Қазақстан атом электр станциясын салу арқылы энергетикалық тәуелсіздікке маңызды қадам жасалады. Бұл жай ғана жоба емес, бұл елдің болашағына салынған инвестиция. Атом энергиясы – бұл мұнай мен газ бағасының өзгеруіне тәуелді емес тұрақты және сенімді электр көзі.

Сонымен қатар, атом станциялары зиянды шығарындыларды іс-қимыл жүзінде шығармайды, оларды климаттың өзгеруіне қарсы күресте маңызды элемент етеді.

Біз уранның бай қорымен Қазақстан осы салада көшбасшы бола алатынын мақтан тұта аламыз. Бұл еліміз үшін табиғатты қорғай отырып, әлемдік энергетикалық нарықта дамуға және бәсекеге қабілетті болып қалуға мол мүмкіндік.

Сартиф Исманалиевич Алиев, Жамбыл облыстық «Барбанг» Күрділер этномәдени бірлестігінің төрағасы

Халықаралық қарттар күні мерекесі қарсаңында өңірлік Қазақстан халқы Ассамблеясы жыл сайын арнаулы әлеуметтік қызметтер ұсыну орталығына барып, қазыналы қарияларға құрмет көрсетеді.

Биылда бұл үрдістен жаңылмай облыстық ақпарат және қоғамдық даму басқармасы “Қоғамдық келісім” мекемесі аталмыш орталықта болып, қарттарды тағылымы мол мерекемен құттықтап қайтты.

Ел қазынасы қарттарды ұлықтайтын мерекеде облыстық «Қоғамдық келісім» мекеме басшысының орынбасары Сәуле Досымбекқызы, облыстық «Ахыска» Түріктер этномәдени бірлестігінің төраға орынбасары Жалил Аббосов орталықтың қызмет алушыларын мерейлі мерекелерімен құттықтап, сыйлықтарын тарту етті. Айта кетейік, мерекелік сияпаттарға облыстық мәслихат депутаты, ҚХА меценаты Жалил Әзімұлы демеушілік еткен болатын.

Шара барысында айтулы күнмен тұспа-тұс өмірге келген орталықтың қызмет алушысы Мақұлбек Ортаев қарияны жиналған көпшілік туған күнімен құттықтап, ақ тілектерін жеткізді.

Бұдан соң мерекелік жиын концерттік бағдарламаға ұласты. Жамбыл облыстық Грек этномәдени бірлестігі «INFINITY» би ансамблінің өнерімен бастау алғанконцерттік шарада Диас Нұрпейсов, Мадина Бекмурзаева, Алуа Дәулетбергенова және Қалижан Саркеев секілді облыстың жас өнерпаздары «Қазақстаным», «Әке-ана», «Құнан нар», «Туған ел» әндерін нақышына келтіре орындап, көпшіліктің құлақ құрышын қандырды.

Арнайы сый-сияпатын дайындап, құрмет көрсеткен ұйымдастырушыларға қариялар атынан орталықтың мәдени ұйымдастырушысы Эльмира Қараулова алғысын білдірді.

Ағымдағы жылдың 30 қыркүйегінде облыстық ақпарат және қоғамдық даму басқармасы «Қоғамдық келісім» КММ ұйымдастыруымен «Ұлы даланың ұлтаралық тілі» облыстық форумы өтті.

«Мемлекеттік тіл – этносаралық қатынас тілі» жаңа жобасының тұжырымдамасына сәйкес мемлекеттік тілді ілгерілетіп, қолданыс аясын кеңейтуге бағытталған шараға облыстық ҚХА мүшелері, мемлекеттік тілді меңгерген өзге этнос өкілдері, «Мәміле» клубының мүшелері, этномәдени бірлестіктер, өңірлік «Ассамблея жастары» РҚБ, тілдерді оқыту орталығы, БАҚ өкілдері қатысты.

К.Әзірбаев атындағы Жамбыл облыстық филармониясының әншісі Динара Маханованың орындауындағы «Қанекей тілім сөйлеші» әнімен шымылдығы түрілген жиынның алғы сөзін облыстық ҚХА төрағасының қоғамдық орынбасары, ҚХА Ақсақалдар кеңесінің төрағасы Асқарбек Сейілхан алып, мемлекеттік тілді меңгеру – ұлтты ұйыстырудың өзегі екендігін атап өтті.

Айта кетейік, өңірлік ҚХА жанынан мемлекеттік тілді еркін меңгеріп, қолдану көкжиегін кеңейтіп жүрген этностар арасынан 71 спикерлер пулы қалыптасқан болатын. Бүгінгі форум барысында үздік спикерлер қатысушыларға танымдық бағытта баяндамалар жасап, өз ойларымен бөлісті.

Форум жұмысы барысында «Қазақ тілін қалай үйрендім?» тақырыбында өзге ұлт өкілдерінің төл тілімізді қалай үйренгені туралы естеліктері айтылды. «Мемлекеттік тіл – әлеуметтік баспалдақ» айдары аясында медицинада мемлекеттік тілді дәріптеп жүрген Жуалы аудандық ауруханасы хирургия бөлімінің меңгерушісі, беделді хирург, аудандық мәслихат депутаты, Әзірбайжан этносының өкілі Қалды Байрамов қызмет барысында қазақ тілді білгеннің тиімділігі турасында ой бөліссе, «Қазақстан татарлары мен башқұрттары конгресі» РҚБ жастар қанатының төрағасы Риналь Рахматуллин қазақ тілін меңгеру арқылы үлкен жетістіктерге ие болғанын жеткізді.

Мемлекет басшысы Қасым-Жомарт Тоқаев биылғы Жолдауында келесі жылды «жұмысшы мамандықтар жылы» деп жариялаған болатын. Еңбек адамдарына деген құрмет алдыңғы орында болуы керек. Қазақстан халқы Ассамблеясының «Адал азамат» жобасының да мәні осындай. Аталмыш жоба шеңберінде өңірдегі Жаңа Жамбыл фосфор зауытының инженер-технологы, кәріс этносының өкілі, техника тілін қазақшалаған Тен Дмитрий өзінің пікірін ортаға салды.

Сондай-ақ, ауқымды шарада тіл байқауларының жүлдегері, Қордай ауданы Қарасу ауылдық мәдениет үйінің меңгерушісі Елена Борисевич, «Қазақстандық татар және башқұрттар конгресі» РҚБ облыстық филиалының төрағасы Фарида Нақыш, Сарысу аудандық орыс тілі мен әдебиеті пәнінің мұғалімі Валентина Савчук, Қаратау ауданы №1 мектеп-лицей мұғалімі Ханумхас Ахметова, Мойынқұм аудандық «Ақбөпе» бөбекжай-бақшасының меңгерушісі Телли Давыдова, Жуалы аудандық Шақпақ ата ауылдың округі әкімі аппаратының мемлекеттік қызметкері Рамиля Тальбова «Менің қазақ тіліне жету жолым» тақырыбында ой білдіріп, қатысушыларды мемлекеттік тілді үйренуге шақырды.

Сонымен қатар, қоғам қайраткері, Әлем халықтары Жазушылар Одағының мүшесі Үміт Битенова және ҚХА Журналистер клубының мүшесі Марат Құлибаев та форумда белсенділік танытты.

Ал облыстық Тілдерді оқыту орталығының мамандары Назира Ұзақбай форум қатысушыларымен «Қазақша сөйлесейік» тақырыбында тренинг жүргізсе, Айнұр Ақботаева қазақ тілін үйренуге арналған «ІТ жобалар» платформасын таныстырды.

Биылғы жыл рухани қазынаға бай жыл. Себебі, 2024 жылы қазақ әдебиетінің негізін салушы, ақын, жазушы, драматург Ілияс Жансүгіров пен ақын, жазушы Сәкен Сейфуллиннің, Бейімбет Майлиннің туғанына 130 жыл, ақын, драматург Жүсіпбек Аймауытовқа 135 жыл, ақын, жырау, әнші, композитор Кенен Әзірбаевтың туғанына 140 жыл, балалар жазушысы, ақын, сценарист Бердібек Соқпақбаевтың және қазақ әдебиетінің дамуына зор үлес қосқан белгілі жазушы, аудармашы Әбдіжәміл Нұрпейісовтің 100 жылдығы. Айтулы даталарға орай, «Мәміле» пікір талас клубының мүшелері ақын-жазушылардың тіл тақырыбындағы шығармаларын оқып, облыстық филармония әншісі Нұргүл Абдрашова Кенен Әзірбаевтың «Шырқа даусым» әнін нақышына келтіре орындады.

Шара соңында ҚХА-ның тіл туралы жобаларын ілгерілетуге атсалысқан этнос жастары, атап айтсақ, «Қазақстан татарлары мен башқұрттары конгресі» РҚБ жастар қанатының төрағасы Риналь Рахматуллин мен өңірлік «Ассамблея жастары» РҚБ белсенділері Эсмер Дурсунова және Аяна Ким «Тіл жанашыры» белгісі бойынша марапатталса, мемлекеттік тілдің мәртебесін көтеруге үлес қосқан бірқатар азаматтарға Алғыс хаттар мен бағалы сыйлықтар табысталды.

2024 жылдың 30 қыркүйегінде Тараз қаласындағы «Қоғамдық келісім» мекемесінде (Достық үйі) Тараз қалалық Өзбек этномәдени бірлестігінің жиналысы өтті.

Жиында ҚР Президенті Қ. Тоқаевтің “Әділетті Қазақстан: Заң және тәртіп, экономикалық өсу, қоғамдық оптимизм” атты Қазақстан халқына Жолдауы және алдағы референдумға қатысты өзекті мәселелер талқыланды.

Оның бірі — Қазақстанда АЭС салу тақырыбы тілге тиек етілді. Егжей-тегжейлі талқыланған маңызды мәселеге байланысты өзбек жұртшылығының түрлі ой-пікірлері ортаға салынды.

Аудитория алдында Жамбыл облыстық Өзбек ұлттық-мәдени орталығының президенті Бахром Муминов, Тараз қаласы Өзбек орталығының төрағасы Абдырахман Зайнутдинов және т. б. сөз сөйледі.

Қазақстан халқына Жолдаудың маңызды аспектілері, алдағы референдумның маңыздылығы және оның Қазақстанның дамуы үшін маңызы, энергетиканың даму перспективалары, энергия көздері, Атом станциясының басқа мемлекеттердегі жұмыс барысы, қауіпсіздігі, экологияға әсері және т.б.проблемалар сөз болды.

Сонымен бірге, іс-шара барысында Медиация кабинетінің басшысы Валентина Досыбиева Этномедиацияның бағыты, Жамбыл облысы ҚХА этномедиация Кеңесі туралы айтып өтті.

Шара соңы марапаттау рәсімімен аяқталды. Өзбек ұлттық-мәдени орталығының президенті Бахром Тохтасунұлы Өзбек қоғамдастығының бірқатар өкілдеріне ҚХА аясында атқарған қоғамдық-мәдени белсенді жұмыстары үшін алғыс хаттар мен сыйлықтар табыс етті.