Archive for month: April, 2025

«Таза Қазақстан» — елімізде өткізіліп жатқан жалпыұлттық экологиялық акция. Бұл акцияның басты мақсаты – қоршаған ортаны қорғау, табиғатты аялау, халықтың экологиялық мәдениетін арттыру және ел аумағындағы тазалықты сақтау.

Науқан қарсаңында ҚХА-ның 30 жылдығына орайластырылған елдік шараға өңірлік «Ассамблея жастары» РҚБ мүшелері белсенділік танытып, Ғазиз Байтасов көшесі, Пушкин, Абай көшелері қиылысы және Жамбыл даңғылы маңын күл-қоқыстан арылтып, тазалық жұмыстарын жүргізді.

Көрікті шаһарды көркейтуге үлес қосқан ассамблея белсенділері игі шараны қолдауға әркез дайын екендіктерін жеткізді.

Көппен бірге атқарылған жұмысқа жұдырықтай жұмылған жастар көпшілікті қоршаған ортаны таза ұстауға шақырды.

Ағымдағы жылдың сәуір айының 24-і күні Қордай ауданында «Қазақстан халқы Ассамблеясы және өңірлік ынтымақтастық: бейбітшілік пен тұрақтылықты нығайту» тақырыбында, Жамбыл облысы әкімдігі ақпарат және қоғамдық даму басқармасы «Қоғамдық келісім» КММ ғылыми-сараптамалық топ мүшелерімен көшпелі кеңейтілген отырысы өтті.

Жамбыл облысында этносаралық және конфессияаралық қатынастарды, қоғамдық келісімді нығайту, этностардың мәдениеті мен салт-дәстүрлерін дамыту бойынша өткізілген іс-шараға мемлекеттік қызметкерлер, жергілікті тұрғындар, жастар және этномәдени бірлестіктердің өкілдері қатысты.

Жиын аясында қатысушылар алдында Жамбыл облысы ҚХА ҒСТ мүшелері Керимбаева Рысты Қалдыханқызы және Абдурахман Зайнутдинов,Қордай ауданы бойынша «Мансап орталығының» кәсіптік оқыту және кәсіпкерлерді қолдау бөлімінің басшысы Дидар Кузербаев, ауданның қорғаныс істері жөніндегі департаменті басқарма бастығының орынбасары, жұмылдыру бөлімінің бастығы, подполковник Арман Сихимбаев сөз сөйлеп, қоғамдық келісімді арттырып, этносралық қарым-қатынасты нығайту туралы өз пікірлерімен бөлісті. Жиын барысында мамандар бұдан өзге әскери саладағы әлеуметтік жеңілдіктер мен жәрдемдер туралы, ауыл тұрғындарына және жастарға арналған кәсіпкерлікті қолдау бойынша әлеуметтік маңызы бар жобалар төңірегінде бірқатар маңызды ақпараттарымен де бөлісті.

Отырыс соңы қатысушылар мен мамандар арасындағы өзара пікір алмасумен аяқталды.

Облыстық Өзбек этномәдени бірлестігі Аналар кеңесінің өкілдері Түркі халықтарына ортақ Наурыз мерекесін атап өтті.

«Сумаляк-Наурыз» атауымен ұйымдастырылған мерекелік жиынға облыстық өзбек этномәдени бірлестігінің өкілдері, өнерпаз жастары, облыстық ҚХА Аналар кеңесінің төрағалары мен мүшелері, «Мейірімді Аналар» кеңесінің төрайымы Парохат Ходжиметова, Өзбек этномәдени бірлестігінің төрағасы Абдурахман Зайнутдинов, Тәжік этномәдени бірлестігінің төрағасы Махкам Орифов қатысты.

Кеңестің төрайымы Дилиорум Каримова бастаған аналардың ұйытқы болуымен келген меймандарға кең дастархан жайылып, мерекенің бас тағамы бидай дәнінен сумаляк әзірленіп, қонақтарға ұсынылды.

Мерекелік думанда «Қоғамдық келісім» КММ басшысы Мубарак Жинақбаева жиналған қауымды мерекемен құттықтап, айтулы күннің маңызына тоқталды. Күллі Түркі халқын береке мен бірлікке бастайтын мерекеде аймақтық ҚХА Аналар кеңесінің төраға орынбасары, Республикалық Дүнгендер этномәдени бірлестігі Аналар кеңесінің төрайымы Сара Даузова, «Әулиеата» қазақ мәдени орталығы Аналар кеңесінің төрағасы Пайза Куненова ақ жарма тілектерін білдірді.

Сондай-ақ, «Бақыт» вокалды-инструменталды ансамблінің жетекшісі Абдурашид Балтаходжаев қазақ, орыс, өзбек тілдерінде ән салып, кештің шырайын келтірді.

18 сәуір- Ескерткіштерді қорғау күніне орай, Жамбыл облыстық тарихи-мәдени ескерткіштерді қорғау және «Салауатты сана» жобасы аясында «Барыңды бағала» вандализмге қарсы қоғамдық жобасы бойынша аудандық тарихи-өлкетану музейінде ескерткіштерді қорғау насихаттау мақсатында іс шара өтті.

Іс- шараға облыстық ескерткіштерді қорғау дирекциясының директоры С.Қалиев, Жамбыл ауданы әкімінің орынбасары М.Досымбекова, аудандық ардагерлер кеңесінің мүшесі С.Күзербаев, аудандық тарихи-мәдени ескерткіштерді қорғау инспекторы Г.Бекжанова, аудандық, ауылдық округ әкімдері мен сала мамандары және Аналар алқасының төрайымдары мен аналар кеңесінің мүшелері қатысты. Сөз сөйлегендер ескерткіш ұлттық тарихпен мәдениеттің құнды құралы, жәдігері, ескерткішті қорғау мен насихаттау осы қалпында сақтап, қорғап, зерттеп зерделеп кейінгі ұрпаққа сынымен сырын жоғалтпай жеткізу сіз бен біздің парызымыз, халқымыздың өткеніне сыр шертетін қастерлі мұра, тарихи-мәдени ескерткіштер өткен тарихтың куәсі, болашақ ұрпаққа аманат деді. Аға буын өкілдері жастарға вандализм адамдардың мәдениетсіздігін, қоғамдық тәртіптен хабары жоқ екендігін көрсететін әрекет екендігін түсіндірді. Атадан келе жатқан тарихи мұраларды, табиғи ескерткіштерді, зираттарды, қоғамдық мүліктерді бүлдіру- өзіне, ата- бабасына, Отанына жасаған қиянат екендігін жеткізді.

Қазақстандағы этносаралық ахуалдың бірыңғай әлеуметтік мониторингі бағдарламасы негізінде әлеуметтік зерттеулер жүргізуге бағытталған   «Бейбітшілік пен келісім» жобасы биылғы өз жұмысын Талас ауданынан бастады.

Ағымдағы жылдың 17 сәуірінде жобаның ақпараттық-түсіндіру жұмыстары бойынша құрылған топ мүшелері Қаратау, Ақкөл, Қасқабұлақ елді мекендеріне барып қайтты.

Жұмыс топ құрамында облыс әкімдігі ақпарат және қоғамдық даму басқармасының, ҚХА хатшылығы – этносаралық қатынастар мәселелері жөніндегі бөлімінің басшысы Серікжан Абдыкеримов, «Қоғамдық келісім» КММ басшысы Мубарак Жинақбаева мен аталмыш мекеменің бірқатар қызметкерлері бар.

Олар бейбітшілік пен келісімді нығайту бағытында түрлі іс-шараларға қатысып, Қаратау қаласы Қасқабұлақ пен Ақкөл ауылдарының  тұрғындары, жастары, этнос өкілдері, этномәдени бірлестік басшылары және колледж студенттерімен кездесу өткізді.

Айта кету керек ақпараттық-түсіндіру жұмыстары тобының құрамында әскери қорғаныс мамандары мен «Отбасы банк» қызметкерлері де болды. Жиын барысында мамандар тұрғындар тарапынан болған сауалдарға, жауаптар мен бағыт-бағдарлар көрсетіп, өз салалары бойынша кеңестер берді. Банк қызметкерлері  жастарға үй алудың жолдары мен іске қосылған жаңа бағдарламалардың беретін мүмкіндіктерімен таныстырды.

Кездесу барысында  түрлі жалған ақпараттарға сеніп  арандатушылыққа жол бермеу,  отбасында  жалпыұлттық бірегейлік, «көк паспорт» ұғымын қалыптастыру,  жастар миграциясын тоқтату, жастардың бос уақытын ұйымдастыру, белсенді ұзақ өмір сүру орталығын құру, әскери-патриоттық тәрбие сияқты бір қатар мәселелер көтерілді.

Жобаның аудандағы алғашқы жиыны  ҚХА хатшылығы – этносаралық қатынастар мәселелері жөніндегі бөлімінің басшысы Серікжан Тілеумұратұлы мен «Қоғамдық келісім» КММ басшысы Мубарак Қасымқызының этномәдени бірлестік басшыларына қоғамдық қабылдау жүргізуімен өз мәресіне жетті.