ЖАҢА ЖЫЛДЫҚ ҒАЖАЙЫПТАР ЖАЛҒАСУДА

Жаңа жыл уақыты жарқын оқиғаларға толы мезгіл. Осыған сәйкес айналадағы түрлі-түсті шамдармен безендірілген шыршалар да оған сән беріп ғажайып шақты толықтырып тұр. Мұндай уақытта барлық адамзатты бақытты қалыптарында көргің келеді, әсіресе, балақайлардың балбұл жайнаған жүздерінен ерекше қуаныш көру – зор ғанибет. Бәлкім, сондықтан да болар, жаңа жылдық қайырымдылық іс-шараларын өткізу де Жамбыл облысының этномәдени бірлестіктері үшін игілікті дәстүрге айналған.

Мәселен, 2023 жылғы 5-желтоқсанда Тараз қаласында, ата-анасының қамқорлығынсыз қалған балаларға, өмірлік қиын жағдайға тап болған балаларды қолдау орталығының тәрбиеленушілеріне арналып, «Grand Royal» мейрамханасында дәстүрлі жаңа жылдық қайырымдылық мерекесі өтті.

Оны Жамбыл облыстық «Ахыска» түрік этномәдени орталығы ҚБ ұйымдастырды.

Іс-шараға 80-нен астам кішкентай қатысушылар шақырылып, балалар уақыттарының бір бөлігін көтеріңкі жаңажылдық көңіл-күйде өткізуге арнады. Аталған мейрамханада жас қонақтар үшін Аяз Ата мен Ақшақардың қатысуымен жарқын және қызықты ойындарға бай бағдарлама дайындалды. Бұған қоса, оларға ертегілерден көз тартар қызықты қойылымдар ұсынылып, сиқыр мен ертегі сияқты таңғажайып көңілді әлемге еніп, әр бала бір сәтке өздерін сол әлемнің кейіпкері сезінуіне мүмкіндік алды.

Сонымен қатар, мерекеге келгендер би билеп, ән айтып, өлең оқыды. Мерекелік іс-шара мол дастарханға ұласты. Іс-шараға қатысушылар дәмді тағамдар мен тәттілерге, жемістерге қарқ болды.

Іс-шара соңында балаларға жаңа жылдық сыйлықтар таратылды.

«Қоғамдық келісім» КММ

Баспасөз қызметі орталығы