Қоғамдық келісімді нығайтып, отбасы құндылықтарын насихаттап, ұрпақтар

сабақтастығын сақтауға үлес қосуда ҚХА жанындағы Аналар кеңесінің

арқалаған жүгі ауқымды.

Облыста қазіргі таңда 40-қа жуық Аналар кеңесі белсенді қызмет етуде.

Іргелі ұйымның өткен жылғы атқарған нәтижелі жұмыстары мен алдағы

жоспарларын бүгін «Анаға тағзым» отбасыларды қолдау орталығында өткен

кеңестің жұмыс отырысында өңірлік ҚХА Аналар кеңесінің төрағасы,

аталмыш орталықтың директоры Эльмира Мырза-Ғали баяндады.

Жиынға «Қоғамдық келісім» мекемесінің «ҚХА құрылымдарымен жұмыс

және жобаларды жүзеге асыру» бөлімінің басшысы Аққу Қаратаева, өңірлік

Аналар кеңесінің төрағалары, этномәдени бірлестіктер мен мекеме жанынан

құрылған кеңестің жетекшілері қатысып, биылғы жұмыс жоспарларын

талқылады.

-Баршаңызға белгілі, биыл Қазақстан халқы Ассамблеясының 30 жылдығы.

Осынау мерейтой қарсаңында өздеріңізбен бірлесе бірқатар жұмыстарды

еңсеріп, жемісті жобаларды жүзеге асырамыз деген сенімдемін.

Республикалық «Мәдениетті ана — мәдениетті ұлт», «Салауатты сана»

жобалары барысында атқарған жұмыстарымыз өзінің жемісін беруде.

Сондай-ақ, өңірлік кеңестің бастамасымен қолға алынған «Жасыл

сертификат», «Әжемнің ертегісі», «Қауіпсіздік сағаты», «Ана көрген»

жобалары да нәтижелі жүзеге асуда, – деді кеңес төрағасы Эльмира

Инаятқызы.

Отырыс барысында аймақ аналары ҚХА-ның 30 жылдығы қарсаңында «Ақ

орамал», «Айналайын» секілді тың жобалар мен «Барыңды бағала», «Тәртіпті

өзіңнен баста!» қоғамдық акцияларын жүзеге асыратындығын жеткізді.

Сондай-ақ, өзге де ілкімді жобалардың іске асырылуы турасында пікірлер

айтылып, ұсыныстар тыңдалды.

Мемлекет басшысының бүгінгі Үкімет отырысында көтерген әрбір мәселесі

өзекті әрі ел игілігі жолында құнды деген ойдамын. Себебі, алқалы жиында

Үкімет жұмысының басты бағыттары айтылып, айқындалды. Нақтырақ

айтсақ, ірі инфрақұрылым жобалары, цифрландыру және жасанды интеллект,

ядролық энергетиканы дамыту, агроөнеркәсіп кешенін нығайту және

инвестиция тарту мәселелері. Еліміздің экономикасы күн санап дамып

жатқандығы баршамызға мәлім. Алайда, осы қарқынды құлдыратпай,

жұмыстарды жүйелендірген абзал. Мемлекет басшысы алдымызда ауқымды

міндеттер мен жауапты жүк тұрғанын айтты. Мұндай салмағы басым

жұмысты 5 жылды еңсеру қажеттігі кеңінен айтылды.

Ол үшін бізге, ең алдымен, білікті және ел мүддесін ойлайтын отаншыл

кадрлар керек делінді.

Ағымдағы жылдың 28 қаңтарында қаладағы №13 орта мектепте ҚХА-ның 30

жылдығына орай, облыстық қазақ, өзбек, орыс, татар және башқұрт

этномәдени бірлестіктері «Түркі халықтарының музыкалық дәстүрлері» атты

іс-шарасына қатысты.

ҚХА-ның «Бірлік әралуандылықта» жобасы негізінде ұйымдастырылған іс

шара аталған білім орнындағы өнер және музыка мұғалімдерінің «Гармония»

атты шығармашылық бірлестігі айлығы аясында «Радонеж» орыстар

қауымдастығы Аналар кеңесінің өкілі, музыка пәнінің мұғалімі Оксана

Дьяченконың ұйытқы болуымен өтті.

Шығармашылық кеш барысында облыстық этномәдени бірлестіктердің

мүшелері ән айтып, күй тартып музыкалық түрлі өнерлерін ортаға салды.

Сонымен қатар, «Сал күрең», «Көңіл ашар» күйлерін орындаған «Әулие-

Ата» қазақ мәдени орталығының өкілдері Пайза Куненова және домбырашы,

күйші Төрехан Күрпебаев қазақ музыка өнерімен көпшілікті тәнті етсе,

«Қазақстан татарлары мен башқұрттарының республикалық конгресі»

филиалының төрағасы Фарида Нақыш жиналғандарды татар музыкалық

дәстүрі туралы баяндады. Этностың «Лайсан Тамшылар» вокалдық ансамблі

мен Жастар қанатының хореографиялық тобы өздерінің шығармашылық

нөмірлерін ұсынды.

Ал, облыстық Өзбек этномәдени бірлестігінің өкілі, музыкант, әнші, Шавкат

Аширов этностың музыка тарихына тоқталды. Сонымен қатар, этномәдени

бірлестіктің басқа да музыканттарымен бірге музыкалық шығармалар

орындады.

Шара соңында «Радонеж» Орыс қоғамдастығының «Веснушки» қасық ойнау

ансамблі сазды күй орындап, музыкалық сый ұсынды.

Күнделікті қала тазалығын қамтамасыз ететін жұмысшылар қашанда

құрметке лайық.

Бұл тұрғыда жамбылдық Ассамблеяның белсенді жастары көне шаһар

тазалығына үлес қосатын еңбек иелеріне арнап жыл сайын ізгілік шараларын

ұйымдастырады.

Дәстүрлі шара биыл да жалғасын тауып, аймақтық “Ассамблея жастары”

қоғамдық бірлестігінің белсенділері аязды күні көшені қардан тазартып

жүрген коммуналдық қызметкерлерге ыстық шәй толы термос пен тәтті

бәліш, бауырсақтарды үлестірді.

Бұл жолғы шара былтырғыдан ерек. Себебі, биылғы жылды Мемлекет

басшысы Қасым-Жомарт Тоқаев «Жұмысшы мамандықтар жылы» деп

жариялаған болатын. Осы орайда игілікті іске ұйытқы болған Ассамблея

жастары мұндай шара арқылы еңбек адамдарына алғыс білдіргісі келетіндігін

жеткізді.

–Таңның атысынан күн батқанға дейін ауа райының қолайсыздығына

қарамастан қала көшелеріндегі тазалыққа үлкен жауапкершілікпен қарап

жүрген жандардың еңбегі ерекше. Сол адамдардың тәулік бойы жұмыс

істеуінің арқасында тазартылған көшелермен жүреміз. Бүгінгі шара арқылы

қала тұрғындарын жақсылыққа шабыттандырып, айналамызға жылулық

сыйлауға шақырғымыз келеді, – дейді «Ассамблея жастары» РҚБ

төрағасының орынбасары, жамбылдық жастардың жетекшісі, облыстық

Ұйғырлар этномәдени бірлестігі төрағасының міндетін атқарушы әрі Жастар

қанатының төрағасы Хамида Турдыева.

Жамбылда ҚХА жанындағы ғылыми-сараптамалық топтың Жас Ғалымдар

клубы ашылды. Осыған орай Ш.Мұртаза атындағы ХТУ ғимаратында топтың

кеңейтілген отырысы өтіп, оған топ мүшелері, аймақтағы этномәдени

бірлестіктердің өкілдері, студенттер және БАҚ қатысты.

Клубтың ресми ашылуына модераторлық еткен Ш.Мұртаза атындағы

Халықаралық Тараз университетінің ректоры, Жамбыл облысы ҚХА

ғылыми-сараптамалық тобының төрағасы, педагогика ғылымдарының

докторы, профессор – Сарыбеков Махметғали Нұрғалиұлы клубқа мүшелік

ететін жас ғалымдардың тізімімен жеке-жеке, жіті таныстырды.

Жас ғалымдар клубына арнайы бекітілген ереженің талаптарына сай деп

табылған М.Х.Дулати атындағы ТарӨУ, Ш.Мұртаза атындағы ХТУ және Әл

Фараби атындағы ҚазМУ докторанттары, магистранттары, оқытушылары

және 4 курс студенттері мен «Ассамблея жастары» ҚБ мүшелері ұсынылды.

Олар дауыс беру арқылы бекітіліп, жетекшілері тағайындалды.

Енді аймақтық Ассамблеяның Жас Ғалымдар клубына Ш.Мұртаза атындағы

ХТУ «Ғылыми жұмыстар және халықаралық байланыстар басқармасы»

басшысы, PhD докторы Әбутәлипов Мурат Мұхтарұлы және Жамбыл

облысы әкімдігінің ақпарат және қоғамдық даму басқармасының «Қоғамдық

келісім» КММ ғылыми-сараптамалық қолдау бөлімінің жетекші сарапшысы,

әлеуметтік ғылымдар магистрі Жалпанова Рианна Русланқызы жетекшілік

ететін болады.

Жиын соңы жас ғалымдардың әрқайсына тиесілі атқарар жұмыстарына зор

жауапкершілікпен қарап, клуб жұмысын жандандыру туралы ұсыныс,

тілектермен тәмамдалды.