Archive for month: September, 2021

Ағымдағы жылдың қыркүйек айында Тараз қаласындағы Достық үйінде облыстық Қазақстан халқы ассамблеясының Қоғамдық келісім кеңесі, Аналар кеңесі, этнос жастары арасында ҚР Президентінің Қазақстан халқына үшінші Жолдауы талқыланды.

Алқалы жиынға Қоғамдық келісім кеңесінің төраға орынбасары Абдырахман Зайнутдинов модераторлық етті. Алғашқы сөз Қоғамдық келісім кеңесінің мүшесі Рысбай Орынбайға берілді.

– «Еліміздің тұғыры мемлекеттік тілде екенін кешегі Мемлекет басшысы халыққа үндеуінде айрықша атап өтті. Қазақ тілі – әлемдегі мағынасы көп, синонимдік тіркесі мол, сөйлеу стилі сұлу, ерекше тіл. Бұл тілдің құдіреті ерекше. Қуантарлық жайт – Мемлекеттік тілді еліміздегі түрлі этнос өкілдері жарыса оқуда. Қазақ тілін оқытатын арнайы мектептер ашылып, ондағы жастардың қарасы көбейгені де көңілге жылулық ұялатады. Алайда, жастарымыз ресми тіл – орыс тілін жетік меңгерсе еш ұтылмайтынын ұмытпаған жөн, орыс тілі қашанда халыкаралық тіл болып келген және қала береді де», – деп ерекше атап көрсетті Ол.

Сондай-ақ, ассамблея жастарының атынан сөйлеген Шұғыла Жұманғалиқызы қоғамдағы жастардың рөлін тілге тиек етті. Оның айтуынша, патриотизм – бүгінгі жастардың тұрақты болашағының негізі. -«Қазақстандық жастарда патриоттық сезім жоқ дегенді аға буыннан жиі естіп қалып жүрміз. Әрине бес саусақ бірдей емес, Мемлекет басшысының саясатын қолдай келе және уақыттың талабына сүйене отырып, жыл сайын мемлекеттік тілді меңгеруші түрлі ұлт өкілдерінің және жастарының саны артып келеді. Бұл қазақстандық патриотизмнің үлкен дәлелі емес пе?!”- деді Шұғыла Жұманғалиқызы.

Кездесу соңында этнос өкілдері Мемлекет басшысының үндеуін қолдап, басты байлық – бірлікті қадірлеуді мақсат тұтып, ортақ ой, бір тілектің аясында бірікті. “Алдағы мақсаттарға қол жеткізу үшін бірлігімізді нығайтып, осы байлықты ұрпақтан-ұрпаққа тапсыру керек. Одан әрі топтасу мен бірлікті нығайту барлығымызды мемлекеттік тілдің айналасына біріктірген кезде ғана мүмкін болады, – деп қорытындылады отырыс модераторы Абдырахман Юлдашұлы.

Жамбыл облысы әкімдігінің ішкі саясат басқармасының “Қоғамдық келісім” КММ Баспасөз қызметі орталығы

Бүгін мен үшін ерекше күн, қос мереке!  Мемлекет басшысы  Қасым Жомарт Кемелұлы Тоқаев  Парламенті палаталарының бірлескен отырысында жыл сайынғы Қазақстан халқына Жолдауын жариялады және Білім күні .

Бұл – Мемлекет басшысының үшінші жолдауы.

Мемлекет басшысының сөзін бір жарым сағаттан астам уақыт тыңдадым. Кезекті Жолдауын тыңдай отырып, мазмұнның өзектілігі мен айтылып жатқанның уақытылы екендігіне таң қаласың. Ол елдің жаңа кезеңдегі одан әрі дамуының көзқарасын айқындайды.

Президент мемлекет пен барлық қазақстандықтар  үшін көптеген маңызды мәселелерді көтерді. Қасым-Жомарт Тоқаев жаңа экономикалық бағыттың 7 негізгі принципін атады.

Мұғалім ретінде ел баскарушысының қол жетімді және сапалы білім берудің маңыздылығы туралы сөздері маған қатты әсер етті. Мемлекет басшысына ризашылығымды білдіргім келеді, өйткені бұрын-соңды болмаған мұғалімдік мамандықтың мұндай жоғары мәртебесі болмаған. Мемлекет мұғалімдерді қолдау саясатын жалғастырады. “Мұғалімдердің біліміне 1,2 триллион теңге бөлінеді”-  деді Президент. Әрине, біз мұғалімдер Отанымыздың игілігі мен Қазақстанның жарқын болашағы үшін жұмысты жалғастырамыз, сенімді ақтаймыз. «Балалар үйірмесі”  туралы қызметтерді қайта қалпына келтіруге толықтай қосыламын. Үйірмелермен балаларды қамтығанда үш мақсатқа жетеміз. Жастарымызды ұлттық қолөнерге және шығармашылыққа баулу, құқық бұзушылықтың алдын алу және денсаулықты нығайту. Сапалы білім алу үшін әдеттегідей сабаққа қатысып, мұғалімдермен және сыныптастармен араласудың орны бөлек.

Президентіміздің тапсырмасы бойынша санитарлық талаптарды сақтай отырып, білім алудың қалыптасқан дәстүрлі тәсіліне қайта көштік. Бұл, біз үшін  өте  маңызды. Осы күнді барлықтарымыз асыға күттік. Балалармен араға бір жыл уакыт кетіріп табысып жатырмыз.

Мемлекет табысты еңбек етуге, бейбіт өмір сүруге барлық жағдайды жасайды, ал біз азаматтар бәсекеге қабілетті орта құру үшін барлық күш -жігерімізді салып, үнемі заманға ілесіп отыруымыз керек.

Елдің әрбір азаматы мемлекеттің дамуына, отбасылық құндылықтарды нығайтуға үлес қосуға міндетті деп есептеймін. Біз бәрін басқаша жасауға құқығымыз жоқ, өйткені мемлекет басшысы бізге үлкен үміт артады және біздің күшімізге сенеді. Болашақ біздің қолымызда!

Жамбыл облыстық «Вынхуа» Дүнгендер этномәдени бірлестігінің

мүшесі, қалалық №34-мектептің директоры Динара Нуралиева

Бүгін ҚР Парламенті Палаталарының бірлескен отырысында Мемлекет басшысы Қасым-Жомарт Тоқаевтың «Халық бірлігі және жүйелі реформалар-ел өркендеуінің берік негізі» атты Қазақстан халқына арнаған Жолдауын теледидардан көріп, мұқият тыңдадық.

Жолдауда тәуелсіз еліміздің қол жеткізген жетістіктері мен алда тұрған басты міндеттер нақтыланып, ең бастысы – ел бірлігін сақтау, бейбіт өмір, қоғамдағы тұрақтылық пен тыныштықты нығайтуға үлес қосудың маңызына екпін салынған. Сонымен қатар елдің алдағы әлеуметтік-экономикалық дамуының басым бағыттарын іске асыру, халықтың әл-ауқатын жақсартудың тетіктері айтылған.

Елдің бірлігі бәрінен маңызды. Ел Президенті Қасым-Жомарт Кемелұлы: «Мықты мемлекет болу үшін ұлттың ұйыса білуі айрықша маңызды.

Шын мәнінде, Ұйымдасқан ұтады. «Ынтымақ жүрген жерде ырыс бірге жүреді»,- деп халқымыз бекер айтпаған. Біздің күш-қуатымыз – Берекелі бірлікте!,- деп сөзін түйіндеген Президенттің халыққа деген сенімі біздің де жүрегімізде сенім ұялатты.  Халықтың табысын арттырып, әлеуметтік жағдайын жақсартуға бағытталған құжатта көрсетілген міндеттерді қоғам болып, орындайтын болсақ, алмайтын асуымыз болмайды деп сенемін.

Мехия РАДЖАМОВ,

Жамбыл облысы Байзақ аудандық

«Ахыска» түрік этномәдени бірлестігінің төрағасы

Жалпы азамат тарихына үңілсек, әлемдегі озық өркениеттер ұлттық сипаттан бастау алғандығын білеміз. Біз әлемге еліміздің жаңаша бет-бейнесін танытып, өткен дәуірден қалған таптаурын қағидаларды өзгертіп, орындалмайтын «елес идеологиялардан» бойды аулақ ұстауға, жаңа прагматикалық сипаттағы деңгейге қол жеткізбекпіз. Қазақстанның тәуелсіздік кезеңіндегі жаңғыруы байыпты қалыпта, уақыт талабын ескере отырып, кезең-кезеңімен жүзеге асуда. Эволюциялық жолмен жаңғыру қазақстандық азаматтың басты бағдарына айналмақ. Олай деуімізге себеп әлемдегі түрлі революциялардың ешқашан оңтайлы нәтиже әкелмегенін білеміз. Жаһандану үрдісіндегі басты талап қазақ тілімен бірге әлемдік тілдерді игеруге ұмтылу. Бұл біздің ғаламдық үрдіске толыққанды араласуымызға жол ашып, әлемдік озық тәжірибелер мен жетістіктерге қол жеткізуімізге мүмкіндік әпермек.

Дамыған отыз елдің қатарына қосылуды мақсат тұтқан Қазақстан 30 жылда биік белестерді бағындырып, бірліктің арқасында бірегей жетістіктерге жетті. Алдымен ел тұрмысына елеулі көңіл бөлген мемлекеттік саясат ендігі кезекте жеткен жетістіктерімізді еселеуді көздеп отыр.

Ел Президенті Қасым-Жомарт Тоқаев халыққа Жолдауында ұлт болып ұйысуымыздың өте маңызды екенін алға тартты. Өйткені біздің жеткен жетістіктеріміздің негізі халқымыздың ынтымағында. Бәріміз үшін бағалы да, құнды да, маңызды да ел бірлігі. Одан артық ештеңе жоқ. Санамыздың ізімізден озып жүруі, ұлттық рухымыздың бойымызда мәңгі қалуы – ұлт болып ұйысып, жұрт болып жұмылудың бірегей жолы. Бұл бағдар әрбірімізге үлкен жауапкершілік жүктейді деп сенемін.

Сабри Асанов,

Жамбыл ауданы бойынша «Барбанг»

күрді этномәдени бірлестігінің төрағасы

Елімізде ауыл шаруашылығы экономика саласында ерекше орын алады. Ауыл шаруашылығының дамуынан мемлекетің азық-түлік қауіпсіздігі жəне халықтың əлеуметтік-экономикалық жағдайы өзгереді. Еліміз ауыл шаруашылығын жетілдіруде жəне жандандыруда кең көлемде ресурстар кешеніне ие болып отыр. Олардың қатарына мал шаруашылығын дамыту, көкөніс өнімдерін, мақта өсіру, егін жай өнімдерін саралау жатқызылады. Еңбек өнімділігін арттыру жəне егін жайдың құнарлық сапасын жақсартуда көптеген мүмкіншіліктер пайдаланылып келеді, яғни ресурстарды тиімді қолдану жəне егіс алқаптарының көлемін көбейтуде ілгерілеушілік байқалады.

Ауыл шаруашылығын дамытуға бағытталған мемлекеттік бағдарламалар отандық ауыл шаруашылығы өнімінің бəсекеге қабілеттілігін жəне азық-түлік қауіпсіздігін қамтамасыз етуге бағытталған шаралар жиынтығын қамтиды. Алайда саладағы еңбек өнімділігінің төмен деңгейі, қолданылатын технологиялардың жетілмеуі, ауыл шаруашылығы өндірісінің ұсақтығы оның кең көлемде дамуына мүмкіндік бермей отыр. Ол үшін қолда бар материалдық, еңбек жəне басқа да ресурстарды экологиялық талаптарға сəйкес толығымен қолдануды қамтамасыз ету керек.

Мемлекеттің ауыл шаруашылығын реттеу əдістері экономикалық тепе-теңдікті сақтаудан, ауыл шаруашылығы өндірісін өндіруден жəне қайта өңдеуден, сонымен қатар шикізат пен азық-түліктің объективті қажеттілігінен туындаған. Өйткені ауыл шаруашылық өнімдері кез келген мемлекеттің экономикалық жəне əлеуметтік тиімділігін қамтамасыз етуге бағытталған.

Ел Президенті Қасым-Жомарт Тоқаевтың халыққа Жолдауында аграрлық салаға баса мән берілді. Сала жұмысын жандандыру, кеткен кемшіліктерді жою, осы орайда тиісті шараларды қабылдау қажеттілігі нақты айтылды. Шаруаларға субсидия беру мәселесі де назардан тыс қалмады.

Ауыл шаруашылығы ел экономикасының негізгі салаларының бірі жəне қоғамның экономикалық әрі қоғамдық-саяси тұрақтылығын анықтайтын фактор болғандықтан, аграрлық сектордың дамуы мемлекет үшiн экономикалық жəне ең бастысы əлеуметтiк негізде стратегиялық жағынан маңызға ие. Қазіргі уақыттағы ауыл шаруашылығы өніміне өсіп жатқан жаһандық сұраныс жағдайында экологиялық мəселелер есепке алынып, ұлттық бəсекеге қабілетті брендтер құрылуы тиіс. Жаңа ғылыми, технологиялық, басқарушылық жетістіктерді ескере отырып, жер өңдеу мəдениетін өзгертіп, мал шаруашылығындағы дəстүрлерімізді жаңғыртсақ, ауыл шаруашылығында толағай табыстарға жететініміз анық.

Рүстем Бегалиев,

Жамбыл аудандық Қоғамдық келісім кеңесінің төрағасы