Archive for category: Жаңалықтар

Қазақстан Республикасы Тәуелсіздігінің 25-жылдығына орай, «25 жұлдызды күн» республикалық акциясы аясында Жамбыл облысының «Қоғамдық келісім» КММ мен этномәдени орталықтарының өкілдері «№2 әлеуметтік қызметтер көрсету орталығында» үлкен мерекелік іс-шара ұйымдастырды.

Іс-шараға қатысқан облыс әкімі аппаратының «Қоғамдық келісім» КММ басшысының орынбасары Камал Нарбатыров өз сөзінде қарттарды Тәуелсіздігіміздің 25-жылдығымен шын жүректен құттықтай отырып, оларға зор денсаулық тіледі.

Іс-шара барысында  «Ахысқа» түрік этномәдени бірлестігінің өкілі Мамедалы Аббасов, «Айнұры» татар этномәдени бірлестігінің өкілі Рузалия Ахметшина, қазақ этномәдени орталығынан Гүлсім Мәлікқызы түрлі этностардың халық әндерін орындады. Ал  Азиза Джусипова «Дала еркесі» және «Орыс халқының биі» атты хореографиялық композицияларымен көрермендердің ықыласына бөленді. Жастық шақтарын еске алған қарттар әншілерге қосылып ән шырқап, би де кетті.

«Біздің қарттарымызға осындай көтеріңкі көңіл сыйлағанның өзі бір мереке десе де болады. Ұйымдастырушыларға алғысымыз шексіз, – деді Орталықтағы мәдени іс-шаралардың ұйымдастырушысы Қарлығаш Оралбекова.

Қарттар үйінде тұрып жатқан Валентина апай өз сөзінде: «Бүгін біздер үшін мейірімділік пен қуаныштың мерекесі. Осындай мерекені ұйымдастырып отырған Қазақстан халқы Ассамблеясына көп алғыс айтамыз. Әсіресе, жастарымыз бізді қуантады. Олардың әсерлі әндерін тыңдап, билерін тамашалап отырып, өмірдегі қиын кезеңдеріңді ұмытып та кетесің. Әлі де өмір сүргің келіп кетеді», – деді. Сонымен қатар апайымыз ұйымдастырушыларға мерекелік іс-шараға жиналған көрермендер атынан алғысын білдіріп, осындай кездесулер жиі өткізсін деген ұсынысын айтты.

Жамбыл облысының «Қоғамдық келісім» КММ-де этномәдени бірлестіктер өкілдерінің, аналар кеңесі мен «Ақ желкен» жастар лигасы мүшелерінің қатысуымен «25 жұлдызды күн» жобасы аясында «Ассамблеяның тарихы – мемлекеттің тарихы, халықтың тарихы» тақырыбында дөңгелек үстел отырысы болып өтті.

Жамбыл облысы Аналар кеңесінің төрайымы Мұхаббат Миражапова жиналғандарға мемлекетіміздің 25 жылда жеткен келелі жетістіктері туралы кеңінен баяндап берді. – Біз, аналар, қоғамымызға аналық мейірімімізді төгіп, ұрпақтар сабақтастығын сақтай отырып, өмірде болып жатқан қиыншылықтарға төзуге үйретеміз. Отбасында гармониялық қарым-қатынастың болуы дегеніміз, ол біздің ортақ отбасымыз, миллиондаған тұрғыны бар Қазақстанымызда этносаралық және конфессия аралық қарым-қатынасты нығайту.

Барлық этнос арасында бірлікті орнату мен одан әрі сақтап қалу жолдарына ақсақалдар кеңесінің төрағасы Идрис Юнусов тоқталып өтті. «Қоғамымызда Қазақстан халқы ассамблеясының рөлінің артуы дегеніміз ол қозғаушы күш. Бәріміз бірлесіп арманымызды жүзеге асыра аламыз» деп айтып өтті төраға.

«Ахысқа» түрік этномәдени бірлестігінің өкілі, «Ақ желкен» жастар лигасының белді мүшесі Алихан Ахметов: «Біздер, жастарға үлкен жауапкершілік артылғанын сезінеміз. Еліміздің биік армандар мен мақсатқа бейілділігін жастар өз істерімен, жетістіктерімен  дәлелдеуі керек. Сондықтан да біздер «Ақ желкен» жастар лигасының құрамындамыз. Біздер бүгінде өтіп жатқан «25 жұлдызды күн» жобасы аясында Мемлекетіміздің Елбасы қойған мақсаттарына сәйкес біртұтас ұлт келешегінің қалыптасуына өз үлесімізді қосуымыз керек».

Жамбыл облысы әкімі аппаратының

«Қоғамдық келісім» КММ баспасөз-қызметі

Бүгінде Жамбыл облыстық соты мен облыстық Қазақстан халқы ассамблеясы арасындағы ынтымақтастық меморандумын жүзеге асыру жоспары аясында үлкен жұмыс атқарылуда.

Ағымдағы жылда облыстық сотта «Ұлт жоспарын орындау контекстінде Азаматтық іс жүргізу кодексін орындау жылы» тақырыбында дөңгелек үстел отырысы өтті. Бұл тұрғыда Азаматтық іс жүргізу кодексінің негізгі баптары, соның ішінде медиация институтын дамыту, дау-дамайларды шешу мен татуластыру мәселелерін талқылауда ашық диалог алаңына айналды. Қазақстан халқы ассамблеясының медиаторлары кодекс баптарын талқылауда өз ұсыныстары мен ұсынымдарын жасады.

Елбасының «100 нақты қадам» ұлт жоспарының аясында медиация институтын енгізу туралы міндеттері бүгінде орындалуда.

Қараша айында облыстық сотта «Тәуелсіз Қазақстанда сот билігі мен құқық жүйесінің қалыптасуы» тақырыбында конференция болып өтті. «Қоғамдық келісім» КММ-нің медиаторлармен жұмыс жасау менеджері Валентина Досыбиева «Медиация – Қазақстан халқы ассамблеясының жаңа бағыты, ол әртүрлі мәселелер мен  қарама-қайшылықтарды шешіп қана қоймай, еліміздің дамуы мен қоғамдық келісімге шынайы пайда тигізеді», – деп атап өтті өз баяндамасында.

Бұл іс-шара медиация институтын енгізуде соттармен, заңгерлермен, билік пен ғылым органдары өкілдерімен тұрақты түрде диалог орнату керектігін дәлелдейді.

Жамбыл облысы әкімі аппаратының

«Қоғамдық келісім» КММ баспасөз-қызметі. 

Талас, Сарысу және Жуалы аудандарының алыс ауылдары мен қалаларын қамтыған экспедицияның басты мақсаты  «Мәңгілік Ел» жалпыұлттық идеясының құндылықтары негізінде қазақстандық патриотизмді нығайтуға бағытталады. «Ақ желкен» лигасының жастары аналар мен ақсақалдар кеңесінің өкілдерімен бірігіп, Елбасымыз Н.Назарбаевтың қоғамдық келісім мен ұлтаралық татулықтың қазақстандық үлгісінің танымалдығын арттыру мақсатында жергілікті тұрғындармен көптеген кездесулер өткізді. Сонымен қатар Жаңатас қаласындағы «Казфосфат» ЖШС-нің өндіріс орындарында болып, көп салалы колледж білімгерлерімен бірге еңбек ұжымдарымен кездесті. «Көк су» кенішінде болып  еңбек адамдарының, өз ісінің майталмандарының жұмысын көрді.

 Осы колледжде экспедиция мүшелерінің қатысуымен еңбек әулеттерінің форумы болып өтті. Талас ауданындағы көне петроглифтер бар Бөріқазған, Тәңірқазған және Қыз көпірі аумақтарына саяхат жасалып, Қызыләуіт ауылындағы Мынатай Қыстаубайұлы атындағы орта мектеп оқушыларына «Біз –ұлы даланың ұрпақтары» тақырыбында ашық аспан астындағы сабақ ұйымдастырылды. Жуалы ауданы Ертай ауылындағы М.Ғабдуллин атындағы мектептің оқушылары батыр Бақытжан Ертаев туып-өскен ауылдың тарихын зерттеудегі нәтижелерімен, жастардың  патриоттық  рухын нығайту мақсатында,  интеллектуалдық-танымдық ойын ұйымдастырды.

Барлық елді мекендерде «Біз – болашағы біртұтас ұлтпыз!» атты постерлер байқауы үлкен қызығушылықпен өтті. Ауылына сыйлы да құрметті ақсақалдармен өзін-өзі жетілдіру сенімінің маңыздылығы туралы сұхбат жазылды. Экспедиция барысында жиналған барлық материалдар Астана қаласына жіберіліп, республикалық жинақ-альбомға енеді.

“Ақ желкен” жастар лигасы Еңбек Ері М. Искандеровтен  өзінің  сәттілік формуласымен аудандағы колледждің оқу озаттарымен бөлісуін сұрады.  Жаңатас қаласындағы «Айгөлек» балабақшасында ұйымдастырылған қайырымдылық акциясы, Жуалы ауданында салынып жатқан құрмет аллеясы мен Талас ауданындағы таулы петроглифтермен танысу экспедицияның қызықты сәттерінің бірі болды.

Экспедиция жұмысының соңында жастар патриоттық рухты нығайту мақсатында 2017 жылы «Өз өңірінді танып біл» атты жаңа жобаны іске асыруды ұсынды.

Жамбыл облысы әкімі аппаратының

«Қоғамдық келісім» КММ баспасөз-қызметі