ҚХА-ның «Қайырымдылық керуені» жалпыұлттық акциясы аясында әлеуметтік осал топтағы отбасыларға арналған «Қоржын» қайырымдылық көмек көрсету акциясы басталды.«Қоржын» акциясы аясындағы көмектің таратылуына ҚХА «Ассамблея жастары» атсалысты.
Аталмыш акция бойынша 10 дана азық-түлікпен толтырылған қоржын таратылды. Бұл акция Жамбыл облысының барлық аудандарында жүзеге асырылуда.
«Қоғамдық келісім» КММ
Ақпараттық жұмыс және қоғаммен байланыс бөлімі
Біздің еліміз – көп этносты, көп мәдениетті және көп конфессиялы мемлекет. Өркениеттер тоғысында тұрған Қазақстан Шығыс пен Батысты, Еуропа мен Азияны, түрлі мәдениеттер мен діндердің адамдарын жақындастыруда елеулі рөл атқарады. Оны «өркениеттер қиылысы» деп тегін атамаған. Қазақстанда діндердің бейбіт қатар өмір сүруінің өзі оның әлеуметтік және рухани өміріндегі тұрақтылықтың кепілі болып отыр.
Рухани келісім, ұлттар мен дәстүрлі діндер арасындағы бірлік – баға жетпес байлығымыз, ал тұрақтылық – тұғырымыз. Бүгінгі берекелі күнге бірліктің арқасында жеттік. Елдің әлеуметтік-экомикалық көрсеткіші халықтардың өзара татулығы негізінде дами түсетіні түсінікті. Ел басқарған парасатты басшылар қашан да бірлік пен татулыққа аса мән берген.
Қазақстан әлемдегі саяси тұрақтылығы бекем елдердің бірі. Біздің елімізде сан ұлттың өкілі татулық пен достықтың буынын бекітіп, әлемдік дамудың көшбасшысы болуға ұмтылып келеді. Мемлекетіміздің бірден-бір алға қойып мақтанар айнасы – этносаралық татуластық. Жер шарының картасына көз салсақ, қазақ жерінің ұлан байтақ атырапты алып жатқанын көреміз. Қазақ елінің көңілі де дәл сондай, кең, дархан. Соның арқасында, Қазақстан жерінде 140-тан аса этнос өкілдері татулықта өмір сүріп келеді. Алғыс айту күнінің қарсаңында баршаңызды шын жүректен құттықтай отырып, бұдан әрі де арамыздағы сыйластығымыз артып, бірлік пен келісімді бірге нығайтайық дегім келеді.
Ел іргесі тыныш болсын! Құрметті де қадірлі жамбылдық жерлестерім, өмірде барларыңызға разымын, баршаңызға алғысым шексіз! Алғыс айту күні құтты болсын!
Жамбыл облыстық Тәжіктер этномәдени бірлестігінің төрағасы Орифов Махкам Жұманазарұлы
Сіздерді 1 наурыз – Алғыс айту күнімен құттықтаймын!Бұл мерекенің терең мағынасы мен мәні бар.Наурыз – көктемнің белгісі, ал 1 наурыз – сан ғасырдан бері жалғасып келе жатқан ізгіліктің мерекесі, Наурыз мейрамы аталып өтілетін шуақты айдың басы.
Бұл күн – Қазақстандағы барлық этнос өкілдерінің өзара құрметі мен татуластығы айрықша білінетін күн, сонау саяси қудалау жылдары біздің Отанымызға жер аударылып, қазақ жерінен пана тапқан жандардың риясыз алғыс айту күні.
Алғыс айту күні – бір-бірімізге құрмет көрсететін күн, ортақ тарихымызды ұлықтайтын мереке.
Көктемнің алғашқы белгісіндей болатын осынау мереке қазақ жеріндегі татулық пен бірлікті, молшылық пен Тәуелсіздікті нығайта берсін!
“Жамбыл облыстық Өзбектер этномәдени бірлестігі” қоғамдық бірлестігінің төрағасы Муминов Бахром Тохтасунұлы
Сіздерді көктемнің алғашқы күнімен тұспа-тұс келген «1 наурыз – Алғыс айту күні» мерекесімен шын жүректен құттықтаймын!
Талай уақыт қиындықты бастан өткерген қазақ халқы бейбіт күннің есігін айқара ашып, тәуелсіздікке қадам басқалы ширек ғасырдан астам уақыт болды. Қай кезеңде де қазақ халқы ұлт өкілдерін қанатының астына алып, қамқорлық көрсете білді. Бүгінде түрлі этнос өкілдері қазақ жерін мекен етіп, өз туған өлкесіндей қастерлейді.
Ауызбірліктің нағыз үлгісін көрсетіп, ұлтымыздың дінін, ділін, тілін құрметтеп, мәдениетін, салт-дәстүрін, әдет-ғұрпын қатаң сақтап, ұрпақтарына дәріптеуде
Айтулы күн адамзатқа барын бағалай білуге, әр іске жақсылықпен жауап қайтаруға өзіндік үлесін қосады.
Алғыс айту күні – бір-бірімізге құрмет көрсететін күн, ортақ тарихымызды ұлықтайтын мереке.
Мәңгілік татулығымыз берекелі де, баянды, еліміздегі бірліктің көкжиегі кеңейе берсін. Баршаңызға денсаулық, отбасыларыңызға амандық тілеймін! Мереке құтты болсын!
М.Х.Дулати астындағы Тараз өңірлік университетінің “Қазақстан халқы Ассамблеясы” кафедрасының меңгерушісі, Жамбыл облыстық ҚХА жанындағы ғылыми-сараптамалық топ жетекшісінің орынбасары, Тараз қаласы әкімінің кеңесшісі Парида Мамедова
Сіздерді 1 наурыз – Алғыс айту күнімен құттықтаймын!
Бұл мерекенің терең мағынасы мен мәні бар.Тағдыр тәлкегімен Қазақстан жеріне еріксіз қоныс аударылған түрлі этнос өкілдерінің құтты қонысына айналған қасиетті қазақ жері мен қонақжай қазақ халқына терең тағзым белгісі. Қазақ халқы қиын-қыстау заманда олардың басына түскен ауыртпалықты қайыспай бірге көтере білді. Бұл бүгінгі таңда еліміздегі түрлі ұлт өкілдерінің арасындағы адамгершілік қарым-қатынастың өнегелі өлшеміне айналды.
Наурыз – көктемнің белгісі, ал 1 наурыз – сан ғасырдан бері жалғасып келе жатқан ізгіліктің мерекесі, Наурыз мейрамы аталып өтілетін шуақты айдың басы.
Бұл күн – Қазақстандағы барлық этнос өкілдерінің өзара құрметі мен татуластығы айрықша білінетін күн, сонау саяси қудалау жылдары біздің Отанымызға жер аударылып, қазақ жерінен пана тапқан жандардың риясыз алғыс айту күні.
Көктемнің алғашқы белгісіндей болатын осынау мереке қазақ жеріндегі татулық пен бірлікті, молшылық пен Тәуелсіздікті нығайта берсін!
Баршаңыздың отбасыларыңызға амандық пен саулық тілеймін!
Өңірлік ҚХА мүшесі Искандиров
Мұқаш Зұлқарнайұлы
Еліміздегі жалпыхалықтық мереке 1 наурыз күні Қазақстан халқы Ассамблеясы құрылған күнмен тұспа-тұс келеді. Аталмыш мейрам 2016 жылдан бері біздің ортақ тарихымыздың символы, Қазақстан халқының жалпыұлттық бірлігінің, құрметі мен ынтымағының күні ретінде ресми түрде мерекеленіп жүр.
Бұл – Ұлы Дала елінің ұлағатты өткеніне тағзым, Мәңгілік Елдің бүгініне және болашағы біртұтас елдің ертеңіне деген нық сенім. Сонымен бірге, Алғыс айту күні бейбітшілік пен келісім саясатының жарқын көрінісіне айнала білді. Өзара түсіністік пен бір-біріне қолдау көрсету біздің еліміздің, біздің қазақстандық үлкен отбасының рухани қағидаты болып қалыптасты.
Бұл күні біз, барлық ұлт пен ұлыс өкілдері әдебиетімізді, мәдениетімізді, өркениетімізді, тарихымызды аманат етіп табыстап кеткен ата-бабаларымызды ризашылықпен еске аламыз, ата-аналарымызға, ұстаздарымызға, зейнеткерлерге, ардагерлерге, бір-бірімізге алғыс айтып, халқымыздың қайырымдылық дәстүрлерін жалғастырамыз.
Ашаршылық пен қуғын-сүргін жылдары жазықсыз жапа шеккен халықтардың ұлдары мен қыздарына пана болған жандарға шексіз ризашылығымызды білдіреміз!
Сондай-ақ, облыстық Ассамблея іс-қимылдарына жұмыла атсалысып жүрген облыстық ҚХА мүшелері мен барлық этномәдени бірлестік өкілдеріне, облыстық, қалалық әкімдіктерге, Ішкі саясат басқармаларына, Ассамблея жастарына, «Қоғамдық келісім» РММ, КММ қызметкерлеріне де шексіз алғысымды білдіремін!
Жақсы күндеріміз көп болсын! Еліміз аман, жұртымыз тыныш болып, ел бірлігіне нұқсан келмесін!
Жамбыл облысы әкімдігінің ішкі саясат басқармасының
«Қоғамдық келісім» КММ басшысы Жинақбаева Мүбәрак Қасымқызы
Көктемнің алғашқы айы наурыз – ізгілік мерекесіне толы. Алғыс айту күнімен басталып, аналар мейрамымен сабақтаса Ұлыстың Ұлы күні Наурыз мерекесімен аяқталады. Бүкіл тіршілік оянып, табиғат түлеп, қара жерге жан кіре бастағанына адамзат, алдымен, Жаратушыға алғысын айтары анық.
Мұсылмандар «Адамға алғыс айтпағанның Аллаға шүкірі жоқ» десе, қазақ халы «Алтын алма, алғыс ал» деп, алғыс алудың – адамзат танымындағы ізеттіліктің бір түрі екеніне баса назар аудартқан. Әр мерекенің өзіндік тарихы мен соған орай тәрбиелік мәні бар. Сол сияқты Алғыс айту мерекесінің негізгі тәрбиелік мәні – өскелең ұрпақты достық пен бауырмалдыққа, бір-біріне деген құрмет пен толеранттылыққа, отансүйгіштікке тәрбиелеу, Қазақстанда этникаралық келісім мен ұлтаралық қарым-қатынасты нығайту. Қай заманда да қоғамның рухани тренді ізгілікке негізделген.
Сол үшін өз басым алдымен,
Мені дүниеге әкелген ата-анама;
Шарапатын аямаған бауырларыма;
Бақытты еткен бала-шағама;
Ел тыныштығын күзеткен әскерилерге;
Денсаулық үшін күрескен дәрігерлерге;
Білімін берген ұстаздарға;
Ғылымды ашқан ғалымдарға;
Өмірді түрлеткен өнерлілерге;
Халықтың қамын ойлайтындарға;
Шындықтың жаршысы болып;
Әділдік пен адалдықты ту еткендерге;
Қамқорсыздарға пана, ініге аға болғандарға;
Бейбіт заманыма, кең пейіл жомарт халқыма
Бірлігі жарасқан жұртыма АЛҒЫС АЙТАМЫН!
Зуннун Мысри: «Өзіңнен жоғары тұрған адамға алғыс – бойұсынумен, өз деңгейлесіңе алғыс-рақмет айтумен, ал өзіңнен төмен адамға – жақсылық жасаумен болады», – деген екен. Ендеше алғыс айтып, нығметімізді арттырып жүрейік!
Мырзабаева Балмира,
Жамбыл облысы ҚХА ҒСТ мүшесі,
М.Х.Дулати атындағы Тараз өңірлік университетінің аға оқытушысы
Ағымдағы жылдың 1 наурызында «Қоғамдық келісім» мекемесінде Алғыс айту күнін мерекелеу мақсатында Жамбыл облысы әкімдігі, Ішкі саясат басқармасы, «Қоғамдық келісім» мекемесі ұйымдастыруымен «Алғысым шексіз еліме» іс-шарасы өтті.
Мерекелік шара Достық үйіндегі Zoom платформасымен қосылу арқылы «Бірлік даму үшін» республикалық телекөпір өткізуден басталды.
Телекөпірдің мәні – ортақ тарих негізінде қазақстандық бірлікті нығайту және дамыту, мейірімділік, достық, барлық қазақстандықтардың бір-біріне қатыстылығы, әр адамның өз елінің тағдырына жанашырлығы арқасында бірге бастан кешкен қиындықтары туралы ұжымдық есте сақтау болып табылады. Сонымен қатар, бірлікті нығайтуға ықпал ету, «Бірлік даму үшін!» жалпыелдік ұранды ілгерілету, еңбек пен кәсібилік культін дәріптеу арқылы қоғамды дамыту, рухани және адамгершілік құндылықтарды насихаттау мақсатында өткізілді.
Бұл іс-шараға ҚР Парламенті қос палатасының депутаттары, мемлекеттік органдардың өкілдері, ҚР АҚДМ министрі Дархан Қыдырәлі, Қазақстан халқы Ассамблеясының төрағасы орынбасары Марат Әзілханов пен ЭМБ өкілдері, мәдениет, білім беру, ғылым, спорт, құқық қорғау органдарының қызметкерлері, меншіктің барлық нысандарындағы кәсіпорын қызметкерлері, ҚХА қоғамдық кеңестері, көрнекті қоғам және саяси қайраткерлер, ғылыми және шығармашылық зиялы қауым өкілдері, жастар ұйымдары, БАҚ өкілдері қатысты.
Сонымен бірге, ҚХА мүшелері, ҚХА құрылымдары этномәдени бірлестік жетекшілері, өкілдері мен қонақтарды Достық үйі ғимаратының бірінші қабатында Қоғамдық келісім» мекемесі ұйымдастыруымен ұлттық тағам – «бауырсаққа» толы тайқазан мен арнайы тілек ағашы күтіп тұрды. Келушілер Алғыс айту күніне арналған парақтарға тілектерін жазып, ағаш бұтақтарына орналастырды.
Күмбез іспеттес ғимараттың екінші қабатында тақырыптық 6 алаңшалар құрылып, білім, спорт, мәдениет, туризм, кәсіпкерлік саласы мамандары және жастардың қатысуымен түрлі іс-шаралар өткізілді.
Мәселен, ҚХА-ның «Қайырымдылық керуені» жалпыұлттық акциясы аясында әлеуметтік осал топтағы отбасыларға арналған «Қоржын» қайырымдылық көмек көрсету акциясы бастау алды. «Қоржын» акциясы аясындағы көмектің таратылуына ҚХА «Ассамблея жастары» атсалысты.
Бұған қоса қатысушылар «Халықтану» жобасы аясындағы «Ғажайып киіз үй» жылжымалы оқу-демонстрациялық тақтасымен таныс болды. «Ғажайып киіз үй» – қазақ халқының ұлттық құндылықтарын заманауи үлгіде қайта жаңғыртудың инновациялық-тәжірибелік бастамасы ретінде жас ұрпақтың ұлттық құндылықтарды тануына себепші және ұлттық сананы, ұлттық кодты қалыптастыруға бағытталған этнопедагогикада қолданылатын дидактикалық құрал.
Сондай-ақ, өнер, спорт, мәдениет, денсаулық сақтау салалары мен төтенше жағдайлар мекемесі қызметкерлеріне арналып А.Тоқпанов атындағы Қазақ драма театрының әртістері «Алғысым шексіз еліме!» атты театрландырылған көрініс қойды.
Өңірлік ҚХА мүшелері, Жамбыл облыстық ЭМБ жетекшілері, Жамбыл облысы әкімдігінің мәдениет, архивтер және құжаттама басқармасы, Жамбыл облысы әкімдігінің дене шынықтыру және спорт басқармасы, Жамбыл облыстық қоғам белсенділері, БАҚ өкілдері,қала тұрғындары мен қонақтары қатысқан шара шеңберінде облыс әкімі, өңірлік ҚХА төрағасы Нұржігітов Нұржан Молдиярұлы әр сала және кәсіпте адал қызмет етіп, елдің дамуына үлес қосып жүрген және оқиғалар мен жағдаяттар кезінде белсенділік танытқан азаматтарды құттықтап, республикалық ҚХА төрағасының «Алғыс» төсбелгісімен, «Алғыс хатымен», облыс әкімінің «Алғыс хаты», «Құрмет грамоталарымен» марапаттады.
Азаматтық қағидаттары негізінде қазақстандық бірегейлік пен ұлттық бірлікті нығайтуға ықпал етуді және рухани, адамгершілік құндылықтарды дәріптейтін Алғыс айту күнінің жалғасы көңілді мерекелік концерттік бағдарламаға ұласты. Кенен Әзірбаев атындағы Жамбыл облыстық филармониясының өнерпаздары мен этномәдени бірлестіктер шығармашылық топтары – сахна саңлақтары, мың бұралған бишілер, жезтаңдай әншілердің қатысуымен жан-жақты қамтылған мерекелік концерт жиналған көпшіліктің көңілінен шығып, зор қошеметке ие болды.
«Қоғамдық келісім» КММ «Ақпараттық
жұмыс және қоғаммен байланыс» бөл
2023 жылдың 28 ақпанында М.Х.Дулати атындағы Тараз өңірлік университетінде этномәдени бірлестіктердің төрағалары, Жамбыл облысы ҚХА Ғылыми – сараптамалық тобы мен Аналар кеңесінің мүшелері, студенттер, ЖОО өкілдерінің қатысуымен «Алғыс айту күні-Қазақстан халқының бірлігін бейнелеу» атты дөңгелек үстел өтті.
Іс-шара барысында құттықтау сөз қоғам қайраткері, Қазақстан Республикасының Еңбек Ері, «Атамекен» Кәсіпкерлер палатасының мүшесі Мұқаш Ескендіров, және М.Х.Дулати атындағы Тараз өңірлік университетінің оқу ісі жөніндегі проректоры,техника ғылымдарының кандидаты Алдаберген Мәлібековке берілді.
Осы университеттің «Қазақстан халқы Ассамблеясы» кафедрасының меңгерушісі, Жамбыл облысы ҚХА жанындағы ҒСТ басшысының орынбасары, Тараз қаласы әкімінің кеңесшісі Парида Мамедова «Алғыс айту күні» мерекесінің түсінігі, мақсаты, маңызы туралы айтты.
Тараз қаласындағы Өзбек орталығының төрағасы, облыстық ҚХА жанындағы ҒСТ өкілі, Тараз қаласы Қоғамдық кеңесінің мүшесі Абдурахман Зайнутдинов «Алғыс айту күні – ұрпақтардың тарихи естелігін сақтау» тақырыбында баяндама жасады.
Алғыс айту күнінің философиялық қырын М.Х.Дулати атындағы Тараз өңірлік университетінің философия және саясаттану кафедрасының доценті Расылхан Жүншеев ашты. Сондай-ақ аталмыш университеттің профессоры,
Жамбыл облысы ҚХА мүшесі Исабай Бекбасаров өз әріптестеріне, ғылым қайраткерлеріне өлшеусіз қажырлы еңбектері мен таңдаған іске адалдығы үшін алғысын білдірді. Сондай-ақ 3 курс студенті Арайлым Тұрдан мен 1 курс студенті Абдумуталиб Ахмедов те оқу орнына алғыстарын білдірді.
Дөңгелек үстел барысында профессорлық-оқытушылар құрамы мен студенттердің қатысуымен Алғыс айту күніне арналған бейнеролик көрсетілді. Іс-шара соңында марапаттау рәсімі өтті.
“Қоғамдық келісім” КММ
Ақпараттық жұмыс және қоғаммен байланыс бөлім
2023 жылдың 28 ақпанында «Қазіргі заман гуманитарлық-техникалық колледжі» мекемесінде «М.Қашқари атындағы Ұйғыр этномәдени бірлестігі» қоғамдық бірлестігінің ұйымдастыруымен «Алғыс айту күні» мерекесіне арналған «Алғысым шексіз» іс-шарасы өтті.
Мақсаты- этносаралық қатынасты нығайту, өскелең ұрпақ бойында патриотизмді арттыру, мемлекеттің тілдің мәртебесін көтеру және жастардың болашақты жарқын етуге деген ынталарын күшейту. Қатысушылар қатары – Жамбыл облыстық «Ассамблея жастары» қоғамдық бірлестігінің өкілдерімен, оқу орнында білім алып жүрген өзге этностардан құралған студенттермен,еріктілермен толықты.
Іс-шара барысында аталмыш мекеменің директоры Нақыш Фарида Фаридқызы жастарды келе жатқан айтулы мерекемен құттықтап, алдағы күндеріне сәттілік тіледі.
Сөз сөйлеу барысында аталмыш бірлестіктің төрайымы Турдыева Мухабат Абдрахманқызы да жастарға деген өзінің ақжарма тілегін білдіріп, келе жатқан «Алғыс айту күні» мерекесінің, Ассамблеяның, Достық үйінің тарихы жайлы жан-жақты мағлұмат беріп, білім алушылармен кері байланыс орнатып, іс-шараның маңызын аша түсті.
Іс-шара соңында Фарида Фаридқызы Ассамблеяға,қоғамдық-мәдени жұмыстарға,спорттық шараларға белсене қатысып жүрген студенттерді арнайы марапаттады.
“Қоғамдық келісім” КММ
Ақпараттық жұмыс және қоғаммен байланыс бөлімі
