаздар қатарынан көрінгенін айтуға тиіспіз.

Бүгін республикалық деңгейде, онлайн форматта белсенді жеңімпаздарға сыйлықтар табысталды. Сонымен қатар, қайырымдылық пен бизнестің әлеуметтік жауапкершілігін арқалап, еліміздің дамуы мен өркендеуіне үлес қосып жүрген жаны жомарт жандарды көтермелейтін дәстүрлі «Жомарт жүрек» сыйлығы да үлестірілді.

Бірлігімізді нығайтып, ынтымағымызды келістіре түскен еріктілер жылына өлшеусіз үлес қосып, еңбектері еленген азаматтарды жетістіктерімен шын жүректен құттықтаймыз!

Расында, осы жылы еріктілердің көмегімен көптеген шаруа атқарылды, талай сауапты іске сеп болды, көптеген қамкөңіл отбасы қуанды, талай жанның денінің саулығы үшін қаншама маңдай тер төгілді, біршама отбасы үйлі-күйлі болды.

Бір-бірімізге деген сыйластығымыз, пейіліміз, жарастығымыз үзілмесін!

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз қызметі орталығы


Таразда поляк этносының мәдениет күні өтті

/in /by

Ағымдағы жылдың желтоқсан айында Тараз қаласының Рим-католик шіркеуінде поляк этносының дәстүрлері мен әдет-ғұрыптарына, мәдениеті мен тарихына арналған этнос күні аталып өтті.

Іс-шараның мақсаты – этностардың мәдениетін, тілін, тарихын және дәстүрлерін насихаттау.

Этнос күні «6-желтоқсан – Әулие Николайды еске алу» күніне тұспа-тұс келді. Бұл күні католиктер саяхатшылар мен балалардың қамқоршысы атанған Әулие Николайды еске алады. Қасиетті Николай күні ғасырлар бойы қалыптасқан діни тамыры бар ежелгі мейрамдардың бірі.

Жамбыл облыстық «Полонез» поляк тілі орталығы және мәдениеті» қоғамдық бірлестігінің төрағасы Калькова Лариса Викторовна: – «Бұл күні Әулие Николай көше мен үйлерді аралап, тәртіпті балаларға жемістер мен кәмпиттер сыйлайды, ал бұзақылық танытқан балалар шұлықтарынан картоп немесе көмір кесегін табады. Сондықтан, мереке қарсаңында балалар тентек болмауға тырысады, және ешкім Әулие Николайдан сыйлықсыз қалмайды»- деп атап өтті.

Сондай-ақ, іс-шараға қатысушылар рождестволық «колядка» әнін орындап, балаларға жаңа-жылдық сыйлықтар үлестірілді. Колядка – бұл Рождестволық салттық әндердің бірі және Батыс Рождестволық гимндердің ежелгі славяндық аналогы болып табылады. Поляктардың айтуынша, Әулие Николай күні бірқатар жаңа жылдық мерекелерді ашып, барлығын салтанатты оқиғалар мен жағымды істерге шақырады.

Жамбыл облыстық «Полонез» поляк тілі орталығы және мәдениеті» қоғамдық бірлестігі этносаралық қатынастарды нығайтуға және аймақ халықтары арасындағы достықты дамытуға бағытталған барлық іс-шараларға белсенді қатысады.

Аталмыш этнос күндері халықтардың достығы мен бірлігін нығайтып, еліміздегі бейбітшілік пен келісімді сақтауға себін тигізері сөзсіз.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз орталығы





Page 3 of 16
1 2 3 4 5 … 16