ОЛИМПИЯ МЭРІ Г.ГЕОРГИОПУЛОС БАСТАҒАН ДЕЛЕГАЦИЯ ТАРАЗ ШАҺАРЫНДА

/in /by

Ізгілікке арқау болған ұлық мейрам – Құрбан айт мерекесі күні ежелгі Олимпия мэрі Георгиос Георгиопулос бастаған делегация достық сапармен киелі Көне Тараз қаласына келді.

Олимпиада ойындарының мұражайына айналған қасиетті өлке саналатын, тарихы тереңде жатқан Грециядан ат терлетіп келген меймандарды Жамбыл облысы әкімдігінің ішкі саясат басқармасының басшысы Ұлана Сламбекова мен «Қоғамдық келісім» КММ басшысы Мүбәрак Жинақбаева және этномәдени бірлестіктердің басшылары ерекше құрмет, жылы жүзбен қарсы алды.

Достық үйінің кіре берісінде қарсы алынған шетелдік қонақтарға алғаш келген меймандарға ұсынылатын қазақтың ұлттық тағамы- «жеті дәм»: жент, құрт, қаймақ, ірімшік, талқан, қуырылған тары, сүзбе мен дәмді бауырсақтар ұсынылды.

Өңірлік Ассамблеяның тыныс-тіршілігінен хабар берген «Қоғамдық келісім» КММ басшысы Мүбәрак Жинақбаеваның алғы сөзінен соң меймандар назарына «Қазақ» биі ұсынылды.

Ерен делегацияның келуіне орай, «Қоғамдық келісім» мекемесі ұйымдастырған келелі кездесуге Тараз қаласының әкімі Бақытжан Орынбеков, «ҚазМұнайГаз» ұлттық компаниясы басқарма төрағасының қоғамдық кеңесшісі, мемлекет қайраткері Жақсыбек Құлекеев пен Жамбыл облысы әкімдігі және Тараз қаласы ішкі саясат басқармасының қызметкерлері, облыстық этномәдени бірлестіктердің төрағалары мен БАҚ өкілдері қатысты.

Кездесу барысында «Жамбыл облыстық Гректер қоғамы» қоғамдық бірлестігінің жастар орталығының төрайымы Татьяна Герантиди гректер жөнінде кеңінен мағлұмат беріп, этномәдени бірлестіктің Әулиеата өңіріндегі хал-ахуалынан хабар берді.

Бұдан соң, ЮНЕСКО тізіміне енген «Ортеке» күйінің театрлық миниатюрасын Қазым Аманқосов қазақтың қара домбырасында орындап, көпшіліктің өзіне деген назарын аудартты.

Келесі кезекте «Оқушылар сарайының» өскелең өнерпаздары, облыстық Гректер қауымдастығының жасөспірімдер шығармашылық тобынан құралған “Іnfiniti» би ансамблі «Грек» биін орындады.

Осыдан соң, ортаға Георгиос Георгиопулос шақырылып, сөз кезегі берілді. Мэр өз сөзінде маңызды кездесуге жиылған барша қауым мен Тараз жұртшылығына ыстық ықыласпен, депортация нәубетінде Қазақстанның қасиетті жерін паналап, бейбітшілік пен келісімде өмір сүріп келе жатқан “Эллада” ұрпақтарын қиын жылдары бауырындай кеңпейіліділкпен қабылдағаны үшін зор алғысын білдірді.

Шара барысында «Қоғамдық келісім» мекемесі мен өңірлік Ассамблея атынан Достық үйінің басшысы Мүбәрак Қасымқызы мен облыстық Тәжіктер этномәдени бірлестігінің төрағасы Махкам Орифов қазақтың ежелгі кәделі ұлттық киімі – кестелі барқыт шапанын алыстан келген мейманның иығына жауып, естелік ретінде күмбезді Достық үйі ғимараты бейнеленген кілемді сыйға тартты.

Кездесу соңында шетелдік қонақтар делегациясының назарына сан түрлі этностың тарихынан сыр шертетін ұлттық нақыштағы бұйымдардан құралған көрме ұсынылды.

Қарсы алу іс-шарасынан ерекше әсер алған Георгиос Георгиопулос бастаған делегация ерекше жылы көңіл-күйде достық сапарына негізделген жоспарға сәйкес қаланың басқа бөлігіне бет бұрды.

«Ақпараттық жұмыс және қоғаммен байланыс» бөлімі

ТАРАЗДА НАШАҚОРЛЫҚҚА ҚАРСЫ МЕМОРАНДУМҒА ҚОЛ ҚОЙЫЛДЫ

/in /by

Ағымдағы жылдың 26 маусымында Тараз қаласының “Анаға тағзым” орталығында “Халықаралық нашақорлыққа қарсы күрес” күніне орай облыстық ҚХА Аналар кеңесінің бастамасымен қолға алынған «Жасыл сертификат» жобасы аясында «Дәріханалық нашақорлыққа қарсы іс-қимыл шаралары туралы» атты дөңгелек үстел өтті.

Іс-шараның модераторы Жамбыл облысы әкімінің орынбасары Үйсімбаев Еркін Құлымбайұлының өзі болып, маңызды жиынның іс-қимылдарын жоғары деңгейде үйлестіріп отырды.

Бұл іс-шараны өткізудегі мақсат – ҚХА Аналарының қолға алған «Жасыл сертификат» әлеуметтік пилотты жобасын ілгерілету, қоғамда тарап кеткен дәріханалық нашақорлықпен күреске үлес қосу, жастар арасындағы басқа да тәуелділіктердің алдын алып, олардың қауіпсіз болашағын қамтамасыз ету, есірткі қолданудың зияны мен салдары туралы жастар арасында ақпараттық-түсіндіру жұмыстарын жүргізу, салауатты өмір салтын ұстану, насихаттау тұрғысында коалицияға бірігіп жұмыс жүргізу болатын.

Жиынға Жамбыл облысының прокуратурасы, ҚР Ұлттық қауіпсіздік комитеті Жамбыл облысы бойынша департаменті, Жамбыл облыстық полиция департаментінің өкілдері және облыс әкімдігінің басқарма басшылары, қоғамдық ұйымдар, қаламыздағы ең танымал дәріханалар өкілдері мен облыстық БАҚ тілшілері қатысты.

Дөңгелек үстел өту барысында бірнеше жылдан бері жас өспірімдер мен жастарды нашақорлықтан түбегейлі ада ету жолында аянбай еңбек етіп келе жатқан өңірлік Ассамблеяға қарасты Аналар кеңесінің белсенді мүшелері өз ойларын ортаға салып, жастардың болашағына балта шабар, бойы мен ойын меңдеп алған қауіпті дерттен қалай құтқарудың тиімді жолдары турасында өз бағыттарымен бөлісті.

Мәселен, Жамбыл облысы ҚХА Аналар кеңесі төрайымының орынбасары Аракси Плетнева Мемлекет басшысының Ұлттық Құрылтайда балаларды дұрыс тәрбиелеу жөніндегі маңызды тапсырмаларына сүйене отырып, аймақтық ҚХА Аналар кеңесінің осы бағыт бойынша жүйелі де ауқымды жұмыс жүргізіп жүргендігіне тоқтала келе, ақпараттық сипаттағы, әсіресе, синтетикалық есірткінің тез таралуына әлеуметтік желілерді белсенді қолданушы жастар мен оған тікелей ықпал ететін интернет-сайттар және оларға барлық жолмен тосқауыл қою жөнінде кеңінен баяндап берді.

Сонымен бірге, жастар арасында есірткі, уытты заттарды тұтыну және нашақорлықтың алдын алу шаралары жөнінде Жамбыл облысы әкімдігінің жастар саясаты мәселелері басқармасының басшысы Жомарт Зұлпыхар баяндама жасап, еліміздің болашағы — жастарды нашақорлық індетінен алыстату бағытында жұмыс тоқтаусыз жүргізілетіндігін егжей-тегжейлі түсіндіріп берді.

Осылайша қауіпті індетпен күресудің әр түрлі әдістері мен қыр-сырын талдап, талқылап көрсете білген басқа да баяндамашылар мен жиын қатысушылары ортақ бір шешімге келіп, маңызды қадам жасады.

Жиынның ең маңызды сәті, нағыз шарықтау шегі – Жамбыл облысының есірткіге қарсы қоғамдық коалициясы мен дәріханалар өкілдерінің қоғамдық денсаулықты қорғауға және дамытуға деген өзара ортақ тілектерін басшылыққа ала отырып, Меморандумға қол коюы болды!

Нақтырақ айтқанда, қоғамдық коалиция ретінде – Жамбыл облысы ҚХА Аналар кеңесі, облыстық Ардагерлер кеңесі, «Сенімен болашақ» республикалық қоғамдық бірлестігінің Жамбыл облыстық филиалы, «Жер ана» фермер әйелдер қауымдастығы»ҚБ, «AMANAT» партиясы облыстық филиалы, Жамбыл облысы әкімдігінің жастар саясаты мәселелері басқармасы, «Қазақ аналары – дәстүрге жол» республикалық ҚБ облыс бойынша филиалы және облыс әкімдігінің ішкі саясат басқармасының «Қоғамдық келісім» КММ, облыстық «Анаға тағзым» отбасын қолдау орталығы мен тұтынушылардың көп сұранысына ие белгілі дәріханалардың өкілдері арасында ынтымақтастық туралы Меморандумға қол қойылып, басқа да ірілі-ұсақты дәріханалармен “құпия сатып алушы” жүйесі бойынша бірлесіп жұмыс жасау шаралары алға қойылды

ТАРАЗДА АНАЛАР КЕҢЕСІ ҚОҒАМДЫҚ МАҢЫЗЫ ЗОР ІС-ШАРА ӨТКІЗДІ

/in /by

2023 жылдың 24 маусымында Тараз қаласындағы арнайы мектепте Жамбыл облысы ҚХА Аналар кеңесі осы оқу орнының тәрбиеленушілері үшін аналар кеңесі төрағасының орынбасары Аракси Плетнева және осы кеңестің мүшесі Роза Изятова, меценат Лобар Гаюповамен бірқатар мәдени-көпшілік іс-шаралар өтті.

Осыған байланысты ҚХА Аналар кеңесінің «Жасыл сертификат» жобасын жүзеге асыру мақсатында нашақорлықтың алдын алуға арналған іс-шара Жамбыл облысы ІІД Есірткі қылмысына қарсы күрес басқармасының өкілі Қанат Белгібаевпен бірлесіп өткізілді.

Кездесу барысында балаларға есірткінің адам денсаулығы мен өміріне зиянды әсері, сондай-ақ есірткі құралдары мен психотроптық заттардың заңсыз айналымы үшін жауапкершілік туралы айтылды. Аталмыш шара Ұлттық домбыра күніне арналған іс-шарамен жалғасты.

Жиналғандар қазақ халқының ұлттық қазынасы саналатын домбыра аспабы туралы әңгіме қозғады. Қазақтың төл мәдениеті мен өнерін домбырасыз елестету мүмкін емес. Талантты домбырашының қолында халқымыздың бүкіл тарихы оның үнінде бейнеленген. Шара барысында түрлі күйлер орындалды. Сонымен қатар, Аналар кеңесінің өкілдері оқушылармен кездесу барысында бірлік, татулық пен келісімді нығайтуға бағытталған «Біз әртүрліміз, бірақ бірдейміз» тақырыбын қозғады.

Айта кетерлігі, Жамбыл облысы ҚХА Аналар кеңесі меценат Лобар Гаюповамен бірге бұл мекемеге көп жылдар бойы қамқорлық жасап, тағдыры қиын балаларға қол ұшын созып келеді. Бұл жолы оларға жылжымалы бассейн мен дәмді тағамдар ұсынылды.

Мұндай іс-шаралар алдағы уақытта да жалғасын табатын болады.

Ақпараттық жұмыс және қоғаммен байланыс бөлімі

ТАРАЗДА ҚР «БАРБАНГ» КҮРДІЛЕР ҚАУЫМДАСТЫҒЫНЫҢ ЖАМБЫЛ ОБЛЫСТЫҚ ФИЛИАЛЫ” ҚОҒАМДЫҚ БІРЛЕСТІГІНІҢ ФЕСТИВАЛІ ӨТТІ

/in /by

Ағымдағы жылдың 24 маусымында Тараз қаласындағы “Баласағұн” ОКЗ-да «Қазақстан Республикасының «Барбанг» Күрділер қауымдастығының Жамбыл облыстық филиалы» қоғамдық бірлестігінің күрді мәдениетінің фестивалі өтті.

Қала қонақтары мен күрді этносының өкілдері, бірлестік мүшелерінің тамашалауымен өткен фестивальде күрділердің Қазақстан Республикасына қоныс аудару тарихы және күрді этносының қазіргі Қазақстанда қалай өмір сүретіні туралы фильмнің қысқаметражды слайды көрсетілді. Сондай-ақ балалар би ансамблінің және музыкалық топ пен әншілердің қойылымы көпшілікке ұсынылды.

Іс-шараға арнайы Германиядан әнші Дарвеш Шерхеди келіп, күрді этносына кеңінен танымал әндерді орындап берді.

Әсем әуен, көз тартар қойылымдардың барлығы да көпшіліктің көңілінен шығып,зор қошеметтеріне ие болды.

Ақпараттық жұмыс және қоғаммен байланыс бөлімі

МИГРАНТ БАЛАЛАРҒА АРНАЛҒАН ЗАҢ МЕКТЕБІ

/in /by

2023 жылғы 20 маусымда Тараз қаласында АҚШ-тың USAID Халықаралық даму агенттігінің жобасы шеңберінде Winrock International ұйымы іске асыратын Тәжікстаннан келген “Орталық Азиядағы қауіпсіз көші-қон” көшіп-қонушылардың балаларына арналған заңнамалық мектебі дәрістері өткізілді.

Заң дәрістерін өткізудің мақсаты – мигранттардың балаларына өмірлік дағдыларын дамытуда қолдау көрсету.

Ұйымдастырушылар – «Қайсар» ҚҚ кейс-менеджері, «Тараз-анти ВИЧ» қоғамдық бірлестігінің төрағасы, жоба үйлестірушісі Рамиль Перзадаев, «Мирекл» ҚБ маманы, Жамбыл облыстық Тәжіктер этномәдени бірлестігінің өкіілі Гүлсара Тухтамышева. Семинар жаттықтырушылары ретінде «Volonter_Group_08» Еріктілер ҚБ төрағасы, Тараз қаласы Өзбек мәдени орталығы төрағасының орынбасары Рустам Ташметов пен «Азаматтық құқықтарды қорғау»  комитетінің басшысы, Жамбыл облысы «Радонеж» Орыс қауымдастығы кеңесінің мүшесі, өңірлік Медиаторлар кеңесінің төрайымы Ирина Федорова өз ойларын ортаға салды.

Іс-шара барысында қатысушыларға шет елдерден келген азаматтарға қатысты құқықтар мен міндеттер бойынша ҚР заңнамасының тармақтары, еріктілер қозғалысы және т. б. келелі мәселелер жөнінде сауалдар қойылып, қанағаттанарлық жауаптар алынды.

Ақпараттық жұмыс және қоғаммен байланыс бөлімі

БІРЛІК ПЕН ЫНТЫМАҚ НЕГІЗІ – ДОСТЫҚ

/in /by

ҚР Президентінің Қазақстан халқы Ассамблеясының ХХХІІ сессиясында берген тапсырмасының негізінде ҚР Президенті Әкімшілігі Басшысының орынбасары А.Ғ.Балаеваның қатысуымен өткен отырыстың Хаттамасына сәйкес ҚХА құрылымдарын жұмылдыра отырып, бірқатар іс-шаралар кешенін ұйымдастыру жоспарланған болатын. Оның бірі – жазғы сауықтыру және мектеп жанындағы лагерьлерде «әралуандықтағы бірлік» қағидаты тақырыбына іс-шаралар ұйымдастыруды қамтамасыз ету еді.

Осыған орай, ағымдағы жылдың 22 маусымында Жамбыл облыстық ҚХА «Ассамблея жастары» РҚБ және «М.Қашқари атындағы Ұйғырлар этномәдени бірлестігі» ҚБ Жамбыл ауданы Жасөркен ауылында орналасқан «Болашақ» сауықтыру лагеріндегі түрлі этностардан құралған демалушы балаларға арналған «Біз әртүрліміз, бірақ бірдейміз!» атты іс-шара өткізді.

Шараны өткізудегі мақсат – бірлік пен ынтымақтың басын біріктірер адал достық қасиетін дәріптеу, этносаралық қатынасты нығайту, жасөспірімдер арасында өзара түсіністік, келісімнің нық орнауына ықпал ету, жалпыұлттық қазақстандық бірегейлікті сақтауға баулу, білімді, мәдениетті, өз еліне жанашыр патриот тұлға қалыптастыру және мемлекеттік тілдің қолданылу аясын кеңейту.

Аталмыш Ұйғыр бірлестігі жастар қанатының өкілі, сондай-ақ, өңірлік «Ассамблея жастары» РҚБ мүшесі Ирода Абдусатарова мен “Қоғамдық келісім» КММ “Жобаларды іске асыру және ҚХА құрылымдарымен жұмыс” жөніндегі бөлімінің жетекші сарапшысы Рахат Ерханұлы жетекшілігімен “Ассамблея жастары” РҚБ белсенділері лагерь демалушыларына тәрбиелік мәні бар ойын-сауық бағдарламасын ұсынды.

Іс-шара барысында олар жасөспірімдерге «Әралуандықтағы бірлік» тақырыбында тренинг өткізіп, қызықты ойындар ұйымдастырды.

Сонымен бірге, балалардың интернеттік тәуелділіктен бір уақыт бас тартып, уақыттарын тиімді, әрі пайдалы өткізулері үшін, мектептен алған білімдерін ұмыттырмау, дамыту және зеректігін арттыру бағытында оларға қиын да қызық жұмбақтар құрастырылып, викториналық сауалдар да қойылды.

Ойын-сауық шарасы соңында іс-шараға белсенді қатысқан жеңімпаз балақайларды “Қоғамдық келісім” мекемесінің жастарға жауапты маманы Р. Ерхан құттықтап, өңірлік “Ассамблея жастары” ҚБ-нің мүшесі И.Абдусатарова оларға түрлі сыйлықтар табыстады.

Ерекше атап өтейік, аталмыш шарада балалардың сыйлықтарға ие болуына төрайымы Мухабат Турдыева бастаған облыстық М.Қашқари атындағы Ұйғырлар этномәдени бірлестігі демеушілік етті.

Игілікті кездесу өз деңгейінде жоғары өтті деп саналмақ.

“Ақпараттық жұмыс және қоғаммен байланыс” бөлімі

ҰЛТТЫҚ ДОМБЫРА КҮНІНЕ АРНАЛҒАН ІС-ШАРА ӨТТІ

/in /by

Домбыра – көнеден қалған асыл мұра, көзіміздің қарашығы әрі ұлттық кодымыздың айнымас бөлігі. Құрманғазы, Тәттімбет, Дәулеткерей, Қазанғап, Дина, Сүгір сынды бабаларымыздан мирас болып қалған күй өнерін жандандыруда Ұлттық домбыра күнінің алар орны ерекше. Алпыс екі тамырды идіріп, ет жүректі елжіреткен қоңыр домбыраның киелі үні кез келген жан баласын таңқалдырмай қоймас?!

Аталған мерекеге орай, Жамбыл облысы әкімдігі ішкі саясат басқармасының «Қоғамдық келісім» КММ Көрме залының меңгерушісі Вера Майковичтің және домбырашы Рүстем Малдыбаевтың қатысуымен Жасөркен ауылындағы «Болашақ» лагерінде іс-шара өтті.

ҚР мәдениет қайраткері, күйші, сазгер және «Көне Тараз» күйінің авторы Аман Малдыбаевтың ізін жалғаушы, іс-шара қонағы, домбырашы Р.Малдыбаев лагерь қатысушыларына әйгілі «Балбырауын», «Әлқисса», «Шаттанамын» күйлерінің шығу тарихына тоқталып, нақышына келтіріп орындап берді.

Өз кезегінде В.Майкович жасөспірімдердің арасынан жас суретшілерді іріктеп, «Ұлттық домбыра күні» мерекесіне орай «Домбыра» тақырыбында сурет салуды тапсырды. Сондай-ақ, қатысушыларға бағыт-бағдар беріп, бірге сурет салуға атсалысты.

Нәтижесінде, екі топқа бөлінген жас суретшілердің қолынан таңғажайып туынды пайда болды. Іс-шара соңында В.Майкович суретшілерге арнайы сыйлықтар табыс етті.

«Ақпараттық жұмыс және қоғаммен байланыс»  бөлімі

ЕСІРТКІМЕН КҮРЕС – ЕЛГЕ ТИГЕН ҮЛЕС

/in /by

2023 жылдың 22 маусымында ҚР Президентінің Қазақстан халқы Ассамблеясының ХХХІІ сессиясында берген тапсырмасы мен ҚР Президенті Әкімшілігі Басшысының орынбасары А.Ғ.Балаеваның қатысуымен өткен отырыстың Хаттамасына сәйкес ҚХА құрылымдарының қатысуымен іс-шаралар өткізу жоспарланды.

Осыған орай, өңірлік ҚХА Аналар кеңесінің ұйымдастыруымен және Жамбыл облысы Полиция департаментінің Есірткі қылмысына қарсы іс-қимыл басқармасының аға жедел уәкілі, полиция майоры Андрей Сухаревтің қатысуымен «Жасыл сертификат» әлеуметтік-пилоттық жобасын іске асыру мақсатында Жамбыл ауданындағы Жасөркен ауылында орналасқан «Болашақ» сауықтыру лагерінің балаларымен кездесу өтті.

Кездесуде А.Сухарев балаларды адамзат өміріне қауіп төндіріп отырған есірткінің зиянды әрі улы зат екенін түсіндіре отырып, саналы болуға, салауатты өміді таңдауға, тазалыққа, лас істерден аулақ болуға және жан сұлулығымен қатар тән сұлулығын сақтауға шақырды.

Сөз сөйлеу барысында ҚХА Аналар кеңесінің төрайымының м.у.а Аракси Плетнёва, кеңестің мүшелері Антонина Беляева мен Сабаход Кудайбергенова балаларға зиянды әдеттен аулақ болып, адамдармен дұрыс қарым-қатынас жасап, өзге этностармен де достықта өмір сүру керектігін айтты.

Іс-шара соңында А.Беляеваның орындауындағы «Я люблю свою землю» және «Казачка» әндерін орындап, лагерь қатысушыларына көтеріңкі көңіл-күй сыйлады.

Алдағы уақытта «Жасыл сертификат» жобасы аясындағы іс-шаралар жалғасатын болады.

«Ақпараттық жұмыс және қоғаммен байланыс бөлімі»

ТАРАЗДА «ӘКЕ ЖӘНЕ ҰЛТ ТӘРБИЕСІ» ТАҚЫРЫБЫНДА ДӨҢГЕЛЕК ҮСТЕЛ ӨТТІ

/in /by

Әлемдік мәдениетте «Әкелер күні» 100 жылдан астам уақыт мерекеленеді. Бұл мереке маусым айының үшінші жексенбісінде әлемнің 30 елінде тойланады. Биыл «Әкелер күні» 18 маусымға сәйкес келеді. Осыған орай, «Аманат» партиясы Жамбыл облыстық филиалының ұйымдастыруымен «Бауыржантану» орталығында «Бақытты отбасы» партиялық жобасы аясында «Әке және ұлт тәрбиесі» атты дөңгелек үстелі өтті.

Аталмыш іс-шараға өңірлік ҚХА мүшелері қатысты.

Іс-шара барысында Жамбыл облысының «Вынхуа» этномәдени бірлестігінің Ақсақалдар кеңесінің төрағасы Идрис Юнусов бала тәрбиелеудегі әкенің рөлі жайында кеңінен айтып берді. Оның айтуынша, әке ең алдымен балаға дос,сырлас болуы қажет. Баламен тең дәрежеде сөйлесіп, оның ішкі сырына үңілгенде берілетін тәрбие де нәтижелі болмақ.

Сонымен бірге Жамбыл облыстық «Манас Ата» Қырғыз этномәдени бірлестігінің төрағасы Абзалбек Меңдібаевтың сөзінше тәрбиені әрбір әке өзінен бастауы керек. Себебі, бір әкенің тәрбиесін мың мектеп те бере алмасы анық. Сондықтан да саналы,өнегелі ұрпақ тәрбиелеуде әке тәрбиесінің маңызы зор.

Шара соңында «Аманат» партиясының облыстық мәслихаттағы депутаттық фракциясының мүшесі, облыстық қан орталығының директоры – Ғұлам Умаров бала тәрбиесіндегі өзінің тәжірибесімен бөлісіп,дөңгелек үстелді қорытындылады.

«Ақпараттық жұмыс және қоғаммен байланыс» бөлімі

АСҚАР ТАУЫМ,БИІГІМ!

/in /by

Әке-әрбір адам баласы үшін ыстық, жанға жақын, мағыналы да қастерлі ұғым.

Перзенттің өз әкесін қастерлеп,құрметтеп жақсы көруі-табиғаттан берілетін ұлы сезім.Ал менің әкеме деген сезімім сол ұлы сезімнен де басымырақ деп сеніммен айта аламын. Әкемді бәрінен биік тұтып, ерекше тұлға ретінде көремін.

Менің әкем Жамбыл педагогикалық институтының «Көркем сурет» факультетінде,  «бейнелеу, сызу» мамандығын тәмәмдаған.Әлемге танымал ең керемет суретшілер Микеланджело,Рафаэль Санти,Леонардо-да-Винчи болса, мен үшін өмірімнің теңдесіз суретшісі  – ол менің әкем дер едім.  Менің өмірімнің ең бір жарқын жақтары әкемнің қылқаламымен салынған десем артық болмас. Қаламыздағы Бауыржан Момышұлы атындағы Жеңіс саябағында орналасқан  Батырлар аллеясындағы Жамбылдық 48 батырдың есімін және осы өңірден майдан даласына аттанған 100 мыңнан астам ардагердің аты-жөнін мәрмәр тасқа қашап жазған  ол  – менің әкем Садырқұлов Марат Мұхамеджанұлы. Мәрмәр тасқа қашап жазып қана қоймай, тасқа сурет салып оны әрлеу деген ең қиын дүние болсада, әкемнің бұл еңбегін бірі білсе, бірі білмес. Алладан кейінгі шеберім, мен әкеммен мақтанамын.  Әлі есімде бала күнімізде әкем ешқандай өшіргіш пайдаланбай, кез-келген суретті бірден айнытпай салып беретін. Әкемнің бұл суретшілік қасиеті бойыма дарыдыма, әкемдей теңдесіз суретші болмасамда сурет салуға деген қабілетім мен махаббатым ерекше.

Менің әкем – отбасының  ар-намысын ең бірінші орынға қоятын адам. Сонымен қатар, бізді де отбасымыздың абыройына дақ түсірмеуге тәрбиеледі. Өз сөзінде:

«Кішкентай кезінде жақсы оқысаң, керемет маман иесі болсаң, халыққа пайдаң тисе, бізге содан асқан бақыт жоқ» -дейтін. Бойжетіп өсіп, тұрмыс құрған кезімде:

«Ұшқан ұяңның, болашақ отбасыңның да ұйытқысы әрі абыройы сен боласың» -деген сөздері өмірлік кеңестерге айналды. Әкемнің мінезі жайлы қанша жазсам да аздық  етеді. Ұйқасы келсе сөздердің, бір дастан жазуға жетеді.Менің әкем өте сабырлы, байсалды кісі. Ес білгелі анама,бауырларыма дауыс көтеріп сөйлегенін мүлдем естіген емеспін.  Мен қанша жазғанмен де, әкемді толықтай суреттей алмаспын. Өйткені, әке де ана сияқты ұлы, оның қадір-қасиетін сөзбен айтып жеткізу мүмкін емес. Менің мақсатым-әкемнің көз алдында мақтаныш сезімін көру. Сондықтан да өскелең ұрпаққа айтарым- әкеміздің барына шүкір ете білейік!

Бізде бар әке, басқада жоқ болуы мүмкін.Әкелерімізді қадірлейік!

«Қоғамдық келісім» КММ Мәдени-көпшілік іс-шараларды ұйымдастыру бөлімінің мәдени іс-шара ұйымдастырушысы Гүлбала Мұхамеджан.

Page 1 of 3
1 2 3