Archive for month: November, 2020

Ағымдағы жылдың қарашасында Тараз қаласындағы Достық үйінде «Әулие Ата» қазақ мәдени орталығы» қоғамдық бірлестігі мәдениет күнін өткізді.

Іс-шара «Бэл-Арт» би ансамбілінің биімен басталып, Ішкі саясат басқармасы «Қоғамдық келісім» КММ басшысы Рано Убайдуллаеваның құттықтау сөзімен жалғасты. Рано Махсұдқызы өз сөзінде Қазақстандық бірегейлік пен келісім туралы сөз қозғап, мәдени орталықтын жұмысына баға беріп, алғысын білдіре отырып, орталықтың белсенділеріне алғыс хаттар табыстады.

Орталықтың белсендісі Бегімбетов Заман Ұлы Абайдың 175 жылдығына орай «Айттым сәлем, Қаламқас» әнін сарынына келтіріп орындап көпшіліктің құрметіне бөленді.

Сонымен қатар, мәдени орталықтың төраға орынбасары Кабиева Айгүл Кабиқызы атқарылған жұмыстар туралы есеп бере отырып, жастар қанатының белсенді мүшелеріне алғыс хаттар табыстады. – Қазақстандағы этносаралық қатынастардың әлемдік қауымдастық тарапынан бағалануы, ең алдымен, қазақ ұлтының еншісінде екендігі айқын. Осы тұрғыда ұлтымыздың тілін, ұлттық мәдениетін, құндылығын, ерекшелігін сақтау, өзге ұлт өкілдеріне дәріптеу мақсатын ұстанған «Әулие Ата» қазақ мәдени орталығының рөлі зор. Мәдени орталық көне Тараз жеріндегі қазақ халқын ортақ мақсатқа ұйыстыра отырып, облысымыздағы тұрақтылықты сақтау мен дамуына айтулы үлес қосып отыр. Бүгінгі күнге дейін бірнеше баспалдақтан көтеріліп, бірталай белестерді бағындырған мәдени орталық өз қызметін облыстағы, республикадағы ұлттық орталықтармен тығыз қарым-қатынаста жүргізуде. Белсенді қызметтің, атқарылған іс-шаралардың мақсаты – өзге ұлт өкілдеріне ұлттық құндылықтарымызды таныту, ұлтаралық қатынасты нығайтып, ынтымағымыз бен бірлігімізді арттырып, егеменді еліміздің мәртебесін көтеру, ел болашағы – жастарға халқымыздың тілін, ділін, ежелден келе жатқан салт-дәстүрін, тарихын, мәдениетін, ұлттық өнерін насихаттап үйрету, бойына сіңіруге, дамытуға септігін тигізу, – деп атап көрсетті бірлестік мүшесі Айгүл Кабиева.

Іс-шара соңында бірлестіктің жас әншісі Тұрсынбек Диана көрермендерге арнап «Аяулым» әнін орындады.

Қазақ мәдени бірлестігі облыста өткізілетін этносаралық қарым-қатынасты нығайтуға, халықтар достығын дамытуға бағытталған барлық іс-шараларға белсенді қатысатындықтан, дәстүрлі тілде өткізілетін бұл мәдениет және өнер күні халықтардың достығы мен бірлігін бекітіп, серіктестікті кеңейте түсері сөзсіз.

Жамбыл облыстық әкімдігі

ішкі саясат басқармасының

«Қоғамдық келісім» КММ

Баспасөз орталығы

Өзі ақын, өзі дана, қазақтың ортақ мақтанышына айналған халқымыздың ұлы перзенті, ақын, философ Абай Құнанбайұлының туғанына 175 жыл толуына орай, мемлекет көлемінде және халықаралық деңгейде, соның ішінде осы өзіміздің облыстық ассамблея аясында «Абай 175» челленджі, «Абай мұраларын насихаттау» сияқты ауқымды іс-шаралар өткізілді.

Абай өз ғұмырының ақырына дейін қазақ балаларын оқуға, білім-ғылыммен айналысуға, рухани дамуға және әлемдік мәдениеттің құндылықтарын бойға жинауға шақырғанын білеміз. Дана ақын келер ұрпақты, яғни бізді – «жүрегімнің қуаты, перзенттерім» деп бағалаған. Айтылған сөз, жазылған жауһар ойлар бірінші кезекте бізге – қазақ елі жастарына бағытталады.

Жат мінез-құлықтан аулақ болудың нақты жолдарын меңзейді. «Күллі адам баласын қор қылатын үш нәрсе бар. Сонан қашпақ керек: Әуелі – надандық, екінші – еріншектік, үшінші – залымдық» – деп толғайды ұлы ғұлама.

Ұлы дала философы және ағартушысының өмірден озғанына ғасырдан астам уақыт өтсе де, оның бейнесі туған халқына, туған ұлтына жақындай түсуде.

Абай атамыз жөнінде Қазақстан Республикасының Президенті Қасым-Жомарт Тоқаев та, «Абай және ХХІ ғасырдағы Қазақстан» мақаласында айтып өткендей: «Абайды білу – өзіңді тану. Өзін-өзі тану және адамның тұрақты дамуы, ғылым мен білімнің басымдығы – жетілудің көрінісі»- деп атап көрсетті. Абай шығармашылығы тек қазақ халқының ғана мұрасы емес, шетелдіктердің де, бұған қоса, қазақ елінде тұрып жатқан өзге ұлт өкілдерінің де мақтанышы. Қазақ елін Абай арқылы тани түсіп, ақынның жырлары арқылы бағалайды.

Ұлы бабамыз замана атты ұлы күштің, халқының бүгіні мен ертеңіне, болашағына – бізге жас ұрпаққа алаңдады. Ол сонау өз заманында-ақ, туған халқын қараңғылықтың бұғауын бұзып, жарқын күндердің шуағына бөленетін жолдарды іздестіріп, тіршілік мақсаты мен мұраты ілім мен ғылымда деген берік тоқтамға келді.

Сондықтан да болар, біздің өңірлік ассамблеяның «Жаңғыру жолы» жастары қозғалысының әрбір мүшесі өздері оқып жүрген – мектеп, колледждегі, жоғарғы оқу орындарында, сонымен бірге облыстық ассамблеямыздың білім-тәрбиесімен Абайдың шығармашылығын тереңірек зерттеп, өзі үшін өмірлік маңызды бағыт-бағдарды таба білуде.

Солардың бірі өзім бола тұра, Жамбыл облыстық әкімдігінің «Қоғамдық келісім» мекемесінің қабырғасында жүріп, оның тәлім-тәрбиесінің арқасында жуық арада – ағымдағы жылдың қазан айында Қазақстан халқы Ассамблеясы ұйымдастыруымен Нұр-Сұлтан қаласында өткен «Ұлы даланың ұлтаралық тілі» форумына онлайн түрде қатыстым. Облыстық көлемде өзге ұлттар арасында өткен «Жамбыл жырлары» байқауында үздік өнер көрсеткенім үшін марапатталдым. Бұған қоса, «Жаңғыру жолы» жастар қозғалысының

қайырымдылық іс-шараларына белсене араласып, Абай мұраларын жастар арасында насихаттауда ол кісінің шығармаларын зор ниетпен өзімше зерттеп-оқып, мемлекеттік тіл мәртебесін көтеруде, сондай-ақ, дүнген ұлтының салт-дәстүрін жаңғыртуда да шамам келгенше өз үлесімді қосып жүрмін.

«Ұлы даланың ұлтаралық тілі» форумына қатыса отырып, мемлекеттік тілді еркін меңгерген жерлестеріме, әрі ұстазыма (№34-орта мектептің директоры Динара Нұралиева ) оның ішінде жастарға үлгі боларлық Динара Нұралиева, Виктория Трегубоваға, өзге облыстардың да басқа ұлт өкілдеріне қазақ тілін білудегі ықыластарына риза болдым, оларға деген өз қызығушылығымды жасырмаймын! Кішкентайымнан қазақ тілін білуге деген құштарлығым мені талай армандарға жетеледі.

«Өзге тілдің бәрін біл, өз тіліңді құрметте!» деп Қадыр Мырзалиев ағамыз айтқандай, өзімнің туған тілім дүнген тілімен қоса, қазақ тілін де өзімнің ана тілімдей көремін! Кішкентай кезімнен мемлекеттік тілге деген сүйіспеншілігімді көрген ата-анам мені қазақ сыныбына берген еді. Қазіргі кезде сол ата-анама және мектеп мұғалімдеріне алғысымды айта отырып, қазақ тілін жетік меңгеретінімді мақтан етемін! Мемлекеттік тілдің болашағы біздің – жастардың қолында! Сондықтан, тілдің дамуына барлық өзге ұлт өкілдері бір адамдай ат салысайық!

Қорыта келгенде:

Күллі адам өзгерер, Алла өзгермес,

Адал кітап бұл сөзді бекер демес.

Адам нәпсі, өзімшіл мінезбенен,

Бос сөзбенен қастаспай түзу келмес!

Махаббатпен жаратқан адамзатты,

Сен де сүй ол Жаратканды жаннан тәтті, Адамзаттың бәрін сүй бауырым деп,

Және адал жолы осы – әділетті! – деп айтып кеткендей, ғұлама Абай атамыздың осы өсиетті сөздерін үлкен, кіші де жадымыздан шығармасақ, Қазақ елінде бейбітшілік пен келісім өз жарасымын да, жалғасын да табары сөзсіз!

Жамбыл облыстық ҚХА

«Жаңғыру жолы» жастар қозғалысының мүшесі,

«Вынхуа» дүнген ассоциациясының жас өкілі

Амина Курбанова

Ел Президенті Қазақстан халқына арнаған Жолдауында ел экономикасын қалпына келтіру, саяси және әлеуметтік-экономикалық салалардағы реформаларды жалғастыру мәселелеріне тоқталды. Қоғамда көптен бері талқыланып келе жатқан жерге байланысты жеріміздің шетелдіктерге сатылмайтынын мәлімдеп, ел Үкіметіне ауыл шаруашылығы жерлерін экономикалық айналымға енгізудің әдіс-тәсілдерін әзірлеу бойынша нақты тапсырма берді.

Президент Қасым-Жомарт Тоқаев өз Жолдауында еліміздің дағдарыстан кейінгі кезеңдегі басты даму мақсаттары жайында, сондай-ақ, пандемия мемлекет үшін сынақ кезеңі болғаны жайлы сөз қозғап, еліміздегі ахуалдың жақсаруы босаңсуға себеп болмауы тиіс екенін айтты.

Маңызды құжатта халықтың әл-ауқатын көтеру, еңбекпен қамту, баспанамен қамтамасыз ету, жемқорлықпен күресу, электронды қарым -қатынасты арттыру, ауыл шаруашылықты субсидияландыру, өнеркәсіпті дамыту жолдары белгіленіп, көлеңкелі бизнестің және кредит алудың заңсыз жолдарын ауыздықтау керектігі туралы Үкіметке тапсырмалар берілді.

Сонымен қатар, Қазақстан халқы Ассамблеясының басты бағыттарының бірі қоғамдық келісімді нығайту мәселесі де Жолдаудың назарынан тыс қалмады.

Елдің қуаты бірлікте. «Татулық – табылмас бақыт», «Бірлік – түбі тірлік», «Күш – бірлікте», «Ырыс алды – ынтымақ» – деп халқымыз тектен-тек айтпаса керек. Абай атамыз: «Татулықтан артық жолдас жоқ» деген. Елбасы Нұрсұлтан Әбішұлы Назарбаевтың: «Қазақ халқы сан ғасырлар бойы өзінің егемендігі мен тәуелсіздігі үшін күресіп келді. Өзінің ең жақсы қасиеттерінің: қатер төнген сәтте бірігіп, ұйымдаса білуінің, сондай-ақ басқа халықтармен бейбітшілік, келісім мен тату көршілік жағдайында тұруға деген ынта-ықыласының арқасында ол тарих тасқынының астында қалып қоймай, өзінің мемлекеттігін қалпына келтіре алды», – деген сөзі өткені мен бүгінгі тарихымызды ұштастырып отыр.

Бір шаңырақтың астында топтасқан, достығы берік, ынтымағы жарасқан тәуелсіз еліміздің басты байлығы – халықтар бірлігі мен достығы. Бірлік – тыныштығымыз бен бейбіт өміріміздің қорғаны. Тағдырдың жазуымен кең қазақ жерін мекен еткен, бүгінде ұрпақ өсіріп, ел игілігі жолында тер төгіп жатқан сан ұлт өкілдері киелі жерімізді өз Отаны санайды. Қоғамдық келісім мен бірліктің, татулықтың арқасында мемлекетіміз өркендеп, ілгері қадам басып келеді.

Ел басына күн туған қилы замандарда да халқымызды ұлт ретінде сақтап қалған ынтымағы мен бірлігі. Еліміз тәуелсіздігін алғанына 30 жыл толғалы отыр. Осы жылдар ішінде халқымыз талай қиындықтарды бастан өткеріп, толымды табыстарға қол жеткізді, биіктерді бағындырды. Дүние жүзіне бейбітшілік пен келісімнің, сенім мен тұрақтылықтың алтын бесігі ретінде танылдық. Кең байтақ Отанымызда өмір сүрген халықтар бақытты болашақтың, тұрақты дамудың тірегі ынтымақ пен бірлікте жатқандығын сезінуде.

Ата Заңымызда атап көрсетілгендей, кез келген ұлт өкілінің құқықтары тең. Конституцияның бірінші бабының өзінде басты құндылық ретінде адам, оның өмірі мен еркіндігі атап көрсетілген. Бүгінде әрбір ұлтқа салт-дәстүрлерін жаңғыртуға, мәдениеті мен әдебиетін дамытуға, тілінің жетілуіне қамқорлық көрсетілу жалғасуда.

Тарихы терең ауданымызда отыздан астам ұлт өкілдері бірлікті нығайтып, ынтымағы жарасқан қазақ елінің берекесін арттыруға өз үлестерін қосуда. Берекелі іске ұйыстырған бірлік пен ырысқа бастаған ынтымақты сақтауды естен шығармайды.

Қазір әлем үлкен өзгерістерді бастан кешіруде. Сол әлемнің бір бөлшегі ретінде Қазақстан осы үдерістерден тыс қала алмайтындығы белгілі. Сондықтан еліміздің әр азаматы өзгерістер мен жаһандық сын-қатерлерге лайықты төтеп беруі үшін ел бірлігі мен қоғамдық келісімді нығайтуға үлестерін қосуы қажет.

Ел бірлігі – оның әр алуандығында. Басты міндет – ел тәуелсіздігін баянды етіп, дамыған 30 елдің қатарына ену, «Мәңгілік Ел» идеясын іске асыру.

Оралов Қыдырәлі Дәнебайұлы

Байзақ аудандық Қоғамдық келісім кеңесінің төрағасы,

ауданның Құрметті азаматы

Ағымдағы жылдың қарашасында қалалық Мәдениет үйінде халқымыздың ұлы ақыны, жыр дүлдүлі, айтыс өнерінің дарабозы Жамбыл Жабаевтың шығармашылығын насихаттау мақсатында «Жамбыл жырлары» атты өзге ұлт өкілдері арасында ақынның өлең, жырларын мәнерлеп жатқа оқу байқауының облыстық іріктеу кезеңі өтті.Қазан айында бастау алған байқау бұған дейін Жамбыл облысының 10 ауданы мен Тараз қаласында өткізіліп, іріктеу кезеңіне қатысқан 70-тен астам үміткердің 17-сі облыстық байқауға жолдама алған. Олардың ішінде өзбек, моңғол, орыс, ұйғыр, шешен, татар, болгар, қарашай, қырғыз, күрді, дүнген, әзербайжан, кәріс ұлттарының өкілдері бар.

«Рухани жаңғыру» бағдарламасы аясында ұйымдастырылған бұл іс-шара екі кезеңнен тұрды. Яғни, біріншісі – Жамбылдың жырларын мәнерлеп, нақышына келтіре отырып жатқа оқу болса, екіншісі – қазақтың халық әндерін немесе халық компазиторларының әндерін жанды дауыста орындау.

Аталмыш байқауға қатысушылардың жасына шектеу қойылмады.Байқауға  Жамбыл облыстық ҚХА «Жаңғыру жолы» жастар қозғалысының еріктілері,  «Вынхуа» дүнгендер этнобірлестігінің жас мүшелері және қалалық  №34 мектептің 10 сынып оқушылары Искакова Руфина мен Курбанова Амина қатысты.Курбанова Амина үздік өнер көрсеткені үшін номинация бойынша  ынталандыру сыйлығымен марапатталса, Искакова Руфина «Тілдерді дамыту» басқармасының арнайы жүлдесінің иегері атанды.

Жамбыл облысы әкімдігі

Ішкі саясат басқармасының

«Қоғамдық келісім» КММ

Баспасөз орталығы