Жамбыл облыстық ҚХА Аналар және Ақсақалдар кеңесі балалар күні мерекесін биылғы жылы айрықша атап өтті.

«Бар жақсылық балаларға» деген ұранмен аймақтық Ассамблеяның аталмыш құрылымдары Тараз қаласына қарасты Жалпақтөбе алабындағы бүлдіршіндерге көтеріңкі көңіл күй сыйлады.

Мерекелік шараға № 34 орта мектеп директоры Салтанат Ботақұлова және В.Чкалов атындағы орта мектеп басшысы Гүлзат Данаева, Шәмші Қалдаяқов атындағы мәдениет үйінің меңгерушісі Торғын Орынбекова, № 5 округ инспекторы Олжас Әбенов, Жалпақтөбе алабының ақсақалы Сапил Тәжиев, Қазақстанның дүнген республикалық этномәдени орталығының төрағасы Зайнуддин Махусеев, қалалық дүнген этномәдени орталығының жетекшісі Зиявидин Джамалов, Жамбыл облысы ҚХА Аналар кеңесі төрағасының орынбасары, Қазақстанның дүнген республикалық этномәдени орталығы Аналар кеңесінің төрағасы Сара Даузова, сондай-ақ, Жалпақтөбе алабының кәсіпкерлері қатысты.

Айтулы күн қарсаңындағы шара № 34 орта мектеп пен В.Чкалов атындағы орта мектебі жанындағы лагерь және шағын орталықтың ашылуымен бастау алды.

Бұл күні балаларға түрлі ертегі кейіпкерлері мен аниматорлар концерттік қойылымын ұсынып, кештің көркін келтірді.

Мереке иелеріне арнап кеңсе тауарлары, түрлі ойыншықтар тарту етілді.

Ерекше қуаныш пен мейірімге толы «1 маусым – халықаралық балаларды қорғау күні» мерекесі облыстық «Қоғамдық келісім» мекемесінде кең көлемде тойланды.

Дәстүрлі мерекелік шара биыл «Бала – бақыт, бала – байлық!» атауымен ұйымдастырылды. Жайдарлы жаз айының алғашқы күнімен тұспа-тұс келген айтулы күн қарсаңында облыстық ақпарат және қоғамдық даму басқармасы «Қоғамдық келісім» мекемесінің басшысы Мүбарак Жинақбаева балапандарға ізгі тілегін айтып, мерекелерімен құттықтады.

Бұл күн – балаларды шаттыққа кенелтіп, достық пен мейірімге бөлегені сөзсіз. Шара барысында «Достығымыз жарасқан бақытты балалармыз» тақырыбында асфальтқа сурет салу сайысы өтіп, балапандар татулықтың, бақытты балалық шақтың көрінісін әдемі кескін арқылы боямасыз бейнеледі.

Жас суретшілер еңбегіне дизайнер, суретші, «Тараз суретшілер одағы» ҚБ құрылтайшысы, «Қолөнер-Тараз» ҚБ мүшесі Елена Голубинская, суретші Вера Андреевна өз бағасын беріп, барлық қатысушыларды марапаттады.

Ән мен би, әзіл мен ойынға толы думанды шарада балаларға аймақ өнерпаздары концерттік бағдарламасын ұсынды. К.Әзірбаев атындағы Жамбыл облыстық филармониясының «Балауса» циркі «Жонгерлер» қойылымын сахналаса, Арайлым Құрымбетова, Жұлдыз Уксикбаева және Гүлжан Шәріпханова «Қуанышыңмен» әнін тамылжыта орындап, Лаура Бексұлтанова «Жалқаубек» әнімен бүлдіршіндерді көңілді күйге бөледі.

Ал «Қарақат» мектеп студиясының шәкірттері салған «Көктем» әні, ТарМУ жастарынан құралған өнерпаздар тобы орындаған «Балдәурен» әні, Орынбасар Бақытұлының «Көркемім» әні, жас талант Ерасыл Мамырдың орындауындағы «Бауырларым» әні кештің шырайын аша түсті. Айта кетейік, мерекелік кеште жас әнші Ерасылдың «Бауырларым» әніне түсірілген бейнебаянның тұсауы кесілді.

Сондай-ақ, Таразға танымал әзілкештер Айдын Альчикенов пен Жайдар Жорабеков «Сайқымазақтар» көрінісін ұсынып, сиқыршы Талап Таубеков және жамбылдық жұртшылыққа жылан биімен танылған Дилана Жорабек пен Рахат Байтулеевтің шығармашылық нөмірлері балаларға ерекше шаттық сыйлады.

Мерекелік кеш соңында «Заман dance» би тобымен бірлесе балалар флешмоб билеп, өздеріне арнайы әзірленген тәтті толы дастарханнан дәм татты.

Жамбыл облыстық «Архыз-Қарашай-балқар» этномәдени бірлестігі халықаралық балаларды қорғау күні қарсаңында балаларға мерекелік көңіл-күй сыйлады.

Меценат Меркурий Акиловтың демеушілігімен бұл күні бірлестік төрағасы Леля Узденова және бірлестіктің Аналар кеңесінің жетекшісі Раиса Хуртуева балапандарды мерекемен құттықтады.

«Балалар күні – мейірімге толы мереке. Себебі баланың қуанғанынан, оның шат күлкісінен артық ештеңе жоқ. Біз үшін балаларымыздың болашағы маңызды. Өйткені олар – ертеңгі ел тізгінін ұстайтын нағыз кемел ұрпақ. Балаларға қолдау жасауды ұдайы назарда ұстаймыз», – дейді бірлестік басшысы Леля Ахматовна.

Бірлестік өкілдері тәтті толы себет, тәтті шырын, ойыншық және балаларға арналған ыдыс-аяқтарын үлестірді. Мереке қарсаңында сыйлыққа кенелген қос балақай ризашылығын білдіріп, шаттыққа бөленді.

Ағымдағы жылдың 23 мамыры күні №13 бөбекжай-бақшасында «Жасыл ел, жасыл балабақша» 100 кіші жоба аясында «Табиғаттың жас қорғаушылары», «Экологиялық тәрбие балабақшада» тақырыбында қалалық семинар өтті.

Мектеп жасына дейінгі балаларды тәрбиелеу, оқыту үшін бойларында экологиялық сана элементтерін, қоршаған әлемді, табиғатты түсіну, еңбекке баулу, олардың жас ерекшеліктеріне сәйкес экологиялық мәдениетін қалыптастыруды көздеген жиынға «Қоғамдық келісім» КММ басшысы Мубарак Жинақбаева және қаламыздағы балабақша қызметкерлері қатысты.

Семинар Мубарак Қасымқызы және қалалық білім бөлімінің әдіскері Гульфайраз Естаеваның облыстық ҚХА мен Тараз қалалық білім бөлімінің ортақ жобалары және балалар күні мерекесі қарсаңындағы құттықтау сөзмен ашылды.

Жиын барысында Абай атындағы Жамбыл гуманитарлық жоғары колледжі, мектепке дейінгі тәрбие және оқыту мамандығының оқытушысы Забира Серикова тәрбиешілер мамандығының құндылығы, бала тәрбиесіне қатысты қазір таңдағы озық тәжірибелерге қатысты өз пікірімен бөлісті.

Семинарға қатысушылар бұдан әрі жоғарыда аталған білім ордасының студенттері дайындаған бейнероликтер мен балалардың зерттеушілік қабілеттерін экологиялық тәрбие арқылы дамыту және мәдениетін қалыстастыруға қатысты баяндамаларын тыңдады.

Балабақшаның жас өрендері түрлі өнерлерін ортаға салып, жиынға қатысушылармен бірге еңбек жұмыстарында жасады. Сондай-ақ, балабақша қонақтары «Эко бақ» пен «Робот» кабинеттерінің тұсауын кесіп, балалар игілігіне пайдалау ұсынылды. Аталған кабинеттерде заманауи жылыжай мен өсімдіктерді баптаудың түрлі әдістері көрсетіліп, көрнекілітермен жабдықталған. Ал, «Робот» кабинеті болашақта өнеркәсіппен айналысам деген жеткіншектерді талаптандыра түсетін таптырмас орын.

Семинар соңында Тараз қалалық білім бөлімінің әдіскері Гульфайруз Естаева аталмыш балабақша меңгерушісі мен әдіскеріне «Жасыл ел, жасыл балабақша» 100 кіші жоба аясында семинар-тренинг өткізіп, тәжірибесімен бөліскені үшін сертификаттар табыстады.

1 маусым – Халықаралық балаларды қорғау күні мерекесі қарсаңында облыстық «Қоғамдық келісім» мекемесінің қолдауымен Жамбыл облыстық М.Қашқари атындағы ұйғыр этномәдени бірлестігі «Балалар – біздің болашағымыз» атты «BALA FEST» фестивалін өткізді.

Достық үйінде өткен мерекелік шараға «Қоғамдық келісім» мекемесінің басшысы Мубарак Жинақбаева, өңірлік М.Қашқари атындағы Ұйғыр этномәдени бірлестігінің төрайымы Мухабат Турдыева, бірлестіктің ардагерлері мен өкілдері, Республикалық дүнгендер қауымдастығының мүшесі Динара Нұралиева, №19 орта мектеп оқушылары және қаламыздағы түрлі этнос өкілдерінің балалары қатысты.

Қызылды-жасыл шарлармен көңілді нотада балаларды аймақтық Ассамблея жастары қарсы алып, Достық үйін бір мезетте әсем көрініске бөледі.

Ел ертеңі болған балаларға Мубарак Қасымқызы мен Мухабат Абдырахманқызы мерекелік жылы лебізін білдірді.

Айта кетейік, аталмыш фестивальдің жоғары деңгейде өтуіне өңірлік «Ассамблея жастары» ҚБ мүшелері белсене атсалысты.

Бүлдіршіндердің жүздеріне күлкі, көңілдеріне шаттық сыйлаған іс-шара ерекше қарқынмен бастау алды.

Балаларға «Қоғамдық келісім» КММ ғылыми-сараптамалық қолдау бөлімінің жетекші-сарапшысы Замана Исмаилова Достық үйін аралатып, жамбылдық этностардың тарихымен таныстырды. Бұдан соң «Балалар – біздің болашағымыз» атты №19 мектептің талантты оқушылары мерекелік концерттік бағдарламасын ұсынды.

Бұл шара балалар үшін тосын сыйлар мен ғажайыптарға толы болғаны анық. Думанды кеште кішкентай көрермендерге түрлі ертегі кейіпкерлері арнайы шоу жасап, балалар қатысуымен байқаулар ұйымдастырды.