Қазір Отанымыздың астанасы Нұрсұлтан қаласында Қазақстан халқы Ассамблеясының ХХХ сессиясы өтуде. Шараның жоғары деңгейін, жаңа форматын және қызықты көрсетілімін атап өткім келеді. Делегаттардың пікір алмасуға, өз ұсыныстарын атап айтуға, өз көзқарасын білдіруге мүмкіндіктері мол болды. Бұл сессия спикерлер мен ҚХА мүшелері арасында өте пайдалы пікірталастармен ерекшеленді. Сөз сөйлеушілер Қазақстан халқы Ассамблеясының жұмысына қатысты нақты ұсыныстар енгізді. Пікірталас барысында мен этномәдени бірлестіктер өкілдерінің қаншалықты ойларын еркін, ашық жеткізе алатындарына қайран қалдым. Жастарға қатысты секцияларда жас ұрпақтың ассамблея мақсат-міндеттерін атқарудағы  тиянақты іс-қимылдарын,   аға буын алдындағы белсенділігін ерекше атап өткім келеді. Бұл жастардың Қазақстан халқы Ассамблеясының бүгінгі сессиядағы  Ассамблеяға байланысты пікір-ұсыныстарын естіп,  көңілдері жүйрік, ойлары терең жастарымыздың ой еркіндігі мен талмас талаптарына тәнті болдым.

Бұған қоса, бүгінгі күннің екінші жартысында ҚХА-ның ХХХ сессиясы аясында Тараз қаласы Достық үйінде Қазақстан халқы Ассамблеясының жастар сессиясы да өтті. Оған облысымыздың белсенділері – «Ассамблея жастары» ҚБ мүшелері қатысты. Онлайн түрінде өткен іс-шараға қатысушылар өз идеяларымен бөлісіп, өзекті мәселелерді ашық түрде талқылады.

Өз басым Қазақстан халқы Ассамблеясының сессияларына үзбей қатысып келемін және әр сессия сайын тың дүниелер біліп, Әулиеата өңіріме ерекше сезімде ораламын. Сессия барысында  мемлекетіміз бен еліміздің бақытты болашағы үшін қозғалған маңызды мәселелер өз шешімін табады деген үміттемін. Тұңғыш Президент айтқандай  «Қазақстан халқы Ассамблеясы тірек ретінде іс басындағы Президенттің жанында тұруы тиіс және екінші жағынан Мемлекет басшысы да Ассамблеяға арқа сүйейді» деген нақыл тектес сөздері жастардың әрқашан жадында. Ендеше, мемлекет басшысы Қасым-Жомарт Тоқаевтың әділетті де мығым саясатына жастарымыз толық сенім артары сөзсіз.

Жамбыл облыстық Махмұт Қашқари атныдағы Ұйғыр этномәдени бірлестігінің төрайымы Мухабат Турдыева

Бүгін, үстіміздегі жылдың  29-сәуірінде Нұр-Сұлтан қаласының ҚР Тұңғыш Президенті – Елбасы музейінде ҚР Президенті, ҚХА Төрағасы Қасым-Жомарт Тоқаевтың төрағалығымен Қазақстан халқы Ассамблеясының ХХХІ сессиясы өтті.

Сессияға республикалық және өңірлік ассамблеяның мүшелері, қоғам қайраткерлері, республикалық және өңірлік этномәдени бірлестіктердің, орталық және жергілікті атқарушы органдардың, діни бірлестіктердің басшылары, Парламент депутаттары, ҮЕҰ, ғылыми, шығармашылық зиялы қауым өкілдері және  республикалық  бұқаралық ақпарат құралдарының өкілдері қатысты. Оның онлайн және офлайн форматтағы жұмысына Жамбыл облысының әкімі Нұржан Нұржігітов, Жамбыл облысы әкімдігінің ІСБ ішкі саясат басқармасының, “Қоғамдық келісім” КММ өкілдері, ҚХА мүшелері, Жамбыл облысының этномәдени бірлестіктерінің басшылары мен өкілдері белсенді қатысты.

ҚХА-ның бүгінгі ХХХІ сессиясының негізгі мақсаты – саяси реформа жағдайында Ассамблеяның қызметін қайта форматтау.

Сессияның күн тәртібінде тақырыбы  «Халық бірлігі – жаңарған Қазақстанның негізі» деп белгіленді және өз сөзінде  Мемлекет басшысы төзбеушілік пен «өзіміз және өзгелер» деп бөлінудің кез келген көрінісінің қатаң түрде жолын кесуге шақырды.  Қасым-Жомарт Тоқаев Қазақстан халқы өзінің бірлігін сақтауға, нығайтуға тиіс. Тек бірлескен күш-жігер арқылы ғана Жаңа Қазақстанды құра аламыз деп есептейді. Мемлекет басшысы Қазақстан қоғамы өмірінің барлық саласында, ҚХА рөлінде, этносаралық қатынастар мен Қазақстан халқының бірлігінде болып жатқан өзгерістерге егжей-тегжейлі тоқталды. Мемлекет басшысы «жаңа Қазақстан»  серпінді дамып келе жатқан әлемдегі қазақстандық жалпыұлттық бірегейлікті нығайтудың жолы екеніне назар аударды. Ол Ассамблея мүшелерін жаңа Қазақстанның мақсат-мұраттары мен құндылықтарының жолсерігі болуға шақырды. Қасым-Жомарт Тоқаев Қазақстан халқы Ассамблеясының жұмысын қайта жаңарту туралы сөз қозғап, этномедиация оқу орталығын құру және ғылыми-сарапшылық құрылымның әлеуетін арттыру, ақпараттық жұмысты күшейту, саяси реформаларға белсенді қатысу қажеттігін атап өтті.

– Біз барлық жоспарымызды міндетті түрде жүзеге асырамыз. Мен бұған кәміл сенемін. Біз Екінші Республиканы бірге құрамыз, Жаңа Қазақстанды бірге өркендетеміз! Әр азаматқа бірдей мүмкіндік беретін  әділ әрі дамыған мемлекет боламыз! Сөз соңында сіздерді алда келе жатқан Қазақстан халқының бірлігі күнімен және Ораза айт мерекесімен құттықтаймын!, – деп сөзін аяқтады Қасым-Жомарт Тоқаев.

Сессия барысында, отырыста сөз сөйлеген спикерлер – Л.Н.Гумилев атындағы Еуразия ұлттық университетінің кафедра меңгерушісі Наталья Калашникова, «Қазақстан корейлері қауымдастығы» заңды тұлғалар бірлестігінің президенті Сергей Огай, «Халықаралық қазақ тілі қоғамы» қоғамдық бірлестігінің вице-президенті Максим Рожин, саяси шолушы Никита Шаталов, Л.Н.Гумилев атындағы Еуразия ұлттық университетінің проректоры Дихан Қамзабекұлы, «Азаттық Рухы» агенттігінің тілшісі Надежда Палинка, «Ахыска» түрік этномәдени орталығы» республикалық қоғамдық бірлестігінің Нұр-Сұлтан қалалық бөлімінің төрағасы Әскер Пириев және музыкант, блогер Алексей Лодочниковтер сөз сөйледі. Олар  Қазақстанда әрбір этнос үшін барлық жағдай жасалғанын атап өтті. Сондай-ақ, ҚХА-ның этносаралық келісімді нығайтуға бағытталған жұмысы, жастар жобалары, тіл мәселесі, журналистің ақпарат беру кезіндегі этикасы туралы және ақпараттық алаң мен блогосферадағы құқықтар мен жауапкершілікті заңнамалық тұрғыдан бекіту туралы құнды ұсыныстар айтылды.

Жамбыл облысы әкімдігінің ІСБ

«Қоғамдық келісім» КММ

Баспасөз қызметі орталығы

Бүгін, көктемнің бір шуақты күнінде Мемлекетіміздің астанасы – Нұр-Сұлтан шаhарында Қазақстан халқы Ассамблеясының  ХХХ сессиясы өтті.  Биыл Президентіміздің ұсынысы бойынша ҚХА-ның екі сессиясы қатар өтуде.

Бүгінгі ХХХ сессия өте жоғары, оң деңгейде өтті десем қателеспеймін.  Сессияның өткізілу тәртібі түбегейлі өзгерген, өте қызықты, әрі еркін форматта өтті десек те болады.

Аталмыш іс-шараның өткізіліуі бірнеше секцияға бөлінген.  Әр бөлімде тұлғалы спикерлер сөз сөйледі. Мәселен, олардың қатарында ҚР Парламентінің депутаттары, қоғам қайраткерлері, үкіметтік емес ұйым өкілдері, ҚХА мүшелері болды.

Бұл сессия сайлау үрдісі бойынша өткізілгендіктен, ҚХА депутаттығына үміткер кандидаттарға  дауыс берілді. Сайлау нәтижесінде Алматы облыстық Ұйғыр этномәдени орталығының өкілі, ұйғыр бауырымыз Зәкіржан Кузиев жеңіске жетті.

Әрмен қарай жастар сессиясына жалғасқан іс-шарада сөзі нық, ойы ұшқыр белсенді жастар сөз сөйлеп, еркін микрофонда өз ойларын ашық түрде ортаға салды. Әрбір қатысушы  өз пікірін білдіріп, жастар секторының жұмысы бойынша өз ұсыныстарын ашық, айқын  білдіре алды. Сессияның ерекшелігі де осында  – ашық және еркін түрде өтті. Ертең ҚХА-ның ХХХІ сессиясына да қатысу – біздің атқаратын міндеттердің бірі ретінде жоспарда тұр.

Жалпы, бұл сессиялар – Ассамблеямыздың толық жаңғыруын, жаңаруын  көрсететін іс-шаралар.  Сессияға қатысатын ҚХА-ның әрбір мүшесі «еркін микрофонға»  барып, өз пікірін білдіруге толық құқылы. Сондай-ақ, халық тарапынан ассамблеяның маңайында сөз боп жатқан түрлі ұсыныстар мен сауалдарды талқылау барысында Қазақстан халқы Ассамблеясының барлық құрылымдары мен бөлімшелерінің жұмысын жақсарту, дамыту бойынша тың  шешімдер қабылданбақшы.

Тағы бір айта кетер жайт –  сессия спикерлер мен ҚХА мүшелері арасында өте пайдалы пікірталастармен де ерекшеленді. Пікірталас барысында этномәдени бірлестік өкілдерінің қаншалықты құзыретті екені байқалды. Міне, алдымызда   Қазақстан халқының бірлігі күні келе жатыр, сессиямен тұстас келген бұл сүйікті мереке достықты, отансүйгіштікті, құрметті, ұйымшылдықты, өзара сенімді, жасампаздықты бейнелейді. Ең бастысы, бәрімізді біріктіретін  нәрсе – бірлігіміз, ынтымағымыз. Конституциямыздағы ортақ заң, тең құқықтылық, әріптестік, достық қатынастар, ешқандай ұлтқа бөлінбестен біздің бір-бірімізге деген ой-ниетіміздің тазалығы, еркіндігі  және өзара түсіністік – осы игі қасиеттер бойымызда бар болған  жағдайда ғана біз жаңа Қазақстанды бірлесе құру жолында, оның өркендеуінің, оң өзгерістерінің және жарқын болашағының кепілі бола аламыз.

Қазақстан шаңырағының астында әрқашан достық, бейбітшілік пен келісім нығая берсін!!

Жамбыл облыстық «Әулие Ата» Қазақ мәдени орталығының төраға орынбасары, М.Х.Дулати атындағы Тараз өңірлік Университетінің «Мәдениет және өнер» кафедрасының меңгерушісі, профессор, ҚР мәдениет қайраткері, ҚХА мүшесі – Айгүл Кабиева

Қасиетті Рамазан айында қайырымдылық түскі ас беру Жамбыл облыстық этномәдени бірлестіктері жомарт та қайырымды жандарының игі дәстүріне айналды. Рамазан айы – рақымшылық айы, айлардың сұлтаны болғандықтан көптеген адамдар игі істер жасауға, қиын өмірлік жағдайға тап болған адамдарға көмек пен қолдау көрсетуге тырысады. Көмек пен қолдауды қажет ететіндердің арасында мүмкіндігі шектеулі адамдар да бар. Осы орайда,      аталмыш  санаттағы жандарға Тараз қаласының Өзбек мәдени орталығының меценаттары шын жүректен қайырымдылық ауызашар-ифтар өткізді. Бұл маңызды шара ағымдағы жылдың сәуір айында Тараз қаласының “Омад” кафесінде өтті. Онда келушілер мен қонақтарға арналып  бай және жомарт дастархан жайылды. Ұйымдастырушылардың бірі – Тараз қалалық мәслихатының депутаты Әлішер Әлімұратұлы Кәрімов 35 адамға арналған қайырымдылық іс-шараны өткізуге көмек көрсетті. Осымен Тараз қаласының Өзбек мәдени орталығы меценаттарының қайырымдылық көмегі аяқталған жоқ. Мәселен, “Наргиз” кафесінде 30 адамға қайырымдылық түскі ас берілді. Бұл шақырылғандардың арасында да  мүмкіндігі шектеулі жандар болды.  Қиын өмірлік жағдайда қалған жандарға көмектесу және қолдау білдіру – біздің өңірлік ҚХА меценаттарының қалыпты ісіне айналды. Сондықтан қасиетті Рамазан айындағы әлеуметтік жағдайы төмен отбасыларға  қайырымдылық жасаушы ер-азаматтардың пейілі кең, қолы ашық болсын! Жасаған жақсылықтары  өздеріне еселеніп қайтарылары сөзсіз.

Жамбыл облысы әкімдігінің ІСБ

«Қоғамдық келісім» КММ

 Баспасөз қызметі орталығының басшысы Бибігүл Шахзада