Асқарбек Ақылшаұлы Сейілханов, өңірлік ассамблея төрағасының қоғамдық орынбасары, Жамбыл облыстық ҚХА Ақсақалдар кеңесінің төрағасы

Этносаралық қатынастар жаңа Қазақстанның іргетасындағы маңызды да мықты кірпіш іспеттес. Қазақстандағы этносаралық қарым-қатынастар – егемендік пен тәуелсіздікке қол жеткізгеннен кейін пайда болған жаңа әлеуметтік-саяси ақиқат.  Қазақстандағы этносаралық қатынастар онда тұрып жатқан барлық халықтардың қоғамдық қызметінің әр түрлі салаларындағы сан түрлі өзара байланыстары мен қарым-қатынастарының тізбегі, ол біртұтас органикалық жүйе ретінде қызмет атқаратын құнды тәжрибе көрсетіп отыр. Өзінің тағдыр-талайында, біртұтас бола білудің жауапкершілігін көрсеткен кезеңі – ондағы ұлттар мен ұлыстардың үлкен жауапкершілігін көрсетсе керек. Біздің бақытымыз да сол, Қазақстан аз уақыттың ішінде әлемдік қоғамдастықтың алдыңғы қатарлы көшіне қосылды.

Этносаралық  қатынастардың басты тақырыбының маңыздылығы – Президентіміз Қасым-Жомарт Тоқаев айтқандай «біз ұлтына және сеніміне қарамастан, әрбір қазақстандыққа салт-дәстүр, мәдениет пен дінді таңдауға ерік беретін еркін әрі ерікті қоғамның негіздерін нығайтуға тиіспіз!».

Қазақстанның  ұлттық саясаты  барлық этностардың  экономикалық және кешенді  дамуын, бейбітшілік пен келісімді, этностар арасындағы  достық пен  бірлікті, өзара  көмекті  ескере отырып дамуда. Халықтар достығы – қазақ  халқының  көңілінің  дархан кеңдігі, пейілінің  молдығы арқасында  Қазақстандық   үлгі – этносаралық келісім этностардың  татулығына  арқау болып отыр. Осы тұста Қазақстан халқы Ассамблеясының рөліне тоқталмақпын. Аталған этносаралық келісімнің тұрақтылығына ҚХА-ның үлесі зор. Бұған – мемлекет басшысы Қасым-Жомарт Кемелұлы Тоқаевтың  жыл сайынғы  Жолдауларындағы Қазақстан халқы Ассамблеясына қатысты айтқан өте ауқымды бастамалары мен ұсыныс-ұсынымдары, маңызды тапсырмалары дәлел.

Бұл бастамалар мен тапсырмалар еліміздің саяси жүйесі мен әкімшілік-аумақтық құрылымын едәуір өзгертуге зор ықпал етті.  Тәуелсіздік жылдарында небір қиындықтан аман-есен өтіп, сын-қатердің бәрін еңсере осы күнге жеттік. Енді елімізді түбегейлі жаңғырту жолындамыз. Бұл кезең алмағайып уақытқа тұспа-тұс келіп отыр. Қазіргі халықаралық ахуал  Қазақстанға да әсер ететіні анық. Бірақ, заман қаншалықты күрделі болса да, біз тура бағытымыз бен бағдарымыздан айнымадық. Өткеннен тағылым алып, келешекке сеніммен қадам басып келеміз. Осы жолда  жұртымызға, ең алдымен, ауызбіршілік керек. Ақыл мен сабыр, парасат пен ұстамдылық қажет. Біз  әр шешімді мұқият саралап, әр істі  байыппен жасауға тиіспіз.

Тәуелсіздік күні мерекеміздің қарсаңында айтарым –  отаншылдық рухы жоғары ел  көздеген мақсатына  қалайда жетеді. Біздің мұратымыз – әділетті Қазақстанды қалыптастыру болса, жаңа Қазақстан дегеніміз – егемен еліміздің болашақтағы бейнесі. Өз елінің ертеңіне сенбеген халық мықты мемлекет құра алмайды. Бұған тарихтан талай мысал келтіруге болады..

Мемлекет басшысы халыққа арнаған  кезекті бір Жолдауында: «Біз келешегіміз кемел боларына және жарқын болашақты өз қолымызбен жасай алатынымызға  сенеміз.  Әрбір азаматтың конституциялық құқығы мүлтіксіз сақталуын қамтамасыз етеміз. Мемлекет пен қоғамның өзара сеніміне және құрметіне негізделген жаңа саяси мәдениетті қалыптастырамыз. Мемлекет  әр азаматтың үніне құлақ асады. Адал еңбек, озық білім және үздік тәжірибе  әрдайым жоғары бағаланады. Мен жаңа Қазақстанның  осындай ел болғанын қалаймын!» деп баса айтқан болатын.  Осы мақсатқа жету үшін  әрбір адам және бүкіл қоғам, ұлттық құндылықтарымыз  түбегейлі жаңаруға тиіс. Ол үшін  бізден жоғары жауапкершілікті, елімізге және бір-бірімізге деген  жанашырлықты талап етеді. Сондықтан бір кісідей бір жеңнен қол, бір жағадан бас шығарып,  Тәуелсіз Қазақстанды осынау бейбіт қалпында сақтап қалуға атсалысып жүрейік, отандастар! Халықтың қолдауымен  баға жетпес тәуелсіздігімізді сақтап, ұлттық бірегейлігіміздің негізін нығайтып, елімізді жаңғырту жолында ұйысуға тиіспіз. Бұл – болашақ ұрпақ алдындағы қасиетті борышымыз.

Ағымдағы жылдың 7 желтоқсаны күні Тараздағы «Бақытты болашақ» Оқушылар сарайының жас өлкетанушылары Достық үйіне экскурсия жасады.

«Бір шаңырақ астында»  тақырыбы аясында оқушылар өңірлік Ассамблеяның тарихымен, этномәдени бірлестіктердің қызметімен, қолөнерімен, этнос өкілдерінің ұлттық киімдері, бас киімдері, тұрмыстық заттарының тарихымен танысып, этностар арасындағы достастық, мәдениет, салт-дәстүрлер туралы әнгімелер өрбітті.

Өлке тарихын тануға талпынған жастарға экскурсия барысында облыстық «Қоғамдық келісім» мекемесінің Көрме залының меңгерушісі Жазира Шілдебаева аймақтағы этносаралық келісім мен бірлікті нығайтуға бағытталған үлкен жұмыстар туралы түсіндіріп өтті.

«Туризм және өлкетану» үйірмесінің жетекшісі Анна Крокошева бастаған жас саятхатшылар кездесу барысында жамбылдық этностар төңірегінде көптеген мардымды мағлұматқа қанықты.

Мемлекет басшысы Қасым-Жомарт Тоқаев Қазақстан халқы Ассамблеясының биылғы жылы өткен XXXIII-сессиясында Алматы, Жамбыл және Түркістан облыстарының этномедиация саласындағы мамандарының тәжірибесін ҚХА-ның барлық ұйымдарына тарату қажет екенін атап өткен болатын. Осы орайда, ағымдағы жылдың 3 желтоқсанында тәжірибе алмасу мақсатымен Жамбыл облысына Маңғыстау облыстық мәслихатының төрағасы, аталмыш облыстың ҚХА этномедиация кеңесінің төрағасы Жаңбырбай Матаев пен Маңғыстау облыстық ҚХА мүшесі, «Достлуг» Әзірбайжан этномәдени бірлестігінің мүшесі, этномедиатор Таги Тагиев келді.

Достық үйінде делегация құрамын Жамбыл облыстық мәслихатының төрағасы, өңірлік ҚХА мүшесі Абдалы Нұралиев, облыс әкімдігі ақпарат және қоғамдық даму басқармасының «Қоғамдық келісім» КММ басшысы Мубарак Жинақбаева, облыстық ҚХА төрағасының қоғамдық орынбасары, Ақсақалдар кеңесінің төрағасы, медиатор Асқарбек Сейілхан, өңірлік ҚХА Аналар кеңесінің төрайымы, «Анаға тағзым» отбасыларды қолдау орталығының директоры Эльмира Мырза-Ғали, «Әулиеата» қазақ мәдени орталығы ҚБ төрағасының орынбасары Айгүл Қабиева қарсы алып, қазақтың ұлттық 7 тағамын ұсынды. Келген қонақтар әуелі Достық үйін аралап, «Қоғамдық келісім» мекемесінің жұмыс барысына қанықты. Бұдан соң өңірлік ҚХА құрылымдары мен этномәдени бірлестік жетекшілерінің қатысуымен этномедиация кеңесінің отырысы өтіп, онда аймақтардағы медиация институтының өзіндік ерекшеліктері баяндалды.

Алқалы отырыста облыстық мәслихат төрағасы Абдалы Тоқбергенұлы аймақтағы медиаторлардың бітімгершілік бағытындағы жұмыстары өңірдегі бейбіт өмір мен тұрақтылықты қамтамасыз етуге үлкен ықпал етіп отырғандығын баса айтты.

Сондай-ақ, «Елдесу және татуласу» жобасы аясында өңірдегі этномедиацияны іске асыру жөніндегі атқарылып жатқан жұмыстар жайын «Қоғамдық келісім» КММ басшысы Мубарак Қасымқызы баяндаса, облыстық ҚХА этномедиация кеңесінің төрағасы Абдырахман Зайнутдинов және Жамбыл ауданы ҚХА Ақсақалдар кеңесінің мүшесі, қоғамдық медиатор Абдулхалил Маюфи саладағы тәжірибелерімен бөлісті.

Ал облыстық ҚХА төрағасының қоғамдық орынбасары Асқарбек Ақылшаұлы Достық үйі жанынан құрылған «Достық» театрының сахналаған «Бір атаның балалары» қойылымы арқылы ауызбіршілік пен достықтың насихатталып жатқандығын айрықша жеткізді.

Өз кезегінде Маңғыстау облыстық мәслихатының төрағасы, Маңғыстау облыстық ҚХА этномедиация кеңесінің төрағасы Жаңбырбай Матаев пен Маңғыстау облыстық ҚХА мүшесі, «Достлуг» Әзірбайжан этномәдени бірлестігінің мүшесі, этномедиатор Таги Тагиев өңіраралық тәжірибе алмасу жаңа жобалар мен мүмкіндіктерге жол ашатындығын айтып, маңғаз өлке Маңғыстаудағы этномедиация саласындағы негізгі бағыттарды атап өтті.

«Достық керуені» жобасы этностар арасындағы достықты дәріптеумен қатар, олардың мәдениет, спорт, әлеуметтік т.б. саладағы қырларын тануға кеңінен мүмкіндік береді. Дәстүрлі жоба аясында «Татулық – достық кілті» атты облыстық фестивалі өтті.

Аудандық мәдениет үйінде өткен іріктеуге мектеп оқушылары және колледж білімгерлері және аудандағы этнос жастары қатысты.

Фестивальдің мақсаты – қазақ халқының өнері мен мәдениетін жан-жақты насихаттау, еліміздің көптүрлі мәдени ерекшеліктерін дамыту, орындаушылардың кәсіби шеберлігін арттыру.

Аудандағы дарынды тұлғалар өнерін саралаған сайыста өзбек, түрік, славян, кәріс тағы да көптеген этностардың әні айтылып, биі көпшілік назарына ұсынылды.

Шара соңында облыстық ақпарат және қоғамдық даму басқармасы «Қоғамдық келісім» КММ басшысының орынбасары Сәуле Құрманқұлова және облыстық ҚХА төрағасының қоғамдық орынбасары, Ақсақалдар кеңесінің төрағасы Асқарбек Ақылшаұлы ауданның этносаралық, қоғамдық-мәдени жұмыстарына өз үлестерін қосқан белсенді этномәдени бірлестік өкілдерін марапаттап, сый-сияпаттарын табыстады

Жамбыл облысы Қазақстан халқы ассамблеясының «Достық керуені» жобасы аясында өңірлік «Ассамблея жастары» ҚБ Қордай ауданы жастарымен кездесу өткізді.

Кездесу барысында “Ассамблея жастары” РҚБ төрағасының орынбасары, өңірлік ассамблея жастары төрағасы Хамида Турдыева және бірлестік белсендісі, әрі “Барбанг” Күрділер этномәдени бірлестігі жастар қанатының төрағасы Хабиб Алиев, «Қоғамдық келісім» мекемесі «Жобаларды іске асыру және ҚХА құрылымдарымен жұмыс» бөлімінің жетекші сарапшысы Алмас Ақынтай жобаның мақсат-міндеттері туралы жастарға ақпараттық-түсіндіру жұмыстарын жүргізді.

Бірлестіктің белсенді жастары ҚХА құрылымдары және «Ассамблея жастары» ҚБ-нің алты бағыты және атқарылып жатқан жұмыстары туралы баяндады.

Жиын соңында өңірлік ассамблея белсенділері аудан жастарымен пікір алмасып, ұсыныстар мен қызықтырған сұрақтарға жауап берді.

Сондай-ақ, бұл күні аудандағы “Бәйтерек” балабақшасында “Қоғамдық келісім” мекемесінің ұйытқы болуымен бүлдіршіндерге арнап аниматорлар қойылымы ұсынылды.