Archive for month: June, 2021

Ағымдағы жылдың 28 маусымында қаламыздағы Достық үйінде Қазақстан халқы ассамблеясының «Тәуелсіздікке 30 жыл: бейбітшілік пен тұрақтылық кепілі» атты XXIV сессиясы өтті.

Дәстүрлі сессияның мақсаты – этносаралық келісім мен қоғамдағы бірлікті одан әрі нығайту үшін облыстық ҚХА-ның мемлекеттік органдармен және азаматтық қоғам институттарымен тиімді өзара іс-қимылын қамтамасыз ету болатын.

Сессияға облыс әкімі, аймақтық ассамблеяның төрағасы Бердібек Сапарбаев, облыстық ассамблеяның мүшелері, ардагерлері, Қоғамдық келісім кеңестерінің төрағалары мен мүшелері, діни бірлестіктер мен үкіметтік емес ұйымдарының басшылары, жоғары оқу орындарының ректорлары, басқарма басшылары, медиаторлар мен облыстық, қалалық бұқаралық ақпарат құралдарының өкілдері қатысты.

XXIV сессияның күн тәртібіне «Тәуелсіздікке 30 жыл: бейбітшілік пен тұрақтылық кепілі» негізінде қойылған мәселелер бойынша шешім қабылдау, Жамбыл облысы Қазақстан халқы ассамблеясының құрамын бекіту, облыстық ассамблея төрағасының Қоғамдық орынбасарын сайлау туралы мәселелер арқау болды.

Сессияға қатысушылар іс-шарада Достық үйіндегі ҚХА көрмесін аралап, ассамблея тарихынан сыр шертіп тұрған кітаптармен, сондай-ақ, этнос өкілдерінің ұлттық киімдері және ассамблея құрылымдарының іс-қимылдарымен танысты.

Жиын Жамбыл облысы Қазақстан халқы ассамблеясының төрағасы, облыс әкімі – Сапарбаев Бердібек Мәшбекұлының алғы сөзімен бастау алды. Аймақ басшысы облысмызды құтты мекен, құнарлы жеріне айналдырған этнос өкілдерін кезекті сессиямен құттықтап, күн тәртібінде қойылған бірқатар мәселелердің шешу жолдарына кірісті. Бірінші баяндама Ғылыми-сараптамалық қолдау бөлімінің бас сарапшысы Альбина Тапаеваның еншісіне тиді. Ол өзінің «Жастар арасында ұлттық құндылық процестерін дамыту және насихаттау маңыздылығы» атты өз баяндамасында: – Мен өз сөзімді жақсы жаңалықпен бастағым келіп отыр. ҚХА жанындағы ғылыми-сараптамалық тобының мүшесі Рысты Керимбаева Ақпарат және Қоғамдық даму министірлігінің «Ұлттық тәрбие» байқауында мектеп жасына дейінгі балаларға арналған ұлттық ойын макеті жобасымен 4миллиондық грант иегері болды»,-деп атап өтті. Бұдан өзге бас сарапшы ұлттық ойын макетінің қазіргі кездің өзінде бірнеше бала-бақшада қолданыста екенін атап өтті.

Сессияда Жуалы ауданындағы ҚХА меценаты Тейгран Аллахвердиев те «Мен – Тәуелсіздік құрдасымын!» атты өз баяндамасын жасады. Жас меценат «Менің арманым орындалды. Мен құрылысшы болуды армандап ем, қазіргі уақытта құрылыс компаниясының директорымын. Менің басшылығыммен Жуалы және Шу аудандарында күн электр станциялары салынғанын мақтан тұтамын. Мұның бәрі Тәуелсіздіктің арқасында. Бұл еліміздің сындарлы саясатының арқасында. Еліміздің татулығы мен бірлігінің арқасында» – деді. Тейгран Валановичтың бұл баяндамасынан кейін аймақ басшысы Бердібек Мәшбекұлы Шу және Жуалы аудандарындағы күн электр станциясы тынымсыз еңбектің арқасында жүзеге асқанын алға тартып, алғысын айтты.

Бұдан өзге XXIV сессияда облыстық ҚХА Қоғамдық келісім кеңесінің төрағасы Бигелді Тәжібаев, Облыстық ҚХА «Жаңғыру Жолы» жастар қозғалысының мүшесі – Риналь Рахматуллин, Жамбыл облысы ҚХА төрағасының қоғамдық орынбасары- Юрий Минаков және Жамбыл облысы «Өзбек ұлттық мәдени орталығы» қоғамдық бірлестігінің мүшесі Диляфруз Кенжеханова сөз сөйледі.

Күн тәртібіне сай келесі мәселелер ХХІV сессиясы бойынша Қазақстан Республикасының Тұңғыш Президенті – Елбасының Қазақстан халқы Ассамблеясының 2021 жылғы 28 сәуірдегі ХХІХ сессиясында берген тапсырмаларын іске асыруға сәйкес шешім қабылдау, Жамбыл облысы Қазақстан халқы ассамблеясының құрамын бекіту және облыстық ассамблея төрағасының қоғамдық орынбасарын сайлау туралы мәселелер болатын.

Шешім бойынша облыс әкімі Б.Сапарбаев Жамбыл облысы Қазақстан халқы ассамблеясының мүшелерімен Тараз қаласының және Жамбыл облысы аудандарының білім, мәдениет, тілдер басқармалары және әкімдіктерімен бірлесіп, Қазақстандық патриотизм, азаматтық тең құқылық, мемлекеттік тілдің біріктіретін рөлі, әралуандықтағы бірлік, ұлтты тұрақты жаңғырту ұстанымдарын ілгерілету жөнінде шаралар қабылдау; Тараз қаласының және Жамбыл облысы аудандарының әкімдіктері елдегі этносаралық келісімге нұқсан келтіретін қарсы іс-қимылдардың алдын-алудың пәрменді институты ретінде Қазақстан халқы Ассамблеясы қызметінің тиімділігін қамтамасыз ету; Тараз қаласының және Жамбыл облысы аудандарының әкімдіктері өскелең ұрпақты қазақстандық патриотизм рухында тәрбиелеуге бағытталған алаңшалар ретінде Аналар кеңестері мен ассамблеяның Қоғамдық келісім кеңестерінің осы тұрғыда жұмыс істеуін қамтамасыз ету; жоғары азаматтық патриотизмнің үлгісі ретінде ҚХА қайырымдылық іс-шараларын өткізуді жалғастыру; Тараз қаласының және Жамбыл облысы аудандарының әкімдіктері этномәдени бірлестіктерінің жұмыстарына қолдау көрсетсін, сондай-ақ олардың материалдық-техникалық базасын нығайту, мемлекеттік жастар саясатын тиімді іске асыру мақсатында Жамбыл облысы әкімдігінің ішкі саясат басқармасының «Қоғамдық келісім» КММ мен облыс әкімдігінің жастар саясаты басқармасы, «НұрОтан» партиясы, білім басқармасы, облыстың жоғары оқу орындары арасында жалпыұлттық бірлікке қатысты мәселелерді бірге шешу, Жамбыл облысының полиэтникалық ортасында толерантты мінез-құлық дағдыларын және мәдениетаралық достық диалогын дарыту үшін бірлескен ынтымақтастық туралы Меморандумға қол қою сынды біршама шараларды алға қойды.

Осыған қоса, Жамбыл облысы ҚХА төрағасының Қоғамдық орынбасары қызметіне Қазақстан Республикасы күрдтердің «Барбанг» қауымдастығы республикалық Қоғамдық бірлестігінің Жамбыл облысындағы филиалының төрағасы Латиф Айдаров тағайындалды.

Жиын соңында облыстық ассамблеяның бірқатар мүшелері мен этномәдени бірлестік өкілдері, «Қоғамдық келісім» КММ қызметкерлері облыс әкімінің арнайы алғыс хаттарымен марапатталды.

Жамбыл облысы әкімдігінің

ІСБ «Қоғамдық келісім» КММ

Баспасөз қызметі орталығы

#24сессияАНК

Қазақ елі бостандыққа ұмтылысы мен өшпес қайсар рухының арқасында тәуелсіздікке қол жеткізді. Тәуелсіздік туын қолына ұстағанша қазақ батырлары да, ақындары да тыным таппады, табандылықпен небір “тар жол, тайғақ кешуден” өтіп, аянбай күресе білді. Осыған қатысты, ағымдағы жылдың 25-маусымы күні Жамбыл облысы әкімдігінің ішкі саясат басқармасының “Қоғамдық келісім” КММ ұйымдастыруымен

«Қазақстан Республикасы тәуелсіздігінің 30 жылдығы мен Ж.Жабаевтың 175 жылдығына арналған «Отаным – Қазақстан” атты концерттік бағдарлама ерекше серпінмен аталып өтті. Ашық аспан астында, қаламыздың қоңыр бір кешінде өтіп жатқан осынау демалыс концертіне “Көне Тараз” тарихи-мәдени кешенінде серуендеп жүрген қала тұрғындары мен қонақтары да назар аудармай қоймады. Концерттік бағдарлама көрермендер жиналғанша облысымыздың Жүсіп Баласағұн атындағы Филармонияның әншісі, “Мәдениет саласының үздігі” – Орынбаева Торғынның орындауында Е.Хасанғалиевтің ”Айналдым елім” әнімен басталды. Сонымен бірге филармония әншісі Ғани Мәтебаевтың “Дүнген қызы” әнімен жалғасып, өз тыңдаушыларын әсем дауысымен баурап әкетті. Неліктен “Дүнген қызы” әні шырқалды десеңіздер, аймақтық ассамблея мүшелері қатысқан ерекше кештің басты себепшісі – Идыбо Айша Люшировна бастаған облыстық “Вынхуа” дүнгендер этномәдени бірлестігінің шығармашылық тобы еді. Әсерлі кешіміздің шымылдығы дүнген баласы Курбанов Байрамның орындауында қазақтың қара домбырасынан төгілген қазақ күйімен ашылды. Дүнген жастарының шығармашылық тобын қолдау мақсатында Орталық Азиядағы жалғыз дүнген халықтық-этнографиялық фольклорлық ансамблі, дүнген өнерінің шыңы – “Шунтян” (Весна) өнер көрсетті. Бұдан өзге, өнерлі дүнген жастарының орындауында – Лидинцай Раянаның “Желсіз түнде жарық ай” әні, Сава Хакимнің «Атамекен» әні, кішкентай бүлдіршін бишілердің «Қолшатыр «биі, Дулазова Камила мен қалалық №34-орта мектебі биші қыздарының орындауында “Вади щинэ”, “Фантазия” билері, Манезова Алинаның “Сен менің жүрегімдесің» , “Ертегілер елінде” әндері, Мусаров Рашид пен Чива Закирдың “Думин гуннен” әні орындалды.

Дүнген халқының қазақтың әсем әндерін, өз этносының сарынды әуендері мен билерін нақышына келтіріп орындап, ашық түсті маталардан тігілген көз тартар ұлттық киімдерімен өнер көрсетуі жиылған жұрт көңіліне ерекше әсер етті. Алдағы уақытта да осындай концерттік бағдарламадан тұратын аймақтық ассамблеяның жағымды кештері жалғасын таппақ.

Жамбыл облысы әкімдігінің ішкі саясат

басқармасының “Қоғамдық келісім”

Баспасөз қызметі орталығы

#ҚРтәуелсіздігіне30жыл

#Жамбыл175

Жамбыл облысы БАҚ қызметкерлері арасында 28-маусым байланыс және ақпарат қызметкерлерінің төл мерекесіне орай, ағымдағы жылдың маусым айында «Бір шаңырақ астында» облыстық байқауы жарияланып, жеңімпаздары анықталды.

Қаламын қасына серік еткен журналистерге арналған байқаудың негізгі мақсаты – этносаралық татулықты насихаттауда мемлекеттік саясаттың мәні мен мазмұнына тоқталу, ауызбіршілікті дәріптеу, сонымен қатар ұлттың болмысын аңғартатын дәстүрлердің озық үлгісін көрсету болатын.

Сайысқа республикалық, облыстық, қалалық, аудандық бұқаралық ақпарат құралдары қызметкерлерінен жиылған жалпы саны 30-ға жуық үміткердің жұмыстары қабылданды. Байқауға қатысқан журналистер түрлі ұлт өкілдерінің арасындағы мызғымас бейбітшілікті, еліміздің сындарлы саясатын насихаттаудағы еңбектерімен сынға түсті.

Байқау комиссиясы қарауына ұсынылған материалдар ереже талаптарына сәйкес іріктеліп, үміткерлердің жұмыс істеу тәжірибесі, материалдың маңыздылығы, мазмұндылығы, оны ұсыну тәсілі назарға алынды.

Мәресіне жеткен журналистер клубының марапаттау рәсімі Жамбыл облысы әкімдігінің ІСБ «Қоғамдық келісім» КММ басшысы Парида Мамедованың алғы сөзімен басталды. Мекеме басшысы журналистерді төл мерекесімен құттықтап, облыстық ассамблеяның жарықтандыру жұмысына сүбелі үлес қосқан БАҚ өкілдеріне алғысын білдірді.

Байқау ережесіне сай бәсекеге түскен журналистер жұмысы арнайы бекітілген әділқазылар алқасының шешімімен дәрежелі орындары және ынталандыру сыйлықтарымен марапатталды. Қорытындыға сай 1-орын, 150 000 теңге ақшалай сыйлыққа республикалық «Казахстанская правда» газетінің меншікті тілшісі Михаил Тё, 2-орын, 100 000 теңге ақшалай сыйлыққа облыстық «Jambyl.tv» телеарнасының редакторы Аружан Махсатқызы, 3-орын, 50 000 теңге сыйлыққа облыстық «Ақжол» газетінің Шу ауданындағы меншікті тілшісі Ерғали Қартайған ие болды. 30-ға жуық журналист бақ сынасқан бәсекенің қалған қатысушылары түгелдей қаржылай және ынталандыру сыйлықтарын иеленді.

Дәстүрге айналған бәсеке келер жылы да өз жалғасын табатын болады.

Іс-шара соңы фотосессиямен аяқталды.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз қызметі орталығы

Қордайда «Этникалық топтардың құқықтарын қорғаудағы қоғам белсенділерінің рөлі» тақырыбында дөңгелек үстел ұйымдастырылды

Үстіміздегі жылдың маусым айында Жамбыл облысының Қордай ауданы Қордай ауылында Жамбыл облысы әкімдігінің ішкі саясат басқармасының «Қоғамдық келісім» КММ басшысы Парида Мамедованың ұйымдастыруымен «Этникалық топтардың құқықтарын қорғаудағы қоғам белсенділерінің рөлі» атты дөңгелек үстел өтті.

Дөңгел үстелге Жамбыл облысының зиялы қауым өкілдері, этномәдени бірлестіктер мен үкіметтік емес ұйымдардың жетекшілері және БАҚ өкілдері қатысты.

Жиынның басты мақсаты Жамбыл облысында этносаралық және конфессияаралық келісімді күшейту мақсатында атқарылған жұмыстар барысын этномәдени және діни бірлестіктермен бірге талқылап, олардың ұсыныс-пікірлерін тыңдау болып табылады.

Облысымыздың құрметті журналисті, республикаға белгілі БАҚ өкілі Бекет Момынқұловтың модераторлық етуімен өткен дөңгелек үстелде Қордай аудандық Бірлескен қоғамдық келісім кеңесінің төрағасы Әбдібек Сейілханов ұлтаралық қатынасты жақсарту мақсатында ауданда атқарылып жатқан жұмыстарға талдау туралы сөз сөйледі. Спикердің айтуы бойынша, аудандық орталық мешіт қызметкерлерінің ұлтаралық қатынасты жақсарту мақсатындағы атқарған жұмыстары аз емес. Мектептерде қазақ тілінде оқытылатын сыныптардың ашылуы, өзге ұлт өкілдерінің әскерге шақырылуы және ұлтаралық қатынастың жақсартылуы мақсатында әр ауылдың ақсақалдар алқасымен бірлесіп, кестеге сай атқарылып жатқан жұмыс жүйесі тілге тиек етілді.

Сондай-ақ, жиын барысында сөз алған «Тараз қаласының Өзбек этномәдени орталығы» қоғамдық бірлестігінің төрағасы Абдрахман Зайнутдинов Ассамблея жұмысын жандандыру үшін ең алдымен бала тәрбиесінен бастау керектігін айтты. Абдрахман Юлдашұлы: – «Қоғамдағы бейбітшілікті сақтағымыз келсе балаға сол қоғамда өмір сүру жүйесін үйретуіміз керек. Елімізде тұратын барлық этнос болмасын бір-бірімізге бауыр екенін көрсетуіміз қажет. Ал бауырлардың арасында ешқашан дау тумайды» – деді өз сөзінде.

Дөңгелек үстел барысында «Алға» ауылдық округіне ортақ қоғамдық келісім кеңесінің төрағасы Мықтыбек Алтыбай қоғамдық жұмыс белсенділері бірігіп облыс жастарымен кездесіп ұлтаралық қатынасты нығайта түсу үшін түсіндіру жұмыстарын жүргізу керектігін айтып, ұсынысын алға тартты. Сонымен қатар, жиынға қатысқан облыс мәслихатының депутаты Лугмар Буларов этникалық топтар арасында қазақ халқының салт-дәстүрі, әдет-ғұрыптарын кеңінен насихаттауды ұсынды.

Дөңгелек үстел соңында бұдан өзге де айтылған ұсыныстар талқыға түсіп, ескертулер назарға алынды. – Біз мұнда айтылған дана шешімдердің іс жүзінде орындалуына басты назар аударуымыз керек. Мен бүгін сіздермен бас қосып, осындай ел игілігіне қатысты келелі мәселелерді талқылап, ұсыныс-пікірлеріңізді ортаға салған тиімді диалогқа қатысқандарыңызға өте қуаныштымын. Барлықтарыңыздың ара-қатынастарыңызда, отбастарыңызда өзара түсіністік, жайлылық орнап, бір-бірлеріңізге деген сыйластықтық пен толернаттылық сезімдеріңіз арта берсін! – деп іс-шараны қорытындылады Парида Иманжанқызы.

Сондай-ақ, халықаралық қоғамдастықтар өкілдерінің қатысуымен өтетін жергілікті қоғам белсенділерінің алдағы жиналысы туралы мәселе қаралды.

Жамбыл облысы әкімдігінің ішкі саясат

басқармасының «Қоғамдық келісім» КММ

Баспасөз қызметі орталығы

#ҚРтәуелсіздігіне30жыл