Мәдениет саласына өзіндік үлесін қосып жүрген облыстық «Днепро» Украин этномәдени орталығының «Марічка» халықтық ансамбліне биыл – 20 жыл толды.

Осыған орай, Ы.Дүкенұлы атындағы қалалық мәдениет үйінде мерекелік кеш ұйымдастырылды.

Өңірімізге белгілі вокалдық ансамбльдің мерейтойына арналған шарада «Қоғамдық келісім» КММ басшысының орынбасары Сәуле Құрманқұлова сөз алып, аймақ мәдениетіне айтарлықтай үлес қосқан ансамбль мүшелерін марапаттады.

Одан кейін сахнаға «Днепро» Украин этномәдени орталығының төрағасы Федор Клименко шығып, өнер ұжымының құрылу тарихы мен алғашқы құрамы жайлы айтып өтті. Айта кетейік, ансамбль ұжымы құрылғалы бері тыңдармандарды ерекше дауысымен, ырғағымен тәнті етіп, облыста өтетін мәдени шараларға белсенді қатысады.

Қалалық Мәдениет үйінде өткен мерекелік кеште өнер ұжымы көрермендерге концерттік бағдарлама әзірлеп, кештің шырайын келтірді.

Атап өтсек, ансамбль репертуарындағы «Ти ж мене підманула», «У сусида хата біла», «Несе Галя вода», «Арыс жағасында», «Марічка», «Червона Рута», «Гуцулка Ксеня», «Черемшина», «Маруся» секілді жанды дауыста таңдаулы әндер шырқалып, көрермендердің қошеметіне ие болды.

Дәл осы шараға мерейтой иелерін құттықтауға өзіне 50 жыл толып отырған — «Красная гвоздика» шығармашылық тобы келді. Аталған ансамбль ардагерлерінен құралған халық хоры және В.Сорокин басқаратын «Асыл Ана» халық вокалдық ансамблі де, басқа да әртістер өз репертуарындағы әсем әндермен мерейлі кештің сәніне зор үлесін қосты.

Олардың орындауында «Слава тебе, Мой Казахстан», «Хлеб всему голова», «Осенний сон», «Ехал я из Берлина», «Угәй-ай», «Ах, Самара городок» және т. б. бірқатар әндер шырқалды.

Әндердің ерекше мелодиясы, музыканың тереңдігі мен әсемдігі, мюзиклмен жеткізілген күлкілі де қызықты қойылған сахналық көріністері, әртістік қабілеттері, орындаушылық шеберлігі мен сахна мәдениетінің жоғары деңгейі көрермендерді қуантты.

Мерекелік концерт жоғары деңгейде өтіп, көрермендер үшін де, орындаушылардың өздері үшін де нағыз мейрамға айналып, келушілердің жүрегінде ұмытылмас әсер қалдырды.

ҚХА-ның «Тіл мектебі» жобасы – түрлі этностар өкілдерінің мемлекеттік тілді меңгеріп қана қоймай, қазақтың мәдениеті мен тарихын тануға бағытталған бастама. Аталған жоба шеңберінде Меркі ауданы «Тұран» демалыс аймағында еліміздің әр аймағынан жиылған 40-қа жуық қатысушы шараның төртінші күнін мерейлі Меркінің көрікті жерлерімен танысудан бастады.

Бұдан кейін тіл үйренуші жастарды Меркі аудандық ҚХА Ақсақалдар және Аналар кеңесінің өкілдері Қостоған ауылы Жаңатоған ауылдық округінің мәдениет үйінде бар сән-салтанатымен қарсы алды. Бұл күні жастарға қазақ халқының ұлттық салт-дәстүрлері кеңінен дәріптеліп, тарихы таныстырылды. Ауылдық мәдени мекемеде қатысушыларға арналып қазақ, түрік, өзбек, әзірбайжан, украин халықтарының ұлттық астары әзірленіп, дастархан жайылды. Қазақтың қазысы мен қартасы, қымызы мен құрт-ірімшігінен дәм татқан тіл игеруші жастар ерекше тамсанып, қызығушылық танытты. Сондай-ақ, Аналар кеңесінің құрт жаю, таба нан пісіру, киіз басу, кілем тоқу, жүн сабау, ұршық иіру, қонақ кәде сынды дәстүр жоралғылары көрсетілді.

Шара одан ары Қостоған ауылдық #14 орта мектебі оқушыларының концерттік бағдарламасына ұласты. Жоғары деңгейде ұйымдастырылған жиында тіл жанашыры, жоба спикері Жанат Қажығалиева, Меркі аудандық Ақсақалдар кеңесінің төрағасы Байсейіт Жылысбаев, облыстық “Қоғамдық келісім” КММ жобаларды жүзеге асыру және ҚХА құрылымдарымен жұмыс бөлімінің басшысы Аққу Қаратаева, блогер, тіл жанашыры Анастасия Ульченко сөз алып, жастарға жобаның беретін мүмкіндігі мол екендігін айтты.

Мемлекеттік тілді өзге этнос жастарына меңгертудің әдістерін заманауи тұрғыда жеткізіп жүрген Украин қызы Анастасия Ульченко қазақтың ибалы келіні. Салт-дәстүрді берік ұстанған тіл жанашырына аталған мектептің зейнеткер ұстазы, “Білім беру саласының үздігі” Ольга Федоровна ақ орамал жауып, ілтипатын білдірді.

Кездесуде аудандық Аналар кеңесінің төрағасы Қайнаркүл Татықұлова бірлікке ұйыған елге береке ұялайтындығын айтып, жастарға ізгі тілегін жеткізді.

Үлкендердің ақ батасын алып, жылы лебізін тыңдаған қатысушылар да сый кәде ретінде ән мен биден шашу шашып, қошеметке бөленді. Шара барысында ауыл жастары мен Ассамблея жастары арасында мәдениетаралық диалог орнады.

Жиын соңында шараны ұйымдастыруға атсалысқан аудандық Ақсақалдар және Аналар кеңесіне “Қоғамдық келісім” РММ-нің Алғыс хаты табысталды.

Жас жеткіншектердің бойында қазақстандық патриотизм мен мәдени мұраны қалыптастыру мақсатында Жамбыл облысы Жамбыл ауданы Гродеково ауылының орта мектебінде “Карачаевцев және балкарцев – бірлік” РҚБ “Архыз” филиалының басшысы, осы оқу орнының түлегі Лели Удденованың 11 “Б” және 11 “В” сынып оқушыларымен кездесуі ұйымдастырылды.

“Ынтымақтастық — достық белгісі” тақырыбындағы іс – шара Жамбыл облысының 85 жылдығына арналды.

Кездесу барысында бірлік пен келісім, достық, ынтымақтастық, патриотизм, мәдени мұра, маңызды моральдық қасиеттер және т.б. туралы айтылды.

Өскелең ұрпақты ұлттық құндылықтармен сусындатып  тәрбиелеуде өңірлік Қазақстан халқы Ассамблеясы «Ассамблея бөбектері» және «Біртұтас тәрбие» бағдарламасы аясында қалалық білім бөлімімен тығыз жұмыс жасауда.

Ағымдағы жылдың мамыр айында облыстық «Қоғамдық келісім» мекемесі мен қалалық білім бөлімі  «Бір тұтас тәрбие» бағдарламасына сай «100 кіші бағдарлама» аясында әдістемелік материалдарды әзірлеудің 2024-2026 жылдарға арналған жоспарын әзірлеп, меморандумға қол қойған болатын.

Аталған жобаны ілгерілету мақсатында «Қайнар и С» ЖШС  бөбекжай-балабақшасы «Жасыл ел, жасыл балабақша» тақырыбында қалалық семинар ұйымдастырды. Шара мектепке дейінгі балаларды қоршаған әлемді танып, табиғатты аялауға және экологиялық мәдениетті қалыптастыруға бағытталған. Жиынға қатысқан  мектепке дейінгі білім бөлімінің әдіскері Гульфайруз Есенқұлова, бөбекжай құрылтайшысы Сағат Жүнісбеков, «Қазақстанның үздіксіз білім беру қауымдастығы» ЗТБ Жамбыл филиалының төрағасы Эльнұр Құрманәлиева және  «Қайнар и С» ЖШС  бөбекжай-балабақшасының меңгерушісі  Бағдат Жүнісбек ұлттық құндылықтарды негізге ала отырып, ел  бірлігін нығайтуға, әділетті қоғам құруға білімді, адал ұрпақты тәрбиелеуде мұндай жарқын  жобалардың берері мол екендігіне кеңінен тоқталды.

Іс-шара аясында балабақша жанынан «Гидропоника әлемі» атты арнайы орталық ашылып, лентасы қиылды. Сондай-ақ, кездесу барысында бөбекжай-балабақша тәрбиеленушілерінің алтын күзге арнаған мерекелік бағдарламалары мен  біртұтас тәрбиені негізге алған әкелер мен аналар мектебінің жұмыстары да көпшілік назарына ұсынылды.