Өңірлік семинар болып өтті
7–9 қыркүйек аралығында Тараз қаласында қазақстандық татулық пен келісім үлгісін ілгерілету бойынша өңірлік семинар болып өтті. М.Х.Дулати атындағы Тараз мемлекеттік университетінің Жастар сарайы ғимаратында өткен семинарға облысымыздың этносаралық және конфессияаралық қатынастар саласында жұмыс істейтін мемлекеттік қызметшілері, сондай-ақ азаматтық сектор өкілдері қатысты.
Семинардың ұйымдастырушылары Қазақстан Республикасы Президенті жанындағы «Қоғамдық келісім» республикалық мемлекеттік мекемесі мен Жамбыл облысының Қазақстан халқы Ассамблеясы болып табылады.
Қазақстан Республикасы Президенті жанындағы «Қоғамдық келісім» РКММ директорының орынбасары Талғат Жақияновтың айтуынша «Семинардың басты мақсаты – «100 нақты қадам» Ұлт жоспарын жүзеге асыру аясында қоғамдық келісім мен тұрақтылықты қамтамасыз ету мәселелері бойынша тыңдаушылардың кәсіби білімі мен біліктілік деңгейін арттыру» болып табылады».
Семинар жұмысы аясында дәрістер, тренингтер және тәжірибелік сабақтар өткізілді.
Үш күндік семинар барысында мемлекеттік этносаясатты жүзеге асыру, қоғамдық келісім мен ел бірлігін нығайту, медиация, көші-қон үдерістерін реттеу, діни экстремизм және терроризмге қарсы іс-қимыл және олардың алдын алу, т.б. мәселелер қарастырылды.
Семинардың дәріскерлері ретінде Қазақстан халқы Ассамблеясы Хатшылығының, ҚР Денсаулық сақтау және әлеуметтік қорғау министрлігінің, ҚР Білім және ғылым министрлігінің, «Атамекен» ұлттық кәсіпкерлер палатасының, Қазақстан мұсылмандары діни басқармасының өкілдері, ҚХА ҒСК мүшелері мен қоғам қайраткерлері қатысты.
Өңірлік семинар жұмысының қорытындысы бойынша барлық қатысушыларға сертификаттар табыс етілді.
Жамбыл облысы әкімі аппараты
«Қоғамдық келісім» КММ баспасөз-қызметі