Биылғы жылдың 8-ақпанында Тараз қаласының Достық үйінде «Жамбыл облыстық Тәжіктер этномәдени бірлестігі» ҚБ ҚР Президенті Әкімшілігі ҚХА Хатшылығы меңгерушісінің орынбасары Ғалымжан Махан және Қазақстан халқы Ассамблеясы төрағасының орынбасары Ақбаржон Исмаиловпен кездесуі өтті.

Тәжік этносының жергілікті өкілдері қонақтарды этномузыкамен және арнайы мәдени бағдарламамен қарсы алды. Оларға тұрмыстық заттар, тәжік этносының музыкалық аспаптары және жәдігерлері кіретін арнайы көрме-экспозиция ұсынылды.

Жиын этносаралық қатынастардың тұрақтылығы және өңірдегі тәжік этносының ахуалын бағдарлау тұрғысында өткізілді. Ғалымжан Махан тәжік этномәдени бірлестіктері құрылу тарихының түпқазығынан бастап, бүгінгі күнге дейінгі тыныс-тіршілігіне тоқталды.

Спикер ҚХА жұмысы, құрылымдардың жүйелі жұмысының маңыздылығы, жастар арасынан жаңа көшбасшылар құрудың, әйелдерді белсенді қоғамдық өмірге тартудың өзектілігін, бірлестік өкілдеріне мемлекеттік тілді үйренуге де зор мән беру керектігі және мемлекет тарапынан бұл іс-қимылдарды жүзеге асыруға қажетті барлық мүмкіндіктер жасалғандығын тілге тиек етті. Өз сөзінде этносаралық бағыттағы көптеген маңызды мәселелерге шолу жасай келе, тәжік мәдениетінде алдыңғы орынға ие қолөнер көрмелері мен музыкалық шығармашылықтарын республикалық деңгейге дейін көтеру мәселесіне аса мән беруді айтып өтті.

Сондай-ақ, Ақбаржон Исмаилов өзге этностардың қасиетті Қазақстан жерінде туылып өскендіктен және Қазақ елінің оларға салт-дәстүрі мен мәдениетін өсіп-өндіруге, сақтауға зор мүмкіндіктер жасап отырғандықтан, мемлекеттік тіл – қазақ тілін үйренуге және мәдениеті мен тарихын білуге ерекше ықылас қою керектігін баса айтты: «Мұндай мүмкіндіктер этностарға тек Қазақстанда ғана жасалған, осының қадірін білу керек. Қазіргі кезде тәжіктер бірлестіктерінің өкілдері қазақ тілін өте жетік меңгерген, 100 пайызға біледі десем де артық болмайды. Жалпы республика бойынша 11 этномәдени бірлестік филиалдары бар, қоғамдық жұмыстарға белсене қатысады».

Бұған қоса, Тараз қалалық Өзбек мәдени орталығының төрағасы Абдырахман Зайнутдинов тәжік этносының тарихына көз жүгіртіп, тәжік және өзбек этностарының өзара тығыз байланысы мен жақындығы туралы баяндап берді. Сонымен бірге, бірлестік төрағасы Махкам Орифов орталықпен атқарылып жатқан жұмыстары жөнінде баяндады.

Шара соңы қоғамдық-мәдени жұмыстарға атсалысқан тәжік этносы өкілдері мен жастарының ҚР Президенті Әкімшілігі ҚХА Хатшылығы меңгерушісі, ҚХА төрағасының орынбасары Алмас Әзілхановтың Алғысхаттарымен марапатталуымен аяқталды.

«Ақпараттық жұмыс және қоғаммен байланыс» бөлімі

Тату елдің тасы қашанда өрге домалайды. Қоғамдық келісім сақталған жерде қордаланған мәселе болмайды.

Бүгін Достық үйінде ҚР Президенті Әкімшілігінің ҚХА Хатшылығы меңгерушісінің орынбасары Ғалымжан Махан және ҚХА Төрағасының орынбасары Акбаржон Исмаилов этномәдени бірлестіктер мен Жамбыл облысы ҚХА құрылымдарының өкілдерімен кездесті.

Кездесу басы модератор, Жамбыл облысы әкімі аппаратының басшысы Лесбек Ілебаевтың облыстық ҚХА жұмыстарын таныстырумен басталды.

Өз кезегінде сөз сөйлеген Ғалымжан Жайықбайұлы ҚХА алдында тұрған уақытылы орындалуға тиіс өзекті, тың әрі маңызды міндеттер туралы мәлімдеме жасады. Сондай-ақ мемлекеттік тілді меңгеру, медиация және қоғамдық келісімнің сақталуы туралы т.б. бірқатар маңызды мәселелерді қозғап жиылған жұртшылықпен пікір алмасты.

Іс-шара барысында Облыстық ҚХА төрағасының қоғамдық орынбасары Гулам Умаров өңірлер арасындағы қажетті тәжірибе алмасуды қолға алу, волонтерлік қызметтің заң аясында өрбуі туралы айтты.

Ал, «Әулиеата» қазақ мәдени орталығы төрағасының орынбасары Айгүл Қабиева бірлестіктің жұмысымен таныстырып баяндама жасады. Сонымен қатар жиында сөз сөйлеген Жамбыл облысы әкімдігінің «Ассамблея жастары» РҚБ басшысы Хамида Тұрдыева 6 маңызды бағыт бойынша флагмандық жобаларға тоқталды.

Келелі кездесуде облыстық ҚХА Аналар кеңесінің төрағасы Эльмира Мырза-Ғали сөз сөйлеп, қолға алынған «қауіпсіздік сағаты» атты жаңа жобасы туралы айтты. Ғалымжан Махан бұл жобаны жүзеге асырудың маңыздылығы ерекше екендігін атап өтті.

Жиын соңы этномәдени бірлестіктер мен құрылымдардың атқарып жатқан орасан зор жұмыстары мен өңірдегі этностардың дарынды өкілдерінің көп екенін айтқан «Қоғамдық келiсiм» КММ басшысы Мубарак Қасымқызы Жинақбаеваның сөзімен түйінделді.

«Ақпараттық жұмыс және қоғаммен байланыс» бөлімі

Жамбыл облысы әкімдігінің ІСБ «Қоғамдық келісім» КММ «Ақпараттық жұмыс және қоғаммен байланыс» бөлімі этносаралық және әлеуметтік тақырыптарда бейнероликтер дайындау мақсатында және Алғыс айту күні қарсаңында “Жамбыл пайдалану локомотив” депосының тыныс-тіршілігі, тың тарихына бойлап қайтты.

Теміржол – сан түрлі сапарлар мен сезімдерге ерік беретін, ұшақ жолы мен көлік жолдарына қарағанда ең ыңғайлы, әрі ең қауіпсіз жол десек те болады. Ал оның қауіпсіз болуы ол өз алдына үлкен жауапкершілікті жүктейді.

Темірдің тілін тауып, тәртібіне идірген, жолаушылар отыратын жүрдек пойыздарды алып жүретін алып тепловоздарды жөндеу нысаны – локомотив депосының жұмысын бүгінде қазақтармен бірге онға жуық түрлі этнос өкілдері де дөңгелетіп отыр.

Сан түрлі этностарды тонның ішкі бауындай бауырластықта ұстап отырған Нұрболат Нұрсейітов Төлегенұлы олардың мемлекеттік тілге жетік екендерін де алға тартты.

Сұхбат барысында кәсіпорын басшысы бастауы Мұхамеджан Тынышбаевтың ерен еңбегімен басталған Жамбыл пайдалану локомотив депосына бүгінде 100 жыл толып отырғанын хабарлады.

Бұдан өзге цех жұмысының жүйесі, техникалық бақылаулар мен жаңартулар, біліктілікті арттыру мәселелері туралы да сөз қозғады. Нұрболат Төлегенұлы ең бастысы ауызбіршілік бар жерде ғана ойға алған істер оңынан жүзеге асатынын жеткізді.

Әрмен қарай теміржолдағы түрлі маман өкілдерінің жұмысымен таныстық. Осы орайда мұндағы жұмысшылардың денсаулығына аса қатты көңіл бөлінетінін айта кеткен жөн. Олардың әрқайсысы үшін жұмыс күні медициналық тексерістен өтуден басталады.

Сондай-ақ, мұндағы медициналық құрылғылардың заманауи, жаңа екені көрініп-ақ тұр. Ол құрылғыда жұмысшының қан қысымын, тамыр соғысын және алкагольдік сусындар пайдаланғандығын тексеретін арнайы функциясы бар. Тексеру аяқталғаннан кейін медицина қызметкері жұмысшының денсаулық көрсеткіштері қалыпты болса ғана жұмыс істеуге рұқсат береді.

Бүгінде “Жамбыл пайдалану локомотив” депосын ыстық ұямыз деп санайтын орыс, корей, қырғыз, өзбек, түрік, дүнген, неміс, украин т.б этностардың өкілдерінен құралған қызметкерлер тобы басшылары мен жұмыс орындарына алдағы “Алғыс айту” күніне орай алғыстарын айтты.

Бір шаңырақтың астында татулығы мен бірлігі жарасып, ауыр жұмысты еңсеріп отырған этнос өкілдері ең бастысы — Қазақ халқына ризашылықтарын білдірді.

«Ақпараттық жұмыс және қоғаммен байланыс» бөлімі

Тараз қаласының Достық үйінде биылғы жылдың 31 қаңтары күні облыс әкімі аппаратының басшысы, өңірлік ҚХА төрағасының орынбасары Лесбек Илебаевтың Жамбыл облысы ҚХА мүшелері және этномәдени бірлестік төрағаларымен келелі кездесуі өтті.

Аппарат басшысымен кездесуге ҚХА мүшелерінен өзге “Ассамблея жастары” РҚБ мүшелері, «Қоғамдық келісім» КММ қызметкерлері де қатысты.

Жиын облыстық ҚХА төрағасының қоғамдық орынбасары, модератор Ғұлам Умаровтың сөзімен басталды.

Кездесу барысында «Әулие Ата» Қазақ мәдени орталығының белсенді мүшесі, өңірлік ҚХА Ақсақалдар кеңесінің төрағасы Асқарбек Сейілханов, «Днепро» Украин мәдени орталығының жетекшісі Федор Клименко, «Анаға тағзым» орталығының басшысы, облыстық ҚХА Аналар кеңесінің төрайымы Эльмира Мырза-Ғали, «Жамбыл облыстық «Вынхуа» Дүнгендер этномәдени орталықтары» қоғамдық бірлестігінің мүшесі Лугмар Буларов сөз сөйлеп, пікірлерін білдірді.

Сонымен қатар, облыстық «Айнұры» Татар-башқұрт мәдени орталығы» қоғамдық бірлестігінің төрағасы Амир Халиков және «Ахыска» Түрік этномәдени орталығы» қоғамдық бірлестігінің төрағасы Махмутжон Давришев және «Вайнах» Шешен-ингуш мәдени орталығының төрағасы Рамзан Магомадов толғандырып жүрген түйткілді мәселелер төңірегінде өздерінің ұсыныстарын білдірді.

Жиын соңында Лесбек Илебаев Достық үйі қызметкерлерінің жұмыстарымен танысты.

«Ақпараттық жұмыс және қоғаммен байланыс» бөлімі