Archive for category: Жаңалықтар

Ағымдағы жылдың 21 қарашасында Тараздағы Достық үйінде «Этносаралық шиеленістің алдын алу бойынша мемлекеттік және үкіметтік емес ұйымдармен өзара іс-қимыл» тақырыбында этномедиация кеңесінің кеңейтілген отырысы өтті.

Кеңеске облыстық медиаторлар кеңесінің мүшелері, құқық қорғау саласының, тілдерді дамыту басқармасы мен білім беру ұйымдарының мамандары, өңірлік этномәдени бірлестіктер және «Ассамблея жастары» ҚБ мүшелері мен БАҚ өкілдері қатысты.

Жиынға облыс әкімдігінің ақпарат және қоғамдық даму басқармасы басшысының орынбасары Қуаныш Мамашев модераторлық етті.

Кеңес отырысы барысында спикерлер азаматтардың тең құқықтарын қамтамасыз ету, ксенофобия мен кемсітушілікке және этносаралық шиеленісті тудыратын құқық бұзушылыққа жол бермеу, сот өндірісінде медиация институтын насихаттау, этносаралық жанжалдардың алдын алу және өңірде этномедиацияны дамыту бойынша медиация кабинетінің жұмысын талқылады.

Атап айтсақ, облыстық полиция департаментінің экстремизм мен терроризмге қарсы іс-қимыл басқармасының аға жедел уәкілі Зарифжан Юсупов «Жамбыл облысының аумағындағы этносаралық қатынастар» туралы баяндама жасаса, облыс әкімдігінің Діндерді зерттеу орталығының инспекторы Есеней Қалжанов «Конфессияаралық келісім моделі» төңірегінде ой өрбітті.

Сондай-ақ, облыстық тілдерді дамыту басқармасы тілдерді оқыту орталығы бөлімнің аға әдіскері Айгерім Байғабыл «Тілдік белгілері бойынша азаматтардың ар-намысы мен қадір-қасиетін қорлаудың кез келген нысандарына жол бермеу» туралы мардымды мағлұматтар айтса, облыстық «Қоғамдық келісім» мекемесі «Медиация» кабинетінің меңгерушісі Валентина Досыбиева дауларды шешудің тиімді жолын айқындайтын кеңес жұмысының аймақтағы ахуалын алға тартты.

Сонымен қатар, мәжілісте бас қосқандар сарапшылардың баяндамасын тыңдап, көкейде жүрген сауалдарын қойып, пікір алмасты.

Шара соңында өңірдегі медиация кеңесінің жұмысын жандандыруда белсенділік танытып жүрген азаматтар марапатталды.

Ағымдағы жылдың 20 қарашасы күні Достық үйінде «Зорлық-зомбылыққа қарсы 16 күн белсенділік» акциясының ашылу салтанаты өтті.

Бұл күні аталмыш шараға облыстық Полиция департаментінің қызметкерлері мен облыстық «Анаға тағзым» отбасын қолдау орталығының директоры, ҚХА Аналар кеңесінің мүшесі Эльмира Мырза-Ғали, Жамбыл облысы ПД ЖПҚБ әйелдерді зорлық-зомбылықтан қорғау тобының аға инспекторы полиция подполковнигі, ҚХА Аналар кеңесінің мүшесі Диляфруз Кинжеханова, облыстық ҚХА Аналар кеңесінің мүшелері мен өңірлік Поляк этномәдени бірлестігі Аналар кеңесінің төрайымы Аракси Плетнева және өзге де спикерлер қатысып, қоғамдағы өзекті тақырыптар туралы баяндама жасады.

Атап айтсақ, жиында әйелдердің саяси көшбасшылығын қолдау, сондай-ақ әйелдер мен балалардың әлеуметтік мәселелері, отбасы құндылықтары туралы кеңірек айтылды.

Бұл іс-шара – қоғамымызды зорлық-зомбылықсыз, қауіпсіз және бейбіт өмірге бір қадам жақындату жолындағы маңызды қадамдардың бірі.

Сонымен қатар, жиын барысында түрлі сала мамандары тұрмыстық зорлық-зомбылыққа қарсы деректерді алға тартып, оған қарсы жүргізілуге тиісті жұмыстардың жәй-жапсарын нақтылады.

Іс-шараға келген қонақтар Жамбыл облысы ҚХА жанынан құрылған шеберлер клубының қолөнершілері жасаған қазақтың ою-өрнегі бейнеленген түрлі бұйымдарын тамашалады.

Бүгін, ағымдағы жылдың 19 қарашасы Астана қаласында Қазақстан халқы Ассамблеясы Төрағасының орынбасары Марат Әзілханов Жамбыл облысы әкімдігінің ақпарат және қоғамдық даму басқармасының «Қоғамдық келісім» КММ басшысы Мубарак Қасымқызы Жинақбаевамен кездесу өткізді.

Келелі кездесу барысында ҚХА-ның «Біртұтас қоғам: келісім және сенім» қоғамдық жобасын аясында өңірдегі іске асыру қорытындылары талқыланып, ҚХА-ның барлық қоғамдық жобаларын сапалы, әрі тиімді іске асырудың және Қазақстан халқы Ассамблеясының 30 жылдығына дайындықтың маңыздылығы атап өтілді.

Ағымдағы жылдың 18 қарашасы күні Ш.Мұртаза атындағы ХТИИ ғимаратында Жамбыл облысы Қазақстан халқы Ассамблеясы Ғылыми-сараптамалық тобының кеңейтілген отырысы өтті.

Көпэтносты Қазақстанда жұмысшы кәсіптерінің беделін арттыру тұрғысынан жоғары және орта арнаулы білім беруді реформалау тақырыбы аясында өткен отырысқа өңірлік Ассамблеясының ғылыми-сараптамалық тобының мүшелері, аймақтың этномәдени бірлестіктерінің өкілдері, студенттер, БАҚ өкілдері қатысты.

Жиын аталған оқу орнының Вице-президенті, өңірлік ҚХА ғылыми-сараптамалық тобының төрағасы, педагогика ғылымдарының докторы, профессор Махметғали Сарыбековтың модераторлық алғы сөзімен басталды.

Ары қарай Жамбыл политехникалық жоғары колледжі директорының оқу-өндірістік жұмыс жөніндегі орынбасары Тұрлыхан Оразбаев, «Жастар-зерттеу» жастар қоғамдық бірлестігінің төрайымы, М.Х.Дулати атындағы Тараз өңірлік университетінің экономика және құқық факультетінің 3 курс студенті Адиля Саитбаева, «Жамбыл-Жылу» МКК №1 пайдалану ауданының бастығы Сәкен Қасымбеков және облыстық «Днепро» Украин мәдени орталығы» қоғамдық бірлестігінің төрағасы, Қазақстан халқы Ассамблеясының мүшесі Федор Клименколар сөз сөйледі.

Кеңейтілген отырыста еліміздің экономикасының дамуындағы кәсіптік техникалық білімнің рөлі, еліміздегі экономикалық дамуы және жұмысшы кәсіптердің болашаққа болжамдары сынды түрлі мәселелер мен тақырыптар талқыланды.

Сондай-ақ отырыста «Адал еңбек, адал азамат» жобасы таныстырылып, ғылыми талқылау жасады. ҚХА Аналар кеңесінің мүшесі Пайза Куненова қазіргі жастардың, әсіресе блогерлердің жеңіл табысын атап, адал табыс пен адал еңбектің маңыздылығына терең тоқталып, сессия тапсырмасына сәйкес, «Салауатты сана» жобасы қоғамның әлеуметтік дертіне айналған 5 кеселден арылу бойынша сөз сөйледі.

Жиын соңы өзара пікір алмасулар және ғылыми-сараптамалық топтың белсенділерін марапаттаумен тәмамдалды.