Жамбыл облыстық Махмұт Қашқари атындағы Ұйғыр этномәдени бірлестігінің төрайымы Мухабат Турдыева, ҚХА мүшесі  

Қазақстан Республикасының Конституциясы қабылданғанына 1995  жылдың 30-тамызынан бері биыл 26 жыл өтіпті.

Қазақстан Конституциясының басқа елдердің Конституциясынан  айырмашылығы оның мазмұнының сапасында. Конституцияға алғашынан азаматтың құқығына қатысты ғана емес, адам дүниеге келген сәттен ажырамас құқықтарына  қатысты да нормалар енгізілді. Ол бойынша Қазақстан Республикасының Президенті саяси жүйенің басты тұлғасы болып табылады, билік тармақтарынан жоғары тұрады. Бұл президенттік басқару жүйесіндегі мемлекетке сай келеді. Заман талабына сай  Парламент туралы конституциялық бөлім өзгерістерге ұшырап отыратыны заңдылық. Әлемдік өркениеттің шыңына ұмтылған Қазақстан халқы тарихи да тағдырлы шешім қабылдап, жаңа дәуірге қадам басқан уақыттан бері Ата Заң біздің бүкіл жарқын істеріміздің қайнар бастауына айналды. Айналасы 26 жылдың ішінде бірлігі жарасқан, өзге дамыған елдермен иық тірестіре қарыштап келе жатқан мемлекетке айналып отырмыз. Оның барлығы осы уақтылы, дұрыс қабылданған Ата Заңымызда бүкіл адамзаттық құндылықтар мен өркениеттік игіліктердің толық қамтылғанын айғақтайды.

Айтулы күн – Ата Заңымыз мерекесіне орай,  берекесі мен бірлігі мықты Жамбыл облысының  тұрғындары әрбір мерекені қалт жібермей, атап өтуші ек. Қоғам үшін қызмет етіп отырған азаматтар әр мерекенің толыққанды, жақсы өтуіне мұрындық бола отырып, жіті назарда ұстайтын  және бұған облыс әкімінің де, жұртшылығының да қосар үлесі зор.

Конституция күні осымен екінші жыл қатарынан ерекше саябыр форматта атап өтілуде, себебі бүкіл әлемді жайлаған пандемия кезінде сақтық шараларын сақтай отырып,  жұрт аяғын аңдап басып, әрбір мерекені бұрынғыдай  көтеріңкі көңіл-күймен өткізе алмай жатыр. Егемен еліміздің, қала берді облысымыздың өркендеп, даму жолында аймақтық ассамблеяның да қосып жатқан үлесі аз емес. Жалпы ассамблея мүшелерінің қай-қайсысының болмасын, қоғамдық іс-қимылдарынан бөлек, өзіндік жеке кәсіпкерліктері мен басқа да шағын бизнестері арқылы облыс игілігіне жүргізіп отырған жұмыстары да айтарлықтай.   Мәселен, біреуі егін салса, біреуі жергілікті халықты саудамен қамтамасыз етіп отыр, енді бірі дәрігер боп, ел басына  қиындық туған уақытта жұртқа көмек беріп, кенде болып отырған дүниелерін тауып беріп, елге қамқорлық жасауда. Мұндай азаматтардың қатарында Ғұлам  Умаров, Руслан Исмазов, Зайнуддин Махусеев, Махмутжон Давришев,  Юрий Минаков, Абдрахман Зайнутдинов сияқты ер-азаматтардың аттарын ауыз толтырып айта аламын. Шынтуайтқа келгенде облысымызда текке жатқан бір тілім жер жоқтың қасы және қол қусырып тыныш отырған жұрт та жоқ, бәрі де дәйім тірлік үстінде. Одан өзге, облыс әкімі Бердібек Сапарбаев та облыс өркениеттілігіне қатысты және аудандарға жасаған жұмыс сапарлары барысында ауылшаруашылық экономикасын дұрыс дамыту бойынша жобаларын жүзеге асыруда.

Сондай-ақ,  Әулие Ата өңірінің тұрғындары, оның ішінде ассамблея мүшелері мен этномәдени бірлестіктері де тұғырлы тәуелсіздігіміздің, еңселі егемендігіміздің тірегі болған Конституция күнін елде орын алған  қолайсыз жағдайда  ойдағыдай  жоғары дәрежеде атап өткізе алмаса да, облыс әкімдігінің Ішкі саясат басқармасы басшылығымен «Қоғамдық келісім» коммуналдық мемлекеттік мекемесі бекіткен жоспар бойынша өзіндік іс-шараларын карантин режиміне қарамастан оңтайлы атап өтпек. Шама-шарқынша әлеуметтік желілермен қарқынды жұмыс жасап, қайырымдылық іс-шараларын жүзеге асыруда. Соның бірі – өзім, басқарып отырған Ұйғыр этномәдени орталығымның атынан  жуық арада Конституция күніне орай, ковид ауруына шалдығып, өмір үшін  күресіп жатқан жандар мен жергілікті диспансерлердің медицина қызметкерлеріне қайырымдылық акциясын жүргізбекші боп жоспарлап отырмыз.

Конституция күні халықтық мереке болғандықтан, барлық отандастарымызды осы айтулы мерекемен құттықтай отырып,  биылғы ерекше жыл – Тәуелсіздігіміздің 30 жылдық мерейтойы қарсаңында 30 жылдың ішінде жеткен жетістіктер мен абыройымызды одан сайын асқақтату үшін әрқайсысымыз талмай еңбек етіп, ынтымағымызды мықтай түсу керекпіз демекпін барша этномәдени бірлестіктеріне  және өзімнің Жамбыл өңірімнің халқына! Жаратқан иеміз қиналған жұртқа көмек берем деген әрбір қазақстандыққа күш-қайрат, мейірімді жүрек берсін! Еліміздің тұрақтылығының кепілі – бірлігіміз бен тірлігімізде!

Ендеше, ел аман, жұрт тыныш, Ата заңымыздың мерейі үстем болсын!

Бүгін Достық үйінде Тараз қаласы әкімінің орынбасары Алмас Садубаев Жамбыл облысы ассамблея мүшелері мен этномәдени өкілдеріне вакцинаның қажеттілігі туралы түсіндірме жұмыстарын жүргізді.

Жиналғандарға коронавирустық инфекцияға қарсы вакцинацияның маңыздылығы, вакцинация алудың шарттары мен ережелері туралы айтылды.

Алғашқылардың бірі әрі көпке үлгі болып Тараз қалалық өзбек орталығының төрағасы Абдурахман Зайнутдинов вакцинаны салдырды. Абдурахман Юлдашұлының айтуынша, жұрттың амандығы бірінші орында болуы керек.
-Екпе алу арқылы сіз өзіңізді ғана емес өзгенің де өміріне қауіпсіздік сыйлайсыз. Барлығымыз біріксек, бұл індетті жеңіп шығамыз, барлықтарыңызды екпе салуға шақырамын, – деді ол.

Әрмен қарай жиналғандар кезектесіп тәжді тажалды ауыздықтайтын бірден бір күш екпені салдырды. Екпе салу үрдісі аяқталғаннан кейін спикерлер жиылған жұрттың сауалына жауап беріп, індетті бірге жеңу керектігін тағы бір тілге тиек етті.

Жамбыл облысы әкімдігінің Ішкі саясат басқармасының “Қоғамдық келісім” КММ Баспасөз қызметі орталығы

Ағымдағы жылдың тамызда Достық үйінің конференц-залында Тараз қаласының өзбек орталығы өкілдерінің Жамбыл облысы бойынша сыбайлас жемқорлыққа қарсы іс-қимыл департаменті басшысының орынбасары Төлебаев Равиль Қуанышбайұлымен кездесуі өтті.

Жамбыл облысы әкімінің аппараты парасаттылық мәдениетін ілгерілету бойынша 2021 жылғы арналған кешенді жоспарына сай өткен іс-шара барысында атқарушы және басқа да билік тармақтары саласындағы сыбайлас жемқорлық фактілері, сондай-ақ билік құрылымдарының кейбір кемшіліктері туралы өте қызу талқыланды. Жиын басында сөз алған  Равиль Қуанышбайұлы жемқорлықтың түбі жазаға алып келетінін, өзіміздің және болашақ ұрпақтың бойында мұндай нашар қасиеттің сіңбеуін қадағалауымыз қажет екенін түсіндірді. Кез-келген жағдай да ризашылықты білдіру үшін ақшалай сыйақы ұсынуды тоқтату керек екендігіне ерекше  екпін түсіріп айтты.

Мұндай іс-шара әр жұма сайын жалғасын тауып, жемқорлықпен күресу тоқтатылмайды.

Сондай-ақ, жиын соңында Тараз қаласындағы өзбек қауымының ішінара мәселелері талқыланды. Онда негізінен Тектұрмас және Зеленый ковер аумақтарының зираттарында адамдарды жерлеу проблемалары қозғалды. Қатысушылар жерлеу іс-шаралары кезінде жариялылық  және  алым-салықпен айналысатын қабір қазушылардың жоғары бағасына наразылық білдірді және жерлеу қызметтері бюросында қандай қызметтер ақылы, сондай-ақ қандай қызметтер  ақысыз екенін нақтылауды сұрады.  Себебі қабір жұмысшылары марқұмның туыстарынан өте үлкен соманы талап ететін көрінеді.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз қызметі орталығы

Ел егемендігінің 30 жылында Отанымыз ауыз толтырып айтарлықтай жетістіктерге жеткен, келешекке деген батыл мақсаты бекіген қуатты, құнды мемлекетке айналды. Қазақстандағы қоғамның рухани дамуы мен жан-жақты өсу факторларының негізі – зайырлылық екені даусыз.

Еліміздің Тәуелсіздік алған кезеңдегі маңызды жетістіктерінің бірі саяси тұрақтылық, конфессияаралық келісім және дінаралық толеранттылық. Республикада құқықтық теңдік, ұлты мен қай діннің өкілі болғанына қарамастан, барлық азаматтардың экономикалық және қоғамдық бостандығы үшін барлық жағдай жасалған. Әлемнің барлық елдерінде, сондай-ақ біздің мемлекетіміздің де әлеуметтік өмірінде дін маңызды рөл атқарады. Жыл өткен сайын бұл рөл күшейе түсуде.

Мемлекеттік-конфессиялық қатынастардың жеке модельдерін іздей отырып, көптеген елдер зайырлы мемлекеттілік қағидатына таңдау жасады. Зайырлы мемлекет – толерантты, еркін, демократиялық. Бір жағынан, мұндай үлгі ұлтты біріктіруге, мәдениетаралық қарым-қатынасты қамтамасыз етуге, ортақ іс пен өркендеу үшін диалог орнатуға мүмкіндік береді. Екінші жағынан, ол біртұтас халықты құрайтын этникалық топтардың, мәдени, діни қауымдастықтардың өзіндік ерекшелігін сақтайды.

Ата-Заңымыздың бірінші бабында «Қазақстан Республикасы өзін демократиялық, зайырлы, құқықтық және әлеуметтік мемлекет ретінде орнықтырады, оның ең қымбат қазынасы – адам және адамның өмірі, құқықтары мен бостандықтары» делінген.

Бүгінде Қазақстанда бейбітшілік пен өзара келісім ішінде 140 этника мен 40 конфессия өмір сүруде. Республикамыз көпұлтты және көпдінді қоғамнан тұрады.

Зайырлы мемлекеттің маңызды аспектісі – дін ережелері конституциялық жүйеге қайшы келмеуі, мемлекеттің қауіпсіздігіне нұқсан келтірмеуі, әлеуметтік, ұлттық және діни алауыздықты тудырмауы керек. Яғни діни сенім бостандығы құқығын қоса алғанда, адам құқықтары мен бостандықтарын қорғаудың нақты тетігін жасайды. Түрлі ұлт өкілдері тұратын Қазақстан үшін бұл бұрынғыдан да өзекті. Осы орайда Елбасымыздың тағы бір сөзі ойға оралып тұр. Нұрсұлтан Әбішұлы «Қазақстан – зайырлы мемлекет, сондықтан дін саласындағы саясатымыз конфессияаралық бейбітшілік пен толеранттылықты нығайтуға бағытталған. Ар-ождан бостандығына Конституция кепілдік береді» деп нақтылаған болатын.

Тәуелсіздіктің 30 жылы ішінде біздің еліміз халықтың рухани дәстүрлерін жаңғырту мен сақтаудың қаншалықты маңызды екенін нақты мысалдармен көрсетті. Мемлекетіміз тек әділетті әлемдік тәртіп адамзат қоғамының өркендеуінің негізі бола алатындығын дәлелдеді.

«Тараз қаласының өзбек орталығы»

қоғамдық бірлестігі жетекшісі

Абдурахман Зайнутдинов

Ағымдағы жылдың 6 шілдесі күні Тараз қаласындағы Достық үйінде Жамбыл облысы әкімдігінің ішкі саясат басқармасының «Қоғамдық келісім» КММ ұйымдастыруымен Елорда күні мерекесіне және Қазақстан Республикасы Тәуелсіздігінің 30 жылдығына арналған «Ел тірегі – Елорда» фестивалі өтті.

Мерекелік шараның негізгі мақсаты – этносаралық қатынастарды нығайту, сақтау және болашақ ұрпаққа этностар мәдениетін, дәстүрлері мен әдет-ғұрыптарын дәріптеу болып табылады.

Аймақтық ассамблея шығармашылық топтарының қатысуымен өткен фестивальдің шымылдығын «Үкілім-ай» би ансамблі қазақ биімен ашты. Іс-шара барысында Жамбыл облысы әкімдігінің ішкі саясат басқармасы басшысының орынбасары Мақпал Досымбекова аймақтық ассамблеяға және қоғамға еңбегі сіңген бірқатар жандарды облыс әкімінің орынбасары Дәулет Кәрібектің арнайы алғыс хаттарымен марапаттап, құттықтау сөз сөйледі.

Еңбегі еленіп, алғыс арқалағандардың қатарында облыстық М. Қашқари атындағы ұйғыр этномәдени бірлестігің өкілі Данияр Абдусаметов, «Ахыска» түрік этномәдени бірлестігінің төраға орынбасары Ибрагим Зуфаров, «Әулиеата» қазақ мәдени орталығының төраға орынбасары Айгүл Қабиева, «Вайнах» Жуалы ауданы бойынша шешен этномәдени орталығының төрағасы Лечи Оздамиров, «Шиват-цион» еврей этномәдени бірлестігінің өкілі Наталья Перфильева, Жамбыл облысы әкімдігінің ІСБ «Қоғамдық келісім» КММ Баспасөз қызметі орталығының басшысы Бибігүл Утепова, бас есепші Рабиға Асанкулова, «Juwel» неміс жастары ұйымының өкілі Дарья Борсукова, «Жаңғыру жолы» жастар қанатының мүшелері Мишель Вернер және Рамазан Искаков болды.

Фестивальдің концерттік бағдарламасында «Infiniti», «Үкілім –ай» би ансамбльдері, «Калинка» вокалдық тобы және Аян Тынышбек, Әсем Әбілбай, Қосақбаева Ақбота өнер көрсетті.

Кеш соңы Нұр-Сұлтан қаласына арналған әсем әнге Жамбыл облысы әкімдігінің ішкі саясат басқармасының «Қоғамдық келісім» КММ жастарының флешмоб билеуімен аяқталды.

Жамбыл облысы әкімдігінің ІСБ

«Қоғамдық келісім» КММ

Баспасөз қызметі орталығы