1 мамыр мерекесі – ынтымағы мен  мен бірлігі жарасқан берекелі  халықтық мереке! Үстіміздегі жылдың 1 мамыр күні, Жамбыл облысы, Тараз қаласының «Жастар» аллеясында Қазақстан халқының бірлігі күні мерекесіне арналған мерекелік шеру жаңа форматта өткізілді. Жамбыл облысы Қазақстан халқы Ассамблеясы, облыс әкімі аппараты «Қоғамдық келісім» коммуналдық мемлекеттік мекемесі және Жамбыл облысы әкімдігі бірлесе отырып өткізген аталмыш мейрам жоғары деңгейде өтті.

Аталмыш іс-шараның мақсаты мен міндеті – Қазақстан халқы Ассамблеясының аймақтарда этносаралық келісімді қамтамасыз етуді жүзеге асыру жолында Қазақстан халқының рухани-мәдени бірігуі мен қазақ еліндегі отбасылық құндылықтар мен дәстүрлері дамытуды насихаттау, болашақ жас ұрпақты әр этнос салт-дәстүрлері мен әдет-ғұрыптарын құрметтеуге үйрету.

Өңіріміздегі 27 этномәдени бірлестіктердің жетекшілері мен мүшелері де, оған қоса «Ақ желкен» жастар лигасы мен «Жаңғыру жолы» жастар белсенділерінің көшбасшылары, облыстық филармония өнерпаздары, ҚХА Ақсақалдар мен Аналар кеңесінің мүшелері, қолөнер шеберлері, Тараз қаласы әкімдігі білім бөлімінің мектептен тыс және балалар шығармашылығы орталығының оқушылары, қала қонақтары мен тұрғындары, қалалық және облыстық БАҚ өкілдері аталған іс-шараға белсене қатысты.

Мерекелік шеруге  облыстық этномәдени бірлестіктері мүшелерінен құрылған барлығы -3000-нан  астам адам қатысты.

Шерудің сәнін жалт-жұлт еткен ашық түсті, сәнді ұлттық киімдер  киген этномәдени бірлестіктер өкілдері келтірді.  Қоғамдық бірлестіктердің ұйымдастыруымен  Ы.Сүлейменов көшесінің бойына «Ұлы дала ұландары» стеласынан «Білім» алаңы аралығында этноауылдар орналастырылды.  Құрметті қонақтарды облыс әкімінің орынбасары Сұлушаш Құрманбекова, Тараз қаласының әкімі Досаев Қайрат, Жамбыл облысы ҚХА хатшылығының меңгерушісі Маржан Қожаева күтіп алып, оларды этноауылдармен таныстырды.

«1 мамыр – Қазақстанның бірлігі күні» мейрамын мерекелеудің іс-шаралар жоспарына сәйкес әр этностың ұлттық тағамдар көрмесі ұйымдастырылды, «Достық дастарханы»  жайылды. Қазақ, орыс, өзбек, украин, неміс, дүнген, түрік, корей этноауыл «тұрғындары» өздерінің салт-дәстүрлерін, ұлттық тағамдарын, ойындарын, өнерлерін  көрсетуде асқан шеберлік танытып, жиылған жұртшылыққа  зор әсер қалдырды.

Сондай-ақ, әр этноауылда тұрмыстық және қолданбалы өнер шеберлерінің музей экспонаттарынан көрмелер ұйымдастырылды. Қолөнершілердің еңбектері, шығармашылық жұмыстары  тамашаланып, қазіргі заманға сай түрлі материалдар мен өзіндік технологияларды ұштастыра дайындаған тамаша бұйымдар жұртшылық назарына ұсынылды. Көрмені аймақ басшысы Асқар Мырзахметов пен облыс ардагерлері, басқа да зиялы қауым және қала қонақтары көрмеге қатысушы барлық этномәдени бірлестіктердің ұлттық тағамдарымен танысып, концерттік бағдарламаларын тамашалады.

Бұл этноауылдар көрінісі –  еліміздегі ұлттар татулығы мен достығының айқын дәлелі. Өйткені, Қазақстанда бір шаңырақтың астында 140-қа жуық өзге ұлт өкілдері тату-тәтті өмір сүріп жатыр. Ал,  Жамбыл облысында 80-ге жуық этностар болса, оның 27-сі этномәдени бірлестіктер екен. Барлық этностар да Бірлік мейрамын мерекелеуге  зор ықылас-ынтамен ат салысты.  Дал осындай ауылдар-татулықтың символына айналып, халықтардың ынтымақты араласуына себепші болары сөзсіз.

Бұдан әрі түрлі қызықты спорт ойындарынан – «қазақ күресі», «қол күрес», «ордабасы», «асық ату», «мас-рестлинг», «тоғызқұмалақ»,  «ләңгіден»  жарыс өткізілді.

Бұдан соң «Білім» алаңында жастар мен жасөспірімдердің театрландырылған қойылымы және  жастар арасында тақырыптық байқаулар мерекелік концерті өтті.

«Жастар» аллеясының басты алаңында этномәдени бірлестіктер шығармашылық топтарының қатысуымен  өткен концерттік бағдарлама 2 сағаттан астам уақытқа созылды.

Мерекелік концерт барысында облыс әкімі Асқар Мырзахметов жиналған барша жұртшылық – қала тұрғындары мен қонақтарын  бірлік мерекесімен құттықтап,  жамбылдықтарға зор денсаулық, бақ-береке, бай-қуатты өмір тіледі.  Сонымен бірге облыс әкімі өңіріміздің әлеуметтік-экономикалық дамуына үлес қосқан қоғамдық бірлестіктер өкілдерін марапаттап, оларға алғыс хаттар мен мақтау қағаздарын табыс етті. Сондай-ақ, мерекеге жиналған жұртшылыққа «Полонез» поляк тілі және мәдениеті орталығы» қоғамдық бірлестігінің мүшесі Аракси Плетнева және «Айнұры» татар-башқұрт этномәдени бірлестігі» қоғамдық бірлестігінің өкілі Риналь Рахматуллиндер  де ризашылық  лебіздерін білдірді.

Ары қарай этномәдени бірлестіктер жастарының қатысуымен «Рахмет, саған туған ел!» әнінің фонында «Саялы бәйтерек» атты театрландырылған қойылым көрсетілді. Театрланған қойылымға орыс-қазақ драма театры актерлары  мен  облыстық ассамблеяның шығармашылық топтары қатысты.

Мерекелік кеш соңы Жамбыл облыстық ҚХА этномәдени бірлестіктерінің «Поющие сердца», «Чун-тянь», «Самульнори», «Дэй Мохк Stayle», «Үкілім-ай», «Эремурус», «Калинка», «Маричка», «Infinity», «Грация Кавказа» би және вокал ансамбльдері, т.б. мен облыстық филармонияның  «Жібек жолы» халықтық эстрадалық оркестрі мен  «Ақкербез» би ансамблі, «Кәусар» вокалдық тобы және филармонияның  танымал әншілері өз өнерлерін көрсетуімен аяқталды.

Жамбыл облысы әкімі аппараты

«Қоғамдық келісім» КММ

баспасөз қызметі

Жамбыл облысы әкімі аппаратының «Қоғамдық келісім» КММ «Отбасы және мектеп» пилоттық жобасы аясында Тараз қаласының ювеналды сотымен  бірлесіп,  Тараз қаласының Сағадат Нұрмағамбетов атындағы № 10 орта мектебінде “Мектеп медиациясы”кабинетін ашты.

Іс-шараға сот өкілдері, Тараз қаласы әкімінің орынбасары, қалалық білім бөлімінің басшысы, АХАЖ, ювеналды заң консультациясының, жұмыспен қамту және әлеуметтік бағдарламалар бөлімінің, “Жастар ресурстық орталығы” КММ,  ішкі саясат бөлімінің,  ақсақалдар, аналар мен медиаторлар кеңесінің өкілдері қатысты.

Ювеналды соттың төрағасы Ербол Дүйсенбаевтың пікірінше: «Мектеп медиациясы – бұл тек білім беру әдісі ғана емес, сонымен қатар басқа адамды түсіну, қабылдау және тыңдау қабілетіне негізделген тұтас дүниетаным. Оны тәрбиелеу және білім беру саласындағы кездейсоқ жағдайларды шешу барысында пайдалану қажет».

Жамбыл облыстық сотының азаматтық істер жөніндегі сот алқасының төрағасы Жомарт Рүстембеков медиация кабинетінде мұғалімдер мен оқушыларға әлеуметтік-құқықтық көмек және психологиялық қолдау көрсетілетінін атап өтті. Сондай-ақ, ол қақтығысты, оның тікелей қатысушылары шешуі тиіс екенін де және сонда ғана  проблеманың үздік шешімі табылатындығын түсіндірді.

Тараз қаласының әкімі Кенжебай Олжабай да бала мүддесі –  мемлекеттік саясат пен мемлекеттік органдар қызметінің басым саласы болып табылатынын айрықша атап өтті.

Осы қатарда Медиация кабинетінің меңгерушісі  Валентина  Досыбиева  ҚХА Аналар, ақсақалдар  кеңесі, қоғамдық келісім кеңесі мен медиаторлары өкілдерінің бірлескен жұмысы жүргізіліп жатқанын түсіндіре келе, облыстың орта мектептерінде мұғалімдер мен оқушылар арасында медиацияны қолдану туралы құқықтық түсіндіру жұмыстары жүргізілетіндігін айта кетті.

Ағымдағы жылдың екінші жартыжылдығында  «Мектеп медиациясы» бағдарламасы бойынша  семинар-тренингтері жоспарланған, онда мұғалімдер,  психологтар, әлеуметтік педагогтар, оқушылар мен белсенді ата-аналар арнайы дайындықтан өтуі тиіс. Семинар-тренинг оқушылардың медиативтік құзыреттілік деңгейін арттыру мектеп қабырғасынан басталуына,  медиация институтын дамыту  жұмыстарын  жүргізуде жол көрсетіп, болашақ ұрпақтың  кездейсоқ болатын дау-дамай мен қақтығыстар шиеленістеріне  медиативтік көзқараспен қарауға  үйрететін болады.

Медиация кабинеті мектеп медиаторларының жұмысын қамтамасыз ету үшін қажетті жиһазбен жабдықталған.

Сонымен қатар, медиацияны қолдану саласы, медиацияны жүргізу қағидаттары туралы оқушыларға арналған ақпарат пен буклеттер, сондай-ақ мектеп медиаторларының тізімі орналастырылған арнайы стенд орнатылды.

Кабинеттің ашылу салтанатынан кейін облыстық ҚХА ақсақалдар кеңесінің орынбасары Абдрахман Зайнутдинов «Ұрпақтар сабақтастығы» тақырыбында, облыстық ҚХА Аналар кеңесінің төрағасы Мухаббат Миражапова «ҚХА –бірлік пен толеранттылық үлгісі» тақырыбында, облыстық ҚХА медиация кабинетінің меңгерушісі В.Н.Досыбиева «Мектептегі Медиация» тақырыбында баяндама жасап, оқушылармен дәріс-әңгіме жүргізді.

Іс-шара соңында, отырысқа қатысушылар «Мектеп медиациясы» кабинетінің жоспарын  құру қажеттілігі туралы ортақ пікірге келді, өйткені олар мектеп қабырғасындағы қақтығыстардың төмендеуіне ықпал етеді.

Жамбыл облысы әкімі аппараты

«Қоғамдық келісім» КММ

Баспасөз қызметі

Қазақстан халқы ассамблеясының «Қайырымдылық керуені» ұлттық қайырымдылық науқанының бағдарламасы бойынша еліміздің барлық өңірінде «Бейбітшілік және келісім керуені» қайырымдылық акциясы өтуде. Акциянын мақсаты – қоғамдық келісім мен жалпыұлттық бірліктің басты факторы ретінде қоғамда мейірімділікті, гуманизм мен өзара риясыз көмек жасауды орнықтыру, қазақстандықтардың, олардың ішінде балалардың, көп балалы отбастарының, мүмкіндігі шектеулі адамдардың өмір жағдайлары мен денсаулығына қамқорлықты күшейту.

Осыған орай, Жамбыл облысы Қазақстан халқы ассамблеясы мен Жамбыл облысы әкімі аппаратының «Қоғамдық келісім» КММ ұйымдастыруымен ағымдағы жылдың сәуірінде Жамбыл облысының Т.Рысқұлов, Меркі аудандарында «Қайырымдылық керуені» ұлттық қайырымдылық компаниясы аясында өтетін «Бейбітшілік және келісім керуені» қайырымдылық акциясы өтті.

Аталған шараға ҚХА мүшелері мен этномәдени бірлестіктер өкілдері, облыстық ҚХА Қоғамдық келісім кеңесінің төрағалары мен мүшелері, Т.Рысқұлов пен Меркі аудандарының ішкі саясат бөлімінің өкілдері, облыстық Аналар кеңесінің жетекшілері мен мүшелері, «Жаңғыру жолы» жастар қозғалысының белсенді мүшелері, ауданның жұмыссыз жастары, «Салауатты өмір салтын қалыптастыру» орталығының мамандары, аудандық, ауылдық округтері Ақсақалдар кеңесінің төрағалары, аудандық сот өкілдері, медиаторлар, халық шығармашылығы шеберлері, БАҚ өкілдері қатысты.

Акция Т.Рысқұлов ауданының Құлан ауылының агротехникалық колледжінде және де Меркі ауданы, Меркі ауылының №9-колледжінде Қоғамдық келісім кеңестері мен «Жаңғыру жолы» жастар қозғалысы мүшелерін «Жаңғырған ауыл» жобасымен  таныстырудан  басталды. Әрмен қарай еліміздің ауылдарын жаңғыртуда, жаңартуда жастарды талаптандыру, қызықтыру ретінде және адамгершілік-рухани тәрбие беру мақсатында колледж жастары арасында тренингтер өткізілді. Тренингтен соң Құлан ауылы мен Меркі ауылының колледж ғимараттары мен тарихи орындарына саяхат жасалып, акцияға қатысушылар жергілікті мұражайлармен  таныстырылды.

Сонымен бірге, «Қазақтану» жобасы аясында «Қазақтың дәстүрлі құндылықтары: отбасындағы әйелдер образы және тәрбие» тақырыбында  Аналар кеңесінің  және  «Медиация – ел бірлігінің негізі» тақырыбында медиаторлардың, осыған қоса облыстық Қазақстан халқы ассамблеясы Ақсақалдар кеңесінің де аймақтық кеңейтілген отырыстары өткізілді.

Аналар кеңесінің осы отырысында Жамбыл облыстық ҚХА Аналар кеңесінің төрайымы Мухаббат Миражапова  әр қазақстандық отбасындағы аналардың ролі мен міндеттерін тілге тиек етті. «Берік отбасы-тұрақтылығымыздың кепілі» қағидасын ұстана отырып, ананың қаншалықты перзентін моральдық, рухани құндылықтарға баулуынан еліміздің болашағы айқындалады,  осы тұрғыда өз ойымен бөлісті.

Қалалық және Меркі, Т.Рысқұлов аудандық медиаторлары өз отырыстарында аталған аудандар бойынша жастар арасында қауіпсіз ортаны қалыптастыру, қақтығыс және дағдарыстық жағдайларда жастардың медиативтік көзқарас дағдыларын дамыту қажеттігін, еліміздің болашағы жастардың белсенділігіне, мәдениетіне және қарым-қатынас жасау қабілетіне байланысты екендігіне, 2019 жыл Жастар жылы деп жарияланғандықтан, жастардың белсенді азаматтық ұстанымын қалыптастырып, олар үшін медиативтік құзыреттілік негіздерінің тренингтерін жиі өткізу мәселелерін қарастырды.

Сондай-ақ, «Салауатты өмір салтын қалыптастыру» орталығының бас маманы Сарыбаева Балхаш көп балалы аналарды тегін медициналық тексерістен өткізді.

Жиналған жұрт, колледж жастары JASTAR JYLY-DANGYL ZHOL» Қазақстан халқы Ассамблеясының  жобасымен таныстырылып, ауданның жұмыссыз, бос жүрген жастарымен кездесулер өткізілді. Олардың тізімі алынып, қанша пайызы жұмыс іздеуде қиыншылыққа ұрынады, өз мамандығы бойынша жұмысқа тұра алмаушылық,, «дипломды жұмыссыздық» мәселелерінің өзектілігі негізінде  жастар арасында анкеталық сауалнама жүргізіліп, жұмыспен қамту шаралары көзделді.

Шара барысында «Қазіргі заманғы дәстүрлі өнердің ролі» тақырыбында халықтық шығармашылығы шеберлеріне арналған дәрістер өткізіліп, «Туған жер» көшпелі көрмесі ұйымдастырылды. Көрмеде жергілікті этномәдени бірлестіктер  қолөнер, қылқалам шеберлерінің шығармалары бағаланатын болады.

Осыған қоса, ҚХА Ғылыми-сараптамалық бөлімінің «Қазақстан Республикасының этномәдени саясатының жалпы тәсілдері мен негізгі принциптері» тақырыбында аймақтық семинары өтті. Жиынға қатысушы мемлекеттік саясат мәселелерімен айналысатын мемлекеттік қызметкерлер,  дін істері, тілдерді дамыьу басқармаларының мамандары, құқық қорғау органдарының өкілдері – этносаралық және конфессияаралық қатынастар, қоғамдық келісім мен жалпыұлттық бірлік саласындағы мемлекеттік саясатты іске асыру технологиялары бойынша сөз өрбітті. Семинар барысында М.Х.Дулати атындағы Тараз мемлекеттік университетінің доценті, педагогика ғылымдарының кандидаты, Рысты Керімбаева «Ғасырлар дәстүрін сақтау: қазақтардың мәдени коды мен толеранттылық» тақырыбында жасаған баяндамасында ҚХА «Қазақтану» жобасы негізінде этносаралық жағдайлар қарастырылып, осы орайда күнделікті жұмыс жүргізілу қажеттігін атап көрсетті. Сонымен бірге, аталған жоба барысында орындалатын жұмыстарды жүзеге асырудағы  өз тәжірибесімен бөлісті.

Қайырымдылық жасауды қағидаға айналдырған облыстық ассамблея этномәдени бірлестіктерінің мүшелері  бұл жолы Т.Рысқұлов ауданы, Құлан ауылының және Меркі ауданы, Меркі ауылының  жағдайы төмен көп балалы 10 этностық отбасына  азық-түліктер таратып қайырымдылық көмек көрсетті. Атап айтқанда, Жамбыл облыстық Өзбек этномәдени бірлестігі» қоғамдық бірлестігінің төрағасы Бахром Муминов, «Жамбыл облыстық» «Вынхуа» дүнгендер ассоциациясының мәдени орталығы» қоғамдық бірлестігінің құрметті төрағасы Руслан Исмазов, «Ахыска» түрік этномәдени бірлестігінің Жамбыл облыстық филиалы қоғамдық бірлестігінің төрағасы Махмутжон Давришев, Қазақстан республикасы «Барбанг» күрділер ассоциациясының Жамбыл облысындағы республикалық филиалы» қоғамдық бірлестігінің төрағасы Латиф Айдаров, «Жамбыл облыстық» «Вынхуа» дүнгендер ассоциациясының мәдени орталығы» қоғамдық бірлестігінің мүшесі Зайнуддин Махусеевтердің басшылығымен аталған аудандардың аз қамтылған отбастарына азық-түліктің түр-түрі таратылып, қамығып отырған көп балалы аналарға қайырымдылықтар жасалып, бірнеше жанұялар қуанышқа бөленді.

«Бейбітшілік және келісім» керуені қайырымдылық іс-шарасының соңы ұлттар бірлігін ұлықтайтын және әркез қайырымдылықтарын аямайтын акцияға қатысушылардың қалаға қайтуымен аяқталды.

Іс-шараға 1000-ға жуық адам қатысты.

Жамбыл облысы әкімі аппаратының

«Қоғамдық келісім» КММ

баспасөз қызметі

Ағымдағы жылдың сәуір айында Жамбыл облыстық әкім аппаратының «Қоғамдық келісім» коммуналдық мемлекеттік мекемесінің ғылыми-сараптамалық бөлімінің ұйымдастыруымен Байзақ, Жамбыл және Жуалы аудандарының мемлекеттік қызметкерлері мен этномәдени бірлестіктерінің өкілдерінің қатысуымен Байзақ ауданының Сарыкемер ауылында  «Қазақстан Республикасының этномәдени саясатының жалпы тәсілдері мен негізгі принциптері» тақырыбында аймақтық семинары ұйымдастырылды.

Семинардың мақсаты – қоғамдық келісім және жалпыұлттық бірлік саласындағы мемлекеттік саясатты іске асыру технологиялары бойынша тыңдаушылардың кәсіби білімі мен дағдыларын, сондай-ақ Қазақстан Республикасы Елбасының «Болашаққа көзқарас: қоғамдық сананы жаңғырту» бағдарламалық мақаласында қойылған міндеттерді арттыру. Корсетілген тақырып бойынша тыңдаушылардың заманауи білімі мен дағдыларын меңгеру болды.

Іс-шараға этносаралық және конфессияаралық қатынастар, қоғамдық келісім мен жалпыұлттық бірлік саласындағы мемлекеттік саясат мәселелерімен айналысатын мемлекеттік қызметкерлер, дін істері, тілдерді дамыту басқармаларының мамандары, құқық қорғау органдарының қызметкерлері қатысты.

Белгіленген бағдарламаға сәйкес семинар модераторы – М.Х.Дулати атындағы Тараз мемлекеттік университетінің «Қазақстан халқы Ассамблеясы» кафедрасының меңгерушісі, философия ғылымдарының кандидаты  Парида Мамедова  «Жамбыл облысындағы этноконфессионалды жағдайды талдау және шолу: этномәдени, діни бірлестіктердің мемлекеттік құрылымдарымен өзара іс-қимылын жетілдіру бойынша ұсынымдар» атты  баяндамасында Жамбыл облысындағы этносаралық және конфессияаралық қатынастарды, қоғамдық келісімді нығайту, этностардың мәдениеті мен салт-дәстүрлерін дамыту бойынша ұсынымдарын атап көрсетті.

Жамбыл облысы әкімдігінің тілдерді дамыту басқармасының «Тілдерді оқыту орталығы» мемлекеттік коммуналдық қазыналық кәсіпорнының директоры Әлімбекова Гүлхан «Жана әліпби және емле ереженің жаңалықтары» тақырыбында жазылған  баяндамасында жалпыұлттық бірлік саласындағы мемлекеттік саясат мәселелері мен жаңа әліпбиге көшу жұмыстарына тоқталып өтті. Сонымен қатар, семинарда Жамбыл облысы әкімдігінің тілдерді дамыту басқармасы «Тілдерді оқыту орталығы» «Жаңа әліпби мен емле ережелерінің жаңалықтары» тақырыбында тренинг өткізді.

Аз ғана үзілістен соң, Жамбыл облысы әкімдігінің  «Дін проблемаларын зерттеу орталығы» коммуналдық мемлекеттік мекемесі ақпараттық түсіндіру және жоспарлау бөлімінің инспекторы Бахтияр Алпысбаев өңірдегі діни жағдайға баға бере отыра, Қазақстанның бүгінгі өмірінде ислам факторы үлкен мәнге ие екендігін,  бұл бір жағынан қуантарлық жағдай болса,  екінші жағынан ислам дінін өз мүдделерін жүзеге асыру жолында қолданғысы келетін діни радикалды топтардың белсенділігі де алаңдатпай қоймайтындығын өзекті мәселе ретінде қарастырды.

Сондай-ақ,  М.Х.Дулати атындағы Тараз мемлекеттік университетінің аға оқытушысы, педагогика магистрі Раушан Сейдрахманова жаһандану үрдісінде  әлемді шарпыған рухани дағдарыс жағдайында тұлғалардың адами құндылықтарға бүгінгі таңда мән бермеуі туралы практикалық тренинг жүргізді. «Менің құндылықтарым» тренингі арқылы әрбір адамның жеке «мені» «сананы тазалауы», сананы кеңейтуді қамтамасыз ететін рухани байлыққа жетілдіруі керектігі туралы ой қозғады.

М.Х.Дулати атындағы Тараз мемлекеттік университетінің доценті, педагогика ғылымдарының кандидаты Рысты Керимбаева «Ғасырлар дәстүрін сақтау: қазақтардың мәдени коды және толеранттылық» тақырыбында баяндама жасады. Еліміздің жас ұрпақтарының ұлттық кодын қалыптастыру жолында жасаған ғылыми-педагогикалық жобасымен таныстырды. Автордың жобасы  2018 жылдың 19 қарашасында Астана қаласының Қазақстан Республикасы Президентінің жанындағы Мемлекеттік басқару академиясы мен Қазақстан халқы Ассамблеясы ұйымдастырған «Н.Ә.Назарбаевтың қоғамдық келісім мен жалпыұлттық  бірліктің қазақстандық моделіне» арналған үздік ғылыми жобалардың республикалық байқауда  1-орын иеленгенімен хабардар етіп, жобаның практикалық маңызымен таныстырды.

Ғылыми-сараптамалық топтың бұл отырысында Жамбыл облысындағы эносаралық жағдайлар қарастырылып, әлеуметтік зерттеу нәтижелері қорытындыланып, атқарылған жұмыстарға  толықтырулар енгізілді.

Жиын соңында семинарға қатысушыларға сертификаттар табысталып, өткізілген іс-шараның қорытындысы жарияланды.

Жамбыл облыстық әкім аппаратының                          «Қоғамдық келісім» КММ баспасөз қызметі