Archive for month: November, 2024

ҚХА-ның «Бір ел» тарихи-танымдық жобасы аясында Жамбыл облысында өтіп жатқан республикалық жастар форумы қатысушыларға көптеген саланы қамтып, жан-жақты ақпарат беруде.

Үш күнге ұласқан шараның екінші күнінде жастар қазіргі әлемде табысқа жетудің бірден бір кілті саналған шешендік өнердің қыр-сырына қанықты.

Бүгінде мақсатқа жету және мансап пен мүмкіндікке қол жеткізу адамның аудитория алдында өзін ұстау және сөйлеу қабілетіне тікелей байланысты. Осыған орай, жоба барысында қатысушы жастар Алматы қалалық «Ассамблея жастары» ұйымының белсендісі, «Включи харизму» ораторлық шеберлігі жобасының авторы Әлімжан Бауыржановтан шешендік өнер бойынша дәріс алды. Еркін форматта өткен тренингте спикер адамның тұлғалық қасиеттерін дамыту, сөз шеберлігін қалыптастыру тақырыптарында сөз қозғап, адамның ең үлкен қорқынышының бірі – көпшілік алдында сөйлеу екенін атап өтті.

Сонымен қатар, тақырып аясында шешен сөйлеудің логикалық-композициялық құрылысы мен стильдік табиғатына, импровизациялық өнердің түрлі әдіс-тәсілдеріне тоқталып, жастардың шығармашылық белсенділігін арттыруға, дамыту ынтасын анықтауға, бағыт-бағдар берді.

Спикер форум қатысушыларымен топтық және жеке жұмыс түрлерін жүргізу арқылы қатысушыларды көшбасшылық, аудиторияны қалай тез орналастыру керектігі туралы келіссөздер жүргізу дағдыларына үйретті.

Екінші күннің кешінде бағдарлама бойынша қатысушылар топтық ойын ойнап, серуенге шыққан соң мерекелік кештің куәсі болды. Шара қонақтарына арнап бұл күні кең дастархан жайылып, құрмет көрсетілді. Өнерпаздардың концерттік бағдарламасымен өрілген кеште облыстық ақпарат және қоғамдық даму басқармасы «Қоғамдық келісім» мекеме басшысының орынбасары Дәурен Тайлеев жастарға ізгі тілегін білдірді.

Достықты ұрандаған форум жастары ән айтып, би билеп, кешті көңілді өткізді.

Жастардың көптен бері медиасауаттылыққа қатысты сұрап жүрген сауалдары мен талаптарына сай Қазақстандық Татар және башқұрт конгресі РҚБ жастар қанатының төрағасы,  «JAMBYL»  облыстық телеарнасының журналисті Риналь Рахматуллин өзінің достық дәрісін Журналистика әлемінен бастады.

Журналистика саласының қызығы мен шыжығы, қыр-сырына тоқталған соң спикер-жаттықтырушы медиа ақпарат кеңістігіндегі ақпараттық жарияланымды әлеуметтік желілерде жариялаушыға кеңес ретінде түрлі қызықты әдіс-тәсілдер қолданды

Мәселен, сұхбат аларда спикермен сөйлесу мәдениеті, сұхбат берушіні сөз техникасы арқылы баурап алу, тіл мәдениеті, стилистикасына зерделі акцент жасап, аудиторияның қызығушылығын туғызып, қатысушыларды серпілтті.

Бұған қоса, облыстық «Знамя труда» газетінің тілшісі, өңірлік «Ассамблея жастары” РҚБ активі Дионисий Пляшешник те Алматы қалалық «Ассамблея  жастары» ұйымының белсендісі, «Включи харизму» ораторлық шеберлігі жобасының авторы Әлімжан Бауыржановтың танымдық бағыттағы әдістемесін қолдана отыра БАҚ-та материал жазудың және оны жариялаудың логикалық бағыттарымен егжей-тегжейлі таныстырды.

Меркі ауданы «Turan»  демалыс аймағында өтіп жатқан «Тарих – жастар көзімен» аты республикалық жастар форумына қатысушылар түрлі саладағы кәсіби мамандардың дәрісін тыңдап, білім көкжиектерін кеңейтуде. Аталған ауқымды жиынның алғашқы күнінде жастарға педагогика ғылымдарының магистрі, психолог, Абай атындағы ҚазҰУ-дың докторанты, Қазақ ұлттық қыздар педагогикалық университетінің аға оқытушысы, психолог,  Каспий қоғамдық университетінің сеньор-лекторы, Қазақстан ұйғырлары республикалық  мәдени орталығының қоғам қайраткері Зульфия Таипова адамның ойлау қабілетін «үрмелі шар» әдістемесіне теңеу арқылы түрлі іс-қимылдармен практикалық семинар-тренинг өткізді.

Оның ішінде қандай да бір ақпарат жариялауда түрлі әдістемелерді қолданып, қазіргі заманда ақпаратты жариялау және тарату алдында әр тұлғаның жеке өз ой аумағында алдын-ала дұрыс ақпаратты өңдеу туралы түрлі іс-қимылдарды қолдана отырып, маңызды ақпараттарды айтып өтті.

Жамбыл облысында Қазақстан халқы Ассамблеясының «Бір ел» тарихи-танымдық жобасы аясында өтіп жатқан «Тарих – жастар көзімен» атты республикалық жастар форумына қатысушылар өңірдің тарихи орындарын аралап, тамашалады.

Атап айтқанда, «Көне Тараз» кешенінен бастау алған экскурсия «Қарахан», «Айша бибі», «Тектұрмас» этно-тарихи кешені, «Әулие-Ата» сынды жерлерден бастау алды.

Өз кезегінде атаулы форумға келген Астана, Алматы, Атырау, Ақтөбе, Павлодар, Манғыстау, Қызылорда, Түркістан, Орал, Қарағанды, Ұлытау, Жетісу, Абай, Жамбыл облыстары, Шымкент қалаларынан 60-тан аса жастар шара барысында көптеген қажетті ақпарат алғандарын жеткізді.

Қазақстан халқы Ассамблеясының «Бір ел» тарихи-танымдық жобасы аясында киелі Әулиеата топырағында «Тарих – жастар көзімен» атты республикалық жастар форумы ұйымдастырылуда.

Бүгін Тараздағы Достық үйінде ауқымды шараның ашылу салтанаты өтті. Жиын М.Х.Дулати атындағы Тараз өңірлік университетінің «Дулати» жастары театрының «Қарахан-Айша бибі» қойылымымен бастау алды.

Аймақтық шарада облыстық ақпарат және қоғамдық даму басқарма басшысының міндетін атқарушы Ұлана Сламбекқызы жобаның жастарды ұлттық құндылықтармен тәрбиелеуге зор септігін тигізетінін атап өтті.

–Қазақстан халқы Ассамблеясының елімізде тұратын этностарды біртұтастыққа топтастыру мен мәдениетаралық диалогты дамытуды мұрат еткен «Бір ел» жастар жобасы үшінші жыл қатарынан ұйымдастырылып отыр. Елге, Отанға деген сүйіспеншілік төл тарихымызды тереңнен танудан басталады. Жалпы, бұл жобаның жастарға берері мол. Іс-шара аясында өтетін пленарлық отырыстар, пікірталастар, интеллектуалды ойындар еліміздің әр өңірінен келген жастардың білім көкжиегін кеңейтіп, патриоттық рухтарын нығайтуға зор үлес қосады деп сенемін, – деді.

Салтанатты жиында дәстүрлі шара қатысушыларына «Қазақстан ұйғыр жастары одағы» РҚБ төрағасы, «Ассамблея жастары» РҚБ төрағасының кеңесшісі Рустам Қайриев, Жамбыл облыстық ҚХА төрағасының қоғамдық орынбасары, облыстық ҚХА Ақсақалдар кеңесінің төрағасы Асқарбек Сейілхан және облыстық ҚХА Аналар кеңесінің төрайымы Эльмира Мырзағали сәттілік тілеп, бірлікке үндеген жобаның маңызын айтты.

Айта кетейік, аталған шараға еліміздің барлық өңірінен 60-қа жуық жас қатысуда.

Алғашқы күні облыс орталығына табан тіреген форум қатысушылары Достық үйін аралап, өңірде тұратын этностардың тыныс-тіршілігінен хабар алды.

Жастарға облыстық «Қоғамдық келісім» мекемесінің Көрме залының меңгерушісі Жазира Шілдебаева толыққанды ақпарат берді.

Үш күнге жоспарланған форум аясында Меркі ауданындағы Тұран демалыс аймағында арнайы шақырылған танымал тұлғалар мен сарапшылар қатысушы жастарға рухани және ұлттық құндылықтар мен тарихи-мәдени мұра, этносаралық татулықты сақтаудың маңыздылығын түсіндіру мақсатында дәріс өткізетін болады.

Сондай-ақ, жоба аясында жастардың қатысуымен Жамбыл облысының тарихи орындарына көшпелі экспедициялар ұйымдастырылады.