20 қыркүйек күні «Достық керуені» жобасы аясында облыстық ҚХА Ақсақалдар кеңесінің «Ақсақалдар кеңесі – ел бірлігінің кепілі» тақырыбында көшпелі отырыс өтті.

Отырысқа Облыстық «Вынхуа» дүнгендер қауымдастығы Ақсақалдар кеңесінің төрағасы – Маюфи Абдулхалил, Жамбыл облысы ҚХА Ақсақалдар кеңесінің мүшесі – Юнусов Идрис, «Архыз» республикалық қоғамдық бірлестігінің Бірлік – қарашай-балқарлардың Жамбыл филиалы» қоғамдық бірлестігінің ақсақалдар кеңесі төрағасының орынбасары – Хаджимуратов Исмаил, Қордай ауданы Ақсақалдар кеңесінің төрағасы -Сейілханов Әбдібек және Қордай аудандық ҚХА Ақсақалдар кеңесінің мүшелері қатысты.

Отырыс барысында облыстық ҚХА Ақсақалдар кеңесінің мүшесі – Юнусов Идрис жалпы облыста ақсақалдар кеңесінің жұмысын жандандыру мақсатында ел ішінде жастарға ақыл-кеңесін айтып, дұрыс жол сілтейтін данагөй қарияларымыз аянбай еңбек етуде екендігін, ақсақалдарымыз өскелең ұрпақты тәрбиелеуге, ел бірлігін сақтауға атсалысып, ортақ іске зор үлес қосып жатқандығын жеткізді.

Қордай ауданы Ақсақалдар кеңесінің төрағасы – Сейілханов Әбдібек этностарды қоғамдық өмірге интеграциялау, этнос өкілдерінің әскерге баруы, аудандағы медиация жұмысын жүйелі жүргізу және ақсақалдар институтының жастармен жұмысын жандандыру мәселелерін көтерді.

Іс-шара соңында еліміздің даму жолында қоғамдық келісім мен бірлікті нығайтуға қосқан үлесі мен белсенді еңбегі үшін аудандағы бірқатар Ақсақалдар кеңесінің мүшелеріне Алғыс хаттар беріліп, сыйлықтар табысталды.

Жамбыл облысы әкімдігінің ішкі саясат басқармасының «Қоғамдық келісім» КММ ұйымдастыруымен «Достық керуені» жобасы аясында ағымдағы жылдың 20 қыркүйегінде Қордай ауданының Мәдениет үйінде облыстық ҚХА Аналар кеңесінің активтері, Қордай аудандық Аналар кеңесінің төрайымы мен белсенді мүшелері, аудандық ішкі саясат бөлімі, құқық қорғау органы қызметкерлері, этномәдени бірлестіктерінің өкілдері, сондай-ақ, Қаракемер, Ауқатты, Қарасу, Сортөбе, Масаншы ауылдары Аналар кеңесінің жетекшілері және өңірлік ҚХА медиаторлары, барлығы 10 ауылдық округтің кеңес мүшелері қатысқан аудандық Аналар кеңесінің кеңейтілген отырысы өтті.

Отырыстың модераторы болып «Қоғамдық келісім» КММ басшысы – Мүбәрак Касымқызы іс-шараны өзі бастап кетті.

Жиын барысында аудандық Аналар кеңесінің – білім беру ұйымдарымен тығыз байланысы, мектеп, бала-бақша ата-аналарымен жұмысты күшейту, аудандағы дағдарыс орталығы психолог-мамандарымен байланысы, қыздар арасындағы ерте тұрмыс құру, ерте жүктіліктің алдын алу бағытындағы жұмысты күшейту мәселелері сөз болды. Сондай-ақ, этнос әйелдерін қоғамдық-мәдени шараларға тарту, оларды әлеуметтендіру және мемлекеттік тілді меңгеруді қолға алу, тіл үйренудің тиімді жолдары талқыланды.

Мемлекеттік тілді жылдам үйрену әдіс-тәсілдері бойынша Сортөбе ауылы Аналар кеңесінің озық тәжірибелері аталып өтті. Мәселен, дүнген этносының өкілі Салима Вансильван жаз бойы жазғы демалыста балаларын қазақ отбасына жіберетіндігін сөз етіп, тілді тез үйренудің бір қарапайым жолымен бөлісті.

Сонымен бірге, сөз сөйлегендер қатарында Жамбыл облысы Полиция департаментінің «ЖПҚБ әйелдерді зорлық -зомбылықтан қорғау» тобының аға инспекторы, полиция подполковнигі Диляфруз Кенжиханова тарапынан «Отбасында зорлық-зомбылыққа жол жоқ!» тақырыбында сөз қозғалып, жиналған аналарға осы бағыттағы заңнамалық өзгерістерге түсініктеме беріп, зардап шегуші болған жағдайда сенім телефондарына хабарласу мүмкіндігін пайдалануға және жалпы еліміздегі әрбір ананың құқықты сауатты болуы жөнінде нақты ұсыныстар берілді.

Бұған қоса, отбасындағы тұрмыстық зорлық-зомбылық туралы, қолайсыз отбасыларында балаға қысым жасап, қол жұмсап, баланы келеңсіз жағдайға душар еткен ата-аналарға шара қолдану, жапа шеккендерге психологиялық, әлеуметтік көмек беру тақырыбына кең көлемде тоқталды. Осы тұста Тараз қаласынан арнайы барған облыстық ҚХА медиаторы Ирина Федорова мен «Қоғамдық келісім» мекемесінде орналасқан ҚХА Медиация кабинетінің меңгерушісі Валентина Досыбиева да этностар үшін Қазақстанда барлық мүмкіндіктер жасалғандығын тілге тиек етті.

Жиын соңында шараның модераторы, мекеме басшысы Мүбәрак Қасымқызы ҚХА Аналар кеңесімен кеңесе жұмыс атқарған Қордай ауданының белсенді аналарына естелік сыйлықтар тарту етіп, алғысхаттармен марапаттады. Жиын көңілді фотосессиямен аяқталды.

«Ақпараттық жұмыс және қоғаммен байланыс»  бөлімі

Мемлекет басшысы Қасым-Жомарт Тоқаев Қазақстан халқына арнаған «Әділетті Қазақстанның экономикалық бағдары» атты Жолдауында ел экономикасын дамытудың жаңа жолдарын айқындап берді.

Ел Президентінің сындарлы саясатының арқасында еліміздің экономикалық дамуы қарыштай түсетіні айдан анық.

Қоғамның дамуында мәдениет пен руханият ерекше орын алады. Осы кезге дейін де мемлекет тарапынан мәдениетке, руханияттың дамуына көп көңіл бөлініп келді. Алдағы уақытта да бұл саланың тасы өрге домалай беретіні анық.

Жалпы, еліміздің экономикасы нығайған сайын мәдениет саласына бөлінетін қаражат көлемі де көбейіп келеді. Мәдениет саласы қызметкерлерінің жалақысы соңғы жылдары біршама жоғарылады. Бұрынғы мүмкіндікпен салыстырып қарағанда едәуір алға жылжып, ілгеріледік. Бұл жолы Президент экономика, мемлекетке тартылатын инвестиция туралы көбірек мәселе қозғады.

Экономиканың алға басуы руханияттың дамуына оң серпіні берері анық. Президент «Келешек» бағдарламасы бойынша әр туылған балаға салынатын депозит жөнінде де кеңінен тоқталды. Бұл шешім мәдениет саласының қызметкерлерін де қуантып отыр.

Әр балаға салынған қаржы ата-анаға үлкен көмек болары анық. Жолдау да еліміздің әр ауласын, әр отбасын дамытуға бағытталған мәселелер көп айтылды. Оның бәрі де өзекті.

Марат Кулибаев, облыстық “Ақжол” газетінің тілшісі, ҚХА Журналистер клубының белсенді мүшесі

Мемлекет басшысы Қасым-Жомарт Тоқаев 1-қыркүйек күні «Әділетті Қазақстанның экономикалық бағдары» атты өзінің Қазақстан халқына кезекті Жолдауын жариялады. Өз Жолдауын мемлекет басшысы бүгінде алдыңғы бастамаларының басым көпшілігінің жүзеге асып жатқандығы жайлы айта келіп, халықтың тұрмыс сапасына тікелей әсер еткен кейбір шараларды атап өтті.

Қасым-Жомарт Тоқаев өзінің Жолдауында «Қолға алған шаралар нәтижесінде билік тармақтары арасында тиімді тепе-теңдік орнады. Басқару жүйесі ықпалды Парламенті бар Президенттік республика үлгісіне көшті» деп арнайы айтып өтті. Сонымен қатар Президент алдағы уақытта «халық үніне құлақ асатын мемлекет» қағидатын одан әрі қарай іске асыру қажеттігіне тоқталып кетті.

Қасым-Жомарт Тоқаев өзінің Жолдауында «нағыз дамыған ел боламыз десек, саяси реформалармен шектеліп қалмауымыз керек» екендігін айта келіп, «осы жұмысты түбегейлі және жан-жақты әлеуметтік-экономикалық реформалармен ұштастыру қажет» екендігіне тоқталды.

Мемлекет басшысы өз сөзінде қазір әлемде геосаяси ахуалдың ушығып тұрғандығын атап өте келе, «… Жаһандық экономика және халықаралық еңбек нарығы түбегейлі өзгеруде. Технологиялық бәсеке қызып тұр. Барлық жерде ресурстар үшін талас жүріп жатыр. Климаттың өзгеруі, азық-түлік қауіпсіздігі және демографиялық тұрғыдан орнықты даму ең өзекті мәселеге айналды. Бір сөзбен айтқанда, адамзат тарихында бұрын-соңды болмаған сын-қатерлер мен түбегейлі өзгерістер дәуірі басталды» деп тұжырым жасады.

Мемлекет басшысы әлемдегі осындай аса маңызды шақта еліміздің зор экономикалық серпіліс жасауға толық мүмкіндігі бар екендігін айрықша атап өтті. Ол үшін еліміз біртіндеп жаңа экономикалық үлгіге өтуі керек. Президенттің сөзімен айтар болсақ, «Басты мақсат – қағаз жүзіндегі биік жетістіктерге қол жеткізу емес, шын мәнінде халықтың тұрмыс сапасын жақсарту болуға тиіс.»

Жаңа экономикалық бағдарымыздың өзегіне айналатын қағидаттар – әділдік, инклюзивтік және үнемшілдік болмақ. Қасым-Жомарт Тоқаев өз Жолдауында айтып кеткендей, «Қазақстанның экономикалық дамуының жаңа парадигмасы еліміздің бәсекелік артықшылықтарын тиімді пайдалануға және өндіріс саласындағы еңбек, капитал, ресурстар, технология сияқты негізгі факторлардың әлеуетін барынша ашуға негізделеді.»

Президент одан әрі қарай экономиканың құрылымына қатысты реформаның негізгі бағыттарына тоқталып, арнайы атап өтті. Ең басты міндет – еліміздің мықты өнеркәсіптік негізін қалыптастыру, сонымен қатар еліміздің экономикасын өзімізді толық қамтамасыз ете алатын жағдайға жеткізу. Мемлекет басшысы сондықтан өңдеу саласын жедел дамытуға баса мән беру қажеттігіне айрықша тоқталып кетті.

Қасым-Жомарт Тоқаев халыққа Жолдауында еліміздің тағдыры үшін айрықша мәні бар бірқатар жобаларды жүзеге асыру керек екендігіне тоқталып өтті. «Бұл ретте металды терең өңдеу, мұнай-газ және көмір химиясы, ауыр машина жасау, уранды конверсиялау және байыту, автобөлшектер және тыңайтқыштар шығару сияқты бағыттарға айрықша назар аударған жөн.»

Қорыта айтқанда, еліміз жаңа өнеркәсіп саясаты арқылы экономиканың жаңаша даму үлгісіне көшуі тиіс. Президент айтқандай, «мемлекет ірі кәсіпорындармен бірлесіп, өндірістің барлық сатысы өз елімізде болуын қамтамасыз етуі керек.»

Президент өз Жолдауында сонымен қатар отандық өнім өндірушілерді қорғау және сирек кездесетін металл кеніштерін игеру қажеттігіне, ауыл шаруашылығы өнімдерін өндіруді арттыру, су ресурстары, көлік-логистика саласы мен энергетикалық қауіпсіздік мәселесіне және экономиканың басқа да бірқатар өзекті әрі маңызды бағыттарына тоқталып, күн тәртібінде тұрған міндеттерге талдау жасап өтті.

Мемлекет басшысы еліміздің алдында тұрған экономикалық реформаның мақсаты мен міндеттеріне тоқтала келіп, өз Жолдауын мынадай сөздермен қорытындылады: «Бүкіл экономикалық жүйені шұғыл түрде түбегейлі қайта қарап, өзгерту арқылы елімізді өркендетеміз, халықтың әл-ауқатын арттырамыз. …

Еліміздің болашағы баянды болсын десек, бұл стратегиялық міндетті қалайда орындауға тиіспіз. … Біз болашақта қандай ел болатынымызды нақты білеміз. Бәріне бірдей мүмкіндік беретін өркениетті ел – Әділетті Қазақстанды құрамыз. Заң және тәртіп, өзара түсіністік, тілектестік пен жауапкершілік бәрінен биік тұратын тиімді мемлекет боламыз.» Еліміз Президентінің осындай ізгі мақсаты мен асқақ арманы орындала берсін деп тілек айта отырып, біз де Жолдауда айтылған міндеттердің орындалуына өзіміздің қолдан келер үлесімізді қоссақ екен деген ниетімізді білдіреміз!

М.Х. Дулати атындағы Тараз өңірлік университеті,

философия және саясаттану кафедрасының

аға оқытушысы Баярисов Режеп Оразбайұлы