Ағымдағы жылдың 11 сәуірінде Қазақстан Ассамблеясының 30 жылдығы аясында Жамбыл облыстық «Қоғамдық келісім» мекемесінің ұйымдастыруымен вандализмге қарсы «Барыңды бағала» акциясы Тараздағы Қазақ хандығының 550 жылдығына арналған «Қазақ хандығы» монументінде жалғасты.

Облыстық ҚХА Аналар кеңесінің бастамасымен өткен шараға Ақсақалдар кеңесінің төрағасы Асқарбек Сейілхан, өңірлік ҚХА Аналар кеңесінің төрағасы Эльмира Мырза-Ғали және төраға орынбасары Сара Даузова, Фарида Нақыш, Жамбыл облысы мәдениет және тілдерді дамыту басқармасының тарихи-мәдени ескерткіштерді қорғау және қалпына келтіру дирекциясы, колледж студенттері қатысты.

Шарада облыстық «Жаңару» РҚБ Жамбыл облыстық филиалының директоры Қасымхан Төлендиев игі іске ризашылығын білдіріп, тарихи-мәдени ескерткіштерді құрметтеуге атсалысып жатқан жастарға алғысын айтты.

Бұдан соң, Жамбыл облысы ҚХА Аналар кеңесі төрайымының орынбасары Аракси Плетнева мәдени-тарихи құндылықтарды қастерлеу арқылы отанымызды құрметтеу қалыптасады дей келіп, ел мен жерге деген жанашырлық – «Адал азамат» тұлғасының ең асыл қасиеттерінің бірі екендігін атап өтті.

Сонымен қатар, «Тарихи-мәдени ескерткіштерді қорғау және қалпына келтіру дирекциясы» КММ ғылыми қызметкері Сания Мекемтасқызы қазақ хандығының алғашқы хандары Керей мен Жәнібекке арналған мүсіндік композицияға ғылыми негіздеме беріп, қазақ хандығының 560 жылдығына орай өткізілген бүгінгі акцияны маңызды шара деп баға берді.

Аға буын өкілдерінен бағалы ақпараттар алған жастар қаламыздың әр қоғамдық игілігін күтіп ұстауға уәде беріп, мәдени игіліктерге қамқорлық жасап жүруге ізгі тілек- ниеттерін білдірді.

Аналардың басшылығымен жастар «Қазақ хандығына – 550 жыл» монументі аумағын қоқыстан тазартып, шаң-тозаңды сүртіп, тазалық жұмыстарын жүргізді.

Ағымдағы жылдың 9 сәуірінде Қызыл-жұлдыз мәдениет үйінде Тараз қаласы Әулиеата ауданы әкімінің міндетін атқарушы Медет Нұрмаханов этнос өкілдерімен кездесу өткізді.

Жиынға облыстық «Қоғамдық келісім» мекемесінің Көрме залының меңгерушісі Жазира Шілдебаева қатысты.

Түрлі этнос өкілдері қоныстанған ауыл тұрғындарымен кездесуде этносаралық келісім мен татулық, тұрақтылық сынды бірқатар мәселелер қарастырылды.

Кездесу барысында аймақтық Ассамблеяның тыныс-тіршілігі, толеранттылық, бірлік төңірегінде «Қоғамдық келісім» мекемесінің қызметкері Жазира Мейрамбекқызы өз сөзінде баяндады.

Жиын этнос өкілдерінің түрлі сауалдарына жауап беріп, тұрғындардың тілек, ұсыныстарын білдіруімен тәмамдалды.

Бүгін Қызылордада Қазақстан халқы Ассамблеясының 30 жылдығы аясында еліміздің белсенді жастары «Сыр елі – достық мекені» форумында бас қосуда. Республикалық форум Достық үйінде этномәдени бірлестік төрағаларының ұсынған ұлттық дәмінен ауыз тиіп, ақ баталарын алумен басталды.

Аталмыш жиынға Жамбыл облысынан «Ассамблея жастары» РҚБ төрағасының орынбасары, өңірлік жастар ұйымының жетекшісі Хамида Турдыева, «Ассамблея жастары» ҚБ төраға орынбасары Хабиб Алиев және «Ассамблея жастарының» мүшесі Зуфар Саитханов қатысуда.

Форумның ашылуы салтанатына Қызылорда облысының қоғамдық даму басқармасының басшысы Руслан Каюпов қатысып, 2 күнге жоспарланған форум жұмысына сәттілік тіледі.

Форумының алғашқы секциялық отырысы «Болашақ» университетінде өтті. Басқосу жұмысшы мамандықтардың маңыздылығын арттыруға, жастардың кәсіптік бағдарын айқындауға арналды. «Жұмысшы мамандықтар жылы» тақырыбына орайластырылған секцияда қатысушылар мамандық таңдаудың маңыздылығы, еңбек нарығындағы сұраныстар мен болашақ мүмкіндіктері туралы ой бөлісті.

Жиын «Кәсіптік бағдар – табысты өмірге бастар жол» деген оймен қорытындыланды.

Айта кету керек, форум аясында түрлі тақырыптардағы мазмұнды секциялық жұмыстар өтеді және жастар үшін маңызды тақырыптар талқыланатын болады.

Ағымдағы жылдың 28 наурызында Достық үйінде Қазақстан халқы Ассамблеясының 30 жылдығына орай «Бірлік пен келісімнің 30 жылы» атты республикалық фестивальдің облыстық іріктеу кезеңі өтті.

Қазақстанның көпэтносты халқының мәдени мұрасын сақтау және насихаттауға бағытталған байқауға өңірлік Ассамблеяның шығармашылық ұжымдары қатысып, халық әндері, халық билері, халық аспаптары бойынша жеке және топ болып өнер көрсетіп, бақ сынасты. Аталмыш сайыстар бойынша қатысушылардың өнеріне облыстық «Қоғамдық келісім» КММ басшысы Мубарак Жинақбаева, К.Әзірбаев атындағы облыстық филармония әншісі, Мәдениет саласының үздігі Назима Үсенова және мектептен тыс іс-шараларды өткізетін облыстық орталықтың бөлім меңгерушісі Қарлыға Қанапина әділ бағасын берді.

Байқау аясында мекеме басшысы Мубарак Қасымқызы сөз алып, аталған фестивальдің Қазақстан халқының мәдени дәстүрлерін дамытып, халық шығармашылығын дәріптеу арқылы мәдениетаралық алмасуды нығайтуға кеңінен жол ашатындығын жеткізді.

Фестиваль барысында әртүрлі этнос өкілдері халық әндерін орындап, ұлттық мәдениеттің сан қырын көрсетті. Орыс, қазақ, украин, күрді, дүнген, қарашай-балқар, грек және басқа да халықтардың өнерлері паш етілді.

Атап айтсақ, халық әндері аталымында «Әулие Ата» қазақ мәдени орталығы» ҚБ «Асыл Ана» халықтық вокалдық ансамблі «Көк тудың желбірегені», «Жамбыл жастарының вальсі», «Радонеж» орыс ЭМБ «Калинка» вокалдық ансамблі «Мама», «Белый тополь, белый клен», Днепро украин ЭМБ «Маричка» вокалдық ансамблі «Ти ж мене підманула», «У сусіда хата біла» әндерін орындады. Ал облыстық немістер қоғамы ЭМБ «Поющие сердца» вокалдық ансамблі «Көктем вальсі», «Я приеду в Казахстан», Қордай аудандық «Отечество» славян ЭМБ «Соседушки» халықтық вокалдық ансамблі «Ночь проходит, а я у порога», «Я на печке молотила» және осы бірлестіктің балалар вокалдық «Ромашки» ансамблі «Ой зоря, зорюшка», «Астана кеші» және Т.Рысқұлов ауданынан келген «Сударушка» халықтық фольклорлық ансамблі халық әні мен ретро әндерден шашу шашты.

Ал жеке орындауда қордайлық Харлампий Мироненко «Синяя вечность» және тараздық Наталья Гирина «Сүгірдің термесі», «Пелагея-ой да вечер» әндерін нақышына келтіре орындады.

Аспаптық орындау кезеңінде облыстық «Радонеж» орыс ЭМБ «Русский наигрыш» аспаптық ансамблі «Светит месяц», «Фантазия» Лядовская және «Веснушки» қасықшылар ансамблі «Казачья танцевальная» және халық әндерінен попури орындады.

Сонымен қатар, би ансамбльдері арасында өткен сында қалалық білім бөлімінің оқушылар сарайының Үлгілі «Жас дәурен» балалар хореографиялық ансамблі, облыстық білім басқармасының мектеп олимпиадаларын және мектептен тыс іс-шаралар өткізетін облыстық орталықтың «Бозторғай» тобы, облыстық гректер қоғамы ЭМБ «Infiniti» би ансамблі, «Архыз» республикалық ҚБ Бірлік-қарашай-балқарлардың облыстық филиалының үміткерлері «Деймох style» би ансамблі, «Вынхуа» дүнген ЭМБ «Цымый хуар» ансамблі, облыстық «Барбанг» күрділер ЭМБ «Күрді» би ансамблі, Достық үйі жанынан құрылған «Вдохновение» би ұжымы жоғары деңгейде өнер көрсетіп, көрермен қошеметіне бөленді.

Үш кезең бойынша бақ сынасқан іріктеу кезеңінде қазылар құрамының шешімімен халық аспаптары аталымы бойынша І орын «Веснушки» қасықшылар ансамбліне бұйырса, «Русский наигрыш» аспаптық ансамблі ІІ орынға ие болды.

Ал халық әндерін орындау бойынша қордайлық «Соседушки» ансамблі І орынды иеленсе, «Калинка» және «Маричка» өнер ұжымдарына ІІ орын бұйырып, «Асыл Ана» халықтық вокалдық ансамблі мен «Ромашки» ансамблі ІІІ орынға лайық деп табылды.

Және жеке орындау шеберлігі бойынша қордайлық Харлампий Мироненко І орынға иелік етіп, ІІ орын тараздық Наталья Гиринаға тиесілі болды.

Би аталымында «Бозторғай» би ансамблі жеңімпаз атанып, Үлгілі «Жас дәурен» балалар хореографиялық ансамблі ІІ орынға ие болса, «Деймох style» би ансамбліне ІІІ орын бұйырды.

Барлық жүлдегерлерді қазылар құрамы марапаттап, байқауға жоғары деңгейде атсалысқандары үшін алғыс білдірді.