ҚОРДАЙҒА ЖОЛ ТАРТҚАН “ДОСТЫҚ КЕРУЕНІ” ТАРАЗ ШАҺАРЫНА ОРАЛДЫ
Тарихы сырға толы көне Тараз шаһарында орналасқан күмбезді Достық үйінен жуырда ғана құрылған «Достық” керуенінің Қордайға дейінгі өңіріміздің Меркі, Шу, Т.Рысқұлов аудандарындағы сапары да сәтті аяқталған болатын.
Ел тыныштығы мен бірлігі, татулығы мен ынтымағының сақталуына дәнекер болған «Достық» керуені бірқатар игілікті іс-шаралар легімен Қордай ауданына жол жүріп келді.
Ағымдағы жылдың 20-қыркүйегінде Өңірлік ҚХА іс-шаралар жоспарын жүзеге асыруға сәйкес, Қордай ауданының Степной, Қарасу, Ауқатты, Масаншы, Сортөбе ауылдық округтерінде жалпықазақстандық бірегейлікті сақтау, этносаралық қатынастарды нығайту мақсатында өңірдегі этнос өкілдері тығыз шоғырланған елді-мекендерде ақпараттық-түсіндіру жұмыстары жүргізілді.
2023 жылдың қыркүйек, қазан айларында қолға алынған республикалық «Достық керуені» жобасын ілгерілетумен қатар, Мемлекет басшысы Қ.Тоқаевтың 2023 жылдың 1 қыркүйектегі кезекті Жолдауы және маусым айындағы ҚР Құрылтайындағы ҚХА жұмыстарына этностар жөнінде жүктеген талап, ұсыныс-міндеттері, ҚХА төрағасының орынбасары М.Әзілхановтың аталмыш Жолдауға байланысты 5 қыркүйектегі ҚХА жұмыстарын жандандыру, күшейту тұрғысында өткізілген ҚХА-ның республикалық кеңейтілген отырысы және 2023 жылдың 20 қыркүйектегі «Этносаралық қатынастар саласындағы мемлекеттік саясаттың жай-күйі мен перспективалары» ғылыми-практикалық конференциясында қойылған талап-ұсыныстарды назарға ала отырып ақпараттық-түсіндіру жұмыстарын ұйымдастырған «Қоғамдық келісім» КММ басшысы Мүбәрак Жинақбаева бастаған мекеме қызметкерлері достықты ту еткен іс-шаралар керуені бағытымен аталған ауылды аймақтарда әлеуметтік және этносаралық ахуалды зерделеді.
Аталған мекеме үйлестіруімен ҚХА құрылымдары – Медиация кабинеті, Ақсақалдар, Аналар кеңестері, «Ассамблея жастары» РҚБ активтерінің атсалысуымен жергілікті тұрғындармен дебатты кездесулер ұйымдастырылды.
Кездесу барысында этнос жастарына, ауыл тұрғындарына нақтырақ айтқанда, өңірдегі этносаралық тұрақтылықты сақтау, ксенофобия – этносаралық алауыздық, «араздық тілін» болдырмау, мемлекеттік туды қолдану шектеулігі мен мемлекеттік рәміздерді қадір тұту, қоғамда жалған ақпарат таратуға жол бермеу, т.т.,келеңсіз жағдайлардың алдын алу мақсатында түсіндіру жұмыстары жүргізілді.
Сондай-ақ, «Жобаларды іске асыру және ҚХА құрылымдарымен жұмыс» бөлімінің бас сарапшысы Аққу Қаратаеваның жетекшілігімен бөлім қызметкерлері Дихан Талғатов, Рахат Ерхан ауыл жастарына, мектеп оқушыларына арналған «Менің елім, Менің Қазақстаным» атты тимбилдинг, Ақсақалдар, Аналар кеңестерінің отырысын өткізді.
Медиация кабинетінің меңгерушісі Валентина Досыбиева жергілікті медиаторлардың тұрғындармен басқосуына себепші болды.
Сонымен қатар, Тараз қалалық Достық үйі көрме залының жетекшісі Вера Майковичтің үйлестіруімен жасөспірімдер мен жас суретшілер арасында «Бірлік – әралуандылықта» байқауы өтті.
Бұдан бөлек, «Ғылыми-сараптамалық қолдау» бөлімінің сарапшылары Ербол Қаншымбеков пен Рианна Жалпанова Қордай ауданының Степной, Қарасу, Ауқатты, Масаншы, Сортөбе ауылдық округтерінің тұрғындарына арналған әлеуметтік зерттеулер және сауалнама жүргізді.
Бұған қоса, «Көпшілік-мәдени іс-шараларды іске асыру» бөлімінің жетекшісі Біржан Үксикбаевтың жетекшілігімен этномәдени бірлестіктер жастары арасында түрлі спартакиадалық ойындар және Қордай аудандық этномәдени бірлестіктері шығармашылық топтары арасында «Өнерім саған, Қазақстан!» атты патриоттық әндер фестивалі өткізілді.
«Ақпараттық жұмыс және қоғаммен байланыс» бөлімі
