Жастар арасындағы медиация

/in /by

Мемлекет басшысының «Қазақстандықтардың әл-ауқатын арттыру: табыстар мен өмір сапасын арттыру»  атты Қазақстан халқына Жолдауын іске асыру жөніндегі жалпыұлттық іс-шаралар жоспарын орындау мақсатында «Медиация бірлік негізі ретінде» әлеуметтік жобасы әзірленді.  Ол қоғамның, оның ішінде жастар ортасының толыққанды дамуы мен әлеуметтенуі үшін қолайлы жағдай жасауға бағытталған. Айта кетерлігі, жастар жылы жастарды қолдау және дамыту жөніндегі жаңа жобаларды жүзеге асыру және олардың қоғамдық өмірге белсенді қатысуға деген қызығушылығын арттыру үшін жаңа мүмкіндіктер ашты. Осыған орай, Тараз қаласының Достық үйінде  Медиация кабинетінде үстіміздегі жылдың желтоқсан айында «Жастар арасындағы медиация» тақырыбында оқу семинар-тренингі өткізілді.

Жамбыл облысы әкімі аппаратының «Қоғамдық келісім» КММ-нің алға қойған мақсаттарына қол жеткізу үшін мұндай бірқатар – «Мектеп медиациясы», «Жастар арасындағы Медиация», «Отбасылық медиация», «Медиация. Базалық курс» сияқты оқу тренингтерінен қаншама жастар игілікті дәріс алды.  Алғашқы оқу сабақтарының бірі – «Мектеп медиациясы» ҚХА «Жаңғыру жолы» жастар қозғалысының жас өкілдері, «Айбын» әскери-патриоттық клубы және облыс мектептерінің оқушылары үшін өткізілген болатын. Мектеп ортасындағы шиеленіс сипатқа ие болатын күрделі жағдайлардың саны жыл сайын артып келе жатқанына байланысты, тренингтің мақсаты оқушыларды дауларды конструктивті шешуге және олардан шығуға көмектесетін әдістермен және тәсілдермен таныстыру болды.

Сабақ барысында оқушылар медиативтік процедуралар тәжірибесінен мысалдар оқып, ойын түрінде өздерін медиатор ретінде көрсетіп, оны сәтті орындап шықты.

«Жастар арасындағы Медиация» семинар-тренингі стресстік және даулы жағдайларда дауларды шешу дағдыларын қолдану ұстанымдарына негізделді.  Алынған тәжірибе жастарға өз құрбыларымен және ересектермен қарым-қатынасын сауатты құруға көмектеседі. Оқу сабағының қатысушылары ҚХА «Жаңғыру жолы» жастар қозғалысының белсенді өкілдері, колледж және мектеп студенттері болды.  Оларға дау-жанжалды жағдайлар  мен  медиацияны шешу кезінде қолдану тәсілдері ұсынылып, олар алынған дағдылардың көмегімен табысты шешілді. Тренингте жастарды оқыту күнделікті өмірдегі келеңсіз жағдайларды азайтуда айтарлықтай нәтиже береді.

«Медиация бірлік негізі ретінде» жобасын жүзеге асыру міндеттеріне сондай-ақ, Жамбыл облысы ҚХА-ның тәжірибеші медиаторларының кәсіби біліктілігін үнемі қолдау және біліктілігін үнемі арттыру қажеттілігі де жатады.  Оған орай, әлеуметтік жоба аясында «Отбасылық медиация» атты семинар-тренинг те өткен болатын.

Ресми мәліметтер бойынша, елімізде әрбір үшінші отбасы ыдырап жатыр, бұл негізінен жас жұптар. Қазақстан халқы Ассамблеясының міндеті – этностардың менталитетін, мәдениетін ескере отырып, осындай проблемаларды шешуге жәрдемдесу, оларды ескерту. Аналар кеңесінің, этномәдени бірлестіктердің өкілдері, ҚХА-ның ақсақалдары мен медиаторлары отбасылық қарым-қатынас саласындағы жанжалдар түрлері мен Медиация ерекшеліктерімен танысты.

Оқыту интерактивті тренинг форматында өткізілді. Онда мини-дәрістер, практикалық жаттығулар, рөлдік ойындар және отбасылық даулар мен қақтығыстар бойынша пікірталастар қолданылды. Бұл дағдылар оларды отбасылық құндылықтарды сақтау және әртүрлі даму кезеңдерін бастан кешірген ата-аналар мен отбасыларға қажетті көмек көрсету үшін медиация кабинетінде құрылған «Отбасы орталығында» бұрышында пайдалануға көмектеседі.

Медиаторлар желісін дамыту және ҚХА медиаторлары пулын қалыптастыру және кәсіби емес медиаторлар үшін базалық курстан  аудандық би кеңесінің, этномәдени бірлестіктердің, жеке ұйымдардың өкілдері, жалпы білім беретін мектептердің психологтары мен әлеуметтанушылары базалық білім алды.  Қатысушылар оларды адамдар арасында туындаған даулы қарым-қатынастарды реттеу үшін пайдаланатын болады. Тренингте алынған бұл дағдылар қоғамдағы әлеуметтік, саяси шиеленісті төмендетуге көмектеседі.

Сабақты тәжірибелі сертификатталған медиатор-жаттықтырушы Сафонова Лариса Владимирқызы өткізді. Әр семинар-тренингтен кейін қатысушыларға сертификаттар мен әдістемелік ұсыныстар берілді. Жобаны бастапқы іске асыру 2019 жылға көзделген, бірақ медиация мен қалпына келтіру тәсіліне оқыту бір реттік бола алмайды, ол келесі жылы да жалғасатын болады.

Біз Жамбыл облысы әкімі аппаратының «Қоғамдық келісім» Жамбыл коммуналдық мемлекеттік мекемесінде Медиация мектебі базасында медиативтік өзара іс-қимыл саласында дайындықтан өткен тыңдаушылар Қоғамдық келісім мен жалпыұлттық бірлік саласындағы жанжалдар мен дауларды шешуде бірегей тәжірибе мен практикалық дағдыларды алды деп есептейміз.

Жамбыл облысы әкімі аппаратының

«Қоғамдық келісім» КММ

Баспасөз орталығының басшысы

Бибігүл Шахзада

Медиацияның қоғамдық келісімді қамтамасыз етудегі рөлі

/in /by

Үстіміздегі жылдың желтоқсан айында Тараз қаласындағы Достық үйінің Медиация кабинетінде «Қоғамдық келісімді қамтамасыз етудегі медиацияның рөлі» тақырыбында медиаторлар кеңесінің кеңейтілген отырысы өтті.

Іс-шараға облыстық, қалалық соттардың судьялары, кәмелетке толмағандардың істері жөніндегі мамандандырылған  ауданаралық сотының судьялары, прокуратура, облыстық ІІД өкілдері, этномәдени бірлестіктердің мүшелері, ҚХА медиаторлары және БАҚ өкілдері қатысты.

Кездесу барысында «Медиация туралы» заңды дамыту және қолдану перспективалары, өңірдегі медиация институтының қызметін күшейту және жандандыру үшін мемлекеттік органдармен, азаматтық қоғам институттарымен өзара іс-қимылдың негізгі тетіктері туралы мәселелер қаралды.

Мәжілістің  модераторы боп Медиация кабинетінің меңгерушісі-Досыбиева Валентина Николайқызы саналды. Алғы сөз «Қоғамдық келісім» КММ басшысы Убайдуллаева Рано Махсұдқызында болды.

Отырыста Жамбыл облыстық сотының қылмыстық істер жөніндегі сот алқасының төрағасы Н. М. Абидов, бітімгершілік процедуралар жөніндегі үйлестіруші Д. Н. Нұрлыбаева, «Отбасылық медиация» облыстық сотының судьясы  Ғ.А.Асылбек және басқалар сөз сөйледі.

«ҚХА – ның Жамбыл облысындағы 2019 жылғы медиация кабинетінің қызметі туралы» баяндамасымен Валентина Николайқызы өз ойын білдірді: – 2019 жылдың 10 айында ҚХА медиаторларына 803 азамат жүгінді, оның ішінде 697 жанжал мен даулы жағдайлар шешілді. Шешілген мәселелердің негізгі түрлері: еңбек – 33, азаматтық – 400, отбасылық – 123, қылмыстық даулар – 141. Медиация кабинетінің бітімгершілік рәсімдерді насихаттау бойынша жүргізген жұмыстарының нәтижелерін біз қазірдің өзінде көріп отырмыз. Ағымдағы кезеңде медиация кабинеттеріне 2018 жылдың ұқсас кезеңіне қарағанда 24,5% – ға артық өтініш білдірді, өткен жылмен салыстырғанда қақтығыстар мен даулы жағдайлар шешілді, жалпы саннан 38.7% – ға өсті. Медиация өңірдегі дауларды шешудің танымал институтына айналуда.  Сондай-ақ, спикерлер өз сөздерінде, медиация құқықтық дауларды шешуде өзінің тиімділігін дәлелдегенін атап өтті. Отырысқа қатысушыларға 2019 жылғы медиация кабинетінің жұмысы туралы В.Досыбиеваның дайындауымен бейнеролик көрсетілді.

Сонымен қатар, бітімгершілік процедуралар жөніндегі үйлестіруші Д. Н. Нұрлыбаева атап өткендей: – Жамбыл облыстық соты мемлекеттік қызмет істері агенттігі мен «Атамекен» ҰКП департаментінің қызметкерлерімен кездесу ұйымдастырып өткізді, онда жария-құқықтық қатынастардан туындайтын даулар бойынша мәселелер талқыланды,-дей келе, талқылау нәтижесі бойынша облыстық сот «Жария-құқықтық қатынастардан туындайтын дауларды алдын алу» жобасын іске асыру шеңберінде заңнаманы және құқық қолдану практикасын жетілдіру бойынша мемлекеттік органдардың қызметін үйлестіретін жұмыс тобын құруды ұсынды.

Кездесу соңында кеңейтілген отырысқа қатысушылар Жамбыл облысындағы медиация институтын дамыту жөнінде нақты ұсыныстар беріп, пікір алмасты.  Облыстық сотпен, облыстық прокуратурамен, облыстық ішкі істер департаментімен, сондай-ақ, «Нұр Отан» партиясының ЖОФ-мен, медиация орталықтарымен, этномәдени бірлестіктермен және қоғамдық медиаторлармен өңірдегі медиация институтын дамыту үшін тұрақты негізде өзара іс-қимыл жасау жұмысын жалғастыру ұсынылды.

Оған қоса, халық арасында бітімгерлік рәсімдерді насихаттауды және Жамбыл облысы ҚХА кәсіби емес медиаторларының біліктілігін арттыру үшін оқыту курстарын өткізуді жалғастыру.

Қоғамдық келісім «КММ баспасөз орталығы»

Жамбыл облысы әкімі аппаратының

Баспасөз қызметі орталығы

Қайырымдылық қадірлі іс!

/in /by

Біздің барлығымыздың ортақ тілегіміз – еліміздің амандығы және Қазақстанымыздың дамуы мен гүлденуі. Осы арқылы біздің әрқайсымыз бақытты өмірге сенімдіміз. Әр отбасының тыныштығы, әл-ауқатының өсіп, тұрмыс сапасының артуы бәрімізге маңызды. Тараз қаласы Шу ауданында үйі өрт құшқан еврей халқының азаматшасына Қазақстанмен қатар  алып мұхиттық арғы жағындағы қандастарынан да көмек қолы келіп жетті. Жаны жомарт жандар  зардап шеккен отбасыға барынша көмек көрсетті.

Жамбыл облыстық «Шиват Цион»  этномәдени бірлестігі» қоғамдық бірлестігі төрайымы  Корнилина Людмила  Григорьевна Шу ауданында  үйі өртенген Ивашкина Татьяна Абрамовна және  оның мүмкіндігі шектеулі әрі   іс-әрекетке қабілетсіз ұлына көмек көрсетті.  Қарт әйелдің қайғысына  Шымкент қаласының еврей қауымы да  ортақтасып  175 000 мың теңге ақшалай жәрдем жасады. Аталған көмекті зардап шеккен отбасының есебіне еврей қауымының мүшесі, үйлестіруші Белла Атран жіберді. Сондай-ақ, қауымдастықтың кеңсесіне қайырымды жандардың көмегі ретінде тұрмыстық қажетті заттар, төсек-орын жабдықтары,  ыдыс-аяқ,  азық-түлік және ақша түрінде    көмек көрсетілген.

Қайырымды іс жасаудан Америкадағы еврей этносының өкілдері де шет қалмады.  «Джойнт» атты америкалық еврей үйлестіруші  комитетінен  200 000 теңге  бөлінсе,  Тараздағы еврей этносы 40 000 теңге жинап берді. Демеушілердің көмегімен жиналған ақшаға сатып алынған құрылыс материалдары мен басқа да қажетті заттар Людмила Григорьевна мен Тараз қаласындағы еврей этносының үйлестірушісі Наталья Перфильева арқылы  Тараз қаласынан Шу ауданына зардап шеккен отбасыға жеткізілді.

Зардап шегуші отбасыға барлығы 415 000 теңгеге қайырымдылық көрсетілді.

Назерке Оңғар

Жамбыл облысы әкімі аппараты

«Қоғамдық келісім» КММ

Баспасөз орталығы

Біз достықпен мықтымыз!

/in /by

Тараз қаласының Достық үйінде “Жамбыл облысы этностарының дәстүрлері мен мәдениеті” жобасы аясында “Біз достықпен мықтымыз!” атты этномәдени бірлестіктердің фестивалі өтті.

Іс-шараның мақсаты облыстың этномәдени бірлестіктерінің дәстүрлері мен мәдениетін сақтау және дамыту, олардың шығармашылық әлеуетін ашу, “Рухани жаңғыру”бағдарламасын жүзеге асыру және насихаттау болып табылады.

Шараға облыстың этномәдени бірлестіктерінің өкілдері мен жастары қатысты.

Этнофестиваль театрландырылған қойылым түрінде өтті,онда баланың туған кезінен бастап ересек жасқа дейінгі өмірі көрсетілді. Әр түрлі этностар өз дәстүрлерін өмірлерінде маңызды орын алатын сәттерін салт-дәстүр түрінде көрсетті. Сахнаға алғашқылардың бірі болып  «Әулие-ата» қазақ мәдени бірлестігінің өкілдері бала дүниеге келгенде  қазақы салт-дәстүрмен «Сүйінші сұрау» атты жоралғыны театрланған көрініспен қойды.

Сүйінші – қуанышты хабар әкелушіге берілетін сыйлық. Дүниеге жас нәресте келуін, келін түскенді, алыстағы сағынған адамның келгендігін, жоғары атақ, үлкен сыйлық берілуін, т.б. қуанышты сәттерді алғаш хабарлаушы сүйінші сұрайды. Сүйіншіге бағалы зат немесе ақша береді. Қуанышты хабар жеткізуші адам «сүйінші-сүйінші» деп келеді. Мұндайда қуанышты үй иесі «қалағаныңды ал» дейді. Немесе оған риза болатындай сыйлық ұсынады. Бұл қуанудың, ризалықтың белгісі. Сүйінші сұраудың да, оның сүйіншісін алудың да ешқандай сөкеттігі жоқ.

Қазақ мәдени бірлестігі көрерменге тек «Сүйінші сұрау» салтымен ғана шектелмей бесікке салу рәсімінде көрсетті. Ежелден дүниеге ұл бала келсе де, қыз бала келсе де қазақтар үлкендердің ақ батасын алып баланы бесікке бөлеп әлдилейтін  болған.  Бұл үрдіс күні бүгінге дейін жалғасын тауып келеді.  Қазақ халқы  баласын ағаш бесікке салып асырайды. Қазақтар ертеде өшпелі халық болғасын ағаш бесік көшпелі өмірге өте қолайлы, иіп кептірілген талдан жасалған. Екі басын қайың ағаштан да шауып жасайды, астына тақтай салып, дәрет жүретін жерін тесіп ойып қояды. Оған киізден түбек жасап кигізеді. Баланы орайтын кеудеше, аяқ жақты қымтайтын көрпеше жастықтар салады. Бесіктегі сәбидің дене бітімі түзу, қол-аяғы түзу, ширақ болады. Бесік баланы кездейсоқ құлаған заттан, суық пен ыстықтан қорғайды.

Одан әрі Жамбыл облыстық «Радонеж» орыстар қоғамы» қоғамдық  бірлестігі «Әженің ботқасы» атты дәстүрлерін ұсынды. Орыс халқында баланы шомылдыру рәсімін өткізінен кейін яғни шоқындыру рәсімінен соң үйге келген сәби мен қонақтарға әжесі ботқа жасап таратады. Сол сәтте балаға арнап тілек айтқан адамға ерекеше көп ботқа берілетін болады. Ботқаның құрамында денсаулыққа пайдалы дәмдеуіштер болады және ол ерекеше дәмге ие тағам түрлеріне жатады.

«Ахыска» түрік этномәдени бірлестігінің Жамбыл облыстық филиалы қоғамдық бірлестігі баланың алғашқы қадамдарын басқан сәтте тұсауын кесу рәсімін жасады.  Ақ матада бала ортасына дейін өтіп, монеталар салынған қапшықты қолына алады. Шақырылған қонақтар мен туыстар өз қалауы бойынша өз үлесін қосып, қапшыққа тиындар салады.

Өзбек этномәдени бірлестігі музыканттардың сүйемелдеуімен ұлттық әуендеріне билеп шықты. Әжелер, халық әнін шырқап, 6-10 жас аралығындағы немерелеріне шашу шашып, соңында әрбір әже немересінің басына тақиялы кигізіп, ұзақ өмір сүруді тілей отырып, батасын берді.

Одан әрі тәжік этномәдени бірлестігі 13 жастағы қыз әкесімен “Әдемі әрі бойжеткен қыз өсірген егін алқабын қалай өсті”-деп, әңгімелеседі.  Басқа қыздармен бірге хореографиялық композицияда бидай өрісі бейнеленген кілем тігіледі. Тәжік халқы үшін кілем құнды зат болып табылады. Тоқылған кілемнің  астында күйеу жігіт қалыңдығын ертіп үйіне алып барады.

Қыздың өміріндегі маңызды кезеңді әзірбайжан этномәдени бірлестігі ұсынған құдалық рәсімінен көруге болады.Күйеу жігіттің жағы қалыңдыққа сақина берді, ал ол өз кезегінде бұл сақинаны құрбыларына үлгі етеді. Өлшемі сәйкес келген қалыңдық сәтті үйленуге келісімін береді.

Үйлену той үрдісін көрерменге украин этномәдени бірлестігі көрсетті. Мұнда қатысушылар күйеу жігіт пен қалыңдыққа нан (тұз қосылған нан) тарту етеді. Содан кейін қалыңдықтың анасы қызының басына үш түрлі-түсті лента байлайды, олар анасының, әкесінің және туған жерінің батасын білдіреді.

Әйел өміріндегі керемет сәт-ол ана болуға дайын кезде. Кәріс этномәдени бірлестігі дәстүрлі тағамдардың әйел затының философиясымен байланыстырды.Мысалы, күрішті жақсы  көрсе, толғатып жатқан ана  ол дені сау бала туады, ал етті жақсы көрсе, жүктілік қуанышты болады, өткір кимчиды жеу оның жүктілігіндегі жеріктігі ең ауыр кезең, ал босануы жеңіл болады.

Қарашай-балқар этномәдени бірлестігі ұлын әскерге шығарып салу рәсімін көрсетті. Қарашай балқарларда әскерге кетіп бара жатқан ұл анасының табанының астынан топырақ алып, оны өзімен бірге ала кететін болған. Бұл оған сыртта жүргенде қорған болады деп есептеген. Міне, осы бір рәсім арқылы қарашай-бақар халқы ана деген құрметтің зор екендігін  тағы бір мәрте көрсетті,

Қойылым соңында түрлі этностардың аналары өз ана тілінде өлеңдер мен тілектер оқыды. Жер Ана символы ретінде шыққан ана айналаның бәрін біріктіріп, татулықтарын арттыруға шақырды.Фестиваль аяқталар тұста қатысушыларға ұлттық кәдесыйлар мен тәттілер таратылды.

Жамбыл облысы әкімі аппаратының

«Қоғамдық келісім» КММ

Баспасөз орталығы

Назерке Оңғар

Қоғамдық келісім кеңесінің форумы өтті

/in /by

Тараз қаласының Достық үйінде  Жамбыл облысы Қазақстан халқы ассамблеясы мен облыс әкімі аппаратының «Қоғамдық келісім» КММ бірлесе ұйымдастыруымен аймақтық ассамблея жанынан құрылған қоғамдық келісім кеңесінің «Тұрғындардың сапалық өмір сүруін жақсартудағы қоғамдық келісім кеңестерінің рөлі» тақырыбында облыс ҚХА қоғамдық келісім кеңесінің форумы өтті.

Форумға Жамбыл облысы әкімдігі еңбекпен қамтыуды үйлестіру және әлеуметтік бағдарламалар басқармасының, еңбек, әлеуметтік қорғау және көші –қону комитеті Жамбыл облысы бойынша департаментінің, Жамбыл облысы әкімдігі қаржы басқармасының, «Казпочта»АҚ Жамбыл филиалының басшылары, Еңбек, әлеуметтік қорғау және көші –қону комитеті Жамбыл облысы бойынша департаментінің басшысының дәрігерлік-әлеуметтік сараптама мәселелері жөніндегі орынбасары, Жамбыл облысының прокурорының бірінші орынбасары, Тараз қаласы әкімдігінің ішкі саясат бөлімінің бас маманы, «Гуд Жем» ЖШС менеджері, ауыл, аудан, мекемелердегі ҚКК барлық деңгейдегі мүшелері қатысты.

Форум мақсаты – тұрғындар мен азаматтық қоғам институттарының жергілікті атқарушы органдармен, өкілетті билікпен байланысын қамтамасыз ету, қоғамдық келісім мен ұлттар бірлігін нығайту бойынша ұсынымдар әзірлеу және талқылау, қоғамдық маңызды бастамалар, жобалар мен ұсыныстарды қолдау және ынталандыру, келеңсіз үрдістердің алдын алу мен ескертуге қатысу, алауыздық пен егестерді реттеудің практикалық шараларын жүзеге асыру, жан-жалды жағдайға жеткізбеу, әлеуметтік шиеленіс ошақтарын тоқтату болып табылады.

Кеңес форумы Облыс қоғамдық келісім кеңестерінің жұмысы жайлы көрмені тамашалаумен басталды. Көрмеге «Good Look Сауда үйі» ЖШС жем шығару өндіріс орны және Талас, Сарысу, Жуалы, Байзақ, Мойынқұм, Жамбыл, Т.Рысқұлов ауданыдарының қоғамдық келісім кеңесінің атқарған жұмыстарына қатысты ақпараттар мен көрнекіліктері қойылып, өзара сынға түсті. Жамбыл облысы Қазақстан халқы ассамблеясының хатшылық меңгерушісі Қожаева Маржан Төреғұлқызы аудандардың артық кем тұстарын айтып, түрлі тапсырмалар берді.  Мәселен Талас ауданындағы Қасқабұлақ ауылында тек күрді халқы ғана мекен етеді. Оларға арнап салынған мектептің ішінен қазақ сыныбын ашу әлі күнге қолға алынбаған. Маржан Төреғұлқызы осы мәселені таластықтарға шегелеп тапсырды. Ал, Жамбыл ауданында атқарылған ауықымды істер мен жүзеге асырылып жатқан шаруаның қарасы қалың екен. Шайқорық ауылына қарасты Қоңыртөбе елді мекенінде жастардың есірткіге әуестігін тию мақсатында Қоғамдық келісім кеңесінің өкілдері ауыл тұрғындарына арнап  салып жатқан мешітке қолдау танытып жатыр. Сондай-ақ, ауылдағы арақ мәселесімен арпалысуда айтарлықтай жүзеге асып жатқан көрінеді. «Биылғы жылы Жамбыл ауданы Жамбыл ауылдық округындағы дүкен сөрелерінен талайдың тағдырына кесірі тиген  арақ атаулының төбесі көрінбейтін болады.», – дейді аудан әкімдігі ішкі саясат бөлімінің Қазақстан халқы ассамблеясына жауапты  маманы Әбдірахман Мадияр Мұхтарұлы.Бұдан өзге аудандар мен мамандарға арнайы тапсырмалар мен міндеттер жүктелді. Өз аудандары туралы жақсы жаңалықтары мен игі істері туралы толыққанды таныстырған мамандарға дәрежелі орындармен сый-сияпаттар табыс етілді. Атқарған жұмысы мен айрықша нәтежиелерінің арқасында Жамбыл ауданы жүлделі бірінші  орыннан көрінді.

Көрме көрсетілімінен кейін форум басталды. Жиын тізгіні облыс ҚХА қоғамдық келісім кеңесі төрағасының орынбасары – Тажибаев Бигелді Халилуллаұлында болды.

Мінбеге алғаш болып шыққан Жамбыл ауданы қоғамдық келісім кеңесінің төрағасы – Сырлыбаев Бахыт Уалиұлы бастады. ҚХА әлеуметтік жобаларын жүзеге асыру, қайырымдылық, азаматтарды қабылдау, тұрғындардың өзекті мәселелерін шешуде Жамбыл ауданы қоғамдық келісім кеңесінің іс-тәжірибесі туралы баяндаған Бахыт Уалиұлы аудандағы кеңестің кең көлемде атқарған істері туралы есебіменде таныстырды. Жамбыл ауданы қоғамдық келісім кеңеснің төрағасының айтуы бойынша аталған ауданда биылғы жылы тоқсанына бір рет кеңестің отырысы өткізіліп, аудан халықтарының әлеуметтік мәселелерін шешуде кеңес мүшелері белсенділік танытқан. Кеңес жұмысы барысында 17 ауылдық округ бойынша кеңес мүшелеріне 110-ға жуық ұсыныс түсіп, оның 80-ге жуығы қанағаттандырылған. Сонымен қатар, биылғы жылы  Қоғамдық келісім кеңесінің мүшелері әлеуметтік жағдайы аз қамтылған, көп балалы аналарға және мүмкіндігі шектеулі отбасыларға барлығы 40 млн. теңге  көлемінде қайырымдылық шараларын жасаған.   Сонымен қатар, ауданда 11 медиатор жұмыс істеп жыл бойында 80 жуық мәселенің 60-ның шешімін тапқан.

Сонымен қатар, жиын барысында облыс қоғамдық келісім кеңестерінің ҚХА «Кедергіге жол жоқ» әлеуметтік жобасын жүзеге асыру,  «Жамбыл облысы Азаматтық альянс» заңды тұлғалар қоғамының  президенті,  облыстық «Кедергіге жол жоқ» мониторинг тобының жетекшісі – Юлдашев Заитжан Рахимұлы сөз сөйледі. «Мен осы іс-шара мүгедектер мен олардың отбасыларының проблемаларына, олардың қадір-қасиетін, құқықтары мен амандылығын қорғауға назар аударатынына, мүмкіндігі шектеулі жандардың құқықтары мен олардың проблемаларының өзгеруі үшін негіз болатындығына шын жүректен сенемін. Қазіргі заманғы қоғам арқылы мүмкіндігі шектеулі адамдардың интеграциясы мен әлеуметтік бейімделуі саласында да тез арада шешуді талап ететін ең өткір мәселелер бар.2019 жылдың сәуір айындағы ақпарат бойынша біздің облыста 45098 адам мүгедектер тұрады, оның ішінде 1-ші топтағы мүгедектер – 4125 адам, 2-ші топтағы мүгедектер – 18586 адам, 3-ші топтағы мүгедектер – 16171 адам, 18 жасқа дейінгі балалар -6196» – дейді,Заитжан Рахимұлы.

Кеңес отырысы барысында Тараз қаласындағы «Гуд Жем» ЖШС өндіріске прогрессивтік технологияны енгізудегі жұмыстары  туралы “GOOD LOOK Сауда үйі» ЖШС дайын өнімдерді сату  менеджері- Усенбаев Мухамед Еділбайұлы және ауылдарды дамытуда ҚХА «Жаңғырған ауыл» әлеуметтік жобасын жүзеге асыру және агроөнеркәсіптік секторға жаңа технологияны енгізудегі жұмыстары  туралы «Ақ желкен» жастар лигасының төрағасы, кәсіпкер – Махусеев Зайнуддин Абдулбахтиярұлы өз баяндамаларын жасады.

Жамбыл облысы ҚХА қоғамдық келісім кеңесінің форумының соңы концерттік бағдарламамен және жыл бойы белсенді жұмыс істеген кеңес мүшелеріне алғыс хаттар табыс етумен тәмамдалды.

Жамбыл облысы әкімі аппаратының

«Қоғамдық келісім» КММ

Баспасөз қызметі орталығы

Таразда аймақтық ассамблеяның Аналар кеңесінің кеңейтілген отырысы өтті

/in /by

ҚР Президентінің «Бірге» сайлауалды бағдарламасы мен Қазақстан халқына жолдауындағы тапсырмаларын ілгерілету және облыс ассамблеясының Аналар кеңесінің жыл бойы атқарған жұмысын қорытындылау негізінде аталған  кеңестің Таразда  кеңейтілген отырысы өтті.

Жамбыл облысы Қазақстан халқы ассамблеясы мен облыс әкімі аппаратының «Қоғамдық келісім» КММ бірлесе ұйымдастыруымен өткен шараға облыстық этномәдени бірлестіктің Аналар кеңесі, облыстық жұмыспен қамтужәне әлеуметтік қамсыздандыру бөлімі, облыстық дағдарыс орталығының мамандары,  оқу орындарындағы қыздар үйірмелерінің жетекшілері, жастар, отбасы мен қоғамдық жұмыстарды тең алып жүрген азаматшалар қатысты.

Шараның мақсаты – көп балалы отбасылар мен жастарды қолдау бойынша мемлекеттің жаңа шараларын түсіндіру, әрбір нақты аймақта отбасылық негізде шағын және орта бизнесті жүргізу үшін мемлекет ұсынатын мүмкіндіктерді қалай пайдалануға болатынын жеткізу, көп балалы және жас отбасыларды қолдау бойынша өңірде қолданылатын шаралармен таныстыру, аудандардағы аналар кеңесінің іс тәжірибесімен таныстыру, сонымен бірге  аналарға өз балаларының бейбіт және қауіпсіз болашағының негізі ретінде елдегі әлеуметтік әл-ауқат, тұрақтылық, бейбітшілік және келісім саясатын қолдауға шақыру болатын.

Кеңестің кеңейтілген отырысы аудандардағы Аналар кеңесінің қызметі туралы көрмені тамашалаумен басталды. Көрмеге түрлі қолөнер бұйымдары мен тағамдар қойылып, олар өзара бақсынасты.

Көрмеден кейін  кеңес төрайымы Миражапова Мухаббат Сайдуллаевнаның модераторлық етуімен  «Қазақстандықтардың жаңа буынын қалыптастырудағы Қазақстан халқы Ассамблеясы Аналар кеңесінің рөлі»  атты аталмыш кеңестің пленарлық отырысы өтті. Отырысқа «Асыл арман»ұлттық дәстүр мен өнерді қолдау» қоғамдық бірлестігінің басшысы – Нұрақбаев Ринат Даниярұлы, «Тараз қаласы әкімдігінің жұмыспен қамту және әлеуметтік бағдарламалар бөлімі» КММ басшысы – Олжабаева  Гаухар Елубайқызы, «Жұмыспен қамтуды үйлестіру және әлеуметтік бағдарламалар басқармасының «Жамбыл облыстық зорлық-зомбылық  салдарынан өмірлік қиын жағдайға тап болған әйелдерге арналған дағдарыс орталығы»КММ басшысы – Калыбекова  Жамал Дүйсебайқызы, Жамбыл облыстық денсаулық сақтау басқармасының №7 Тараз қалалық емханасы бас дәрігерінің орынбасары – Оспанбаева Аяжан Мелдешқызы, «Ника» коммуникативтік дамыту орталығының жаттықтырушысы, ҚР президенті жанындағы мемлекеттік басқару академиясының лекторы – Сарытай Гүлмира және аудандық Аналар кеңесінің төрайымдары қатысып, сөз сөйледі. Жиында   облыстық ҚХА жанындағы налар кеңесінің есебі, аудандағы аналар кеңестерінің тәжірибесі тыңдалды. Кеңестің кәмелетке толмағандары арасында құқықбұзушылықтың алдын алу бойынша полиция департаментімен бірлесе атқарған жұмыстары, жас отбасылардың ажырасуының алдын алу бойынша медиация мен облыс әкімі жанынан құрылған «Бастау» пилоттық жобасы аясындағы, қайырымдылық жұмыстары сараланады. Сонымен қатар, қаладағы жоғары және арнаулы оқу орындарының  қыздар үйірмелерінің жетекшілері мен белсенді мүшелері өз пікірлері мен жастар проблемаларын ортаға салып, ой қозғады.

Жиын соңына қарай жыл бойы атқарған жұмыстары мен еңбектері үшін қызмет пен тұрмысты қатар алып жүріп қана қоймай қоғамда белсенділік танытып жүрген  аналар мен қыз-келіншектерге алғыс хаттар мен бағалы сыйлықтар тарту етілді.

Марапаттау салтанатынан кейін Жамбыл облысы әкімі аппаратының «Қоғамдық келісім» КММ ғылыми-сараптамалық қолдау бөлімінің  «Жамбыл облысы этностарының мәдениеті мен сал-дәстүрлері» атты жобасының  аясында «Біздің күшіміз – бірлікте!» атты этнофестивалі өтті. Фестивальде өңірлік этномәдени бірлестіктерінің өкілдері өз салт-дәстүрлерін көрсетіп, мәдениеттерімен таныстырды.

Жамбыл облысы әкімі аппаратының

«Қоғамдық келісім» КММ

Баспасөз қызметі орталығы

Достықта жоқ шекара!

/in /by

Ел ертеңі жастар! Бүгінгі ұрпақ бүгінгі аға толқыннан қандай іс-әрекет көреді, соны өз дәуірінде жалғастыртын болады. Демек елдің болашағы мен кемел келешегі жастардың қолында. Олар ертең де осы бейбіт өмір мен тарих сахнасындағы Қазақстанның гүлденген ғасырларын жалғастыра алуы керек. Олар жалпыұлттық бірлік пен бірегейлікті, халықтар достығын, ұлыстар ынтымағының қаймағын бұзбай сақтауы қажет. Ал, біздің әр ісіміз оларға үлгі аларлық, өнегеге толы болуы шарт.

Міне осыған орай Жамбыл облысы Қазақстан халқы ассамблеясы өңірлік Достық үйінде «Достықта жоқ шекара» тақырыбындағы халықаралық жастар мәдени жобасын ұйымдастырды.

Елбасының 2018 жылғы 5 қазандағы «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауын іске асыру жөніндегі жалпыұлттық іс-шаралар жоспарының» 93, 94, 97 тармақтары бойынша жүзеге асқан жоба қараша айының 15-16 күндері аралығында екі күн бойы өтті.

Шараға Қырғызстан Республикасының және Жамбыл облысы Қазақстан халқы ассамблеясының белсенді жастары, сарапшы-жаттықтырушылар, лекторлар қатысты.

Жобаның негізігі мақсаты жас ұрпақты жалпыұлттық бірлік пен халықаралық ынтымақтастықты одан әрі нығайтуға үндеу, патриотизмге тәрбиелеу, мәдениетаралық шығармашылық диалогты дамытудың жаңа формаларына бастамашылық ету болып табылады.

15 қараша күні жоба шымылдығы салтанатты түрде түрілгеннен кейін жастар Жамбыл облысы Қазақстан халқы ассамблеясы ғылыми-зерттеу тобының мүшесі, педагогика ғылымдарының кандидаты – Керимбаева Рысты Калдыханқызы және М.Х.Дулати атындағы Тараз мемлекеттік университетінің «Педогогика және психология» кафедрасының оқытушысы – Байбосынова Раушан Темиргалиевнаның «Менің құндылықтарым» атты семинар-тренингіне қатысты. Сондай-ақ, тренинг барысында жастар асықтан жасалған түрлі бұйымдардан көрмеде тамашалады.

Семинар бітісімен Алатаудың арғы бөктерінен келген айыр қалпақты ағайынның жастары Тараз қаласының көркем әрі көне жерлерін аралап саяхат  жасады. Дәл осы уақытты «Қазақтану» жобасы бойынша  Достық үйі ауласында аймақтық ассамблеяның белсенді жастары киіз үй тұрғызып оның әрбір элементтерімен танысты.

Екі күнге созылған жастар мәдени жобасының екінші күні «Жастардың иннавациялық әлеуеті» атты көрме тамашалаумен басталды. Көрмеде жастар түрлі қылқалам шеберлерінің ереше, асқан шеберлікпен салынған  картиналарымен танысты.

Көрме тамашалау аяқталғаннан кейін Жамбыл облысы әкімі аппаратының «Қоғамдық келісім» КММ ғылыми сараптамалық тобының бас сарапшысы Альбина Маратқызы мен Замана Назимқызы «ҚХА жас елшілері» конференциясын өткізді. Конференцияға арқау болған тақырып «Селфбрендинг» болды. Конференция барысында бүгінгі күннің басты брендтері мен блоггерлері және интернет желісіндегі танымалдық туралы кеңінен ой қозғалып ортаға салынды. Конференция барысында облысымызға белгілі блоггер Исламбек Дастан бүгінгі күннің бренді туралы өз ойымен бөлісіті. Белгілі блоггер бүгінде менің посттарымның халыққа тез таралуының себебі қате жазуымда. Қандай ой айтсамда постта қатені өте көп жіберемін.Бұл оқырманның көңілін аудартып әрі жарияланымның рейтингін көтереді дейді. Аталмыш тақырып аясында облыстық «Ақ желкен» және «Жаңғыру жолы» жастар қозғалысының белсенді жастары Махусеев Зайнуддин,  Лигостаев Артур, Турдыева Хамида, Мухтасимова Алина, Прияхина Русалина және Қырғыз елінен келген қонақтар жастар арасындағы бренд түсінігінің мағынасы мен ондағы ерекшеліктер туралы атап көрсетті. Конференция соңында сөз алған облыстық ассамблеяның төраға орынбасары, хатшылық меңгерушісі Маржан Төреғұлқызы селфбрендинг тақырыбының мағынасы ашып көрсетіп, жастардың бойынан байқаған күш-жігері және ерекше форматта өткен конференция туралы ойымен бөлісті. Хатшылық меңгерушісі достықты ту еткен іс-шараның ұлттар арасындағы қарым-қатынасын одан әрі нығайта түсетінін баса айтты.

Конференция аяқталысымен жастар «Жамбыл облысы этномәдени бірлестік өкілдерінің салт-дәстүрлері мен мәдекниеті» жобасы аясында  «Этномириада» атты тимбилдинг өткізді. Жастар арсындағы бұл сайыс жастардың да қазылар алқасы құрамы мен көрермендерге де ерекеше көңіл күй сыйлады. Тартысты өткен тимбилдинг соңы  аталған жоба аясында және «Қазақтану» жобасы негізінде «Қазақ қонақжайлығының ерекшеліктері» тақырыбына сай қонақтар мен өңірлік жастарға қазақ халқының ұлттық тағамдары жент, мәйсөк, құрт, бауырсақ және ішінде кәмпиттер толтырылған қоржындар таратылды.

Жоба ары қарай Жамбыл облысы әкімі аппаратының «Қоғамдық келісім» КММ мәдени көпшілік іс-шаралар ұйымдастыру бөлімінің «Шекара дос жүрегін бөлмейді» атты концерттік бағдарламасымен жалғасты. Концертте елімізге белгілі Оңал Азаматова, Сұлужан Әбеновалар қырғыз тілінде ән салып қонақтарға көтеріңкі көңіл күй сыйласа, Әлішер Боранбаев және Ақбота Қосақбаева, «Болашақ» вокалдық триосының әншілері таланттарымен тамсандырды. Сондай-ақ, облыс ассамблеясының «Инфинити» және  «Үкілім-ай» би топтары әр ұлттың билерін биледі. Кеш соңы Жамбыл облысы әкімі аппаратының «Қоғамдық келісім» КММ басшысы Рано Махсудқызының қонақтар мен белсенді жастарға сый-сияпат тарту етуімен тәмамдалды.

Екі күнге созылған іс-шара соңында Тараздықтардан тәбәрік сый ретінде қазақ халқының брендіне айналған «Қазақстан» шоколады таратылып, қолөнер бұйымдары тарту етілді.

Жамбыл облысы әкімі аппаратының

«Қоғамдық келісім» КММ

баспасөз қызметі

Ахыска түріктеріне 75 жыл

/in /by

Ахыска түріктері түркі халықтарының құрамындағы тағдыры күрделі, тарихи тағдыры ауыр ұлттардың бірі. Бұл халықтың орналасуы қазақ жерінен алыста, тілдік байланыстары алшақ болғанымен, тағдыр ол халықты тоталитарлық қоғамның зұлмат жылдарында қазақтармен бір шаңырақ астында табыстырды. Содан да Жамбыл жерін мекен еткен ахысхалықтардың кешегі тарихы мен бүгінгі тағдыры жамбылдықтарды да бей-жай қалдырмайды.

«Ахыска» түріктері – Сталин режимімен 1944 жылы қарашада Орта Азия мен Қазақстан аумағына қоныс аударған көптеген халықтардың бірі болып келеді.

14 қараша 1944 жылы Грузияның Түркиямен шектесетін шекарадағы Аспиндза, Ахыска, Адыгюн, Ахилкелек және Богдановка секілді аудандарынан ахыска түріктерін Орта Азияға күштеп қоныс аудартты.

Міне, бүгінде Жамбыл облысын мекен еткен Ахыска түріктерінің жер аударылып келгендері 75 жыл толды. Атаулы датаға орай «Ахыска» түрік этномәдени бірлестігінің Жамбыл облыстық филиалы қоғамдық бірлестігі ас беріп, нәубетті жылдары өмірден өткенден құрбандардың құрметіне құран сүрелерін бағыштады. Жалпы түрік халқының жергілікті жердегі тұрғындары жыл сайын қараша айының 14 күні ата баба рухына арнап ас беруді дәстүрге айналдырған.  «Ахыска» түрік этномәдени бірлестігінің Жамбыл облыстық филиалы қоғамдық бірлестігінің төрағасы Махмутжон Давришев бұл  бас қосудың әр жыл сайын жалағаса беретіндігі және осы жолғы асқа жастардың қатысуы осы үрдісті ұрпақтан ұрпаққа жалғастыратынына сенетіндігін айтты.

Сонымен қатар, ас үстінде тағдыр тырнағы батқан түрік халқының тарихы туралы облыстық ассамблеяның хатшылық меңгерушісі Қожаева Маржан, түрік этносының ақсақалдар алқасының төрағасы Зулфаров Ибрагим, ҚМДБ Жамбыл облысындағы өкіл имамы Жұмағұл Қанат естеліктер мен  еске алулар айтып, 1944 жылы құрбан болған ата бабаға арналып оқытылған ұран аяттары қабыл болсын деп тіледі.

Жиын барысында тарих толқынынан сыр шертер арнайы дайындалған бейне роликтер көрсетілді.

Тарихқа көз жүгіртсек…

Ішкі істер халық комиссариатының ресми деректеріне қарағанда 1944 жылдың желтоқсан айының ортасында 92 307 адам, оның ішінде ер азаматтар – 18.923 (қариялар мен мүгедектер), – 27.399 әйелдер, 16 жасқа дейінгі балалар 45.085 болатын. Ең алғашқы эшелондар Ташкент облысына 9 желтоқсан 1944 жылы келді. Қоныс аударушылардың екінші жартысы Алматы, Жамбыл, Қызылорда және Оңтүстік Қазақстан облыстарына 22 күндік жолдан кейін келіп жетті. Қазақстанға қоныс аударушылар саны 6300 отбасын құрады, яғни 27 833 адам (Бараташвили, 1998: 12). Оларға тек 3 күндік тамақтарын алсын деп бұйрылды, бірақ олар 20 күннен астам жол ISSN 1563-0269 Journal of history. №1 (88). 2018 181 Тұрсұн Х.М., Омаралиев И.М. жүрді. Жол бойы тауарға арналған вагондарда 40 мыңға жуық адам суықтан және аштықтан мерт болды. Себебі, ол вагондар адам жағдайын еш қанағаттандырмады. Біріншіден, вагондардың ішіне 20-30 отбасын сыйғызды. Екіншіден, ол вагондар ешқандай жылулыққа икемделмеген. Ішкі істер халық комиссариатының ресми деректерінде мынандай көрсетіледі: «Қоныс аударушыларға ешқандай эксцесс жүргізілген жоқ және оларға жол бойы әрбір станцияда тоқтап ыстық тамақ берілді» деп жазылған болатын. Бірақ ол мағлұматтардың бұрыс екендігі белгілі. Түнгі сағат 12-де әскери киімдегі адамдар түріктердің үйлеріне келіп, оларды өз тұрғылықты жерлерінен эвакуациялады. Соғыс біткен соң оларды қайтадан өз үйлеріне әкеп жайғастырамыз деген уәде әлі күнге дейін орандалған жоқ. Түннің жартысында кім не аларын білмей, ешқандай дайындықсыз тек құжаттарын алуға үлгерді. Жер аударылғандарды тауар вагондарына салып, сыртынан құлыптап тастады. Вагонның ішінде ашыққандар сырттан көмек сұрай алмады, дәретке шығайын десе есік құлыпталған, іші боран, себебі далада қараша айы және вагонның ішінде пеш орнатылмаған. Осының салдарынан қаншама адамдар жолда үсіп, қайтыс болды. Арнайы мәліметтерде КСРО Ішкі істер халық комиссариатының дерегі бойынша 1948 жылдың маусым айы бойынша 14895 адам қайтыс болды деп келтіреді. Шын мәнісінде алғашқы алты айда 37 мың адамға жуығы қайтыс болды, олардың ішінде 17 мың балаларды құрады (İbrahim Hasanoğlu, 2016: 4). Қоныс аударған түріктердің ешқандай қоғамдық және азаматтық құқықтары болмады. Оларға Қазақстан мен Орта Азияның ауылдық жерлеріне ғана қоныстануға рұқсат берілген.

Тарих қойнауындаға түрік бауырлардың бастан кешкен өмірі осылай.

Әр жылдың 14 қарашасында Тараз қаласында және Жамбыл жерінің әр ауданында  түрік  халқы ата-бабаларына арнап ас беріп, құран бағыштауды әдетке айналдырған.

Жамбыл облысы әкімі аппаратының

«Қоғамдық келісім» КММ

баспасөз орталығы

«КОРЕ» Жамбыл облысы кәрістер қауымдастығы этнос күнін атап өтті

/in /by

Ағымдағы жылдың қараша айындаөңіріміздегі Достық үйінде Жамбыл облысы әкімі аппаратының  «Қоғамдық келісім» КММ ұйымдастыруымен Жамбыл облысы бойынша «КОРЕ» корейлер қауымдастығыөзінің 25-жылдығын атап өтті.

Бұл мереке Жамбыл облысы корейлері үшін ерекеше маңызға ие. Себебі, әр жыл сайын күз мезгілінде этнос күнін атап өтетін кәріс халқы осы жылы 25 жылдықтарын тойлады.

Салтанатты кешке құрметті қонақтардан  Жамбыл облысының “КОРЕ” корейлер қауымдастығының Вице-президенті Кан Анатолий Лаврентьевич, «Атамекен» кәсіпкерлер палатасы директорының орынбасары Ким Ирина Алексеевна, «Атамекен» кәсіпкерлер палатасының мүшесі Ан Антонина Анатольевна, сондай-ақ «Ноиндан» ақсақалдар кеңесі және кәріс этносының өкілдері мен жастары қатысты.

Концертте «Ариран» өнер мектебінің әртістері корей барабандарында өнер көрсетті. Дәстүрлі стильдегі корей музыкалық қойылымы бірінші секундтан бастап көрермендерге мерекелік атмосфера сыйлады.

Шара барысында «Ноиндан» ақсақалдар кеңесінің төрағасы Хе Илья Николаевич құттықтау сөз сөйледі. Ол барлық қатысушыларды осындай айтулы күнмен шын жүректен құттықтап, 25 жыл бойы алған жетістіктері мен нәтижелерін атап өтті. Өз кезегінде «Ноиндан» ақсақалдарының мүшесі Пак Анатолий Иванович кеңес үкіметі кезіндегі этносаралық қатынастар туралы тарихи деректерді егжей-тегжейлі баяндалып, сөз сөйледі. Қазақ жеріне келген сәттен бастап кәрістер тарих шеңберіне кірмегенін, керісінше, өз мәдениеті мен дәстүрлерін сақтап, байытқанын атап өтті.

Жамбыл облысының «КОРЕ» корейлер қауымдастығының Вице-президенті Кан Анатолий Лаврентьевич қонақтарға алғысын білдіріп, сондай-ақ, осы жылы бірлескен күш-жігерміздің арқасында  көптеген мақсаттарға қол жеткізгендігін ерекше атап өтті. Атап айтар болсақ биылғы жылы кәріс этносы «Сэроун Мирэ» кәріс жастарының қозғалысын және «Ариран» өнер мектебінің құрған.

Құттықтау сөзінен кейін мерекелік концерттің салтанатты бөлімі басталды. Бағдарламаға сай кеш барысында дәстүрлі биден бастап замауи биге дейін түрлі би биленді.Сондай-ақ, кәріс этносының ұлттық аспаптарымен түрлі музыкалық шығармалары орындалды. Кештің көркін қыздырған кәріс халқының талантты жастарының асқан шеберлікпен барабанда ойнауларын айтпай кетуге болмас.

Кеш соңында аталмыш этнос өкілдері  кәріс халқының мәдениетіне қызығушылық танытушы қонақтарға алғыс білдіріліп естелік суреттерге түсті.

Жамбыл облысы әкімі аппаратының

«Қоғамдық келісім» КММ

баспасөз орталығы

 

Жамбыл облыстық «Полонез» поляк тілі мен мәдениеті қоғамдық бірлестігі облыс аймағында жерленген поляк сарбаздарын еске алды

/in /by

Польшада 1 қараша күні өмірден кеткен барлық жақын адамдарды еске алатын күн болып саналады. Поляк халқы дүнеиден озған жақындарын жиі еске алып, оларға зор құрметпен қарайды. Қараша айы жақындаған сәтте Польша көшелерінің кез-келген дүкендер сөрелерінен шамдарды жиі кездестіруге болады. Бұл осы күні поляк халқының жақын адамдарының зираттарында тұтататын шам.

Бұл күні зират басы жарықтандырылады. Өйткені әрбір қабірде осындай шамның бір емес, ондағаны жанып тұрады. Бұл зираттарды мұқият жинап, гүлдермен әшекейлейді.

Дәл осы күні зират өте жарықтандырылады, өйткені әрбір қабірде осындай шамның бір емес, ондағаны жанып тұрады. Сондай-ақ, осы мереке қарсаңында зираттарды мұқият жинап, гүлдермен әшекейлейді.

Осыған байланысты жыл сайын осы уақытта Жамбыл облысының «Полонез» поляк тілі мен мәдениеті орталығы қоғамдық бірлестігінің өкілдері Жамбыл облысындағы жерленген поляк сарбаздарын еске алады.

Облыста поляк этносының жауынгерлері үш өңірде жерленген. Олар Мерке, Т.Рысқұлов аудандарында және Шотпак станциясында. Осы жылы олар поляк сарбаздары жерленген барлық орындарды аралап шықты.

Бірінші күні көптеген поляк жауынгерлері жатқан Шотпак станциясына барды. Сондай-ақ, Шымкент қаласының Польша орталығы мен Алматы қаласындағы Польша Республикасының елшісі Михал Богдановичпен кездесу өтті.

Келесі күні Достық үйінде елшінің  Польшадағы білім беру, виза алу, поляк картасын алу мәселелері бойынша кезекшілігі өтті. «Полонез» қоғамдық бірлестігінің өкілдері сондай-ақ, Меркі ауданы Сыпатай Батыр ауылында және Т.Рысқұлов ауданында поляк солдаттарының мазарына барып, гүл шоқтары мен шамдарын қойды.

Жамбыл облысы әкімі аппаратының

«Қоғамдық келісім» КММ

Баспасөз орталығы

Page 110 of 141
1 … 108 109 110 111 112 … 141