Archive for month: May, 2025

Ағымдағы жылдың 23 мамыры күні №13 бөбекжай-бақшасында «Жасыл ел, жасыл балабақша» 100 кіші жоба аясында «Табиғаттың жас қорғаушылары», «Экологиялық тәрбие балабақшада» тақырыбында қалалық семинар өтті.

Мектеп жасына дейінгі балаларды тәрбиелеу, оқыту үшін бойларында экологиялық сана элементтерін, қоршаған әлемді, табиғатты түсіну, еңбекке баулу, олардың жас ерекшеліктеріне сәйкес экологиялық мәдениетін қалыптастыруды көздеген жиынға «Қоғамдық келісім» КММ басшысы Мубарак Жинақбаева және қаламыздағы балабақша қызметкерлері қатысты.

Семинар Мубарак Қасымқызы және қалалық білім бөлімінің әдіскері Гульфайраз Естаеваның облыстық ҚХА мен Тараз қалалық білім бөлімінің ортақ жобалары және балалар күні мерекесі қарсаңындағы құттықтау сөзмен ашылды.

Жиын барысында Абай атындағы Жамбыл гуманитарлық жоғары колледжі, мектепке дейінгі тәрбие және оқыту мамандығының оқытушысы Забира Серикова тәрбиешілер мамандығының құндылығы, бала тәрбиесіне қатысты қазір таңдағы озық тәжірибелерге қатысты өз пікірімен бөлісті.

Семинарға қатысушылар бұдан әрі жоғарыда аталған білім ордасының студенттері дайындаған бейнероликтер мен балалардың зерттеушілік қабілеттерін экологиялық тәрбие арқылы дамыту және мәдениетін қалыстастыруға қатысты баяндамаларын тыңдады.

Балабақшаның жас өрендері түрлі өнерлерін ортаға салып, жиынға қатысушылармен бірге еңбек жұмыстарында жасады. Сондай-ақ, балабақша қонақтары «Эко бақ» пен «Робот» кабинеттерінің тұсауын кесіп, балалар игілігіне пайдалау ұсынылды. Аталған кабинеттерде заманауи жылыжай мен өсімдіктерді баптаудың түрлі әдістері көрсетіліп, көрнекілітермен жабдықталған. Ал, «Робот» кабинеті болашақта өнеркәсіппен айналысам деген жеткіншектерді талаптандыра түсетін таптырмас орын.

Семинар соңында Тараз қалалық білім бөлімінің әдіскері Гульфайруз Естаева аталмыш балабақша меңгерушісі мен әдіскеріне «Жасыл ел, жасыл балабақша» 100 кіші жоба аясында семинар-тренинг өткізіп, тәжірибесімен бөліскені үшін сертификаттар табыстады.

1 маусым – Халықаралық балаларды қорғау күні мерекесі қарсаңында облыстық «Қоғамдық келісім» мекемесінің қолдауымен Жамбыл облыстық М.Қашқари атындағы ұйғыр этномәдени бірлестігі «Балалар – біздің болашағымыз» атты «BALA FEST» фестивалін өткізді.

Достық үйінде өткен мерекелік шараға «Қоғамдық келісім» мекемесінің басшысы Мубарак Жинақбаева, өңірлік М.Қашқари атындағы Ұйғыр этномәдени бірлестігінің төрайымы Мухабат Турдыева, бірлестіктің ардагерлері мен өкілдері, Республикалық дүнгендер қауымдастығының мүшесі Динара Нұралиева, №19 орта мектеп оқушылары және қаламыздағы түрлі этнос өкілдерінің балалары қатысты.

Қызылды-жасыл шарлармен көңілді нотада балаларды аймақтық Ассамблея жастары қарсы алып, Достық үйін бір мезетте әсем көрініске бөледі.

Ел ертеңі болған балаларға Мубарак Қасымқызы мен Мухабат Абдырахманқызы мерекелік жылы лебізін білдірді.

Айта кетейік, аталмыш фестивальдің жоғары деңгейде өтуіне өңірлік «Ассамблея жастары» ҚБ мүшелері белсене атсалысты.

Бүлдіршіндердің жүздеріне күлкі, көңілдеріне шаттық сыйлаған іс-шара ерекше қарқынмен бастау алды.

Балаларға «Қоғамдық келісім» КММ ғылыми-сараптамалық қолдау бөлімінің жетекші-сарапшысы Замана Исмаилова Достық үйін аралатып, жамбылдық этностардың тарихымен таныстырды. Бұдан соң «Балалар – біздің болашағымыз» атты №19 мектептің талантты оқушылары мерекелік концерттік бағдарламасын ұсынды.

Бұл шара балалар үшін тосын сыйлар мен ғажайыптарға толы болғаны анық. Думанды кеште кішкентай көрермендерге түрлі ертегі кейіпкерлері арнайы шоу жасап, балалар қатысуымен байқаулар ұйымдастырды.

Ағымдағы жылдың 19-21 мамыр күндері аралығында Жамбыл облысы әкімдігінің ақпарат және қоғамдық даму басқармасының «Жастар ресурстық орталығы» КММ-нің ұйымдастыруымен «Әулиеата жауһарлары» атты тарихи-танымдық экспедициясы өтті.

Экспедицияға волонтер жастар, Жастар ресурстық орталықтарының мамандары, өңірлік «Ассамблея жастары» ҚБ , тарих пәнінің мұғалімдері, әртүрлі салада жұмыс істейтін жастар қатысты.

Экспедицияның бірінші күні «Даңқ» залының алдында тарихи-танымдық экспедицияның ашылу салтанаты өтті. Ашылу салтанатына облыс әкімінің орынбасары Сәлемов Серік Жақсылықұлы, облыстық ардагерлер кеңесінің төрағасы Солтыбаев Еркінбек Бейсенбекұлы, Тарихи-мәдени ескерткіштерді қорғау және қалпына келтіру дирекциясының директоры Қалиев Сауран Қалиұлы қатысты. Алғаш болып сөз алған облыс әкімінің орынбасары Серік Жақсылықұлы өңірде өтетін тарихи-танымдық экспедицияның маңыздылығына тоқталып, қатысушыларға сәттілік тіледі. Ал, облыстық ардагерлер кеңесінің төрағасы Еркінбек Бейсенбекұлы экспедиция қатысушыларына ақ батасын берді.

Экспедицияның ресми бөлімінен кейін қатысушылар Ұлы Жеңістің 80 жылдығына орай жаңадан ашылған Бауыржан Момышұлының музейіне жол тартты. Музейдің экспонаттарымен және даңқты қолбасшының өмір жолымен танысты. Содан соң, экспедиция маршруты «Ақбұлым» ауылында орналасқан «Қарасай» петроглифтеріне бағыт алды. Сонымен қатар, Т.Рысқұлов ауданындағы «Ақыртас» сәулет-археологиялық кешені, «Құлан» қалашығы, аудандық музейдің жұмыстарымен кеңінен танысты. Экспедицияның алғашқы күнінің екінші бөлігінде экспедиция қатысушылары Меркі ауданындағы Абай Құнанбайұлының 180 жылдығына орай өткен ашық аспан астындағы керемет акустикалық кешпен жалғасын тапты.

Экспедицияның екінші күні қатысушылар көне тарихи мұраларға толы Меркі аудандық тарихи музейіне сапар шекті. Содан соң, ежелгі Меркі қалашығы мен тылсым сырымен белгілі «Меркі сегіз» петроглифтерімен танысты. Сондай-ақ, экспедиция барысында «Меркі» үңгіріне сапар шеккен жастар керемет әсерлерімен бөлісті.

Айта кетейік, аталмыш шарада өңірлік «Ассамблея жастары» ҚБ-нің белсенді мүшесі, Ш.Мұртаза атындағы Халықаралық Тараз университеті «Алтын шаңырақ» студенттер ассамблеясының төрағасы Аяна Ким және аталмыш бірлестіктің өкілі Иминжан Сметов «Үздік пост» номинациясы бойынша дипломмен марапатталды.

Жамбыл облысы ҚХА этномедиация орталығы жұмысының бағыттарының бірі өскелең ұрпақпен Қоғамдық келісім мен бірлік саласындағы мемлекеттік саясатты түсіндіру, қоғамда бейбітшілік пен келісім идеясымен құндылықтарды дәріптеу мәселелері бойынша іс-шараларды ұйымдастыру және өткізу болып табылады. Мұндай жұмысты жас ұрпақ арасындағы этномедиация Кеңесі әңгімелесу, кездесулер, толеранттылық туралы сынып сағаттары, диалог алаңдары және т. б. форматында жүргізеді.

Кеңес тәрбие процесінде өткізетін іс-шараларда жастардың мәдени, адамгершілік құндылықтарына, қоғамдық борышқа саналы көзқарасына, басқа халықтардың мәдени жетістіктеріне төзімділігіне көп көңіл бөлінеді. Патриотизм сезімі де осы қағидаттармен тығыз байланысты-елдің прогрессивті дамуы үшін жауапкершілік, азаматтардың теңдігі, елдің игілігі мен өркендеуі үшін қызмет ету.

Мәселен, 2025 жылғы 15 мамырда Д.Қонаев атындағы № 19 мектеп-гимназиясында “Жас патриоттар Академиясының” салтанатты ашылуы өтті, оның мақсаты өскелең ұрпақтың бойында патриотизм сезімін қалыптастыру, ұлттық рух пен жауапкершілікті арттыру.

Салтанатты ашылу  құрметті қонақтары арасында Жамбыл облысының қорғаныс істері жөніндегі департаментінің, Құқық қорғау органдарының, білім беру органдарының, “Интернационалист-жауынгерлер одағы” ҚБ, әскери бөлімнің өкілдері және ҚХА медиаторлары болды.

“Жас патриоттар академиясы” -бұл әскери дағдылар мен тәртіпке баулитын алаң ғана емес, сонымен қатар жас ұрпақтың әскери-патриоттық тәрбиесін дамытуға үлкен үлес қосатын Отанға берілген ұрпақты тәрбиелеудің нақты тетігі!

Ағымдағы жылдың 15-16 мамырында Қордай ауданында облыстық ақпарат және қоғамдық даму басқармасы «Қоғамдық келісім» КММ ұйымдастыруымен «Мемлекеттік саясаттың қоғамдық келісім мен жалпыұлттық бірлік саласындағы қазіргі жай-күйі: өңірлік даму ерекшеліктері» тақырыбында аймақтық коучинг өтті.

Аталмыш жиынға мемлекеттік қызметкерлер, жергілікті тұрғындар, жастар және этномәдени бірлестік мүшелері қатысты.

Жамбыл облысы әкімдігінің ақпарат және қоғамдық даму басқармасының «Қоғамдық келісім» КММ ғылыми-сараптамалық қолдау бөлімінің сарапшысы Рианна Жалпанова модераторлық еткен семинар тренингте М.Х.Дулати атындағы Тараз университетінің «Әлеуметтік психология» кафедрасының аға оқытушылары, психология ғылымдарының магистрлері Айгүл Абдрахманова мен Айнұр Берденова «Лудомания – XXI ғасыр дерті» және «Қарым-қатынасты дұрыс қалыптастырудың психологиялық негізі» тақырыптарында арнайы дәрістер оқып, тренингтер жүргізді.

Заманның талабына сай қоғамның түрлі дертіне айналған амалдардан алшақтатуға бағытталған семинарда екі күн бойы қатысушылардың сан – сауалдарына мамандар тарапынан мардымды жауап берілді. Жас жеткіншектерді жаман әдеттен арылту мақсатында түрлі тақырыптар қозғалып, олардан арылу және алдын алу шаралары турасында өзара пікірлер мен ұсыныстар айтылды.

Аталмыш семинарлар алдағы уақытта этностар көп шоғырланған аудандарда өз жалғасатын табады.