Бүгінде облысымызда 87 этностан құрылған 75 этномәдени бірлестік жұмыс істейді. Олардың 34-і аккредитациядан өтіп, ассамблея тізіміне енген. Қазіргі таңда облыстық ассамблеяда ғылыми-сараптамалық топ, қоғамдық келісім кеңестері, аналар кеңестері, медиация кабинеті, журналистер клубы, «Жаңғыру жолы» жастар қозғалысы және «Аулие ата» еріктілер орталығы жұмыс істеуде. Осы орталықтардың ұйымдастыруымен өткен жылы 892 іс-шара өтіп, оған 58500 адам қатысты. Бұдан бөлек, этномәдени бірлестік өкілдерінің қатысуымен түрлі форматтағы 560 іс-шара өткізілген болатын. Атап айтсақ, «Рождество», «Масленица», «Наурыз», Қазақстан халқының бірлігі мерекесі, этностардың мәдени күндері, «Мейірімділік керуені» ұлттық қайырымдылық акциясы және тағы басқа іс-шараларды айтуға болады.

Сондай-ақ «Рухани жағыру» бағдарламасы аясында «Жамбыл облысындағы этностардың дәстүрлері мен мәдениеттері» атты энциклопедияны шығару және ол энциклопедия негізінде интерактивті картаны құру» және «Ұлы Дала Қазынасы» («Сокровища Великой Степи») жобалары іске асырылды. Бұл жобалар республикада баламасы жоқ деп танылған. Биыл осы жобалардың негізінде ассамблеяның «Жалпы азаматтық бірегейлікті қалыптастыру» республикалық жобалары және «Қазақстандық этностардың алуан түрлілігін рухани-мәдени танымал ету» мәдени-білім беру жобасы әзірленді. Бұл бойынша еліміздің барлық өңірлері жұмыс істеуде.

Ассамблея қызметінің басым бағыттарының бірі – Медиация институтын ілгерілету. «Қоғамдық келісім» КММ-де медиация кабинеті жұмыс істейді. Онда сенім телефоны орнатылған. Бүгінде облыста 40 Медиация алаңында халыққа практикалық және медиативтік көмек көрсету бойынша қабылдау кабинетері жұмыс істеуде. Өткен жылы олардың қызметіне 791 азам жүгініп, 631 дау-жанжал оң шешімін тапқан. Медияция жұмысы бойынша облысымыз республикада 3 орынды иеленіп отыр.

Өңірлік ассамблея өткен жылы 570 миллион теңгеге 48 мың адамға көмек көрсетті. Бұдан бөлек, этномәдени бірлестіктердің көмегімен 32 мың адамға 441 миллион теңге жәрдем берілді. Төтенше жағдай кезінде 25600 адамға 160 миллион теңгенің азық-түлігі, медициналық жабдықтар мен ИВЛ аппараттары алынған. Сондай-ақ медицина қызметкерлерінің отбасына қайырымдылық көрсетілген. Әлеуметтік тұрғыдан аз қамтылған 2 отбасына 30 миллион теңгеге үй сатып әперілді.

Қазіргі таңда Тараз қаласы мен аудандарда ассамблеямен бірлескен қоғамдық келісім кеңестері құрылуда. Бүгінде қоғамдық келісім кеңесі – 181, бірлескен қоғамдық келісім кеңесі – 9 бірлікке жетіп отыр. Олардың күшімен 246 іс-шара өткізілген. Сондай-ақ олардың ұйымдастыруымен Достық үйінде халықтың өзекті мәселелері бойынша қоғамдық қабылдау ұйымдастырды. Халықтан 45 өтініш түсіп, оның 20-сы сол арада шешіліп, 25-і тиісті инстанцияларға жіберіліп, жыл ішінде шешімін тапқан. Облыстың 6 ауданында 12 көшпелі отырыс өткізілген.

Аналар кеңесі болса 102 іс-шара ұйымдастырған. ҚР Жоғарғы Сотының «Отбасылық сот» пилоттық жобасы аясында Аналар кеңесіне жүгінген 59 отбасының 40-ын ажырасудан сақтап қалған. Бұдан бөлек, кеңес атаулы әлеуметтік көмек алушылармен, мемлекеттік грант алып кәсібін бастағандармен кездесіп, жиын өткізген. Сонымен қатар ерте жүктілік, туыстық некенің алдын алу, әйелдерге құқықтық көмек көрсету мақсатында көшпелі отырыстар ұйымдастырылды. Республикадағы аналар кеңесінің жұмысы үздік деп танылып, Қазақстан халқы Ассамблеясының дамуына қосқан үлесі үшін ҚХА алғыс хатымен марапатталды.

Ал «Жаңғыру жолы» жастар қозғалысы өз жұмысын қайырымдылыққа бағыттап Еріктілер қозғалысы орталығы құрды. «Өмір сыйла» қайырымдылық акциясында ассамблея жастары 13,5 литр қан өткізген. «Жаңғыру жолы» жастар қозғалысының төрағасы Хамида Турдиева «Еріктілер жылы» халықаралық байқауында «Корпоративтік еріктілік көшбасшысы», Насыров Станислав «Бейбітшілікті, достық пен келісімді нығайтуға қосқан үлесі үшін» номинациясында бірінші жүлделі орындарға ие болды.

Жалпы ұлттық бірлік пен ұлтаралық келісімді дамытуға қосқан ерекше үлесі үшін Артур Лигостаев, Хабиб Әлиев, Сабина Заитова, Рахат Ерханұлы ассамблеяның республикалық Алғыс хаттарымен марапатталды.

Мемлекеттік тілді үйренуге 2239 ассамблея өкілі қызығушылық танытқан. «Мәміле» клубының мүшелері карантин кезінде «Үйде отырып, қазақ тілін бірге үйренеміз», «Каз.онлайн», «Абай Құнанбаевтың 175 жылдығы», «Этнодастархан» және «Тілге құрмет – елге құрмет» интернет-акцияларын ұйымдастырып, арнайы іс-шараларға қатысқан. Республикалық «Ұлы даланың ұлтаралық тілі» форумына облыстың әр өңірінен мемлекеттік тілді жетік меңгерген 1287 адамның тізімі ұсынылды.

Өткізілген іс-шаралар аясында белсенділік танытқан ұйғыр этномәдени бірлестігінің басшысы М.Турдыева, дүнген этносының өкілі И.Буларов II дәрежелі «Достық» ордендерімен, облыстық «Вынхуа» этномәдени бірлестігінің өкілі Д. Нұралиева «Ерен еңбегі үшін» медалімен марапатталды.

Журналистер клубының қызметін этносаралық тақырыптарды қозғайтын республикалық және өңірлік бұқаралық ақпарат құралдарының 20 тілшісі жүргізеді. Өңірлік ассамблеяның қолдауымен өткен жылы 2 мың дана таралыммен «Ұлы шаңырақ» облыстық газеті шығарылды. Бұқаралық ақпарат құралдары өкілдерінің арасында жыл сайын облыстық «Бір шаңырақ астында» байқауы ұйымдастырылуда. Қазіргі таңда облыстық «Jambyl» телеарнасында екі тілде «Достық дастарқаны», «Философия вкуса» телебағдарламалары жүргізілуде. Онда түрлі ұлт өкілдерінің дәстүрлері мен ұлттық тағамдарын көрсетіледі. Телеарна тілшісі Ильдар Гизатуллин өңірде Қазақстан халқы Ассамблеясының жұмысын насихаттағаны үшін Алғыс хатпен марапатталды. Баспасөз орталығының барлық жұмысы республикалық деңгейде жоғары бағаланды. Қоғамдық келісім мен жалпыұлттық бірлікті нығайтуға қосқан үлесі үшін Жамбыл облысы әкімдігінің ІСБ «Қоғамдық келісім» КММ баспасөз қызметі бөлімінің басшысы Бибігүл Шахзада «Мейірім»төсбелгісімен марапатталды.

Дегенмен шешілмей жатқан мәселелер де жоқ емес. Атап айтсақ, кейбір аудандарындағы этномәдени бірлестіктерге жұмыс істейтін, түрлі деңгейдегі іс-шаралар өткізетін ғимараттар қажет. Бұл да алдағы уақытта шешімін табады деген сенімдеміз.

Алғыс айту күні – күрделі заманда қиындықты иық тіресе бірге еңсеріп, қысқа мерзім ішінде Елбасының басшылығымен Тәуелсіз Қазақстанды құру жолында аянбай тер төккен еліміздің барлық азаматтарының бір-біріне құрмет білдіретін күн. Осы орайда барша қазқстандықтарды алда келе жатқан Алғыс айту күні мерекесімен құттықтаймын. Ауызбіршілік, татулық және достық сынды құндылықтарымызды жоғалтпай, Отанымыздың өркендеуіне үлес қоса берейік!

Ағымдағы жылдың ақпан айында Жамбыл облысының прокуратурасы жанындағы Құқықтық мониторинг орталығының алаңында «Медиация туралы» ҚР Заңы және оның қолданылуы бойынша Жамбыл облысының прокуратурасы ұйымдастырған құқықтық түсіндіру жұмысы өтті. Оған

облыстық прокуратура өкілдері, судьялар, өңірлік ҚХА медиаторлары, адвокаттар, ішкі істер органдарының қызметкерлері қатысты.

Аталған іс-шараның мақсаты – қолданыстағы заңнамаға енгізілген өзгерістер туралы хабардар ету, сондай-ақ мемлекеттік және құқық қорғау органдарының дауларды реттеуде медиация институтын жандандыру.

Облыстық прокуратураның 2-ші басқармасының бастығы Алмас Меңлібаев өз баяндамасында: «Талдау көрсеткендей, 2020 жылы сотқа дейінгі тергеу барысында тараптардың татуласуына байланысты 1387 іс тоқтатылды, бұл өткен жылмен салыстырғанда сотқа жіберілген істердің саны 16% – ға азайды. Бұл сандар қоғамдағы жанжалдың төмендеуін, сот жүктемесінің төмендеуін және аймақтағы дауларды шешуде медиация халық арасында танымал бола бастағанын көрсетеді»- деп атап өтті. Сондай-ақ, қатысушыларды ҚР Жоғарғы Сотының 21.06.2001 ж. нормативтік қаулысына өзгерістер енгізу туралы түсіндіре келе, «ҚР Қылмыстық кодексінің 68-бабын қолдану жөніндегі сот практикасы туралы», оған қоса, (6-бап) сотқа дейінгі тергеп-тексеру органдарының татуластыру рәсімдерін пайдалануы туралы ережелерімен таныстырды.

Жиын барысында Медиация кабинетінің жетекшісі Валентина Досыбиева да үш жыл бұрын Жамбыл облысының ҚХА облыстық сотпен бірлесіп, осы құқықтық қызмет көрсету орталығын ашқанын, онда ҚХА медиаторлары азаматтарға өзекті мәселелер мен даулар бойынша кеңес беретінін атай келе, «Мемлекеттік және құқық қорғау органдарымен ынтымақтастық аймақтағы медиация институтын дамытуға үлкен серпін береді, осы бірлескен жұмысты жалғастыру қажет!», – деп қорытындылады.

Іс-шара соңы ҚХА медиаторлары дауларды сотқа дейін реттеуге қатысты келелі мәселелерді көтерумен бірге, қатысушылар Жамбыл облысында Медиация институтын дамыту бойынша нақты ұсыныстар қабылданғанымен аяқталды.

Жамбыл облысы әкімдігі ІСБ

«Қоғамдық келісім» КММ Баспасөз орталығы

Донор болу – біреудің өмірін ғана емес, өз өміріңді де құтқару. Қан тапсырудың адамды ынталандыратын әсері бар екені ғылыми түрде дәлелденген, яғни, донорлар – өте белсенді және өмірге құштар жандар. Әлемде қан құюға жыл сайын миллиондаған адамдар мұқтаж болады. Осыған орай, ағымдағы жылдың ақпан айында Жамбыл облыстық «Жаңғыру жолы» республикалық жастар қозғалысының өңірлік штабының белсенділері Тараз қаласындағы «Қан орталығына» барып қан тапсырды. Айта кетейік, қайырымдылық шара жыл сайын дәстүрлі түрде өткізіліп келеді. Қан өткізуге, қайырымдылыққа ерікті түрде атсалысатын жастардың биылғы жылғы шарасы «Өмір сыйла» акциясы аясында өткізілді. Қолдарына ҚХА жалауын ұстаған жастар, «Қан орталығы» ғимаратының алдында жиналды. Бұл игілікті іс әрбір жанға үлгі болары сөзсіз.

Қан қандай жағдайда керек? Сырқат жандар күнделікті қан құюға мұқтаж болады. Қан немесе қанды құраушы компоненттер жол-көлік оқиғасына ұшыраған, босанғаннан кейінгі ауыр жағдайдағы әйел азаматшаларға, сырқаты терең балаларға ауадай қажет. Ал гемофилиямен және анемия ауруына шалдыққандарға өмірін сақтап тұру үшін тек қан керек. Әлемнің әрбір үшінші тұрғыны бір рет донорлық қанды қажетсінеді дейді статистика. Ал «Донор» дегеніміз –өзінің қанын беру арқылы біреуге өмір сыйлайтын адам.

Жамбыл облысы әкімдігі ІСБ «Қоғамдық келісім» КММ-нің ерікті донорлары, Тараз қалалық Қан орталығының қолдауымен өткен атаулы акцияға ерекше ынта-ықыластарымен атсалысты.

Алдымен тіркеу бөлімінен өтіп, зертханалық кабинетте талдама жасалынды. денсаулығы жарамды деп танылған қыз-жігіттер қанға мұқтаж жандарға өз қандарын өткізіп, қайырымды іс жасады.

Орталық басшысы Умаров Гулам Мухтарұлы қайырымдылық іске белсене қатысқан жастардың ізгі ниеттеріне өз ризашылығын білдірді. Осынау дәстүрлі шара жалғасын тауып, қайырымдылыққа жаны құмар мейірімді жастардың қатары көбейсе деген тілегін де жасырмады. Мұндай жауапты әрі өте маңызды шараға жас буынның саналы түрде қатысуы қуанарлық жағдай екенін ерекше атап өтті.

Сонымен қатар, Жамбыл облыстық «Жаңғыру жолы» республикалық жастар қозғалысының өңірлік штабы жастарының жетекшісі Хамида Турдыева: – «Қайырымдылық акциясына барлығы 25 жас қатысып, белсенділік танытты. «Өмір сыйла» қайырымдылық акциясы алдағы уақытта да өз жалғасын табады және оған қатысушылар саны артып келеді» -деді.

Шара соңында акцияға қатысушылар мекеме қызметкерлерімен естелік суретке түсті.

Жамбыл облысы әкімдігі

ішкі саясат басқармасының

«Қоғамдық келісім» КММ

Баспасөз орталығы