Ағымдағы жылдың 29-30 маусымы күндері өңіріміздегі Достық үйінде Жамбыл облысы Қазақстан халқы ассамблеясы және Жамбыл облысы әкімдігінің ішкі саясат басқармасының «Қоғамдық келісім» КММ Баспасөз қызметі орталығының ұйымдастыруымен «Интернет кеңістігіндегі коммуникацияның жаңа технологиялары: даму болашағы мен мәселелері» атты семинар-тренинг іөтті.

Этносаралық қатынастар мен тұрақтылық саясаты туралы біліктілікті арттыру дәрістеріне облыстық бұқаралық ақпарат құралдары, этномәдени бірлестіктердің өкілдері, ішкі саясат басқармасының қызметкерлері және «Жаңғыру жолы» жастар қозғалысының белсенділері, Полиция департаментінің Баспасөз орталығының тілшілері, психологтар қатысты.

Іс-шараның басты мақсаты, әрі міндеті – қоғамның бірлігі мен тұрақтылығын сақтауда журналистиканың рөлін жан-жақты ашу, этномәдени бірлестіктердің өкілдері мен облыс журналистері арасындағы байланысты нығайту, қоғамдық бірлестіктердің өкілдерін ашық диалогқа тарту болып табылады.

Дәріс алуға келген журналистер, ЭМБ өкілдері мен жастарды облыс әкімдігінің ІСБ «Қоғамдық келісім» КММ басшысы Парида Мамедова қарсы алып, алғы сөзін арнады.

Екі күнді қамтыған тренингте «Алматы» телеарнасы Бас директорының кеңесшісі, журналист – Рауан Есқали, «Рух» психология және тұлғаны дамыту» орталығының директоры, психолог – Резеда Баймухамедова, Жамбыл облысының ардагер журналисті, 2015 жылғы «Шаңырақ» республикалық байқауының жеңімпазы – Михаил Бунин қатысушыларға дәріс өткізсе, ҚР Ұлттық қауіпсіздік комитеті Академиясының психологы- Лола Шакимова ZOOM платформасы арқылы байланысқа шығып, дәріс берді.

БАҚ өкілдеріне және этномәдени бірлестік мүшелеріне арнап Рауан Өмірұлы «Ақпараттық замануи интернет-журналистика», «Ұлтаралық қақтығыстарды шешудің әдістері мен тәсілдері», «SMM (social media marketing) мәтіндері мен пресс-релиздерді қалай дұрыс жазуға болады?», «PR» немесе қоғаммен байланыс» тақырыптарында, Резеда Салимжанқызы «Қоғамдық сананы насихаттау мен манипуляциялаудың психологиялық аспектілері», «Ақпаратты қабылдаудың интерактивті тренингі», «Этносаралық қақтығыстарды шешу ерекшеліктері: халықаралық аспект», «Ақпаратты қабылдаудың психологиялық аспектілері» тақырыбтарында семинар тренингтер жүргізді. Ал, Лола Сергеевна «Жанжалды жағдайларды шешуде нейролингвистикалық бағдарламалауды тәжірибелік қолдану» атты дәрісін онлайн форматта өткізсе, Михаил Вениаминович «Бірлік тілі. Газеттегі және эфирдегі сөздердің мағынасы» тақырыбында журналистерге арналған шеберлік сабағын өткізді. Дәріс беру барысында Рауан Өмірұлы белсенді қатысушыларға соңғы үлгідегі электронды сағат пен «Әдемі-ай» ұлттық зергерлік бұйымдар мен кәдесыйлар компаниясының арнайы флеш-картасын табыс етті.

Дәріске қатысушылар аталған шараның біздің өңірге керектігін айтып, ұйымдастырушыларға алғысын білдірді. Сондай-ақ, аталмыш семинар-тренингтердің жиі ұйымдастырылып тұрса екен деген тілектерін де білдірді.

«Қоғамдық келісім» КММ басшысы Парида Иманжанқызы біздің еліміздің басты саясаты болып саналатын бейбітшілік пен тұрақтылық арқасында елімізде сан түрлі ұлттың тату-тәтті тұрып жатқанын тілге тиек етіп, әрбір қазақстандықтық осы саясат тұрғысында хабардар болу керектігін алға тартты. Сонымен қатар, екі күн бойы алтын уақыттарын бөліп қатысқан қатысушыларға және дәріскерлерге алғысын білдірді.

Семинар тренингтің соңында барлық қатысушыларға арнайы сертификаттар табысталып, естелік фото-сессия ұйымдастырылды.

Аталған біліктілікті арттыру дәрістері түрлі форматта әр жыл сайын жалғасын табатын болады.

Жамбыл облысы әкімдігінің

ішкі саясат басқармасының

«Қоғамдық келісім» КММ

Баспасөз қызметі орталығы

Ағымдағы жылдың маусымында Жамбыл облысы ҚХА Журналистер клубының 2021 жылғы алғашқы отырысы өтті. 28-маусым байланыс және ақпарат қызметкерлері күні мерекесіне орай ұйымдастырылып отырған іс-шараға журналистер клубында бекітілген 20-дан астам журналист қатысты.

Жалпы, Журналистер клубы – толеранттылықты нығайтуға, мемлекеттегі этносаралық келісімді, азаматтық бірлікті, патриотизмді және рухани-мәдени қауымдастықты сақтауға, журналистік этика қағидаларын сақтауға, дамытуға және енгізуге, сондай-ақ этносаралық тақырыпты жариялау мәселелерінде журналистік қоғамдастықта жауапкершілікті қалыптастыруға бағытталған ұйым.

Жиынға облыстың түпкір-түпкірінен келген журналистер, интернет кеңістігінде жарияланымдар жасаушы блогерлер, облыс әкімдігі ішкі саясат басқармасының «Қоғамдық келісім» КММ басшысы Парида Мамедова және Баспасөз қызметі орталығы қызметкерлері қатысты.

Кіл журналистерден құрылған клубтың бүгінгі жиындағы шешімін күтіп тұрған мәселелері 2021 жылы атқарылған жумыстарды сарапқа салу, аймақтық журналистердің «Бір шаңырақ астында» байқауына жолдаған материалдарын талқылау және жеңімпаздарын анықтау болатын.

Күн тәртібіне сай ағымдағы жыл бойынша жазылған материалдар мен телеарна, телерадио және интернет желісіндегі жарияланымдар туралы Журналистер клубының төрағасы Саятхан Сатылғанов сөз сөйледі: «Алдыңғы жылдармен салыстырғанда ақпараттық жарықтандыру дұрыс жолға қойылды. Баспасөз беттерінде де, телеарнада да, интернет ресурстарында да аудитория саны артып, қаралымдар жиналуда. Дегенмен, әлі де ақсап келе жатқан тұстар бар. Бұл, өлмейтін тақырып соңынан шыға алмауымыз. Ассамблея елімізді өзге елдерден оқ бойы озық етіп тұрған бейбітшілік пен тұрақтылық негізін қалаушы бірегей институт. Бұл еліміздің саясаты. Ал, елдің әр игі ісін жарқыратып көрсету біздің басты міндетіміз. Олай болса, құрметті қалам ұстаған қауым әрбір қаузайтын тақырыптарыңызды әбден зерттеп, зерделеп барып жазуларыңзды және мейлінше жаңа, әрі тың тақырыптар табуларыңызды өтінеміз» -деп, ойын ашық жеткізді клуб төрағасы.

Күн тәртібіндегі кезек күттірмей тұрған тағы бір мәселе облыстық «Бір шаңыра астында» байқауына қабылданған материалдарды сарапқа салып, жеңімпаздарды анықтау болатын. Конкурсқа түскен материалдар мемлекеттік тілде, орыс тілінде және видео, аудио түрінде үш жақты көзқарастық терсеруден өтті. Қазылар құрамында орыс тілді баспасөз беттері бойынша облыстық «Знамя труда» газетінің тілшісі Индира Боташова, телеарна-радио саласы бойынша «Jambyl» телерадио корпорациясы басшысының орынбасары Айбол Қарашев және қазақ тілді басылымдар бойынша республикалық «Айқын» газетінің облысымыз бойынша меншікті тілшісі, облыстық «Арай» газетінің саясат бөлімінің жетекшісі Саятхан Сатылғанов болды.

Қазылар құрамы қабылданған материалдарға жан-жақты талдау жасай келе бірінші дәрежелі орынды республикалық «Казахстанская правда» газетінің облысымыздағы меншікті тілшісі Те Михаил Борисұлына, екінші дәрежелі орын «Jambyl» телеарнасының редакторы Аружан Мақсатқызына және үшінші орын облыстық «Ақ жол» газетінің Шу ауданы бойынша меншікті тілшісі Қартайған Ерғали Асхатұлына лайық деп тапты. 30-ға жуық журналист бақ сынасқан бәсекенің қалған қатысушылары түгелдей ынталандыру сыйлығын иеленді.

Жиын соңы қабылданған шешімдер бірауыздан мақұлданып, байқауға қатысушы журналистер қауымын марапаттау рәсіміне шақырумен тәмамдалды.

Өзі елінің ана тілін, мәдениетін, әдебиетін, тарихын

білмеген адамды мәдениетті адам деуге келмейді.

Мұхтар Әуезов.

Тәуелсіздік алғаннан бері жаңа Қазақстан өзінің дербес даму жолын таңдап, жылдан жылға әлемдік қоғамдастықта барған сайын зор құрмет пен беделге қол жеткізіп, алға қарай нық сеніммен ілгерілеп келеді. Болашағымыз – жастар! Жастарға деген сенім жолында біз бар күшімізді аямай қолда барымыз, яғни, көзіміздің қарашығындай сақтап келе жатқан мәдениетіміз, әдебиетіміз, тарихымыз, салт-дәстүріміз сияқты ұлттық құндылықтарымызды келер ұрпаққа тиянақты тапсыруды мақсат-міндет етіп, сол жолда аянбай еңбек етудеміз. Жас ұрпақтың санасына ең бастысы – ел тыныштығы мен ынтымағын сақтауды дәріптеп келеміз.

Осыған орай, ағымдағы жылдың маусым айында Қазақстан Республикасының тәуелсіздігіне 30 жыл толуы қарсаңында, Тараз қаласының шетіндегі – «Шөлдала» саяжайында орналасқан №59 орта мектептің бастауыш сынып оқушылары қаламыздағы сәні мен сәулеті келіскен Достық үйіне саяхат жасады.

Бұл экскурсияның мақсаты – жастардың өз еліне деген мақтанышы арқылы қазақстандық патриотизмді, белсенді өмірлік ұстанымын тәрбиелеу болып табылады. Осыған сәйкес алыстан мен мұндалап тұратын достық пен бірліктің символы – күмбезді Достық үйі мен татулық пен тыныштықтың нышаны – бірегей ассамблея тақырыбына терең қызығушылық танытқан бүлдіршіндер ғимаратқа кіре салысымен айналаға көз тастап қызыға қарап, баспалдақтан баспалдаққа секіріп жоғарыға бірінің артынан бірі жүгіре кетті.

Оларды Жамбыл облысы әкімдігінің ІСБ «Қоғамдық келісім» КММ, әрі Достық үйінің басшысы Парида Мамедованың өзі қарсы алды. Парида Иманжанқызы ғимараттың үшінші қабатында орналасқан дөңгелек үстелге оқушыларды жайғастырып, осы жердегі әрбір орындықтың өзі тарихтан сыр шертетінін айтты: -“Сендер отырған осы орындықтарда Елбасымыз – Нұрсұлтан Назарбаев, дипломат, елші – Мұрат Әуезов т.б. елімізге ерен еңбегі сіңген ұлы тұлғалар отырған. Сендердің де сол ағаларымыз секілді мықты қайраткерлер, өз елінің жанашыр азаматтары болуларыңа тілектеспін!” – деді Ол. Бұдан соң, жас жеткіншектерге қоғамдық келісім қызметінің қыр-сыры мен облысымызда тұратын түрлі этнос өкілдері туралы айтып берді.

Осыған қоса, Президентіміз Қасым-Жомарт Тоқаев пен Елбасымыздың әділетті саясаты мен жобалары арқылы біздің ірі жетістіктерге жеткеніміз де айтылды. Бұған қоса, ассамблея дегеніміз не, оның атқаратын міндеті қандай, ассамблеяға кімдер мүше бола алады, этнос, этномәдени бірлестік дегеніміз не деген сауалдар төңірегінде де оқушылардың өз деңгейіне қарай кішігірім дәріс берілді. Сондай-ақ, оқушыларға облыстық ассамблеяның арнайы Құрмет тақтасында тұрған еңбегі сіңген этномәдени бірлестік төрағаларының фотосуреттері көрсетіліп, олардың жұмыстары таныстырылды.

Өздеріне бір тың дүние ашып, «ассамблея», «достық үйі» ұғымдарынан хабардар боп шыққан балақайлар қуаныштан жүздері бал-бұл жанып, «Достық» ордасынан әсерлі көңіл-күймен шықты.

Танымдық экскурсияның соңы көңілді фотосесиямен аяқталды.

Жамбыл облысы әкімдігінің

Ішкі саясат басқармасының

«Қоғамдық келісім» КММ

Баспасөз қызметі орталығы

#ҚРтәуелсіздігіне30жыл

Қазақ елі мен Ресей арасындағы байланыс ежелден бастау алады. Қазақта «көршіңмен тату бол!» деген ұлағатты қағида бар. 1992 жылдың 25 мамыры күні достық, ынтымақтастық және өзара көмек туралы шартқа қол қойылды. Бұл – тәуелсіз екі елдің арасындағы дипломатиялық қарым-қаты­нас­тар орнаған тарихи күн. Міне, сол айрықша оқиғаның дәлелі – тарихи-мәдени байланыс жағынан да, бүгінгі таңда экономикалық тұрғыдан алғанда да Қазақстан үшін Ресейдің орны бөлек. Неге десеңіз, іргелес жатқан елдер болғандықтан, экономикалық даму үрдісі де, қоғамның дамуы да бір-біріне оң ықпал етері сөзсіз.

Осыған орай, бүгін Тараз қаласындағы «Көне Тараз» тарихи-мәдени кешенінде орналасқан Достық үйінің алдында Жамбыл облысы әкімдігінің ішкі саясат басқармасы «Қоғамдық келісім» КММ ұйымдастыруымен облыстық «Радонеж» орыс қауымдастығы» қоғамдық бірлестігінің «Қазақстан-Ресей – мәңгілік дос» атты концерті өтті.

Ел Тәуелсіздігінің 30 жылдығына орай ұйымдастырылып жатқан бұл іс-шараның негізгі мақсаты – этносаралық қатынастарды нығайту және орыс этносының мәдениетін, дәстүрлері мен әдет-ғұрыптарын сақтау, төл мәдениетімен таныстыру болатын.

Мерекелік концерттің басы «Радонеж» орыс қауымдастығы» қоғамдық бірлестігінің жетекшісі Владимир Сорокиннің жетекшілік етуімен «Калинка» ансамблінің «Вот избушка» әнімен басталып, «Үкілім-ай» би ансамблі бишілерінің қазақ биімен жалғасты. Сондай-ақ, кеште «Ляйсан тамчилары» вокалдық ансамблі, орыс халқының ұлттық аспаптарынан құралған «Русский наигрыш» оркестрі және шығармашылық топтағы Надежда Кадышева, Любовь Юргинцева, Евгений Белоголова, Валентина Туренко, Валентина Матвеева, Ахмат Сарбашев, Александр Крыгин, Лариса Есеналиева, Антонина Беляева өнер көрсетті. Көңілді кеш барысында облыстық «Айнұры» татар-башқұрт этномәдени бірлестігінің әншісі Рузалия Абдуганиеваның орындауындағы «Қазақ елі осындай» әні көрермендердің көнілінен шықты.

Маусым айының жайма-шуақ кештерінің бірінде өткізілген концерт соңы «Калинка» ансамблінің орындауында орыс халқының «Дорога» әнімен және Достық үйінің басшысы Парида Иманжанқызы мен этномәдени бірлестік өкілдерінің құттықтау, алғыс сөздерімен аяқталды.

Қала тұрғындары мен қонақтарына арналған кеш жамбылдықтарға көтеріңкі көңіл-күй сыйлады.

Екі ел арасындағы байланыстың дами түсуі екі елге де тиімді болатынына толық сенімдіміз!

Жамбыл облысы әкімдігінің ІСБ

«Қоғамдық келісім» КММ

Баспасөз қызметі орталығы

#ҚРтәуелсіздігіне30жыл