Archive for month: November, 2024

Астана қаласында ҚР Мәдениет және ақпарат министрлігінің қолдауымен Қазақстан халқы Ассамблеясының «Көшбасшылар академиясы» жобасы өтуде.

Аталған жобаға еліміздің барлық өңірлерінен 50-ден астам белсенді жастар жиылып, Елордадағы «OzgeEpic» креативті хабы» ғимаратында танымал жетекші тренерлер мен спикерлер жүргізген шеберлік сабақтарына қатысып, білімдерін жетілдіруде.

Үш күнге ұласқан шараның екінші күнінде қатысушылар бейвербалды қарым-қатынаспен және әлеуметтік белсенділікпен өзара әрекеттесу мәселелерін талқылап, өзекті тақырып төңірегінде білікті мамандардың дәрісін тыңдады.

Атап айтсақ, бағдарлама бойынша екінші күні UBES HIGH SCHOOL оқытушы-тренері Ләззат Асқарова қатысушылармен «Үлкен уақыт» атауымен тимбилдинг ұйымдастырды.

Ал, «Халықаралық құзыреттілік академиясы» ЖШС директоры, психология ғылымдарының докторы, медицина ғылымдарының кандидаты, ЖАК доценті Лейла Асылбекова «Вербалды емес тұлғааралық қарым-қатынас өнері» тақырыбында мардымды баяндама жасап, қатысушылармен пікір алмасты.

Сондай-ақ, «Ассамблея жастары» РҚБ төрағасы Тимур Жұмырбаев Workshop тәжірибелік алаңында белсенді жастарға креативті инсайттар беріп, пікірлерін тыңдады.

Айта кету керек, бұл жоба Қазақстан халқы Ассамблеясының жаңа ұрпақ көшбасшыларын тәрбиелеуге, әлеуметтік және мәдени мәселелерді тиімді шешуге дайын жас жетекшілерді қалыптастыруға үлес қосады.

Сонымен қатар, «Көшбасшылар мектебі» өңірлер арасындағы ынтымақтастықты нығайтуға, этносаралық қарым-қатынас және көшбасшылық дағдыларын дамытуға, сондай-ақ жаңа ұрпақ көшбасшыларын даярлауда маңызды қадам болмақ.

Ағымдағы жылдың 18 қарашасында Астана қаласында Қазақстан халқы Ассамблеясының «Көшбасшылар академиясы» жобасы бастау алды.

Үш күнге жоспарланған жобаға республиканың әр өңірінен этномәдени бірлестіктердің жас көшбасшылары, «Ассамблея жастары» РҚБ өкілдері, белсенділер мен блогерлер қатысуда.

Айта кетейік, ауқымды жиынға Жамбыл облысынан республикалық «Ассамблея жастары» төрағасының орынбасары, өңірлік жастар ұйымының жетекшісі Хамида Турдыева және облыстық ақпарат және қоғамдық даму бақармасы «Қоғамдық келісім» КММ жетекші сарапшысы Алмас Ақынтай қатысуда.

Жоба кадрлық резервті даярлау алаңын құру арқылы Қазақстан халқы Ассамблеясының жас көшбасшыларының жаңа буынын қалыптастыруды көздейді.

Шараның ашылу салтанатында “Қоғамдық келісім” РММ директоры Элина Масағұтова мен «Ассамблея жастары» РҚБ төрағасы Тимур Джумурбаев сөз алып, жоба жұмысына сәттілік тіледі.

Мазмұны мол жастар жиынының алғашқы күнінде қатысушыларға бірқатар спикерлер дәріс өткізді.

Атап өтсек, Ш.Шаяхметов атындағы «Тіл-Қазына» ұлттық ғылыми-практикалық орталығының бас директоры, «OzgeЕpic» шығармашылық хабының негізін қалаушы Мақпал Жұмабай «Жасанды интеллект және оны өмірде қолдану» тақырып шеңберінде түрлі әдістемелерімен бөліссе, ҚХА шығармашылық ұжымдары қауымдастығының төрағасы, «Ұлттық дельфий комитеті» КҚ төрағасы Құралай Түспекова «Мәдени кодты қалыптастыру» тақырыбында баяндама жасап, жастарға көптеген мағлұмат беріп өтті.

Ағымдағы жылдың 18 қарашасында Астана қаласындағы Л.Н.Гумилев атындағы Еуразия ұлттық университетінде Қазақстан халқы Ассамблеясы Төрағасының орынбасары Марат Әзілхановтың қатысуымен ҚХА Академиясының ашылу салтанаты өтті.

Академия ҚХА мүшелері мен этномәдени бірлестіктердің, Ассамблеяның қоғамдық құрылымдары жетекшілерінің біліктілігі мен құзіретін арттыруға арналған маңызды институт.

Менеджмент бойынша тәжірибеге бағытталған алғашқы курс Достық үйлерінің басшыларына арналды. 5 күнге созылатын бағдарлама аясында жобаларды басқару, гранттық қаржыландыру, бюджеттеу және этномедиация мәселелері бойынша дәрістер, семинарлар және тренингтер өтеді деп жоспарлануда.

Атап өтейік, маңызы мол жиынға өңірлік ассамблеядан «Қоғамдық келісім» КММ және Достық үйі басшысы Мубарак Қасымқызы Жинақбаева қатысуда.

Жамбыл облыстық «Радонеж» Орыс қауымдастығы» қоғамдық бірлестігі жанынан құрылған «Калинка»  вокалдық ансамблінің есімі Әулиеата жұртына етене таныс. Аймақ мәдениетін дамытуға үлес қосып, орыс халқының әндерін жергілікті жұртшылыққа кеңінен насихаттап жүрген шығармашылық ұжымның құрылғанына биыл 10 жыл толып отыр.

Осыған орай, ағымдағы жылдың 16 қарашасы күні Достық үйінде ансамбльдің мерейтойлық концерті салтанатты түрде аталып өтті.

Бұл күні шығармашылық ұжымды құттықтауға келген өңірлік этномәдени бірлестік өкілдері мен ҚХА мүшелерінің қарасы қалың болды. Сондай-ақ, шараға облыстық «Қоғамдық келісім» КММ басшысының орынбасары Сәуле Құрманқұлова қатысып, өңірлік Қазақстан халқы Ассамблеясының игі істеріне белсене атсалысып жүрген ансамбльге алғысын білдіріп, марапаттады.

Жыл арта өнер ұжымының шығармашылық әлеуеті артып, репертуары жаңарып отырады. Өнердің өлкесінде жүрген ұжымның көркемдік жетекшісі, облыстық «Радонеж» Орыс қауымдастығы» қоғамдық бірлестігінің төрағасы Владимир Сорокин ансамбльдің орындаушылық шеберлігі жыл озған сайын шыңдала түсуде екенін мақтанышпен жеткізді.

–Осы уақыт аралығында өнер ұжымы әрдайым шығармашылық ізденісін тоқтатпай жаңа туындыларымен өз тыңдармандарын тамсандырып келеді. Ансамбльдің алғашқы кәсіби қойылымы әйелдер ұжымы және «Радонеж» Орыс этномәдени бірлестігі мүшелерінің орындауындағы «Ой, цветет калина» әнімен басталған болатын. Міне, содан кейін құрам «Калинка» атауына ие болды, – дейді ансамбльдің көркемдік жетекшісі В.Владимирович.

Мерекелік кеште ансамбльдің орындауындағы «Когда весна придёт не знаю…», «Матушка-земля», «На деревне тихо», «Ромашка белая», «Осень золотая», «Две души», «Ах, судьба, моя судьба», «Хуторок», «Есаул молоденький», «Печки-лавочки», «Сильная женщина» секілді көптеген әндері көрерменнің ыстық ықыласына бөленді. Әуезді ән шырқалған кеште қазақ, татар, украин халқының ұлттық билері сахналанып, кеш шырайын аша түсті.