Маусым айының үшінші жексенбісі – “Әкелер күні” мерекесі. Осыған орай, өңірлік ҚХА құрылымдары мен этномәдени бірлестік өкілдері өңірдегі 5513 әскери бөлімінде тәрбиелік маңызы зор тағылымды кездесу ұйымдастырды.

Жиын әкенің отбасындағы, қоғамдағы орнын айқындап, сарбаздар арасында отбасылық құндылықтарға, ата-анаға деген құрметті арттыруды көздеді.

Тағылымды шарада облыстық ҚХА Аналар кеңесінің белсенді мүшесі Аракси Плетнева модераторлық етіп, Ақсақалдар кеңесінің төрағасы Асқарбек Сейілхан, аталмыш кеңес мүшесі, Өзбек этномәдени бірлестігінің төрағасы Абдурахман Зайнутдинов, “Радонеж” орыс қауымдастығы қоғамдық бірлестігінің төрағасы Владимир Сорокин, аймақтық “Ахыска” түрік этномәдени бірлестігі Аналар кеңесінің төрайымы Роза Изятова, “Радонеж” ҚБ Аналар кеңесінің мүшелері Антонина Беляева мен Наталья Боцман, ақын, қоғам белсендісі Наталья Гончарова қатысып, тақырып төңірегінде толғаныстарын ортаға салды.

Сонымен қатар, республикалық “Адал азамат”, “Салауатты сана” жобалары жөнінде де келелі ойлар айтылды.

Сарбаздар да өз кезегінде әкеге деген сағынышын, құрметі мен ризашылығын ән мен жыр арқылы жеткізді. Бірқатар сарбаз жүректен шыққан өлеңдерін оқып, көрермен көңілін тебірентті.

Жиын соңында “Қоғамдық келісім” КММ қызметкері Қалижан Саркеев те әннен шашу шашып, Асқарбек Ақылшаұлы әскери бөлімге құнды қазына ретінде кітапты сыйға тартты.

Ал мұндай жиындардың әскери ортада ұйымдастырылуы сарбаздардың тек әскери машықты ғана емес, рухани құндылықтарды да бойына сіңіруіне септігін тигізетінін өңірлік ҚХА Аналар кеңесінің белсенді өкілі Аракси Ваграмовна ерекше атап өтті.

Ағымдағы жылдың 12 маусымы күні Достық үйінде облыстық М.Қашғари атындағы ұйғыр этномәдени бірлестігі Қазақстан халқы Ассамблеясының 30 жылдығына орай «Тәуелсіз Қазақстанның қалыптасуы мен дамуындағы Қазақстан халқы Ассамблеясының рөлі» тақырыбында коворкинг ұйымдастырды.

Мерейтойлық шараға қаладағы №19 орта мектеп оқушылары мен өңірлік «Ассамблея жастары» ҚБ белсенділері қатысты. Жиын барысында оқушылар Достық үйіне саяхат жасап, оларға «Қоғамдық келісім» мекемесінің қызметкері Замана Исмаилова аймақтағы этностардың тыныс-тіршілігі жөнінде ақпарат берді.

Алғы сөзді аталмыш бірлестіктің төрағасы Мухабат Турдыева алып, өскелең ұрпаққа еліміздегі іргелі ұйым – Ассамблеяның мән-маңызы мен құрылу тарихы жайлы түсіндірді. Сондай-ақ, мемлекеттік тілді құрметтей отырып, Отанды сүюге шақырған Мухабат Абдырахманқызы бірлікке ұйысқан еліміздегі этностар татулығына ерекше тоқталды.

Ал аталмыш бірлестіктің Ақсақалдар кеңесінің төрағасы Турсунмагомел Касимов балаларға үлкендерді сыйлау, жақсылықты бағалау сынды құндылықтар төңірегінде айтып өтті.

Сонымен қатар, «Ассамблея жастары» РҚБ төрағасының орынбасары, жамбылдық жастардың жетекшісі Хамида Турдыева оқушылармен болашақ тақырыбында мазмұнды дәріс өткізіп, тиісінше олардың да Ассамблея, татулық, бірлік туралы ойларына құлақ асты.

Шара соңында аймақтық «Ассамблея жастары» қоғамдық бірлестігі кішкентай қонақтарға балмұздақ таратып, естелік суретке түсті.

Ағымдағы жылдың 10 маусымында облыстық мәдениет және тілдерді дамыту басқармасының қолдауымен, облыстық айтыскер ақындар, жыршы-термешілер орталығының ұйымдастыруымен қазақ әдебиетінің заңғар тұлғасы Жамбыл Жабаевтың шығармашылығын дәріптеуге арналған «Тыңда, дала Жамбылды!» атты республикалық байқау өтті.

Достық үйінде өткен сайыс этнос өкілдері арасында Жамбыл шығармаларын насихаттауға бағытталды.

Байқауға Түркістан облысы, Шымкент қаласы мен Әулиеата өңірінен 9 үміткер қатысып, ақын шығармашылығын жатқа оқу және қазақ әнін орындау кезеңі бойынша бақ сынасты.

Сайыстың ашылу салтанатында Жамбыл облысы әкімдігінің мәдениет және тілдерді дамыту басқармасы басшысының орынбасары Сара Мадиева бұл тек өнер сайысы ғана емес, этностар достығының символы, ел бірлігінің жарқын көрінісі екендігін алға тартты.

Қос кезең бойынша сайыскерлер өнеріне ҚР Мәдениет саласының үздігі, айтыскер ақын Алтынкүл Қасымбекова, Халықаралық айтыс ақындар, жыршы-термешілер ордағының мүшесі, Республикалық домбырашылар «Жамбыл облысы бойынша» төрағасы Дидар Басығараев, Халықаралық, республикалық конкурстардың лауреаты, облыстық ақын-жыршылар одағының мүшесі Мерей Әбуева әділ бағасын берді.

Республикалық аламанда ХХ ғасыр Гомері атанған Жамбыл ақынның шоқтығы биік шығармалары оқылып, халық әндері әуелете шырқалды.

Айта кетейік, аталған байқауға қатысушылар қатарында облыстық М.Қашқари атындағы ұйғыр этномәдени бірлестігінің мүшесі Мухабат Алеханова мен өңірлік «Ассамблея жастары» ҚБ белсендісі Нұрсұлтан Искандеров бар.

Қазылар құрамының шешіміне сай, екі кезең бойынша облыстық М.Қашқари атындағы ұйғыр этномәдени бірлестігінің мүшесі Мухабат Алеханова басқаудың бас жүлдесін иеленсе, өңірлік «Ассамблея жастары» ҚБ белсендісі Нұрсұлтан Искандеров арнайы Алғыс хатпен марапатталды.

Ағымдағы жылдың 4 маусым күні Достық үйінде қаламыздағы 5513 әскери бөлімінде елдік пен бірлікті, ұлттың рухани негізін арқау еткен «Мемлекеттік тіл – менің тілім!» атты байқауының екінші кезеңі өтті.

Игі бастама – мемлекеттік тіл мәртебесін көтеруге, қазақ тіліне деген құрметті күшейтіп, көпэтносты әскери ортада тіл мәдениетін қалыптастыруға бағытталған.

Ел көлеміндегі «Оңтүстік» өңірлік қолбасшылығына қарасты әскери қызметкерлер арасындағы түрлі этнос өкілдерінің байқауында қазақ тілінде көркем сөйлеуі, мәнерлеп оқуы, эссе жазуы және тілдік тапсырмаларды орындауы қадағаланып, тілді меңгеру деңгейі, сөйлеу шеберлігі, мазмұн тереңдігі мен шығармашылық қабілеттері сынға түсті.

Мемлекеттік тілді жетік меңгерген этнос өкілдерінің сайысында «Оңтүстік» өңірлік қолбасшылығы тәрбие және әлеуметтік-құқықтық жұмыстар жөніндегі орынбасары, полковник Атабек Салихбаевтың төрағалығымен «Қоғамдық келісім» КММ жобаларды іске асыру және ҚХА құрылымдарымен жұмыс бөлімінің бас сарапшысы Аққу Қаратаева, мәдениет пен қоғамдық ұйымдардың өкілдері қазылық етті.

Байқау қорытындысы бойынша бірінші орын – 5571 әскери бөлімінің әскери қызметшісі, кіші сержант Роллан Бондаренко, екінші орын – 3650 әскери бөлімінің ефрейторы Пархат Сеитке, үшінші орын – 5514 әскери бөлімінің қатардағы жауынгері Мирас Бехтольд пен 5574 әскери бөлімінің аға сержанты Эркинбой Шамуратовқа бұйырды.

Ал, Қазақстан халқы Ассамблеясының арнайы сыйлығы 5547 әскери бөлімінің сержанты Сергей Образцовге табысталса, басқа үміткерлерге бүгінде 30 жыл толған ҚХА туралы арнайы дайындалған кітаптар үлестірілді.

Жеңімпаздар арнайы дипломдар мен алғыс хаттар және бағалы сыйлықтармен марапатталды.

Жиында сөз сөйлеген полковник Атабек Салихбаев байқаудың еліміздегі тіл саясатының жүйелі жүргізіліп жатқанын және көпэтносты қоғамда қазақ тілінің біріктіруші күшке айналғанын көрсететін, бейбітшілік пен ынтымақтастықты нығайтып, мемлекеттік тілді қастерлейтін саналы ұрпақты қалыптастырудың айнымас кепілі болуына өз ықпалын тигізетінін айтты.

Жамбыл облысы мәдениет және тілдерді дамыту басқармасы қолдау білдірген байқау 5 маусым күні қазақ тілінің кәсіби салада қолданылуын тереңдетуге бағытталған әскери бөлімдердегі тіл мамандары арасында өтетін «Үздік маман» байқауымен өз жалғасын табатын болады.