Береке бастауы – бірлік
1мамыр – Қазақстан халықтарының бірлігі күні мерекесі «Достық» алаңында кең көлемде атап өтілді. Қазақстан халқы ассамблеясы этномәдени бірлестіктерінің ұлттық нақыштағы концерттік бағдарламасы, салт-дәстүрмен сабақтасқан қойылымдары алаңға жиналған көрермендерді ерекше тәнті етті. Бірлігі жарасқан түрлі ұлт өкілдерінің бір-біріне деген сый-құрметі, татулығы мен бірлігі алаңға сән берген алып бәйтеректей жайқалып жарасып тұрды.
Бүгінде бір шаңырақ астында бір үйдің баласындай ынтымақта ғұмыр кешкен этномәдени бірлестіктің өкілдері жиналған жұртшылыққа жеті түрлі ұлттың салт-дәстүрінен сыр шертер қойылымдар қойды. Атап айтар болсақ, «Әулие ата» қазақ мәдени орталығы» шілдехана тойынан, «Манас ата» қырғыз этномәдени бірлестігі»тұсаукесер дәстүрінен, «Ұйғыр этномәдени бірлестігі» үлкендер мен жастардың«Мәшірәп» атты басқосу кешінен, «Түрік этномәдени бірлестігі» келін түсіру,«Орыс этномәдени бірлестігі» «Выкуп невеста», «Неміс этномәдени бірлестігі» жастардың үйлену дәстүрлерінен қойылымдар көрсетті.Ал, «Корей этномәдени бірлестігі» асқаралы 60 жастың мерейтойынан көрініс арқылы үлкенге құрмет көрсетудің үздік үлгісімен таныстырды.Этномәдени бірлестік өкілдерінің ақсақалдары «Өмір ағашына» орамал байлап, ақ тілегін арнады. Игі шара «Достық» биімен өрнектеліп, жас баланың «Атамекен» әнін орындауымен жалғасты. Зеңгір көкке бейбітшілік символы көгершіндерұшырылып, шарлардан жасалынған алып шаңырақ көрер көзді тәнті етіп қалықтап тұрды.
Мереке Алматы және Тараз қалалары мәдени орталықтары әртістерінің қатысуымен концертке ұласты.
