Archive for month: March, 2023

2023 жылдың 30 наурызында Тараз қаласында «Қоғамдық келісім» КММ-де Жамбыл облысы әкімінің орынбасары Еркін Үйсімбаевтың қатысуымен Жамбыл облысы ҚХА Кеңесі мен Ақсақалдар кеңесінің отырысы өтті. Оған жоғарыда аталған Кеңестердің, Жамбыл облыстық «Ассамблея жастары» қоғамдық бірлестігінің өкілдері қатысты.

Іс-шара модераторы Еркін Үйсімбаев отырыстың күн тәртібіндегі бірқатар мәселелерге тоқталды. Нақтырақ айтқанда:

1.Өңірлік ҚХА Ақсақалдар кеңесінің төрағасы мен құрамын бекіту және жұмыс жоспарларымен танысу;

2. Облыстық ҚХА кеңесінің құрамына өзгерістер енгізу;

3.Өңірлік ҚХА-ның 2023 жылға арналған жоспары;

4.2023 жылы 26-27 сәуірде өтетін ҚХА-ның XXIII сессиясына дайындық барысы туралы .

Сұрақтарға көшпес бұрын модератор Ақсақалдар кеңесінің құрылу алғышарттары мен тарихына тоқталып, 2022 жылғы 25 қарашада өткен ҚХА Кеңесінің отырысында нақты шешім қабылданғанын, консультативтік-кеңесші орган ретінде ҚХА Ақсақалдар кеңесі құрылғаны жайлы сөз қозғады.

Жиын барысында Жамбыл облысы әкімдігі ішкі саясат басқармасының «Қоғамдық келісім» КММ басшысы Жинақбаева Мүбарак Қасымқызы сөз сөйлеп, Жамбыл облыстық ҚХА Ақсақалдар кеңесінің төрағасы мен өкілдерін сайлауға үміткерлер тізімін жариялады.

Бұдан соң, дауыс беру арқылы Ақсақалдар кеңесінің төрағасы сайланып, осы Кеңестің құрамы бекітіліп, жұмыс жоспарымен таныстырылып, алдағы жоспарлар белгіленді.

Келесі сөздің кезегі өңірлік ҚХА кеңесінің құрамы мен қызметіне қатысты мәселелер бойынша Жамбыл облысы әкімдігінің ішкі саясат басқармасы басшысының орынбасары, облыстық ҚХА хатшылығының меңгерушісі Сержан Қуанышовқа берілді.

Жиын соңында қатысушылар түрлі сауалдар қойып, тұшымды жауаптар алды. Сондай-ақ, пікірлер мен ұсыныстар да тыңдалды.

Ақпараттық жұмыс және қоғаммен байланыс бөлімі

Наурыз мерекесі – жалпы түркі халықтарының мерекесі, ұрпақтар жалғасы мен рухани қазына болып табылады. Бұл мереке ел бірлігіне, тыныштығына ықпал етеді. Күн мен түннің теңеліп, жан-дүниені тірілтіп, шаруаның бір малы екеу болып, арқа-басы кеңіп, аққа аузы тиген, қыстың ызғарынан құтылып, алдағы шуақты күндерден үміттендірген Наурыз мерекесі де келіп кетті.

Ағымдағы жылдың наурыз айында Жамбыл облысы әкімдігінің «Жұмыспен қамтуды үйлестіру және әлеуметтік бағдарламалар» басқармасының тапсырысы бойынша, бас бостандығынан айыру мекемелерінен босаған адамдарға арналып, Ұлыстың ұлы күні — Наурыз мерекесі атап өтілді. Мереке Жамбыл облысы бойынша қылмыстық-атқару жүйесі департаменті мен «Жаңа шабыт» республикалық қоғамдық бірлестігі арасындағы меморандум негізінде ұйымдастырылды.

Бас бостандығынан айыру мекемелерінен босаған адамдармен прокуратура және Тараз қалалық №1,2,3 пробация бөлімінің қызметкерлері Наурыз мерекесімен құттықтап, құқықтық түсіндірме жұмыстарын жүргізді. Кездесу барысында сотталғандарға жаза өтеу барысында пробация қызметімен белгіленген тәртіп бойынша сот жүктеген міндеттерді сақтап, заң талаптарын орындауға шақырды.

Сонымен қатар, «Жаңа шабыт» республикалық қоғамдық бірлестігінің мамандары пробация есебіндегі мұқтаж азаматтарға әлеуметтік-құқықтық, психологиялық  көмек, жұмыссыз адамдарды жұмысқа орналастыру бағытында тиісті көмектерді көрсететіндігін жеткізді.

Кездесу барысында, Наурыз мерекесі өтіп кетсе де, әлеуметтік-мәдени қызметтерді ұсыну мақсатында, концерттік бағдарлама ұйымдастырылып, жұртшылыққа қазақтың күйлері мен әуендері шырқалды. Осыған қоса, іс-шараға қатысушыларға тары, арпа, бидай, бұршақ, күріш сияқты жеті түрлі дән мен ақ қосылған Наурыз көже таратылды. Сол жерде қазанға пісірілген ыстық палау мен бауырсақтар, тәттілер үлестірілді, ыстық шай берілді.

Алдағы уақытта осы меморандум аясында пробация есебінде тұрған азаматтарды спорттық шараларға тартып, әр-түрлі көмек түрлері көрсетілетін болады.

Ұлыс оң болсын, ақ мол болсын, ағайын!

Талғат Ахымбетов,  

«Жаңа шабыт» республикалық

қоғамдық бірлестігінің төрағасы

2023 жылғы 23 наурызда Жамбыл облысы Талас ауданы  «Қасқабұлақ» ауылында мешіт ашылды. Іс-шарада өңірлік ҚХА төрағасының Қоғамдық орынбасары Жалил Аббосов, Жамбыл облысы әкімдігі ІІБ “Қоғамдық келісім” КММ басшысы Мүбарак Жинақбаева, этномәдени бірлестіктердің басшылары мен өкілдері, Жамбыл облысындағы ҚР күрдтердің “Барбанг” қауымдастығы Өңірлік ҚБ филиалы ақсақалдар кеңесінің мүшелері қатысты.

Мешіттің ашылу салтанатына арналып, іс-шарада кілем сыйға тартылды.

«Қоғамдық келісім» КММ Ақпараттық жұмыс және қоғаммен байланыс бөлімі

Тарихи тамыры тереңге бойлаған әз-Наурыз ежелден ырыс пен ынтымақтың мерекесі болып келген. Тек адамзат қана емес, табиғаттың да жасарып, бой түзейтін шағы –Ұлыстың ұлы күнінің барлық қазақстандықтар үшін жолы да, жөні де бөлек. Наурыз мейрамы күн мен түннің теңескен күні тойланады. Бірлік, бейбітшілік пен көктемгі жаңаруды бейнелейтін мереке әрбір қазақстандықтың жаңа Қазақстанды дамыту бағдарында кемел жол ашады және қоғамдағы бейбітшілікті, достық пен келісімді нығайтуда маңызды рөл атқарады.

Осыған орай, бүгін, «Шахристан» этно-мәдени кешенінен басталған «Қош келдің, Әз Наурыз!» атты мәдени-көпшілік іс-шара әдеттегідей жылдағы дәстүр бойынша облыс әкімінің қатысуымен көне тарихымыздан сыр шертер Тараз шаһарында ойдағыдай аталып өтті. Жиналған қауымды облыс әкімі Нұржігітов Нұржан Молдиярұлы құттықтады.

Іс-шараға облыстық ҚХА мүшелері мен этномәдени бірлестік өкілдері, Жамбыл облысы әкімдігі ішкі саясат басқармасы қызметкерлері, «Қоғамдық келісім» мекемесінің қызметкерлері, қала тұрғындары мен қонақтары және облыстық БАҚ өкілдері қатысты.

Мереке қонақтары концерттік бағдарламаны тамашалады.

Балалар мен жастар алтыбақанда тербеліп, көпшілік түрлі қызықты спорттық және ұлттық ойындардан жарыстарға да қатысты. Атап айтқанда «Тоғызқұмалақ» , «Асық ату» , «Қазақша күрес» сынды ұлттық ойындарға жастар тарапы зор белсенділік көрсетті.

«Шахристан» орталығында жағалай, дәстүрлі түрде қалалық және облыстық маңызды ұйымдардан қаз-қатар боп тізіліп, сәнділігімен көз тартар аппақ киіз үйлер орын алды. Әрбір киіз үйдің алдында мекемелердің даярлаған шағын театрландырылған көрінісі көпшілікке ұсынылып, салт-дәстүрлерден үзінділер көрсетілді.

Сонымен бірге, жиынға келген жұрт назарына киіз үй ішінде қазақ халқының және басқа да этностардың ұлттық көрмесі ұйымдастырылды.

«Наурыз» күнін мерекелеудегі басты мақсат – түркі халықтарының салт-дәстүрін құрмет тұту, елде қоғамдық келісім мен жалпыұлттық бірлікті қамтамасыз ету, өскелең ұрпақты бір-біріне деген құрмет пен отансүйгіштікке тәрбиелеу, этносаралық қатынастарды сақтау, қазақ халқының салт-дәстүрлерін дәріптеу.

Қазақы Жаңа жылымыз – Наурыз мейрамы жаңару мен жаңғыру жолындағы Қазақстанымызға тыныштық пен құт-береке әкелсін!

«Қоғамдық келісім» КММ

Ақпараттық жұмыс және қоғаммен байланыс бөлімі

2023 жылдың 15 наурызында «Ассамблея бөбектері» жобасы аясында «Қоғамдық келісім» КММ Ақпараттық жұмыс және қоғаммен байланыс бөлімімен Тараз қалалық “Айнелёк” балабақшасында Наурыз мерекесіне арналған іс-шара өтті.

Іс-шараның мақсаты – жас ұрпаққа Наурыз мерекесінің мән-мағынасын түсіндіру,бүлдіршіндердің бойындағы патриоттық сезімді ояту,бірлік пен келісімді нығайту.

Аталмыш жоба өскелең ұрпақпен жұмыс істеуге бағытталғанын және облысымызда үшінші жыл жүзеге асырылып жатқанын айта кеткен жөн. Жамбыл облысы балаларды мектепке дейінгі жастан бастап отансүйгіштікке тәрбиелеуге бағытталған жұмыстарды алғашқылардың бірі болып жүзеге асырып келеді.

Жұмыс барысында балалардың қабылдауына қолжетімді ақпаратты жеткізу формасы таңдалды. Атап айтқанда, арнайы суреттер, ұлттық киімдер, ұлттық ойындар, танымдық анимациялық мультфильмдер көрсетіледі.

Бұл жолы бөбектерге Достық үйінің, ҚХА жұмысы туралы кеңінен айтылды.

Іс-шараға кішкентай қатысушылар тақпақ айтып, ұлттық ойындар ойнады. Сондай-ақ бауырсақтардың көрмесі қойылды.

«Қоғаммен байланыс» КММ

Ақпараттық жұмыс және қоғаммен байланыс бөлімі