Archive for month: November, 2023

Тараздағы Достық үйінде Жамбыл облысы әкімдігі ІСБ «Қоғамдық келісім» КММ ұйымдастыруымен ҚР «Халық Қаһарманы», «Алтын Жұлдыз» белгісі «Отан» және «Қызыл Жұлдыз» орденінің иегері Бақытжан Ертайұлы Ертаевпен облыстық этномәдени бірлестік өкілдерінің кездесуі өтті.

Аталған кездесуге облыстық этномәдени бірлестіктердің жетекшілері мен өкілдері, өңірлік «Ассамблея жастарының» мүшелері қатысты.

Жиын Жамбыл облысы әкімдігі ІСБ «Қоғамдық келісім» КММ басшысы, модератор Мүбарак Қасымқызы Жинақбаеваның сөзімен басталды. Мекеме басшысы өз сөзінде облыс этномәдени бірлестіктерінің тату-тәтті күн кешіп, қоғамдық жұмыстарға, ел игілі жолында аянбай еңбек етіп жатқанын және халық санының жиырма миллионға жеткенін тілге тиек етті.

Кездесу барысында Б. Ертаев ҚХА атқарып жатқан игі істері, Отан алдындағы әрбір азаматтың борышы, еліміздің жастары туралы өз пікірін баса айтты. Батырлардың елмен, жастармен бірге болуы керектігін, бұл өз кезегінде өскелең ұрпақтың бойында отансүйгіштікті қалыптастыру үшін маңызды әрі құнды екеніне де ерекше тоқталды.

Осы орайда этномәдени бірлестік жетекшілері өз ой-пікірлерін ортаға салып, батырмен емен-жарқын әңгімелесті.

Кездесу Бақытжан Ертайұлына алғыс білдіріп, естелік суретке түсумен аяқталды.

«Ақпараттық жұмыс және қоғаммен байланыс» бөлімі

Бүгін  М. Х. Дулати атындағы Тараз өңірлік университетінде республикалық «Мәдениетті ана- мәдениетті ұлт» жобасы аясында «Әулиеата» қазақ мәдени орталығы Аналар кеңесінің ұйымдастыруымен  «Үкілі» қыздар клубының тұсау кесер рәсімі өтті.

Клубтың мақсаты қоғамдық ортада азаматтық ұстанымдары бар, өмірінде отбасылық міндеттерді білімімен ұштастыра білетін ұлтжанды, парасатты, ұлттық салт-дәстүр мен мәдениетті дәріптейтін қыздарды қалыптастыру. Университет қабырғасында жүріп  сырласып, ой бөлісетін, қажетті кеңестер ала алатын текті қыздардың ортасын құру.

Тұсау кесерге «Жер ана» Корпоративті ауыл фермерлерінің қорының төрайымы, ҚХА Аналар кеңесінің мүшесі Роза Мұсабаева, университет аналар кеңесінің төрайымы Ардақ Жантаева т.б  қатысты.

Клубтың тұсауын кафедра меңгерушісі Айгүл Қабиқызы Қабиева және  Роза Мұсабаева кесіп, қыздарға бата беріп, барлық қыздаға үкілі моншақ үлестірді. Ал, көрермен тұсау кесер шашуынан дәм татты. Кеш барысында  қыздар клубының  алғашқы жобасы «Кітап оқуға шақырамыз» атты челленджі көрсетілді.

«Ақпарат және қоғаммен байланыс» бөлімі

Жамбыл облысы әкімдігінің ІСБ «Қоғамдық келісім» мекемесінің ұйымдастыруымен Жуалы ауданында облыстық Қазақстан халқы ассамблеясының «Достық керуені» жобасы аясында ауқымды іс-шара өтті.

Шараға Жамбыл облысы ҚХА Ақсақалдар кеңесінің мүшелері, Жуалы аудандық Ақсақалдар кеңесінің төрағасы мен белсенді мүшелері, облыстық ҚХА Аналар кеңесінің төрайымы мен мүшелері, Жуалы аудандық Аналар кеңесінің төрайымы мен белсенді мүшелері, ішкі саясат бөлімі қызметкерлері, этномәдени бірлестіктер өкілдері, «Ассамблея жастары» қоғамдық бірлестігі, аудан және ауыл этнос жастары, мектеп оқушылары, студенттер, ауыл тұрғындары, БАҚ өкілдері қатысты.

Шараның мақсаты — ҚХА этномәдени бірлестік мүшелерінің халықпен кездесулерін өткізу мен коммуникациялар қалыптастыру, этносаралық саладағы тәуекелдердің алдын алу үшін жастар, мәдени және басқа да құрылымдар нысанындағы диалог алаңдарының жұмысына қатысу.

Сонымен қатар, Жамбыл облысы әкімдігінің ІСБ “Қоғамдық келісім”КММ «Ғылыми-сараптамалық қолдау» бөлімінің сарапшылары Жуалы ауданының Б.Момышұлы, Көлбастау ауылдарының тұрғындарына әлеуметтік-зерттеулер мен этносаралық бағыттағы ақпараттық-түсіндіру жұмыстарын жүргізді.

«Ақпараттық жұмыс және қоғаммен байланыс» бөлімі

Жамбыл облысы Қазақстан халқы ассамблеясының «Достық керуені» жобасы аясында өңірлік «Ассамблея жастары» Жуалы ауданы жастарымен кездесу өткізді.

«Достық керуені» жобасын ілгерілетудегі мақсат — өңірлік ҚХА этномәдени бірлестік мүшелерінің халықпен кездесулер өткізуі, коммуникациялар қалыптастыру, этносаралық саладағы тәуекелдердің алдын алу үшін жастар, мәдени және басқа да құрылымдар нысанындағы диалог алаңдарының жұмысына қатысу.

Осы орайда, облыстық Ассамблея жастары Жуалы ауданының «Шерхан Мұртаза» мектебінде оқушыларға арналған «Менің елім, Менің Қазақстаным» атты тимбилдинг жұмыстарын жүргізді.

«Ақпараттық жұмыс және қоғаммен байланыс» бөлімі

Тараз қалалық Достық үйіндегі Жамбыл облысы әкімдігі ІСБ «Қоғамдық келісім» мекемесі республикалық жоба аясында ұйымдастырған «Этносаралық қақтығыстарды реттеу кезіндегі медиативті тәсілдерді оқыту» атты облыстық семинар-тренинг сәтті аяқталды.

Іс-шараның спикерлері ретінде «Парасат» медиация және құқық орталығы ЖМ кәсіби медиаторы, тренер-сарапшысы Адаев Мұхтар Мұханұлы және осы орталықтың тренер-сарапшысы, кәсіби медиатор, конфликтолог Бахыт Амангелдіұлы Жамбыл облысына қарасты аудандарынан және Тараз қаласынан келген тыңдаушыларға медиация бойынша дәрістерді түрлі әдістемелік тәсілдермен жеткізді.

Үш күндік іс-шара барысында дәріс алушы қатысушылар алған білімдерін практика жүзінде де дұрыс қолдануды үйреніп, медиация саласының медиативті тәсілдері туралы білімдерін тереңдете түсті.

Бұған қоса, аталған кәсіби медиаторлардың дайындаған медиациялық кейс-дәрістері оларға ұмытылмас тамаша әсер қалдырды.

Семинардың дәрістер жөнінде мәселен, ІІ-топ қатысушыларына сауалнамалар толтыртқызылып, спикерлер берілген толық дәрісті қорытындыласа, І-топ дәріскерлері үш күндік семинардан алған әсерлерімен бөлісті.

Тыңдаушылар семинарда үйренгеніміз мол, әр түрлі тақырыпты қамтыған дәрістер білімімізді жетілдіре түсті деп ұйымдастырушылар мен дәріскерлерге ризашылықтарын білдірді.

Іс – шара қорытындысы бойынша тыңдаушылар сертификаттар алды.

«Ақпараттық жұмыс және қоғаммен байланыс» бөлімі